نتعظ ولااااااااااا

نتعلم و لا ما نتعلمشي؟؟؟؟

نتعظ ولا ما نتعظشي نكسف على دمنا ولا ما نكسفشى؟

امبارح كنت بتفرج على برنامج العاشرة مساءا

و كان الضيف مع منى الشاذلى سفير اليابان فى مصر

و كانت مستضيفاه علشان يتكلم عن تجربة اليابان الناجحة فى تنقية مياة الشرب

و العمل على خلق بيئة نقية

و بالفعل اثبتت المعاينة و الدراسة و التحليل ان اليابان من انضف المدن بالنسبة للهواء و المياة

ابدألكم من الاول علشان اللى مش شاف الحلقة

السفير كان بيحكي عن ان اليابان بعد القنبلة النووية

و الدمار اللى حل عليها كان لازم تنمو من جديد و من هنا بدأت فى انشاء المصانع الكثيرة

و بعد فترة بدأوا يلاحظوا(ديه الحكومة بتاعتهم بيعيد عنكم) ان امراض كثيرة و غريبة بدأت فى الظهور

و بدأت تقضى على الناس و بعض القري

و من ضمن الأمراض ،الأمراض السراطانية للكبار و الصغار، الصرع،هشاشة العظام ، الفشل الكلوى

و غيره من الامراض اللى موجوده كلها عندنا فى مصر الحمد لله

و من ثم بدأت الحكومة اليابانية طبعا فى البحث و التنقيب عن العوامل المسببة لتلك الأمراض

و توصلت إن المصانع بتلقى بالمخلفات بتاعتها من مواد كيماوية و غيره فى النهر(النيل عندنا)

و فيه بيعيش السمك، و طبعا همه بياكلوا سمك كتير،و مياة النهر بعد التنقية و اللذي منه علشان تستخدم للشرب،لازالت تحتوي على بعض من تلك المخلفات(احنا بقا اصلا اصلا عاملين المزارع السمكية فى مياة المجاري)

(حكومة ذكية بصحيح، و خايفة على شعبها و ناسها و بتحسبها احسن من اي رجل اعمال)

قوم الحكومة الذكية اصدرت قوانين صااااارمة لمحاربة التلوث بكل انواعه

و حسبتها صح، لقت ان المال الذى يتم صرفه لمعالجة البشر اكثر بكثير من المال الذي سوف ينُفق لتنقية البيئة

و من هنا بدأت الحملات لحث الشعب على التعاون.

و هنا نطت منى الشاذلى بسؤال نميس: و هل اصحاب تلك المصانع لم يعترضوا على القوانين الصارمة ديه

و مصوتوش و قالولكم اقتصاد البلد، البلد محتاجة لكل مليم

-رد عليها السفير و قالها اننا اجتمعنا بيهم و عرضنا عليهم الموقف و التكاليف

والجميل بقا انه قالها ان تجاوب الشعب و تعاونة هوه اللى مكن الحكومة من تطبيق القانون الصارم

سامعين الشعب و تعاونة و الخوف على مصلحتة و مصلحة غيرة(اااه ياااني يا مفروسة)

و اصبحت اليابان من انقى الأجواء و احتفظت بتقدمها الإقتصادي

من الحاجات كمان اللى فرستنى و يارب تفرسكوا معايا

قالها ان زراعة الأرز سبحان الله بتنقى المياه رباني........شوفتوا اتفرس ولا مش اتفرس؟؟؟؟

و احنا حنقلل زراعة الأرز لأنه بياخد مياه كثيرة

ده حتى مية السيفون بتاعة التواليت فكروا ينقوها علشان يوفروا المية و ترجع تنفع لمياة السيفون تاني

مش للشرب يا بشر لاحسن حد ينط و يقولى حيشربوا مية السيفون؟؟؟؟

و كل ده و اللى يفرس بجد انه بيقولها اننا اعتمدنا على المواد الطبيعية فى التنقية وليست الكيماوية

ااااه يا فرستك يا مفروسة اااه

و المصيبة الكبرى بقا ان حكومة اليابان بتدى مصر المبجلة منحة 100 مليون دولااااااااااااااااار كل سنة

