زعلانة مش مفروسة


ازيكم جميعا
وحشتوني كلكم...معلش الفترة اللى فاتت كنت بواجهه صعوبة فى دخول المدونة مش عارفه ليه
و بالرغم من انى كانت نفسي مفتوحة و بزور مدونات و بقرأ اللى بيتكتب بس كنت لما احاول اسيب تعليق
كان عم جوجل مش بيقبل الساين بتاعي ولا الباس وورد
و مش عارفه ليه الصراحة
زيه زي كذا حاجة كانت بتحصلى اليومين اللى فاتو و مش عارفه ليه
انا جايالكم النهارده زعلانة و مش مفروسة
زعلانه و اكاد اكون ببكي على حال الناس و اللى بيحصل منهم
مش ححكيلكم تفاصيل علشان مش اضايقكم انتو كمان
بس كل اللى اقدر اقوله ان الناس بتصطاد فى المية العكرة بتتصيد لاي مخلوق اي حاجة علشان
تظهر هيه فى الصورة و تبان انها شخصية سوية و هيه مش كده
زعلانه ان الناس مابقتش تفرق بين الكلام الجد و التهريج
بياخدو الجد على انه تهريج و يستهانو بيه
و بياخدو التهريج على انه جد و يعملو منه مشكلة
و تلاقى نفسك بعدما كنت داخل مبتسم و مبسوط و بتهرج
خرجت و انت معمولك مشكلة من ولا حاجة و بتبقى مزهول و مستغرب
هوه حصل ايه؟
بس هوه صحيح حصل ايه يا جماعة؟
هيه الناس بقت ليه كده؟
ليه ما بقيناش نستحمل حتى التهريج من بعض؟
ليه ما بقيناش نتوسم حسن النية فى اي حد
ليه بقينا نخلق مشاكل من الهوا؟
ليه بقى خلقنا ضيق
مش طايقين الناس اللى حوالينا
بيصعب علينا نشوف حد مبسوط لازم نقلبها نكد و نخلق معاه مشكلة علشان يضايق
ليه بنحور الكلام لو اتقال بتهريج نخليه ياخد شكل تاني يزعل الناس مننا
ليه؟
انابعانى من الموضوع ده بقالى كام يوم
مش حقولكم ان اسلوب تهريجي خارج مثلا الناس تزعل منه
ولا حقولكم تهريجي باللطش يالأيدي تخلى الناس تزعل منى
لأ خالص
بس اكتشفت ان الناس لما بتلاقيك بتهرج بتقول فى عقل بالها ديه واحده ما عندهاش مشاكل مرتاحة فى حياتها
لأ لازم ننكد عليها بقا
زمان كانوا بيتهمونى انى جد وكانو يتهموني بان اللى يقابلنى اول مرة يقول عليا غلسة و مش لذيذة
بس لما يقابلنى تاني و تالت و يعرف طبيعة شخصيتي يلاقيني مختلفة
و قعدت مع نفسي و قررت انى ما اتعبشي اللى قدامي فى انه يعرف طبيعتى من تاني او تالت مقابلة و احاول ان اكون بطبيعتى من اول لقاء
و غيرت من اسلوب حياتي و ريحت الناس و استريحت شوية مش كتير لان فيه ناس مش ينفع تكون على طبيعتك معاهم من اولها كده لازم تبقى جد شوية
بس علشان مش اتعب الناس قلت انا اتعب شوية و خلاص
ومرت الايام و السنين
و اتثبتلى مؤخرا انى ماكانش ينفع ان اتغير خالص
و ان اسلوبي الاولاني كان هوه الاصلح و الصح
و كان مجنبنى كثير من المشاكل اللى مستغربةلها مؤخرا
على الاقل كان موفر عليا انى ابرر باني بهرج
مش معقول ان الواحد يفضل محاسب مع كل الناس على كلامه لانك لو بطبيعتك و قلت كلمه بهزار حتلاقى اللى ياخدها بجد و يعملك مشكلة
فعلشان كده انا حربط لساني عن الكلام اصلا مع اي حد و مع كل حد
حكون غلسة و جد
اللى يعرفوني مش تزعلو منى لاني ما بعرفشي اكون بشخصيتين
يا كده يا كده معرفشي اكون الاتنين
و انتوا كمان خدو بالكم بلاش تكونوا على طبيعتكم تماما
لان اكيد حتلاقى خد ناصبلك فخ
خدوا بالكم و حرصوا علشان مش تزعلوا زيي
سلام

