افضح ما استرش

مش عاوزة اقولكم ان دية ثالث مرة اكتب فيها البوست ده
اولا اشكر كل من شرفنى بالزيارة و ترك لى رسالة
ثانيا كل سنة و انتم بخير
ثالثا كل سنة و كل ام بخير و بسلام
الموضوع بقى انى دايما باسمع ........اسكتى .... يا ساتر ده انتى تفضحى ما تستريش.........
بقى بزمتكوا هو الواحد لما يقول رأيه... فى حاجة معجبتوش يبقى بيفضح .. و ما بيسترش...
ححكلكم و انتو احكموا المره ديه
بقى انا قبل ما ارد على الرسائل .. فى مدونتى .. قلت آخد لفة و اشوف الردود على الرسائل اللتى تركتها فى مدونات اخرى.. و بينى و بينكم كان نفسى اعرف رد مدونة بعينها...
المهم جيت ادخل ما عرفتش يظهر ان صاحبتها قفلتها فى و شى .. ان جيتو للحق اتفرست ..
مش هيه المدونات معموله علشان نتشارك فى الافكار و الاراء ... مش كده ولا انا فاهمة غلط؟
أقولكم بقى الموضوع من اوله ما هو أنا لسة جديدة... لما كنت باتفسح من كام يوم فى المدونات... لقيت خير اللهم اجعله خير مدونة
استفزتنى.. و فزعتنى.... كلها حاجات بتنور بلاحمر و الاسود و الوان فاقعه .. و فجأة.. اناشيد و ناس بتتكلم فى المدونة .. اه والله انا مش ببالغ .. مش عارفة اتعملت ازاى......... و فضولى ... جزبنى لاعرف المزيد و القرائه........
نسيت ان اقول لكم صاحبة المدونة عندها 20 سنة .. الله يرحم الايام .. لما الواحد كان عنده 20سنة ..
المهم المهم مش ده موضوعنا ........الموضوع و العنوان اللى استفزونى لارد ... هو المقاطعة .............
و انا بصراحه لي رأى ما بيعجبش...وفى الموضوع .. كاتبه كام اسم بلد و مصانع .. و منتجات ...
ردى كان كلاتى بدون زيادة ولا نقصان :
انا معاكى مليون فى المية.. بس زى ما الموضوع ..له شق ايجابى ... له شق اكثر سلبية و مش حيقع غير على .. دماغنا احنا ..... ممكن تقوليلى الكام ألف دشليون عامل اللى فى المصانع ديه حيروحوا فين؟؟؟ العملية مش ناقصة ... هو اكيد فى حل بس عاوز رويه و تفكير بذكاء و حنكة .... و اذا كان مقاطعة و خلاص .. يبقى نقاطع الكمبيوتر و البلوجر لانهم امريكانى .. و كل دقة حرف بتعود عليهم برده......
وبس
بقى بزمتكوا انا قلت حاجة غاط؟
ليه تقفل الباب فى وشى مش هو الكلام اخد و عطا.....؟
و الناس اللى بتكتب فى المدونات ... غرضها ان حد يسمعها .. ويتفق أو يختلف فى الرأى .. و يرد عليها ... مش كدةولا انا فاهمة غلط......؟
ارجع للبداية سمعت نفس الكلام ,,,,, و انتى مالك زمانهم اهدروا دمك .. انتى كدة دايما .....
تفضحى و ما تستريييييييييييييييييييييش.....................................
بس برضة مش فاهمة استر على ايييييييييييييه
حد يفهمنى
***********************************************************************

31 زارونى......و اتفرسوا:

dreamer said...

والله يا مفروسة أنا معاكي
المشكلة أن في ناس - زي عتريس كدة- متخيلة أن هي اللي مفروض تحدد الصح والغلط وباقي العالم يمشي على مزاجها .
في ناس - زي مدرسين المدرسة واساتذة الجامعة - متخيلين ان النقاش بيكون في اتجاة واحد بس . نوع من الحشر
وفي ناس بقي من بتوع ( لا تجادل او تناقش يا أخ على ) اللهم احفظنا .
هي أهدرت دمك .
خليها براحتها .
أقولك .
اهدري دمها انتي كمان :)

Anonymous said...

wahda mafroussa,

ana zayek keda lessa gedeeda fe nezam el blog da, fee nas mish 3ayza te3mel blog 3ashan 7ad yekalemha, fe nas 3ayza 7ad yeb'a ra'yo zayaha we khalas, we 3ayza ele yesharekha yekon beyfakar zayaha we khalas, we fe nas ya bentee mabet7ebesh el entekad khales belmarra, kol ma 7ad yeolohom kelma yet'emso.

el wa7ed el mafrod ye'ol ele lee wele 3aleeh. we kelmet el 7a' matza3alsh. eza kanet heya mish 3ayza tesma3 ra'yek wa law eno ana shayfa enek ma'olteesh 7aga ghalat yeb'a heya el khasrana, we bokra hatla'e ele beyrodo 3aleha mwefa'enha fe ra'yaha we hayekhlas el nekash, mahowa el nekash beyege men ekhtelaf el araa'.

ma3lesh sorry ana bakteb bel english la'eno law 7awelt 3arabe el keyboard hayedrab, asle bakhod 6000 sana 3abal ma akteb bel3arabee.

