هو فيه إيييييييه

البوست ده كنت كتبته فى سنة 2008
و جاتلى عليه تعليقات
و خبأت ساعتها تعليقات علشان مش تولع نار
و اهى ولعت لوحدها
@@@@@@@@@@
هو فيه اييييه
---------
ايه اللى بيحصل ده.......ايه اللى بيجرى ده.......وليه؟... و علشان مين.....؟
مكانش كده.....الحال زمان...
زمان امى...و جدتى...وزمانى انا كمان... لما كنت صغيره...
.زمن دلوقتى.. بقى حاجه تانيه خالص....
زمان انا فاكره لما كنت فى المدرسه ..كانت الشطاره هى اللى بتميزنا...
عمرنا ما بصينا ..على الشكل .. و لا اللون ..ولا الديانه و ارجع اقول تانى ولا الديانه.....
انا كنت فى مدرسة راهبات....و ربونا على انه لا يوجد فرق فى الديانه...
عمرى ما حسيت انه فيه تفرقه.. بل بلعكس.. انا فاكرة انى كنت محبوبه جدا منهم.....
و فاكره كمان لما كانت اى بنت تاخد نمرة وحشه فى العربى و لا الدين ... كان بيبقى نهارها مش فايت...
مع ان المدرسه اللغه الاولى بتاعتها مش عربى ....و كنا ُجمال جدا مع بعض.. و اخوات.. الحاجه الوحيده اللى كانت تجعلنا نعيد حساباتنا من ناحيه الإبقاء على الصداقه.. هى الشخصيه نفسها...
و عمر ما كانت الديانه نقطه من النقاط....
كانت ايام جميله........حتى لما دخلت الجامعه...كنا اصحاب كتير..و الاديان مختلفه.....
.والتعامل بيننا كان زى المدرسه ...
اصلا الموضوع..لم يكن له اى محل من الاعراب فى دماغنا اصلا...ناس و بتتعامل مع بعضها...
ممكن اعرف هوه حصل ايه فى الدنيا بقى....ليه اتغيرنا؟
..اذا كانوا اجدادنا..واهالينا ... و احنا ماكانش عندنا مشكله...
ميييييييين اللى خلق المشكله اللى مالهاش معنى ديه......


ربنا سبحانه و تعالى قال...لا فرق بين عربى ولا أعجمى الا بالتقوى
التقوى يا بنى آدم التقوى يا ناس ..مش حاجه تانيه ....


ان الله لا ينظر الى صوركم و لكن ينظر الى قلوبكم............قلوبكم......لانها ملكه وحده...


الكلام واضح جداا .. سبحانه و تعالى .. و ليس به اى مجال للاجتهاد فى تفسيره...مفسر نفسه


اتصلت بى صديقتى اليوم .. و كلها فــرسه.. و غيظ.....و حكتلى قصه...قلت بعدها ربنا يستر

ملخصها........ ابنها عنده 6 سنين و بقاله فتره كل لما يشوف حد فى تلفزيون‘ فى شارع ‘فى محيط الاصدقاء‘ يسأل على ديانته..
و فى كل مره كان الرد عاوز تعرف ليه.. الانسان مش بديانته .. بمعاملته لك.. و يسكت الولد.

.و هى ياعينى بسزاجه..ونيه صافيه.. فاكره ان الموضوع خلص
..يرجع يسأل تانى ..فى يوم تانى.. .....و الاجابه.. تقريبا نفسها.. ان المهم الاخلاق.. و ياعينى عامله زى الاسطوانه المشروخه...و تكرر الكلام نفسه.. المهم اننا مانكذبش.. و مانقولش كلام وحش.. و مانزعلش حد.. و نحترم الناس كلها..و نقول من فضلك و لو سمحت.. حتى لو لزميل ليك فى الفصل.....

.متربيه شويه كتير صحبتى .. مش كده...؟
ماتعرفش يا حبة عينى .. ان الولد..فى حد بيلعب فى ودانه فى المدرسة.....(بيلعب مش بمعناه الصحيح طبعا)

قو م ...فى يوم فى جلسة الاعتراف يتاعة كل الامهات..مع ابناءهم.. و همه يا عينى جايين من المدرسه جعانين .. و ملهوفين على طبق مكرونه.. ولا حته فراخ فيليه..و شوية رز و خضار.....مش عاوزه اقولكم اللحظه ديه بالزات

و هو وشه فى الطبق.. و بياكل .. الام بتعرف اخبار المدرسه كلها.. من ساعة لما ركبته الباص.... الى ان رجعلها بالسلامه.....جربوها الطريقه ديه سرها باتع......وعلى فكره انا معنديش و لاد.....

