اسكندرية...انا احبك


انا جيت يا اهل المدينة

مدينة البلوجرية

ازيكم جميعا اخباركم ايه؟

طبعا مفروسين منى و مش طايقنى علشان مش بزوركم ولا برد على تعليقاتكم

بس و الله كلكم على بعضكم انتوا عارفين انا بعزكم كلكم ازاي

بس حالتي كانت سيئة جدااا..نفسيا يعنى.

انا الحمد لله انا بخير

مفروسة دايما و مفيش جديد

حاولت اهدي من اعصابي شوية

قلت انا ايه الاماكن اللى بتهدى اعصابي؟؟

و بعد تفكير عميق قلت مافيش غيرها

عروس البحر الابيض المتوسط

اه و الله ليها سحر غريب

اكيد اللى عايشين فيها مش شايفين السحر ده زينا

بس انا بقول حاسينه اكيد لانهم مش بيقدروا يبعدوا عنها

مش بيستريحوا براها ابداااا

المهم عقدت العزم و روحت

طول السكة و انا رايحة عندى الاحساس انى حشوف حد واحشنى

حاسة بلهفة و نشوة

و اول ما قربت كانت فيه ابتسامة مرسومه على وشي

أكيد أكيد اللى شافتي زمانه قال الست ديه فيوزاتها ضاربة

هيه مبتسمه على ايه؟؟ لوحدها كده لاحول ولا قوة إلا بلله

المهم اول لما وصلت على الكورنيش

استنشقت نفس عميييييييييييييييييييييييييييييق

يااااااااااااه قد ايه حسيت براحه

طبعا انا ما صدقت اني رايحة اسكندرية و قمت من الفجرية علشان اوصل فى اول النهار و فعلا و صلت على 9ونص

الله عليكي يا اسكندرية

انا بحبها اوي

و باين عليها انها حاسه بكده علشان كده بتخليني اقابل نوعيات جميله من البشر اللى بيخلو حبي ليها يزيد و يزيد

المهم انا جاية اسكندرية اريح اعصابي بس اول لما وصلت بقيت عاوزة انزل و الف على المحلات و اعمل شوبينج

كأن المحلات اللى هنا مش موجوده فى القاهرة

مش عاوزة افرسكم منى اكتر ما انتو مفروسين بس هيه ديه الحقيقة من ساعة لما وصلت و انا نازله لف وشرا