و ده ليه علشان حاجات كتيرة و من ضمنها انهم يعملوا على تنقية المياة(وطبعا المبلغ ده بيتعمل بيه حاجة تانية، )

انا خلااااااص حيجيلى سكتة فرسية.....انا ما نمتش و مخي شغال من امبارح على فكرة

الجميل بقا فى الموضوع انه بيقول لمصر انتى بلد جميلة و نيلك عظيم و شعبك اعظم(يا خرااابي)

فياريت تتعظوا من اخطاء غيركم...و بلاش تقعوا فى نفس الخطأ اللى وقعنا فيه

و جت منى الشاذلى ردت بصراحة على الجزئية ديه بمنتهى الذكاء(انا عجبتنى بصراحة)

قالتلة ما انتم اللى خلقتوا الثورة الصناعية و انتم اللى خليتوا الناس تقلدكوا

قالها فعلا عندك حق بس احنا من اكتر من 30 سنة و ركزوا معايا من اكتر من 30 سنة و احنا بنعالج الأخطاء اللى ترتبت من وجود المصانع و بنحاول اننا نجنب العالم فى الوقوع فى نفس المشكلة

احنا عرفنا السبب و الحل و بنقول للعالم عليه علشان مش يعانوا مثلنا

(طبعا حلاقى ناس تقول يعنى اليابان قديسة اوي يعنى و خايفة على بقية العالم؟؟؟؟؟

طبعا اكيد زي ما هيه عاوزة تفيد الدول فى انها مش تعاني من الامراض المختلفة و انها تاخد بالها من حاجات معينة هيه اللى بتسبب الامراض.

برضه حتستفاد فى انها تروج لاسلوبها فى العلاج،وحتروج لأجهزة التنقية، و غيره طبعا

ماهيه مش غبية علشان تعمل لله و بس لكن لازم تستفيد برضه. وده برضه ما منعش ان السفير يروج للسياراات الياباني اللى جهزوها دلوقتي بجهاز يخلى العادم بتاعها صديق للبيئة.

و اهم بيقولوا انهم عملوا تعاون مصري يابانى لتنقية مياة الشرب و الصرف

انا مفروسة اوي بصراحة من الحلقة بتاعة امبارح

زعلت على الشعب المصري اللى مش يهمة غير اذية اخوه،وزعلت على حكومته اللى مش قادره ولا عارفة ولا عاوزة ان الشعب يعيش فى بيئة انضف

لاحول ولا قوة الا بالله اللهم نور بصيرتهم يارب، و اسقيهم من نفس المية اللى بنشربها

سلام انا ححاول انام بقا

21 زارونى......و اتفرسوا:

احساس طفلة محبة للرومانسية بس واقعية said...

ده حتى مية السيفون بتاعة التواليت فكروا ينقوها علشان يوفروا المية و ترجع تنفع لمياة السيفون تاني

اه شفتة الاختراع دا بيستخدموا فية نشارة الخشب عارفة يا مفروسة اليابان حتى من قبل الحرب العالمية وهم شعب محارب مدمر بطبعة دول بهدلوا الصين
ورغم كدا تعاونوا مع الحكومة وعملوا بلد مشاء الله

كمان رغم كل التقدم اللى هم فية تلاقى البيئة نظيفة وفيها شجر بكميات رهيبة
عندهم الناس بتعية بسهولة وكتير وامراض مدمرة لسة لانهم ضعاف جدا

بس رغم كدا برضو الدواء قليل جدا جدا
يعنى مضاد حيوة 10 مثلا مش 500 يقولولك 500 دا قاتل ولية امراض فى المستقبل
ولما الكبار يخدو مضاد حيوى 10 الصغيرين يعملوا اية

وكل حاجة بتكون طبيعية بعيدة عن العمليات الجراحية والادوية
بيلجئولها لما يبقى خلاص مفيش بديل افضل ميضرش فى المستقبل وفى نفس الوقت ينقذ حالات المرضى

ياه لو هنتكلم عن اليابان صدقينى هتلاقى العجب واكتر 10000 مرة من امريكا او البلاد اللى طالعة فيها
بحب البلد دى بجد

انا برضو مفروسة يا مفرووووسة
ربنا يصلح الحااااال
تقبلى مرورى

فاتيما said...