بس مجرباها مع ابنى الكبير اللى هو جوزى..
ماعلينا.. خلينا فى الاهم.. فى الخيبه الاويه اللى جايه.......
قال ايه ..النهارده لما سمعت القرآن فى المدرسه .. سديت و دانى.....
ليه يا حبيبى عملت كده؟
صاحبى قالى كده...
بس كده ربنا يزعل مننا..لانه كلام ربنا.. انت تحب لما حد يسع الصلاه..فى الكنيسه يسد ودانه.....
لا ....طيب انت بتعمل كده ليه؟
بس (......)قالى مش حلعب معاك بعد ما كنا اصحاب علشان انت مش مسلم..

و انا زعلت..و سمعت كلام (...) و عملنا كده
و بدات صديقتى.. رحلتها اليوميه مع .. دليت للمعلومات اللغلط...و استبدالها بمعلومات تانيه.. مستعيته بالبراهين..و الادله...ان اصحاب باباه..واصحاب مامته اللى هو احنا ..مجموعه لا باس بها.......

و التعامل بيننا عادى ...كاننا اخوات وا كتر..

و اصحاب تيته... و اصحاب جدو...
و ياعينى عليكى يابنتى ديه التربيه صعبه.........فى زمن اصعب


انا بقى عاوزه اعرف.. اطفال ..لسه على الفطره..جابو الكلام ده منين.....
و اللى حط الكلام ده فى دماغهم...اهلهم بقى .. و لا الشغالين.. و لا التلفزيون .. اللى بعض الاهالى ما بتعملش رقابه على اللى العيال بتشوفه...


هو ده الجيل اللى بنامل فيه يكون احسن مننا ... منين .انشاء الله

ولا هوه ده الجيل اللى عاوزين ..نزرع فيه الحب من الصغر...ازاى؟


يا ناس يا هو ...........لو فينا ناس مش قادره تحب بعضها... تسيب عيالها يحبوا بعضهم
و لو فيه ناس مش قادرة تتعايش مع بعضها...تعطى لاولادها الفرصه...للتعايش.....

و ما تنسوش فى الاخر ان ربنا هو اللى بيحاسب..و هو اللى خلقنا شعوبا و قبائل لتتعارفوا..لتتعارفوا..
و هو القادر على ان يجعلنا....على ديانه واحده...و جنس واحد...و لكن لحكمته سبحانه و تعالى جعلنا مختلفين..علشان نتعلم من بعض..و نعلم بعض...الصفات الحميده..مش الدين..الاديان لله وحده...

و كفايه بقى لحسن انا شعرى و قع من كتر الفرسه.....

ربنا يعين كل ام بتحاول تغرز...معلومه صح فى جيل صعب

و ربنا يحافظ..على الجيل الجميل..و يحميه...من ال

virus

بتاع اليومين دول أ صل بعيد عنكم لما بيدخل الدماغ..بيعمل

delete..

.لكل المعلومات و ما بيفرقش

******************************************************

47 زارونى......و اتفرسوا:

la3lahakhier said...