صحيح رجليا وجعتنى و صحيح حاسة انى مكسرة على الآخر

بس مبسوطة

صحيح فيه شوية رطوبة و تلزيق من اللى بكره نفسي بسببهم

بس مبسوطة

بس انا بقا عاوزة استفسر عن حاجه فارساني برضه

إلا همه الإسكندرانيه مش مصريين زينا؟؟؟؟؟

امبارح انا و اختى كنا بندور على محل

و معانا خريطة لعنوان المحل هههههههههههههه

طبعا دخلنا فى شوارع و خرجنا من شوارع ههههههههههههه

سواح بعيد عنكم

المهم قلنا نسأل سواق تاكسي

و لما سألناه قالنا امشوا ورايا حوصلكم

عمركوا شوفتوا كده فى القاهرة يا بشر؟؟؟

ده انت لو فى القاهرة و سايق عربيتك و بتسأل حد حيتوهك

و لو مش معاك عربيه اصلا و حتاخد تاكسي برضه حيتوهك

المهم وصلنا المحل و احنا بقا راجعين حسينا اننا تايهين

قلنا نسأل نطلع على الكورنيش ازاي يا عالم

سألنا واحد محترم بعربيه

تفتكروا قالنا ايه؟؟؟؟؟

نفس الجمله و الله

تعالوا ورايا و انا اوصلكم

ايه ده؟؟؟

ايه الزوق ده؟؟؟

فيه كده لسه؟؟؟

و بعد ما يوصلك المكان يودعك بإبتسامه

ايه ده؟

طبعا انا مش حخبي عليكم

انا اول مره لما التاكسي قالنا تعالوا ورايا قلت لاختى احنا حنتخطف

الراجل حيخطفنا

و لما وصلنا للمكان وودعنا بابتسامه

استغربت

و نفس الموضوع فى طريق العوده قلتلها برضه الراجل حيخطفنا

هههههههههههههههههه

بس لاقينا نفسنا على الكورنيش

هههههههههههههههههه

تفتكروا اليوود بتاع البحر اللى همه بيستنشقوه بيخليهم كده؟

مع انه معروف ان سكان المناطق الساحليه دمهم حامي جدااا

بس بروقان..ناس رايقه اللهم لا حسد

المهم انا بفكر آخد شوية هوا من هوا البحر فى ازايز اشمهم لما اتفرس

هههههههههههههههههههههههههه

اه

نسيت اقولكم بما انى عامله رجيم

او بحاول اعمل رجيم يعنى فمش اكلت سمك لغاية النهارده

بس أكلت هريسة من بتاعة أحمد حسنين

يالهوىىىىىىىىىىىىىىىىىىىى

جميله جميله جميله

اللى عاوز منها يقولى قبل ما ارجع اجيبله منها حته يدوقها

ههههههههههههههههههههه

بيقولوا مش بتخن

ههههههههههههههههههههه

المهم ربنا مع المنتخب بقا النهارده انا قلت اكتب البوست قبل الماتش

علشان لو اتنكدت و اتفرست مش كنت حعرف اكتب

الى اللقاء يا اصدقاء البحر بيسلم عليكوا

41 زارونى......و اتفرسوا:

محمد حمدي said...

الاسكندريه هى المدينه الاعظم فى التاريخ

تلات زيارات كمان وهتغيرى اسم البلوج من مفروسه الى رايقققهههههههه

تحياتى

محمد حمدي said...
This comment has been removed by the author.
صيدلانيه طالعه نازله said...

مفروستى انا كنت هناك الاسبوع اللى فات و كنت حاسه بنفس احساسك ده
الاسكندرانيه بجد ناس تحفه و جدعان و طيبين
بالنسبه للبسبوسه بالادب و الذوق انا مش ينفع معايا حته انا عايزه علبه بجوز الهند و البندق
شوفتى انا قنوعه ازااااااااى
ياللا باى عشان اروح استنى الماتش المنتظر
يارب مصر تلعب حلو

Anonymous said...

لفت نظرى العنوان بما انى اسكندرانية
فقلت ادخل ابص بصة
وبصراحة كانت معنوياتى مرتفعة خالص
مش جديد على الاسكندرانية ماذكرتيه
فهما ولاد بلد ومضيافين
بس قولى لى اكلتى هريسة احمد حسنين فى اى فرع شكلك كده جانبنا
طب ماتتفضلى انتى واللى معاكى
قولى بس للسواق عاوزاة اروح عند ام مالك حيقولك نفس الرد ورايا وحوديكى
يالا انا فى انتظارك
نورتى اسكندرية وتحياتى

Anonymous said...

لفت نظرى العنوان بما انى اسكندرانية
فقلت ادخل ابص بصة
وبصراحة كانت معنوياتى مرتفعة خالص
مش جديد على الاسكندرانية ماذكرتيه
فهما ولاد بلد ومضيافين
بس قولى لى اكلتى هريسة احمد حسنين فى اى فرع شكلك كده جانبنا
طب ماتتفضلى انتى واللى معاكى
قولى بس للسواق عاوزاة اروح عند ام مالك حيقولك نفس الرد ورايا وحوديكى
يالا انا فى انتظارك
نورتى اسكندرية وتحياتى

همس الاحباب said...

ماشية معاك هريسة يا مفروسة
بس بجد اسكندرية مارية
تحسى بجو تانى وانتى هناك
ويا سلام على اسكندرية فى الشتاء روعة روعة
انا بحب ازورها الشتاء اكتر من الصيف
وفعلا ناس حلوين قوى وجدعان وخصوصا لو مش عارف مكان تلاقى الف من يدلك
اجازة سعيدة وربنا يسعدك
تحياتى

moustapha achraf said...