23 زارونى......و اتفرسوا:

شلاطة said...

انا شايف ان الناس بتعمل مشاكل من لاشيء من كتر المشاكل اللي عندهم
انتي فاهمة قصدي؟؟؟؟
يعني من كتر مشاكلهم وحياتهم اللي بقت صعبة اوي بقوا مش مستحملين كلمة من حد
المشكله اللي بتواجهك مع الناس انهم مش بيفهموا طبيعة شخصيتك من اول مرة هي نفس المشكله اللي كانت بتواجهني
بس بصراحة انا محاولتش اغير الاسلوب دا
لان قناعتي بتقولي ان الطبيعي ان البني آدم مش بيتفهم من اول ولا تاني ولا تالت مره حتى
ممكن الواحد يقابل ناس يقعدوا معاكي بالسنين كويسين والله اعلم مافي نواياهم من ناحيتك
وناس تانيه تلاقي قلوبهم اصفى من اللبن الحليب من اول مره والواحد مش بيبقى عارف انهم كده لانهم مش بيبان عليهم
وبعدين الجيل الطيب دا راح معدش موجود كله بقى بيعض في كله عشان المشاكل وضيق الخلق
عموما ربنا معانا كلنا
سلام

AHMED SAMIR said...

ماينفعش نعمم حاجة واحدة على الناس كلها
بمعنى ان ماينفعش نقول ان الناس كلها حلوة او الناس كلها وحشة
او الناس كلها بتحول الهزار لجد او الجد لهزار
انما ممكن نقول ان في ناس كتير بالشكل دة
و نصيحة مني بقى....كل واحد من الناس له فرصة واحدة بس و على اساساها تعرفي هتتعاملي معاه ازاي
يعني لو هو لا يتقبل الهزار يبقى اوعي تهزري معاه تاني ...لو هو لا يتقبل الجد...اوعي تتكلمي جد معاه تاني
و هكذا

موناليزا said...

صدق المثل اللى بيقول: حبيبك يبلعلك الزلط وعدوك يتمنالك الغلط

dreem said...

ازيك يا مفروسة
اوعى تغيرى نفسك علشان حد
اللى مش عاجبه يغور طالما انتى مقتنعة بيكى كده وحباكى كده

hasona said...

السلام عليكم

كل واحد يكون بطبيعته
والاجمل ان أصدقائنا وأحبائنا يعرفون طبيعتنا ومن ثم لن يستمعوا أو يصدقوا هذه الابواق التي تغير الحقائق وتشوها

وأنت مش هتتغيري من أجل كل الناس - أنت كده عايزة ولا ألف شخصية ومليون قناع

كوني كما أنت وبما تحمليه من صفات
تحاولي فقط تغير الاشياء السيئة

فيه ناس لا تفرق بين المزاح والجد

فلا تزعلي ان أحدهم أساء الفهم

حبارير said...

كوني نفسك ولا تكوني غيرك

ولا تمزحي إلا مع من يستحق أو تعرفين

وفي النهاية

لا تجعلي شيئا أبدا يثير حزنك وزعلك

مفيش حاجة تستاهل

قلم رصاص said...