السلام عليكم
بصى اذا سمحتيلى نتكلم بصراحة
فى مشكلة حاصلة فى مشاعر مش حلوة متبادلة ليه بقى لاسباب كتير منها النت اللى اظهر اسوأ مافى البشر يعنى كل واحد يطلع يعمل روم ويعد يشتم فى النبى عليه الصلاة والسلام بابشع السباب وكذلك اصحاب العوة اللى هم كمان يعدوا يفندوا فى الديانة المسيحية وكأنها حرب
لكن ده مايمنعش ان فى مازال كتير علاقاتهم كويسة مش حقول حميمية لكن كويسة
انا شخصيا اتقرصت من واحدة اظهرتلى كم عداء غير عادى ولما اختلفنا واتناقشنا زى اى حد لاقيت حوارها دخل فى الدين ونزلت شتيمة لكن ارجع واقول انها حالة فردية
النبى عليه الصلاة والسلام حدد العلاقة للتعامل مع غير المسلمين والموضوع مش محتاج اجتهاد ولا تزويق كلام حفاظا على مشاعر طرف بل النبى صلى الله عليه وسلم كان اولى مننا جميعا وعلمنا واللى يخالف تعليمه يبقى العيب فيه
وبصراحة الاولى بينا نحسن نحن المسلمين من اخلاقنا معاهم ولا تنسى ان افريقيا اتفتحت على ايد التجار المسلمين اللى اخلاقهم بهرت الامم
(يا حسرة على العباد)
اسفة جدا على الاطالة بس كان لازم اوضح وجهة نظرى

الهدهد الطائر said...

يقول الله تعالى:
"وَلَوْ شَاء اللَّهُ لَجَعَلَهُمْ أُمَّةً وَاحِدَةً وَلَكِن يُدْخِلُ مَن يَشَاء فِي رَحْمَتِهِ وَالظَّالِمُونَ مَا لَهُم مِّن وَلِيٍّ وَلا نَصِيرٍ * أَمِ اتَّخَذُوا مِن دُونِهِ أَوْلِيَاء فَاللَّهُ هُوَ الْوَلِيُّ وَهُوَ يُحْيِي الْمَوْتَى وَهُوَ عَلَى كُلِّ شَيْءٍ قَدِيرٌ * وَمَا اخْتَلَفْتُمْ فِيهِ مِن شَيْءٍ فَحُكْمُهُ إِلَى اللَّهِ ذَلِكُمُ اللَّهُ رَبِّي عَلَيْهِ تَوَكَّلْتُ وَإِلَيْهِ أُنِيبُ"
(الشورى(8-10))

و يقول تعالى:

"فَلِذَلِكَ فَادْعُ وَاسْتَقِمْ كَمَا أُمِرْتَ وَلا تَتَّبِعْ أَهْوَاءهُمْ وَقُلْ آمَنتُ بِمَا أَنزَلَ اللَّهُ مِن كِتَابٍ وَأُمِرْتُ لِأعْدِلَ بَيْنَكُمُ اللَّهُ رَبُّنَا وَرَبُّكُمْ لَنَا أَعْمَالُنَا وَلَكُمْ أَعْمَالُكُمْ لا حُجَّةَ بَيْنَنَا وَبَيْنَكُمُ اللَّهُ يَجْمَعُ بَيْنَنَا وَإِلَيْهِ الْمَصِيرُ"(15 الشورى)

الموضوع إذًا محسوم و مستقر منذ أكثر من 1400 سنة.

و لكن ما جد يا أختي الفاضلة هو الفقر الناتج عن العجز

فكثير من الناس لا يبحث في نفسه عن أسباب الفشل
بل يعلقها على كل ما هو مختلف عنه
و قد يصل الأمر أن يخترع هذا الأختلاف.

و هذا دليل واضح على صدأ العقول و الذي من أسبباه أختفاء كلمة "لماذا؟"

هذه الكلمة هي أشهر كلمة لدى الأطفال
و لكن يبدو ان الطفل قد أختصرها في "ما؟"

فالطفل بدون شك هو مرآة لما حوله
فإذا ما أكتشفنا خلل في سلوك الطفل علينا أولاً أن ننظر في أنفسنا ثم نتذكر معه كلمة " لماذا؟"

... تحياتي.....

بطوط حبوب said...

اصابع خفيه تريد ان تشعلها نار

Tamer Nabil Moussa said...

كلامك جميل وبوست رائع

فعلاا لازم نحافظ على الاطفال البريئة الصغيرة من اى معلومة غلط تتسمع

ولازم نعلمهم منذ الصغر ونربيهم على كل شىء حلو


ربنا يوفق الجميع ويبعد الشر عن بلادنا الجميلة

تحياتى

Mafrousa said...

دلوقتى بس قرات اسمك صح .. لعلها خير.. يالهوى..ده ايه الذكاء اللى اما فبيه ده..مع انى ماكلتش لحمه بقالى كتير.....الناس اللى عاوزه تفرق ما بين الناس اللى عايشه فى سلام كتير.. و ربما يكفينا شرهم

Mafrousa said...