اة من الأسكندرية ...مشكلتها الوحيدة انهامينفعش تتساب و يتعاش بعيد عنها و اهلا و سهلا بمعجبين الأسكندرية

موناليزا said...

يااه يامفروستى:)
ليكِ وحشة والله
ازيك ياجميلة
يارب تكون اجازة سعيدة عليكِ
==
ملحوظة : فيه غلطة مطبعية فى البوست ارجو تصحيحها
"لاحول ولا قوة الا بالله"
ماينفعش تتكتب لاحول الله
صححيها بسرعة بقى:)

نعكشة said...

ربنا يهنيكي و يسعدك دايماً

عارفة مين كمان تلاقيهم رايقين كدة

بتوع مصر الجديدة

....

المهم انك بتستمتعي

ابقي شميلي شوية من البحر

و قوليلوا نعكشة بتسلم عليك و بتحضنك حضن كبييييييييييييييييييييييير
و بتبوسك كمان

و قوليله إنه واحشني قوي

.........

يلا خير

سلام عليكِ

Empress appy said...

بحب اهلها وليه اصحاب جدعان منهم

Anonymous said...

اسكندرية ماريا و ترابها زعفران و الاسكندرانية دمهم حامى لما حد يضايقهم بس
لكن غيركدة جدعان اوىىىىىىىىى
اوعى وشك

قلم رصاص said...

السلام عليكم

فرسة ايه بقى

دا انتي مروقة على الاخر خالص اهه
وناوية تفرسيتا احنا
ههههههههههههههههه

وفعلا على رأي اخونا محمود حمدي
تلات زيارات وتحولي من مفروسة الى راااااايقه
هههههههههههههه

رحلة موفقة



والف مبروك لينا جميعا

الماتش كان مشرق لينا كلنا

اتغلبنا 4/3 صحيح
بس قطعنا البرازيل والله

وكنا نستحق الفوز

قدر الله وما شاء فعل

وكفاية اللي ابو تريكه عمله فيهم والله

في حفظ الله

Kiara said...

انا بمووووووووووت فيها

بوست لطيف خالث

Mafrousa said...

mohamed hamdy
---------------------
تفتكر يا محمد؟؟؟
انا متهيألى لو قعدت اكتر من الازم يمكن اتفرس
ههههههههههههههههه
لا بفكر فى اسم يلخبط
رايقة و مفروسة
ههههههههههههههه
تحياتي ليك

Mafrousa said...

صيدلانيه طالعة نازلة
----------------------
علا ازيك يا قمرة
و الله انا مقصرة معاكي
بس شوفتي بقا الفرق
انا لما رحت قولت و سالتكم اجيبلكم و لا لأ
و انتى اكلتى لوحدك
ههههههههههههههههههههههههههههههه

Mafrousa said...

ام مالك
---------
الله انتى اسكندرانية؟؟؟؟
اسكندرية جميله
كفاية تقفى قدام البحر
فيه سحر غريب
كأن الهوا بتاع البحر بيدخل جواكي يسحب الشوائب و يخرج
تحياتي ليكي
بس موضوع انى اوقف تاكسي و اقوله وديني لأم مالك ديه
هههههههههههههههههههههه
اخاف اتخطف
ههههههههههههههههه

Mafrousa said...

همس الاحباب
---------------
خااااالد
ايون و الله ماشية معايا هريسة بالقوى
هههههههههههههههههههه
بس انا مش رحت اسكندرية ابدا فى الشتا
المرة الجاية ان شاء الله
نورت

Mafrousa said...

Blind Sniper
-----------------
هههههههههههههه
شكلك اسكندراني
هههههههههههههه
ايون انا ببقا ماشية بالدموع
لو اطول اعيش فيها
بس متهيألى بعد فتره ممكن ازهق لانها هادية مريحة للاعصاب
و انا مفروسة و الفرسة فى دمي
لو مش اتفرست امووووت
هههههههههههههههههههههههه
تحياتي ليك و لكل اهل الاسكندرية

Mafrousa said...