Keep blogging, I like what you have to say. Good luck.

ayar said...

بصى ياقمر اللى بيقول رايه بصراحة اليومين دول بيروح فى داهية لازم ننافق ونجامل علشان الامور تمشى .. انا عن نفسى قررت اقول الصراحة واللى يحصل يحصل .. قولى اللى يملى عليه ضميرك وميهمكيش .. بس هى اازاى قفلت الباب فى وشك .. خذفت تعليقك يعنى ؟!

هاستنى موضوعات جديدة منك ان شاء الله
..سلام ياجميلة

Mafrousa said...

و الله يا يويو جيت اخل ما لقتش اى حاجه الفورمه بس بتاعة البلوج بلصورةو ملفيش كلام يمكن تكون لغتة و لا بتغير فيه جاجه و انا افتكرتها قفلته فى وشى مش عارفة.. بس انتى ما قلتليش ايه رايك فى المقاطعة و ده الاهم

د/اجدع بنوته said...

لا انتى صح يامفروسه

انتى ليك كل الحق انك تعارضى وتقولى رايك

بس متاخديش ف بالك

هتتصدمى كتير بناس مبتقبلش الراى الاخر

وعايزه الكل يقولها امين امين

برافو وخليكى دايما متستريش ف الحق كده

ayar said...

دى شكلها حد جبار يابنتى او بتحضر عفاريت لغوا تعليقك هههههه مقاطعة ايه بالظبط ؟!

t3ban said...

محدش ليه الحق انه يقفل بقك غيرك
من حقك تقولي اي حاجة بأدب
انتقدي بادب
اشتمي بأدب
و هيا ليها حق الر عليكي برده بأدب
وفي النهاية الاختلاف في الرأي لا .........
اما عن المقاطعة
انا صراحة مش عارف ارسي علي بر
شوية اقول حرام العمال دول احنا مش ناقصين بطالة
و شوية اقول مهي لو المصانع دي قفلت ممكن يفتح مكانها حاجة برأس مال عربي ولا مصري
مش عارف بس صراحة
اقتصاديا
الناس دي ممكن تستحمل مقاطعة 100 سنة
و مش حتقفل
بس ممكن تصفي حبة عمال وي وي وي
و كمان المقاطعة بتاعتنا ما هي الا خفض للطلب علي السلعة مش انعدامه
لأن في ناس كتير مش في دمغها الكلام ده
فمتقلقيش علي العما اوي يعني

Mafrousa said...

د/اجدع بنوتة

شكرا على زيارتك...متخافيش على ما هو انا لسة ما باسترش




anwer
شكرا على زيارتك و فعلا عندك حق حاجة تلخبط...

Foxology said...

المقاطعة ماشى من حقنا لكن نقاطع بالعقل !!

بوست جميلة فى انتظار المزيد :)

Mafrousa said...

foxology
برافو هوه ده بالظبط اللى انا قصداه ... بس بالعقل و اكيد فيه طريقة نميسة حتظهر فى يوم من الايام .. و اكيد حتفرسهم............يارب
مرسى على الزيارة

الهدهد الطائر said...

على فكرة.. العديد من المدونيين لا يلغي خاصية تأكيد الكلمة..
و بالتالي لا يتم نشر التعليق ما دام لم يتم تأكيد الكلمة المشفرة

بالنسبة لمدونة mabbion
الظاهر أنه تم اختراق مدونته و افسادها

سنووايت said...

لا افضحي براحتك وما تستريش طالما ان الموضوع بتقولي رأيك , اللي لا يقبل الناس انها تناقشه او لا يقبل النقد لا يصلح انه يكون من المدونين والا تلغي الكومينتات بقي وتخلص
التدوين مش القاء حكم ومواعظ وخلاص التدوين عرض واراء ومناقشة

صيدلانيه طالعه نازله said...