الهدهد الطائر
============
وقال "لتجدن اشد الناس عداوة للذين ءامنوا اليهود و اللذين اشركوا و لتجدن اقربهم مودة للذين ءامنوا الذين قالوا إنا نصارى ذلك بأن منهم قسيسين و رهبانا و انهم لا يستكبرون" المائدة الايه 82

Mafrousa said...

بطوط
========
ربنا يسترها علينا و على و لادنا

Mafrousa said...

تامر
=======
ربنا يحفظهم و يحفظ الجميع
اهلا بيك

عاشــــــ النقاب ـقــــة"نونو" said...

السلام عليكم حبيبتي
تعرفي انا اول صديقة في حياتي كانت احسان مسيحية وكنا دائما مع بعض لدرجة ان اي حد يششوفنا كان يقول انتوا اخوات توأم وزوجي اتربى في شبرا وطبعا زمايله تقريبا 90 في المية منهم مسيحين ولا لنا على اتصال وتليفونات لدرجة منهم واحد في امريكا من يومين كلمنا ساعة بحالها يعني اكتر من اخوات كمان وبندعيلهم بالهداية وبنرشد وساعات كمان نتطرق لامور دينية بمنتهى الحب
حتى ان في مرة زوجي ققال لواحد منهم ايه اللي بيتقال في غرف البال توك دة منكم ؟ عارفة رد وقاله ما تدخلش عندهم دي ناس بتبض عشان تولع البلد ودي مش وجهة ننظرنا خالص
للاسف فيه ناس عاوزينها تولع وخلاص
عارفة كنا من كام يوم في شبراا وادام كنيسة معديين بعربيتنا وشوية شباب وبنات كانوا بياخدوا الدرس التمام ضدنا لان الكنيسة دي معروفة هناك المهم ماحدش عاوز يوسع نمشي فمشينا على استحياء كدة ويا دوب المراية حكتت في ايد عيل واقف ادامنا اصلا لسة هقوله حاسب ولا معلش الواد المفعوص راح خابط العربية وبسرعة قال انت ما بتشوفش يا عم انت وطبعا انا علامة مميزة وزوجي بدقنه الوحشة دي:)
الواد ما يعملش اكتر من 7 سنين تخيلي بقى كان بيتقاله ايه جوة
ربنا يرحمنا ويسترها
اسفة على الاطالة

ba7re said...

السلام عليكم
متفق جدا على كلامك المهم ده
و اللى موافق عليه جدا
بس هل يكفى ان نكتبه ككلمات
اعتقد لأ
المدونات اصبحت اهم حاجة على النت
ليه ميكونش من خلال بوستك ده نبدا
و نعمل حملة نصلح المجتمع تتصلح كل احوالنا
و لا ٍايك ايه ؟
سلام :)

Mafrousa said...

باهر ايدك فى ايدى و فى ايد كل اللى نفسه يشارك...و نحاول تخلى الناس تحب بغضها..اكتر من كده ..زحبنا لبعض حيهون علينا حاجات كتير..

Mafrousa said...

nonoymm
-------
لم اكن اتوقع ان يكون هكذا رايك..نحياتى سيدتى على روحك الجميله.. التى اتمنى ان تتوافر فى كل اللى علامتهم مميزه...زى ما انتى قلتى..
خلينا ندعو الله للكل بالهدايه...لحسن هيه مش ناقصه

موناليزا said...

انا كمان بسأل هو فى ايه؟ لما لقيت طفل عندى مسيحى بيقوللى كل المسلمين وحشين وانا مش بحبهم ولما سألته ليه بتقول عليهم كده قاللى بابا هو اللى قاللى كده وساعتها كان هو الطفل الوحيد المسيحى فى الفصل فسألته على اعز اصحابه قاللى اسماء ناس كتير قلتله دول عملوا فيك ايه عشان ماتحبهمش قاللى لا انا بقوللك المسلمين هما اللى وحشين مش اصحابى
ده طفل عنده4 سنين وشوفى ابوه بيقولوا ايه رغم ان غالبية المدرسة مسلمين ومحدش بيسأل انت ديانتك ايه ومع ذلك يكون هذا الجزاء
وساعتها قلت اشمعنى هما بيعرفوا ولادهم ديانتهم من وهما صغيرين ولسه مفهموش حاجة واحنا مابنهتمش بده

wanna b a physician said...