موناليزا
------------
ازيك يا قمرة انتى
و الله ليكو كلكم وحشة جامده جدااااا
صلحتها يا مونتى يا قمرة
مرسي كتير ليكي
معلش فرستك
ههههههههههههههههههههه
اصلى بعيد عن السامعين ضعيفة فى العربي
ههههههههههههههههههه

Unknown said...

حمدالله علي سلامتك المعنويه
ويارب تقضي هناك ايام جميله
وترجعي مبسوطه علي الاخر

Mafrousa said...

نعكوووووووووووووووووووووشة
ازيك يا منعكشة
تصدقى انا بفكر اجيبلك مشط ولا فرشة من شارع خالد ابن الوليد
ههههههههههههههههههه
و ومعاهم استك علشان مش تبقى منعكشة
ههههههههههههههههههههههههه
سكان مصر الجديدة اجدع ناس
زمان كان نفسي اسكن هناك علشان كل اصحابي و قرايبي هناك
و بعدين لما اتزحمت
قلت اروح اسكندرية
ههههههههههههههههههه
سلمتلك على ابحر
و بوستهولك
بس مش حضنته لا ما يرضاش يسيبنى
ههههههههههههههههههههههههههههه
اسكندرية بتسلم عليكي

Mafrousa said...

Appy
-------
هيه الصراحة جميلة و شعبها اجمل

Mafrousa said...

ابو ملك
-----------
ههههههههههههههههههههه
انت اسكندراني ولا ايه؟؟؟؟
انا اكتشفت انهم دمهم حامي مع الاغبيا كمان
همه ناصحين اوي
ههههههههههههههههههه
تحياتي ليك

Mafrousa said...

قلم رصاص
--------------------
منورني
بس ده العادى لو مش اتفرست بفرس
ههههههههههههههههههه
و الحمد لله على الماتش الحمد لله
ده احنا نعمل فرح دخلنا 3 اجوان فى البرازيل ياعالم
الحمد لله على كل شيء

Mafrousa said...

كيارا
-------
و انا كمان بموت فيها
تحياتي ليكي

Mafrousa said...

esraa
------
اه و مين سمعك
نفسي التون يهدى عندى شوية
تحياتي ليكي

شلاطة said...

ومين قالك ان الكلام دا في القاهرة بس؟
انا من المنحلة الكبيرة(المحلة)
البلد كلها متكملش شارع من شوارع القاهرة
ولو ركبت تاكسي بفلوسي وقلتله على العنوان ووصلني له وبعدين قلتله قدام شويه كمان شارع ممكن يقتلني

ودايما لما بروح اسكندرية بلاحظ حتة ان الناس هناك رايقة اوي بطريقة تغيظ
ههههههههه
عاملين زي بتوع جدة برضه في السعودية تلاقي نفس الروقان اللي يغيظ دا
تحياتي

قوس قزح said...

هههههههههههههههههههههههههههههههههههههههههههههههههههههههههههههههههههههههههههههههههههههههههه


موت من الضحك على الهريسة دى

لا يا مفروسة يا حبيبتى مش بتخنق خالص بدام من عند احمد حسنين

انا عايزة منهااااا
اصلى عاملة رجيم
هههههههههههههههه

انتى سكر والله
متنسيش كمان ازازتين يود ..مش لى لا لجوزى علشان افرسه براحتى هههههههههه

ترجعى بالسلامة

Foxology said...

شط اسكندرية يا شط الهوا

اسكندرية بنت اللذينا مفيش زيها ابدا اكييييد

رحلة سعيدة والحمد لله المنتخب شرفنا واثلج صدورنا جميعا

تحياتى :)

عمرو said...