عندك حق تتفرسى يا فروستى
للأسف محناش عارفين نتجمع على مشروع قومى واحد
حلم يتيم و نتحمسله كلنا
و ننفذه بقلب ..
عشان كدا ليكى حق
ألف حق

eyad said...

سيفون ايه بس ياجدعان اللي بتتكلمو عنو
سيبين الاطفال اللي في اليابان اللي وهما عندهم 7 سنين بيصنعو ادق اجهزه الكترونيه
وفي منح دراسيه للاختراعات وماليه للاطفال اللي يظهرو نبوغ او حتي بيبقي عندو استعداد انو يتعلم المايكنه والتكنولوجي
اليابان اصبحت اكبر صرح ميكاني في العالم وبينافس المانيا في الميكانيكا
مصر ايه اللي عيزنها تتقارن باليابان واحنا وعلي الرغم من اننا من ازكي شعوب العالم الااااا ان التعليم بيضيع الزكاء ده
تلاقي الواد وصل 3 ابتدائي وهو ايه عالم زره يطلع ربعه الله يرحمو مفيش امل فه تاني بس يخلص الكليه يكون اتدمر اساسا

no comment

قلم رصاص said...

والله انا خايف حالة الفرسة اللي عندك دي ميبقلهاش نهاية

طبعا انا اتمنى انك تتخلصي منها
بس انا عارف برضه انه مش بإيدك ولا بإيد اي حد فينا..منها لله ذكية

ههههههههههههههههههه

طبعا اقصد الحكمة الذكية

اشكرك جدا على البوست

في حفظ الله

نعكشة said...

لسة انهاردة شايفة مظاهرة سلمية وانا مروحة

عشان الحوافز و البتاع

اية علاقة دة بالموضوع

ان الشعب مش كسلان في حاجات
و كسلان في حاجات تانية

غريبة

يلا خير

بالنسبة لليابان
عندي شعور غريب انه شعب طيب داخل معاه حتة نمسنة ( جاية من كلمة نمس)

والله هو الموضوع مش يفرس هوه يحسر

بس مش عارفة

نعمل اية طيب؟؟؟

قولي أي اقتراح
بدل ما نكتم في قلبنا كدة و خلاص

يلا خير

سلام عليكِ

MǿиY El-Shreef said...

حقك يابنتي

مش تتفرسي ليه

الهي يرزقنا بحكومه يابانيه تتنيل ع عينها وتظبط ف البلد

احنا بلدنا الي حاميها حراميها

ونفسي تبقى حاجه كبيرة كده

بس ف الاحلام والمشمش والبطيخ

يااارب بقى ارحمنا برحمتك :(

واحده اتفرست زيك

Dr Gad said...

ههههههههههههههههههههه

لا شعب ولا بلد يا مفروسه
الشعب والحكومه الاتنين تعبانين مش الحكومه بس

اليابان دوله بنت نفسها بنفسها هي والصين وغزت العالم بمنتاجتها و سلعها برغم نكستها بعد القنبله الذريه

لكن احنا مش فالحين غير في الاعتراض والنوم والانتخه والفرجه علي ميلودي تريكس وروتانا سينيما وستار اكاديمي

عاشقه وغلبانه said...

مصر بتتبهدل بأيدينا
حكومه وشعب


بس خلاص

رحلتنا في الحياة said...

انتى قولتيها الشعب المصرى متفنن فى اذية نفسه واذية غيره
ربنا يصلح الاحوال

د/عرفه said...

يااااااااااااه
طالما
ان الناس شايفة الاهمال حواليها متفشى
وان المجتهد مش بياخد جزاء اجتهاده بل يمكن يتعاقب كمان ومفيش حد بيراعى ربنا فى عمله

يبقى الناس هتشتغل ليه طالما ممكن يقبضوا ويزوغوا
واللى هيشتغل هيقول اشمعنى انا

يااااااااااااااااه
قلبتى عليا المواجع

Foxology said...