المشكلة ان احنا اتعملنا delete لكل شىء مش بس المعاملات وصدقينى المعاملات زفت بين الناس سورى يعنى حتى من غير اختلاف اديان انا فاكر زمان وانا فى المدرسة كان ليا اصحاب كتير مسيحيين وبنلع سوا وعادى مش حاسين بالفرق لما كبرنا اللى حسسنا بالفرق ناس تانية بس الكويس كويس سيبك انتى
تحياتى

الفارس الملثم said...

يمكن قبل ما اعلق علي الموضوع فانا اتذكر ذات يوم جدل حدث بيني وبين ابنة جارتنا المسيحية عن الدين وكنا حينها في المرحلة الاعدادية , ووصل الحوار لوالدي الله يرحمه , فطلب منا التوقف عن هذا الحديث خشية ان يتطور الحديث الي ما هو غير مرغوب فيه , وكان والدي يحرص علي مشاعر جيراننا هؤلاء , ونفس الحال كان مع والدتي ..

لكني لاحظت في الفترة الاخيرة اناس يطلقون الاحكام والاراء الدينية حتي دون علم , فهم يرفضون الاخر سواء كان مسيحي او حتي مختلف معنا في المذهب كالشيعة غالامر ليس عداء ضد المسيحية والمسيحين , بل رفض اي راي او فكر مخالف , والاطفال بدوهم لا يفهموا معني الاختلاف , لكن هم يسمعوا احاديث تنبض بالتعصب , فيترسب هذا في وجدانهم فيمارسون فكرة رفض الاخر مع زملائهم دون وعي لما تمثله من نتائج وخيمة علي المدي البعيد ..

موضوع قيم وطرح متميز لهذه القضية الهامة احييكي عليه..

مع خالص تحياتي

Foxology said...

عادى جداااااااااااااا

اللى يعيش ياما يشوف دى عملية غسيل مخ بتحصل كل يوم فى كل مكان وشئ طبيعى جدا انه يحصل لا تتعجبى سيدتى

ربنا يرحمنا برحمته

تحياتى :)

Mafrousa said...

monaliza
--------
4 سنين ديه حاجه صعبه جداا...فين الحب اللى المفروض نعلمه لاولادنا....كل اناس بتهتم بتعليم اولادها .. بس كل اب و كل ام ..بيختلف عنده الاسلوب..و الطريقه...انا بعرف ناس مسلمين من كتر تشددهم .... و ده مخالف.. ولادهم عندهم 4 و 6 سنين و ما بيتفرجوش على تلفزيون ولا يسمعوا اغانى و بيقولى امى و ابى مش ماما و بابا..و بيودوهم دروس دين ....الاعتدال كويس ... واكيد الاب و الام دول ماكانش اهلهم بهذا التشدد من صغرهم... ...ربنا ينور بصيرة الناس كلها... و يديهم حسن التفكير و حسن التصرف...

Mafrousa said...

wanna b a pfysician
--------------------
الصراحه انا معاك ان المعاملات بين الناس كلها بقت زى الزفتين .. و مش سورى....

Mafrousa said...

الفارس الملثم..
------------
احييك بشدة ..لانك قلت الكلمه الصح
رفض اى رأى او فكر مخالف... و هى ديه النقطه المهمه ..

Mafrousa said...

foxology
--------
ربما يرحمنا جميعا اينعم .. بس انا مختلفه معاك فى انه بقى عادى...ده لو وصل الناس ان تلك الامور عادى يبقى مش حنتغير

semsem said...

فى ناس غرضها اساسا تولعها وخلاص
انما كلنا من زمان اصحاب واخوات مسلمين ومسيحين عمرنا ما فرقنا ما بين بعض ابدااااااااااا
ربنا يهدي يارب بجد...
ويرزقك بذريه صالحه
اختك ف الله!!

Mafrousa said...

semsem
======
merci
على زيارتك...امين....الهدايه من عند الله

nody said...