الاٍسكندريه مدينه رائعه بجد و زمان كانت أجمل من دلوقتى ..
و الاٍسكندرانيه ناس جدعان جدا و يحبوا يساعدوا ضيوفهم بكل السبل
و حتى فيه مقوله اللى هى اٍسكندريه أجدع ناس :)
و دى مقوله صادقه تماما
هنيالك الاٍجازه و تقبلى خالص تحياتى و تقديرى ..

الجواز و سنينه said...

برضوا اسكندريه
اعمل ايه يعنى
هاعيط
نفسى اوى اروح اسكندريه بس الظروف و الجوابات
انا كمان عامله رجيم
بس اكلت شوكلاته جلاكسى
برضوا مش بتخن زى الهريسه بالظبط
على فكره ضحكنى اوى ان كل شويه تقولى هانتخطف
و الله هلكت ضحك
فكرتينى لما كنت هناك السنه اللى فاتت و طبعا كان معايا عربيه الاطفال علشان لو هامشى مسافه بيهم
الاقى الناس كده تقفلى مخصوص علشان النونات
اول ما رجعت اجى العدى الشارع الناس بدل ما تهدى تجرى عليه
كنت هاتنقط
تحياتى يا قمر
و تييجى بالسلامه
امانه ازازه ميه بحر تطرى الجو هنا و يمكن تعدل الحال

أحــوال الهـوي said...

في مرور سريع اسجل شكري علي سؤالك
فلك مني التحية و العرفان


تحياتي

Anonymous said...

يا بختك! ممكن تبعتيلي قزازة هوا إسكندراني إذا كنتي عبيتي شوية؟

Lyssandra said...

:)

رحلة سعيدة

جميل أوي موقف الناس المهذبة دي

..

تحياتي
Lyssa

عاشقه الرومانسيه said...

ياترى انتى لسه فى اسكندريه ولا رجعتى؟
ياحبيبتى اللى ذكرتيه ده كله مش غريب
اصلنا ناس جدعان جدااااااااا
وبرضه دمنا حامى وبنخاف على ضيوفنا قوى
قوليلى بققى عنوانك علشان اخدك وافسحك فسحه عجب
واخليكى تشوفى فى اسكندريه اللى عمرك ما شوفتيه
وكلام جدعان مش فض مجالس ولا عزومه مركبيه
وجربى
(:

Unknown said...

ربنا يا ستى يهدى فرستك

:)

hasona said...

السلام عليكم
حمد لله علي السلامة
ان شاء الله تكون بخير وتمام

،،،
الاسكندرية أجمل مدينة في العالم وفي مصر
وفي الفترة الاخيرة ضيفت لهابعض المزايا والتجديدات فزادت جمالا وتألقاً

MǿиY El-Shreef said...

وحشتيني يابنتي

انتي واسكندريه والله

سلمي عليها بقى

funky girl said...

بجد الاسكندرية جميلة جدا و تقريبا اي حد يروح هناك هيحس نفس احساسك :)
بجد بلوجج لذيذ اوي
;)

safa7_karmooz said...

هههههههههههههههههههههههههههههههه

انتى مفروسة

ومش مفروسة

اكيد اتفرستى عالمنتخب

هههههههههههههههههههههههههههههه

على فكرة اسكندرية من احب الاماكن لقلبى جدااااااااااااااااااااااااا

كويس انك اتبسطتى ^_^

احلام جوليا said...

اه يا مفروسة وحشني البحر قوي قوي ووحشني الكورنيش وريحة اليود وحشني وشوش الاسكندرانية الي بتضحك والي تحسسك ان في نكته بينك وبينهم من غير ما يعرفوك وحشني جواها الدافي حتى لما يلزق وحشني شوارعها القديمة الي تحسسك انك رجعت لزمان ووحشتني هريسة محمد حسنين وسمك الي ماما بتعمله صيادية ورز ماما الي مهما حاولت مش بعرف اعمله زيها وحشتني قوي بلدي يا مفروسة وانا اسكندرنية وبعيده عن اسكندرية