انا معاكى فى موضوع المقاطعه تماما
احنا كده بنقفل بيوت ناس كتير خصوصا المنتجات اللى مصانعها فى مصر عندنا
لانها براس مال مصرى و خبرات الشركه الام فحرام نعمل فيهم كده
اما بخصوص التعليقات اكتر حاجه بتغيظنى انى اكتب تعليق و تظهر عباره سوف تنشر بعد موافقه صاحب المدونه
المفروض اننا نكتب و الناس تقول رايها بحريه تامه حتى ولو كان الرأى شتيمه و اعتراض على الموضوع
انا شخصيا الاعتراض معناه ان الشخص قرأ الموضوع و بيناقشنى مش بص على اخر كلمتين و كتب مدونه تحفه و الى الامام
هو ده اللى انا احترمه
مع اجمل المنى و ارق تحياتى

Mafrousa said...

سنووليت ده اللى انا فاهماه عن التدوين ...المشاركة .. فى ابداء الرأى .. شكرا على مرورك

Mafrousa said...

صيدلانية طالعة نازلة
أنا معاكى و شكرا على مرورك

Soooo said...

لا لا لا
انتي هايله بجد
اسلوبك ساخر وحلو وهو ده المطلوب في التدوين
-----
بصي بقى
هو صاحبة المدونه ماقبلتش تتناقش معاكي يمكن لانها مش لاقيه دفاع تدافع عن فكرتها بيه .. وده لان معظم الناس في الفتره دي بقو حافظين مش فاهمين

نصيحتي ليكي .. قلبي في المدونات وشوفي مين اللي ينفع انك تتناقشي معاه ومين ماينفعش .. وشويه بشويه هتلاقي ناس فكرهم قريب من فكرك



سلاموووووووووووز

Mafrousa said...

مرسى يا soooo
شكراعلى زيارتك .. و انتى كمات اسلوبك جميل

Ehab said...

ابنتي العزيزه

استوقفني كلامك في البوست السابق ولكنني لم اشا ان ارد عليكي الا بعد ان اقرأ هذا البوست ايض وذلك لأن لي اعتراض على امران احدهم عليكي والأخر لكي


الأول هو انكي تتسائلين عن سر دولنا نحن الكبار في السن عالم التدوين وتستغربين الأمر وتقولين ان البلوجر قد فتح اصلا للشباب لنفثوا عن غضبهم
من قال لكي ان الكبار لا يغضبون ايضا من قال انهم لا يحتاجون الا لحظة تنفيث من وقت لأخر
كل منا يبحث عن عالم خيالي يقضي فيه بعض الوقت ليلملم شتات فكره واعصابه

ليقول رأيه بال خجل او مجاملات
حتى الكبار يغضبون يا صغيرتي

===========
الشق الأخر من رسالتي حول من اقفلت المدونه في وجهك
لا اعرف كيف تقف المدونه في وجه شخص واحد ربما هي اخذت بنصيحتك واغلقتها في وجه الجميع على اعتبار المقاطعه فبدأت بنفسها واغلقت المدونه
انا اوافقك تماما ان سلاح المقاطعه ذو شقين وقد يجرحنا ايضا ولكن ربما ببعض الذكاء والتدبير السليم نفلح في المقاطعه التي تؤلمهم ولا تؤذينا
ولكن هذا يحتاج تضافر الشعب كله والحكومة قبلهم وهذا لا يحتمل حدوثه في القريب العاجل لذلك فليفعل كل منا مايشاء
من يقاطع فليقاطع ومن يختلف مع ذلك فهو حر في رايه

------------------

اشكرك على رحابة صدرك لكلماتي
واقبليني صديق لكي او ابا ان كنت تحسبيني كبريا بما يكفي

-----------------------
نقطه اخيره انا اتخيلت اني كبير في السن ورديت عليكي علشان تعرفي ان الكبار برده من حقهم يتكلموا في البلوجر
مع تحيات الشنكوتي

سلاااااااااااااااااااااااااااام

Mafrousa said...

اولا شكرا على تشريفك المدونة.....
ثانيا انت مش كبير يا شنكوتى.. الا اذا العمر اللى انت مسجله فى مدونتك مش صحيح......
ثالثا.. انا لسه على الزيرو بالنسبة للتدوين.. ..لازلت اطير.. من مدونه لاخرى..أما بالنسبه للكبار..فانا معك ...ان التدوين تنفيس....و ليس فقط عن الغضب...وممكن يكون لغرض آخر !!!!!!
المهم اهلا بك كصديق ...امابالنسبه للمقاطعه...ده موال تانى ...
اهلا بيك فى اى وقت...ويسعدنى ان تشرفنى فى مدونتى الاخرى ارض الاحلام

Anonymous said...

السلان عليكم ورحمه الله وبركاته
دى اول زياره لمدونتك وان شاء الله مش ها تكون الاخيره
المدونه جميله
اما بقى بخصوص الموضوع
فا يعنى عادى لازم تتعودى على كده
انا عندك اهوه اترد عليه باافظع الكلام لما قلت راى فى احد المدونات المشهوره جدا
تحياتى

wael said...