ده نتيجه للتشدد والتعصب عند الطرفين
ومش طرف واحد السبب
لا الطرفين
وللاسف محدش عارف منهم انهم مش بيظلموا غير الاجيال الى جايه
الى ها تتربى على الكراهيه وبغض الاخر
تحياتى

بنوته مصرية said...

انا بعتقد اني فعلا فيه جهه من مصلحتها تعمل فتنه طائفيه واعتقد ده من اسرائيل

ربنا يسترها بجد

انا بقي هحكي علي اعز اصحابي المسحين كنت بروح معاهم الكنيسة وهما بيجو معايا الحسين وحضرو كتب كتابي في المسجد

كفاية في رمضان مكنوش بياكلو في المدرسة واتعزمت عندهم في رمضان واكلو معايا لما المغرب اذنت وكان في الوقت ده صايمين هما كمان وعملو ليا اكل كتير وهما مش هياكلو منه وطبيعي مش هقدر اخلصة يعني كلفو نفسهم جداا
عمري ما حاولت او فكرت اسالهم عن شئ في دينهم لاني حبيتهم هما واللي اعرفة اننا بشر وعايشين في بلد وحده

لو حصل حرب بيحارب المسلم والمسيحي ضد العدو وبيخافو علي بعض

نفسي فعلا الناس تحب بعض وتفهم اني اللي عاوز يفرقنا ده من مصلحته يوقع بينا ويولع الدنيا

معلشي انا طولت عليكي بس انا حزينه للوضع اللي وصلنا ليه

وياريت بجد نحط ايدينا في ايد بعض ونقف ضد اللي عاوز يفرقنا اللي عاوز يخلينا نكره بعض واحنا بنحب بعض ولو عاوزة تعرفي بنحب بعض ولا لاء شوفي لو حد زعلك او اهانك شوفي جيرانك هيعملو فيه ايه وهيقفو جمبك ازاي
وانا لو ماشية في الشارع وجمبي شاب مسيحي واحد ضايقني اكيد هيتخانق معاهم
صح ولا لاء

ربنا يهدينا جميعا

تحياتي
رودي

Mafrousa said...

mody
------
اهلا بيك

Mafrousa said...

رودى
-------
عندك حق...و المهم انه فيه كتير من الطرفين .. بيستنكروا اللى بيحصل... بس للاسف مش مسموعين.. و لا باينين....الاقليه المتعصبه من الطرفين...هيه اللى مسموعه... و للاسف فيه نفوس ضعيفه بتسدق و تنساق وراء الاقليه......
دايما الحاجه المختلفه تبقى باينه...

واحد من البلد دى said...

السلام عليكم.والله يا أختاه أنا حاقول لحضرتك حاجة صغيرة..أنا شخصيا عايشها و باعيشها كل يوم..أنا لاحظت إن كل الأخوة المسيحيين الحريصيين على دينهم بصورة صحيحة..هم الذين يحبوننا فعلا..وأن من يلقن أولاده قصيدة(المسلم كخ )والمسيحى(سكر)هم المرضى من المسيحيين..أنا شخصيا عاشرت أخوة مسيحيين كثيرا ولأنهم مسيحيين بمعنى الكلمة..لم أجد منهم أبدا سوى المودة والحب...ودائما ما أتعامل معهم بمبدأ..(لا تضرنى ما دمت لن تنفعنى)..وفى النهاية فإن أى إنسان من أبسط ما يدعو به لديانته _مهما كانت_هى أخلاقه..وما يفعله الأخوة المسيحيين من غرس للأفكار المسرطنة هذه داخل أبنائهم.فلن تؤدى فى النهاية إلا إلى إنعزالية طائفية _إن صح التعبير_وبعيدا عن كل هذا فتدوينتك رائعة وتمس أمورا حيوية نعيشها كل يوم.....أرجو التواصل

المـــفـــــــقــــــــوعـــــة مــرارتـهــا said...

ابني برضه ساعات يجيلي من المدرسة بأفكار غريبة من صحابه ...
بس لسة صغير مايفهمش في إختلاف الدين
بجد العيال بتلعب في دماغ بعضها
واكيد من سماعهم لكلام الأهل
تحياتي لست الكل

Mafrousa said...