اليابان دولة شعبها مخه نضيف اتربى ونشأ على انه يحب بلده لأن لما يحب بلده ويخدمها صح بلده هتديله بدون حساب

المشكلة فينا احنا .. احنا خلاص زى ما قال جمال حمدان الله يرحمه >>> شعب اتعود انه يبقى مستعبد من الفرعون

عليه العوض وليه تقلبى علينا المواجع بس ؟؟

تحياتى

محبة الرحمن said...

انت فرستينى انا كمان

اقول ايه

ما الحياة حلوة

ولونها بمبى

والهواء عندنا نقى جدا جدا

ايه يا مفروسه الكلام ده

فيه حاجه تفرس

ابقى قابلينى لو حاجه حصلت

على راى ناس

بلا وكسه

Hossam said...

Opps
انتى اول مرة تعرفى ان اليابان كده؟ امال لو عرفتى بقيت الحجات اللى بتعملها اللى اولها بتعلم الاطفال من الكى جى ازاى يشغلوا فصيين مخهم مش زى بقيت العالم اللى بيشغل فص واحد.وغير كده مشروع تخرج الثانوية اليابانية لازم لكل طالب يخترع حاجة مش حصلت قبل كده حتى ولو كانت اد المسمار.عقبلنا يا رب
شكرا مفروسة على انك فرستينى
سلام

maiosha said...

اه
اليابان والصين
فعلا على راى نابليون أحترس ممن أقترب من الأرض.. مش نابليون هو اللى قال كده برضه

حتى الميه بتاعة السيفون مش سايبينها فى حالها.. ايه الناس دول

ده انا اللى باردة برود الديب فريزر شكلى كده هتفرس

على العموم براحة يا مفروسة متعمليش فى نفسك كده .. اكيد هيجى اليوم اللى نشوف فيه مصر عارفة الفرق بين مية الشرب ومية السيفون ومش بتتلغبط فيهم زى دلوقتى

قولى يا رب

ليكوريكا said...

بقالي كتير مجتش هنا

بس انا اتطمنت

عشان لسه مفروسه بصحتك زي منتي

واحنا للاسف بنتعظ

لكن اللي بايدهم كل حاجه للاسف معندهمش بلوج

تيجي نعملهم بلوج ؟

:)

maiosha said...

البوست الجديد بتاع مس تربية 2 نزل يا مفروستى

سبهللة said...

ولا تتفرسى ولا حاجة
اعملى طلب هجرة لليابان
وما تفكريش فى اكتر من كدة
لان القانون عندنا بيقول يبقى الحال على ما هو عليه وعلى المتضرر للجوء لليابان
وحشتييييييييييييينى موت
ومبروك مرور سنة على المدونة

WhItE HeArT said...

لا فعلا حقك تتفرسي

يعني جايه تقارني بيننا وبين اليابان

حرااام عليكي ده انا نفسي الهادي اتفرست

ال 100 مليون ال دول بيتعدوا ازاي دول

تحياتي

الطائر الحزين said...

ما قالوش انهم بينقوا المايه عندهم بايه؟؟
اصلنا لسه عندنا بينقوها بالشبة والكلور وهما هناك بالاوزون

ويارب يشربوا من المايه بتاعتنا ويأكلنا من الجرير كمان بتاعنا والكوسة والبطيخ يا رب

محمد عبد الباسط said...

انا مش مفروس انا حاقد
ههههههههههههههههههه
لالا انا بغبطهم فعلا وان شاء الله فى امل نبقى زيهم بس لازم نوفر الاول متطلبات الحياه الكريمة قبل ما ندور على الكماليات

مدونة رائعة

تقبلوا تحياتى

حلم كبير

الإتربي اللولبي said...

إزيك يا مفروسة

قرأت كل جديدك

و عجبني حالة التسول اللاإرادي اللي انتي شفتيها

و طبعا باشاركك الرأي في موضوع حرامية المدونات و المواضيع اللي ضيعوا معانيها

و ربنا يكرم مصر شعبا و حكومة عشان يوصلوا لربع مستوى اليابان

أحسنتي

سلام عليكم