• سبحان الله
سبحان الله فى خلقه شؤن انا حديثة الانضمام الى البلوجر و منذ انضمامى و انا ابحر فى المدونات المختلفة لانى ببساطة عندى حب استطلاع اعرف الناس بتفكر إزاى و الى اى مستوى وصل تفكيرهم.
و هل بالفعل الناس مريحه نفسها من تشغيل مخها ولا سيباه للى يقودة الى اى اتجاه؟
و مع تصفحى السريع وجدت ناس على كل لون .. شباب جميل و بيكتب كويس و عنده ثقافة بدليل انه بليغ فى الكتابه و عنده درايه .. و مدونته فعلا محترمه حتى سخريته مافيهاش تجاوز.
وقلت لو اكثريه الشباب بهاذا الوعى و التفكير و الاحترام و ضبط النفس... يبقى الدنيا ان شاء الله بخير و كل ما يحدث ما هو الا اختبار من الله سبحانه و تعالى لانفسنا .. هل نحن من اللذين يتحكمون فى انفسهم و لا من اللذين سهل التحكم فيهم؟
و على الجانب الاخر وجدت شباب الله يكون فى عونه و افكاره و غضبه مش حتوصل الا للدمار لهم اولا ثم للى حواليهم.. و قلت يارب استرها لو الشباب اكثرريته كدة يبقى خلاص احنا قربنا من يوم القيامه لما يكون شباب بكر اعمار تتراوح ما بين ال17 و ال25 .. المفروض ان يكون شباب خلاق و تسيطر عليه افكار سوداويه مش عارفة دخلاله منين .. يبقى اكيد ربنا يستر و ادعو له بتنوير البصيرة علشان يعرف يميز.
وعلى الجانب الاخر و جدت شباب رايييييييييق جدا و فاضى و ده نحط عليه علامة ؟ كبيرة ....
و على جانب آخر و جدت ناس كبار فى سن والدى .. مش عارفه دخلوا البلوجر ليه ... و ما هو الغرض من الانضمام؟؟؟؟؟
انا كل تفكيرى ان البلوجر لكى ينفس الشباب عن نفسه و مع بعضه عل سبيل انهم لايوجد احد يسمعهم على الاقل يسمعوا بعضهم و يجدوا من يشاركهم و يختلف معهم و من هنا تاتى الاستفادة من تجميع اراء مختلفه و اساليب تفكير مختلفه.....يمكن الاستفادة منها.......... و لهاذا السبب انضممت للبلوجر
************************************************************....

13 زارونى......و اتفرسوا:

ayar said...

الدنيا فعلا لسة بخير واهلا بيكى فى عالم التدوين .. العالم دا رائع بجد انتى باين عليكى اسلوبك زى العسل ودا لاحظته فى مدونة حماتى ملاك .. ربنا معاكى وتبقى اشهر مدونة ... وياريت تنورى مدونتى .. وتكتبى دايما ...

الهدهد الطائر said...

مرحبا بك في العالم الرابع
على الفكرة..المدونة دي هي غرفة الإنعاش لكتير من الناس-أنا طبعا منهم-ـ
احساس جميل لما اقرا للاخرين و افكر في تعليق و انشره
و احساس اجمل لما اخرج ما بداخلى بأي صورة ويكون متاح للجميع لأبداء الرأي
عمومًا.. في انتظار إنتاجك.. بدون تأخير

ملحوظة:ياريت اختيار خاصية "عدم تأكيد الكلمة" من الإعدادات الخاصة للمدونة

mabioon said...

انتى شايفه ان الشباب عندهم افكار سوداويه ومش عارفه جايالهم منين؟؟
انتى فاكره ان الشباب ليهم ذنب فى اللى هما فيه ده؟؟
لما يبقى الواحد شايف ان المستقبل قدامه مضلم اكتر من ليلة مافهاش قمر والكهربا قاطعه كمان مستنيه منه يعمل ايه؟؟
لما يبقى شباب زي الورد وفى كلية طب القاهره ويطلع عينه 6 سنين وبعد كده سنتين تكليف وبعد كده تلات سنين جيش قوليلى بقى هو بقى عنده كام سنه؟؟ وهيكون نفسه امتى؟؟ وهيتجوز امتى؟؟ او هيعمل اى حاجه فى حياته امتى؟؟
اعذريني لو كانت لهجتى قاسيه شويه او طولت عليكي بس انا مفروس اكتر مانتى مفروسه والله
مش منك طبعا انا مفروس من اللى البلد وصلتله
تحياتى

Dr Gad said...

مرحبا بك في عالم المدونين وان شاء الله تلاقي الفايده من العالم ده وميكونش بضرر

المـــفـــــــقــــــــوعـــــة مــرارتـهــا said...

انا لفيت كتير ذيك
واكتشفت حاجات ماتخيلتش أنها موجودة أصلاً
علي فكرة انا قلت لزوجي علي المدونة وقريتهاله بنفسي وطلب حق الرد كمان

ياتري لوزوجي تمعن في المدونة وقراها حتة حتة هايعمل فيا أيه ؟
كلها فضفضة

Mafrousa said...

ayar
أنا سعيدة جدا بزيارتك و أكيد حزورك فى مدونتك ...و اتمنى ان يكون عالم التدوين رائع كما قلتى

Mafrousa said...

الهدهد الطائر
انا معاك فى هذا الرأى
اما بالنسبة للملحوظة اصبرو على شوية انا بقالى يومين محتاسة جوة الستينج .. فى حالة ولادة متعسرة و عمالة الخبط .ز اوعدك لما الاقى اللى انت بتقول عليه ده حلغيه..ز و شكرا على زيارتك

Mafrousa said...

mabioon
شكرا على زيارتك و شاعرة بالمرارة فى لهجتك ... اتمنى لك التوفيق من كل قلبى

Mafrousa said...

dead man
اتمنى..و شكرا على زيارتك ...

Mafrousa said...

المفقوعة مرارتها
انتى لطيفة جدا وا سلوبك الساخر لطيف و مهذب ... و ربنا يهديلك حماتك وجوزك كمان
شكرا على زيارتك

snohe said...

جمييييله واكتبى يوميا عشان خاطرى

Mafrousa said...

سنوهى
اهلا بيكى ... ان شاء الله

Dr. Ibrahim said...

طيب وانتى داخلى البلوجر ليه؟!
هههههههههههههههههههههههههه

ومش شرط الشباب اللى يدخلوا كل الأاعمار ممكن تتدخل فأرجعى وأقرأى معنى كلمة تدوين لتعرفى ثانيا يمكن العجوز يدخل ويحط خبرته للى أصغر منه وربنا يجعل مدونتك مفيدة ومفيهاش سخرية

د إبراهيم