واحد من البلد دى
----------------
و فيه مسلمين بيعملوا كده برضه .. و ده لان الاجتهادات فى دروس الدين الغير معتمده بقت كتير واى حد بيفسر اى حاجه و بدون رقابه.....ربك يسترها على الجميع
تحياتى

Mafrousa said...

مفقوعه حبيبتى
-------------
ربنا يعينك على تربيه ابنك فى الزمن ده و يارب تشوفيه احسن واحد فى الدنيا... و مايكنش واخد من جينات حماتك
سلام

Mafrousa said...

مجداويه
-------
انا سعيده جدا بمرورك على مدونتى المتواضعه.. وابداء راي فيما كتبت.....
ولكن سامحينى على عدم النشر...تعليقك دسم جدا و انا فهماه كويس.. و اخشى ان يساء فهمه من البعض......
.......ولكن اسمحى لى بالرد عليكى.....
اولا...الاسلام ان تسللمى بوجود الله
و الاديان الثلاثه المنزله من الله تدعو للتسليم بوجود الله
ثانيا وديه و جهه نظرى ان الموضوع لو اتعاملنا معاه ببسلطه حيكون بسيط ... المشكله اننا نساير اللى عاوزين يعطوله حجم اكبر من حجمه .. و...انا معاكى انه يوجد قوه خارجيه تساعد على اشعال الفتنه ليس فقط بين الاديان و لكن فى الدين الوا حد... و هوه ده الموضوع الاكبر فى نظرى
شكرا على مرورك.. و ماتزعليش كمان مره انى لم انشر تعليقك

rona said...

ليكى حق تتفرسى بس اكيد ناس نصلحتها كده مش فكره مؤامره ولا حاجه بس الطفل فى المدرسه بيقابل نوعيات كتير بتنقلها فكره دور البيت انه يشيل الافكار الغلط فى وقتها المناسب لانها لو كبرت معاه سعتها هتكون المشكله

Mafrousa said...

روما
-----
عندك حق لازم البيت يشيل بسرعه المعلومات المغلوطه...
بس المصيبه بقى حضرتك لما تكون المعلومات المغلوطه اصلا من البيت ... مش بزمتك تبقى حاجه تفرس

Mafrousa said...

اختى مجداويه
----------
جزاكى الله كل خير عن التوضيح الذى تفضلت و ارسلتيه الى.. و انا اوعدك ان ادخل على المواقع الجميله التى زكرتيها.. و التى اكيد سوف استفاد منها......

Bongo said...

لأ دلوقتي مش بس بيفرقوا في الديانة

دلوقتي كمان انت اهلاوي و لا زملكاوي ههههه

ربنا يكون في عوننا

الربان said...

تحياتي

للاسف...بعض المتشددين يغرسون في الاطفال
معلومات خاطئة.... و يجب ان يتصدي لهم
المجتمع كله....

التربية الصحيحة...و التثقيف الاجتماعي
و القدوة الحسنة ...كل هؤلاء مجتمعين يمكنهم ان يخرجوا لنا اجيال صالحة...بعيدة عن التطرف الذي هو بالتأكيد ليس من الدين في شيء.


تحياتي و تقديري

بحبك يامصر said...

الاخت المفروسه
ليكى حق تتفرسى بصراحه انا شايف ان بعض من المسيحين وبعض من المسلمين عندهم التعصب ده وبيحاولو يسمموا افكار اولادهم بالحاجات دى وده الجهل بعينه بس بصراحه بشوفها اكتر من المسيحيين وده راجع لاحساسهم بانهم مضهدين والكلام ده
لكن الاكيد ان دى حاجه جديده على المجتمع المصرى
تحياتى

Mafrousa said...

bongo
-----
اهلاوى ايه و لا ملكاوى ايه ديه كانت حاجه من زمان اما دلوقتى بقت التفرقه بين الماكن اللى الواحد ساكن فيها.................و يجعله عامر

Mafrousa said...

اللربان
-------
انا بقول كده و الله بس فيه ناس مش عاجبها الكلام ده .. كلامهم متناقد ..

Mafrousa said...

بحبك يا مص
----------
الاتهاض الذى يشعر به البعض من نسيج خيالهم.. و صدقوه.. و بينشروه... و بيتصرفوا على اساسه... و اصلا ما كانتش الاحوال كده .. و ده بيمهد الارض امام كل من له المصلحه فى خلق تلك الاجواء....و ربك يستر

صبرني يارب said...