السلام عليكم

فعلا ده بيحصل من بعض الناس وليس كل الناس

حتى لانعمم الامر وتصبح الحياه أحادية اللون ، وهي ليست كذلك ، فهناك تدرج للالوان وهو مايميز الحياه

لكن انا مبنكرش ان اللي حضرتك قولتيه في البوست بيحصل وبيبقى احيانا فوق التصور ولكن من اللي بيحصل منهم فقط

دمتي غير مفروسة

في حفظ الله

Ehab said...

كتبت بوست زمان عن الموضوع ده لما حصل معايا ان واحد محترم في شغلي
سالني سؤال على شغله بمضيه منه وكان السؤال غبي قوي لدرجة اني تخيلته بيهزر فهزرت معاه كانت النتيجه انه اهاني فعلا بكلام سخيف
واضطريت اني اتحمل كلامه لأني غلطت وهزرت معاه واديته فرصه يكلمني بطريقه متعجبنيش
وصدقيني لما اديته هو وكتير الوش الخشب بقوا هم اللي بيسلموا عليا وكلموني ويبتسمولي وانا ببقى عايزه اديهم بالجزمه في وشهم صراحه
طبعا ده غير اللي مصرين اني معنديش مشاكل وعايش في مية البطيخ علشان بهزر كتير فكده بقى معنديش مشاكل
مع اني والله ببقى بحالو انسى مشاكل خانقاني وموتراني جدا
لكن نقول ايه
مينفعش صدقيني غير انك تديهم وش احتقار على لا مبالاه كده بيجيب نتيجه حلوه
بس مش مع اصحابك صدقيني بيبقى نتيجته مش حلوه


سلااااااااااااااااااااااااام
اخوكي ايهاب

MǿиY El-Shreef said...

عندك حق مليوووووووون ف المية

بكره حوار ان التهريج يتاخد جد والليله تقلب بنكد وهتبقى ليله سوده

الناس مابقتش مستحمله اي حاجه

وساعات بتستخسر زي ماقلتي كده ان حد يفرح

وناس بتبقى مفرووسه هما اشمعنى فرحانين وانا لا

الدنيا مابقتش زي زمان

وخليكي ع طبيعتك والله مافيش احسن من انك تبقي تلقائيه

لان فيه ناس ممكن تحس انك اتغيرتي لما تكوني قدامهم اول وتاني مره بسيم معين ويتغير بعد كده

طمنينا عليكي

حروف said...

ممممممممممم اتصدقي ان موقف دة حصل معايا الواحد ساعات بيقف علي حاجات ملهاش لازمة لانة بيكون مخنوق

حروف said...

متزعليش والتمسي العذر للي ودامك بجد لان ناس بقت مليانة علي لاخر

نعكشة said...

معلش
قريت البوست و مش قادرة اعلق مع اني عندي تعلقات كتير في مخي

...............

كيف حالك؟؟
قولت اسلم مادام دخلت لحد هون

اتمنالك الخير دايماً بينك و بين نفسك وف ي تعاملاتك مع الناس

سلام عليكِ

سبهللة said...

مفروستى يا حبيبتى
اولا حمدا لله على سلامتك
ثانيا بما انك صديقتى فى اللغة الفرنسية
خدى عندك دى

http://www.youtube.com/watch?v=2GjWyAV2jBs

مش هاقدر اقولك ما تتفرسيش
اتفرسى بس بالراحة
عشان صحتك يا حبيبتى

Asmaa mahaba said...

ازيك يا سوسو وحشانى
سيبيها على ربنا يا بنتى المهم ان ضميرك مرتاح اللى عاوز يفهم الصراحه غلط هو ونفسيته بقى انا عن نفسى اللى يكبمنى فى وشى احسن من اللى يتكلم من ضهرى
خدى بالك من نفسك وزى ما قولتلك خليها على الله

صيدلانيه طالعه نازله said...