شوفي المقاطعه موضوع كبير صعب الجزم فيه
انا بصراحه مقاطع من حوالي 3 سنين ومبسوط بكده
بس بقاطع بمنطقي الشخصي يعني بقاطع الحاجات اللي مش اساسيه بمعنى ممكن اقاطع بيبسي عشان في شويبس بس مش منطقي اني اقاطع حاجه ملهاش بديل زي الكومبيوتر
غير قولي رأيك ولا يهمك محدش واخد منها حاجه
والاختلاف في الرأي لا يفسد للود قضيه

mostafa rayan said...

قولي رايك ولايهمك وماتحطيش في دماغك ابدا

صبرني يارب said...

بصي يا مفروستي الجميله

الاول البوست بتاعك حلو أوي

بعد كده بقى لازم فى ظل التعامل مع الناس الى هما المصريين والعرب عموما لازم تتعودي على انتشار النماذج الى زي الاخت دي
مافيش عندهم اي استعداد لسماع الراي ا لاخر واحترامه باي شكل ان كان

واستمري دايما فى تواجد رايك وابداؤه مهما كان ولكن تحري الحق وصحة المعلومات قبل تكوين رايك
اختك ام مريم

Mafrousa said...

nody
معلش اهو ده حال الدنيا

Mafrousa said...

wael
على رايك الاختلاف فى الراى لا يفسد للود قضية
شكرا على تشريفك

Mafrousa said...

mostafarayan
حقوله ما تخافش.. ما هو انا افضح ماسترش
شكرا على زيارتك

Mafrousa said...

مريم
ربنا يسهل .. و شكرا على زيارتك

في حب مصر said...

أنا بصراحة مفهمتش انتي عايزة تقولي ايه.. وما أعتقدش العيب عندي.. لأني عبقري زماني.. وشايف اني خسارة في الزمن ده وفي الدنيا كلها..هههههه

في كل الاحوال انتي باين عليكي تستري وما تفضحيش
معاكي ربنا
مصري غلبان في الإمارات

مؤنس فرحان said...

السلام عليكم

مفروسة ..انك تقولى رأيك دا الأساس اللى اتعملت عشانه المدونات .. وكان ممكن أوى ان صاحبة المدونة تقفل الردود لو موش عايزة تسمع رأى حد تانى

ممكن يكون فى مشكلة تقنية عندها او عندك والله اعلم
المهم
بالنسبة للمقاطعة .. لازم مانبقاش أغبيا .. يعنى نحكم عقلنا .. يعنى مانضرش نفسنا .. و فى نفس الوقت نوصل لهم احتجاجنا بأقسى طريقة ممكنة بدون مايحصل ضرر لينا بردو

دايما لما تيجي سيرة المقاطعة تلاقى الناس فريقين .. فريق يقولك نقاطع وطبعا دوول موش بيقاطعو كل حاجة
وفريق يقولك نقاطع ايه .. دحنا حياتنا كلها من عندهم و زى ماقلتو يبقى نقاطع الكومبيوتر اول حاجة

انا بقول طيب ليه مانبقاش وسط .. نقاطع الحاجات اللى مالهاش لازمة .. مثلا شوفو كام مريض سكر فى مصر والوطن العربى كله .. هل ينفع نقاطع الأنسولين ؟؟ والأنسولين بنستورده من الدانمارك ..؟؟
طبعا لأ
وغيره كتير حاجات مهمة لحياتنا بتجيلنا من برة
بس فى حاجات اكتر بنستعملها ومالهاش لازمة وممكن نقاطعها وبردو حتسبب لهم ضرر اقتصادى واحنا موش حنخسر حاجة
العصاير والحلويات والمصاصات واللبان والشيكولاتات
الملابس .. المفروشات .. حاجات كتير ممكن نقاطعها ودا مايأثرش علينا
........................

مفروسة اسلوبك لذيذ .. دى اول زيارة ليا لمدونتك .. و زى مابتلفى فى المدونات كلنا بنعمل كده وكتير بنقابل ناس متعصبين لفكرة معينة وماعندهمش استعداد للمناقشة .. بكل بساطة يولعوو .. هنا انا حر .. على مدونتى انا حر .. لما بدخل مدونة تانية بقول رأيى بكل حرية .. وكمان صاحب المدونة عنده كل الحرية انه يسمعنى او لأ فماتتضايقيش منها ابدا لو كانت هى قاصدة انها تمنعك

Mafrousa said...

فى حب مصر
واحنا نيجى ايه جنب عبقريتك يا عبقرينو
شكرا على زيارتك و بعدين ليه الامضاء مصرى غلبان من الامرات
ماتخليها اعبقرى المصرى من الامرات

Mafrousa said...

مؤنس فرحان
كلامك موزون و عاقل
انا سعيده بزيارتك