والله العظيم يا مفروسه انا باشوف بلاوي من كلام العيال

طبعا كلامك صح وانا على فكره جدتى الله يرحمها كانت فى مدرسة راهبات وكانت تحكيلى عنهم زي الى انتى بتقوليه ده ورغم انها كانت ممنوع تتكلم عربي فى الفسحه الا انها كانت بتقول برضه انهم بيهتموا بحصة العربي .
وكمان كانت بتحب تتفرج على القداس بتاعهم فى التليفزيون لانهم كانوا بيحضروه فى المدرسه وبتستعيد ذكرياتها.
الا انها كمان كانت متدينه جدا وعارفه دينها كويس اوي وبتقرا القرآن وتفسره بالسليقه مش بالتاليف الله يرحمها والله كانت ست ذكيه ومحترمه وعلمتنى كتير .

اما بقى عن العيال حدثي ولا حرج وحكاية طبق المكرونه ده مهم اوي على فكره بس انا بقى ولادي بيعترفوا وانا باجهز الطبق مش وهما بياكلوا لاهم وهما بياكلوا بيبقوا مشغولين اوي ولانى باحاول اعلمهم ما يتكلموش كتير على الاكل عشان لو اتكلموا عندي وهما 3 تبقى مووووووولد ولازم اسمعهم ال 3 فى وقت واحد حتى الصغير ابو نص لسان لسه .

ومن ضمن الحاجات الى تعصب ان بنتى جت سألتنى مره ماما هو الاغاني حرام ؟؟؟
قلتلها مين قالك كده يا مريم قالتلى صاحبتى لقتنى باغني شخبط شخابيط قالتلى ان باباها قالها ا ن الاغاني حرام

قوليل بالله عليكى يدخلوا العيال فى قضايا خلافيه لييييييييييييه
وخدى من ده كتييييييييييير

Mafrousa said...

صبرنى يارب ..
---------
شكرا على مرورك......انا سعيده انه فيه ناس زي و زيك ... انا فيه تعليقات لم استطع على نشرها.. لانها اراء متشدده.. ولا تنم على التفكير السليم.... و سلميلى على ولادك.. و بوسيلى مريم

Desert cat said...

يارتى مين اللى بيلعب فى دماغ الاطفال دى
اصل الواحد بيتعامل مع مسيحين قمة فى الاحترام والذوق
مين اللى بيحاول يزرع الفتنة بينا
وازاى وصلوا لاطفال فى العمر ده

اوعى تفكر said...

تعرفى ان اكتر اصحابى كانوا نصارى
وكان منهم واحد قريب منى اوى
كنا بنعمل كل حاجه مع بعض
لكن فجأ لما كبرنا جه قعد يكلمنى ويقولى انتوا دينكم وحش وبدأ يجبلى فى ايات ويحاول يزعزع عقيدتى
لما سألته انت بتجيب الكلام ده منين
قلى من الكنيسه
وبدأ كل المسيحيين اللى فى الفصل يجمعوا بعضهم ويقعدوا مع بعض

Mafrousa said...

desert cat
----------
ياااااااااه ده انتى لو سمعتى القصص اللى بسمعهها..... حتستغربى ...و على فكره من الجانبين......فى لعب فى النافوخ

Mafrousa said...

اوعى تفكر
---------
طيب و احنا عملنا ايه ....بعدنا احنا كمان .. المفروض اننا نفضل نتعامل عادى ...و كويس....الى ان يثبت لهم عكس ما بيسمعوا .. او يتاكد لهم ما سمعوا

الـسـيـدة نـون said...

انا ماقريتش التعليقات
ولكن كنت بقرا اسماء المعلقين
علشان اشوف مين معلق علشان عايزة اعرف هو انا كنت علقت على البوست ده ولا ماعلقتش
لفت نظري ان الفارس الملثم كان معلق

ماقريتش تعليقه
ولكن مجرد اني شوفت اسمه
جسمي قشعر

الفارس الملثم مات

كان معانا وسطينا من سنتين

ياااااااااااه
الموت ده قريب اوي


الله يرحمه
ويرحم امواتنا جميعا


سلام
خيخة