ايه ده يعنى انا شفتك فى مرحله الجد و لا الهزار حددى لو سمحتى
ايا كان انتى جميله قوى يا مفروسه و خليكى انتى زى مانتى و اللى مش عاجبه عنده النيل الملوث يشرب منه و اهوا يموت و يرتاح و يريح
انا شفتك مره واحده اه ساعتين قعدناهم مع بعض بس بجد سابوا اثر معايا كبير
ربنا يخليكى يا قمر و يبعد عنك المشاكل و محدش يستاهل ان احنا نغير طبيعتنا علشانه
ارجعى هزرى و اضحكى تانى لو سمحتى
و انتظرى تليفون منى عشان اتفق معاكى اشوفك فين

عالم حبيب said...

انا رأيي ان الواحد المفروض يتصرف بطبيعته .. ممكن يكون التصرف على طبيعتنا فيه بعض الحاجات مش صح .. في الحالة دي لازم تكون الصحبة الصالحة هي المراية اللي بتصلحلنا العيوب .. الأخ يصلح لأخوه والأخت لأختها

ياريت تعملي وقفة وتشوفي مين اللي حواليكي وبتتعاملي معاهم .. ربنا يصلحلكم الحال

safa7_karmooz said...

ليا صديق مقرب ...بقاله فترة مش فى الموود اهزر معاه ياخد كلامى جد ويزعل اوى

توصلت انى مش ههزر معاه تانى

لان واضح انى الوحيد اللى ماشى بمبدأ النية الحسنة :S

Anonymous said...

كل الرغى دة وتقولى انك مش مفروسة
اومال لو كنتى مفروسة كنتى هتعملى اية فينا
كبرى دماغك وعيشي حياتك ومادمتى مبتعمليش حاجة تخجلى منها
ولا يهمك حد
كلام الناس ولا يقدم
ولا ياخر

عمرو said...

الناس أصلا روحها بقت فى مناخيرها و مستنيين بس اللى يحك لهم على مناخيره علشان ينفجروا !!
لا اللطيف الظريف اللى بيعمل جو حلو من حواليه بيعجب و لا العبوس المتجهم بيعجب !!
طيب مادام كده كده مش عاجبهم يبقى الواحد يخليه على طبيعته لأنه مهما عمل مش حيرضى كل الناس ..
صح ؟؟
تقبلى تحياتى و تقديرى ..

Anonymous said...

أنا بأه اللي مدايقني من الناس بصراحة من غير زعل الغبااااااااااء

آه وربنا والبرود اللي فيهم كمان خصوصا الصبح

دي فعلا الحاجة اللي تفرس ببقى مهاميهوووو مفروسة

عارفة مفرورو... الجو اصلا مش ناقص زعل ولا فرسة .. خدي مني البوسة دي وتعالي ناخدلنا ساندويتش جبنة ومعاه طبق عنب :)

مها ميهوووو

maiosha said...

مفروستى حبيبتى

وحشتيييييييييييييينى موووووووووووت
بقى انا اغيب كل ده يا مفروسة وارجع الاقيكى زعلانةكده .. والله انا هعيط خلاص

الهى يا رب اللى يزعل مفروستى .. يتفرس هو لغاية ما يموت بفرسته

بالله عليكى يا مفروسة ما تزعلى نفسك .. مهما حصلك سيبك منه وتعالى المدونة واكتبى .. وخرجى كل اللى جواكى .. انما متكتميش جواكى وتزعلى نفسك

ولازم تعرفى انك لما بتزعلى هنا مش بتزعلى لوحدك .. لأ ده فيه عالم كامل من المدونين بيزعلوا على زعلك

فكيها بقى يا جميل

ووحشتيييييينى

اقصوصه said...

احيانا الشخص بيكون متضايق

وبينتظر اي موقف عشان ينفغجر

ويطلع كل الضيق اللي فيبه!

كاميليا بهاء الدين said...

قول رأيك بس من غير ما تفرسنى)))

وحشتنى الجملة دى جداً جداً

وصاحبتها كمان..
وحشتنى اوى جدا خالص


كل سنة وانت طيبة حبيبتى
رمضان كريم


لك حب من قلب صغنون ومن قلبى اللى أنت عارفاه.


(F)