مافيش فرسة خاااالص



فعلا البوست ده من غير فرسة
ما تستغربوش
صحيح انا عيانة
عندى برد
بس البرد العادى ،الغير مصحوب بسخونة
يعنى لا اقلق ان تكون انفلونزا الكتاكيت

المهم زمان كنت بلاحظ ان كل قصص الحب تنشأ فى الصيف
عندما يسافر اغلب الناس للمصايف و تكثر معاها سماع الاغاني الجميلة بتاعة فيروز
و تكثر معها التجمعات الشبابية
و السهر و حفلات السمر
أو تمضية اغلب الاوقات فى النوادى...و ده برضه بيكون مجال للتجمع ،و التعارف
و بداية لقصص الحب

و من قصص الحب هذة، ما نجد ما يستمر منها
و يكبر و ينتهى النهاية السعيدة
و منها ما ينتهى بإنتهاء الأجازة
يعنى موسمي
و منها ما يستمر لبضعة ايام او اشهر بعد الأجازة

وده الحب الصيفي

اما بقا الحب الشتوي
اللى بينشأ فى ايام الشتاء...و ليالية الباردة
غالبا ما بيكون حب انضج قليلا
ده من وجههة نظري
لأنه بيكون حب قائم على الشخصية نفسها
مافيش ما يجذب انتباه الطرف الآخر
يعنى الواحد غالبا
بيبقى لابس كل الهدوم من السقعة
مش زي الصيف
الواحد بيكون حران و بيلبس ما قل و خف
و غالبا فى الشتاء بيكون اللون الغامق هو اللذى يصبغ كل الهدوم الشتوي
مش زي الصيف بالوانة الزاهية اللى بتجذب

و برضه الواحد غالبا فى الشتا بيكون عنده برد و مزكم و بينفف و عنية بتدمع
يعنى لاروج حيثبت ولا مكياج حيفضل
مش زي الصيف اللى بيبقى الواحد واخد لون برونزي جميل يغنى عن كل الماكياجات
و بيبقى لابس نضارة الشمس ..للحماية من اشعة الشمس الحارقة
و بتكون الاطة برضه جذابة لكل من الطرفين

فى الشتا صوت الواحد بيكون خافت طبيعي
سواء أكان من الكحة اللى مبهدلة الواحد...او من السقعة
و الصوت الخافت برضه بيحرك مشاعر
مش زي الصيف اللى الواحد صوتة بيبقى ملعلع جايب لأخر الشارع

و قصص الحب اللى بتبدأ فى الشتاء و تستمر
بتكون قصص قوية جدااااااا و غالبا بتعيش
لأن برضه فيه من القصص ديه اللى بينتهى بإنتهاء الشتاء و بداية الصيف
و بداية الحر و الواحد بيكون زهقان من نفسة اساسا و مش طايق حد
فغالبا بيحصل مشاكل و تتفركش

نيجي بقا للمفيد
انا ليه بقول الكلام ده؟؟؟
حقولكم مش عارفة
يمكن علشان حالات الحب الجميلة اللى بتوج كثير من اصحاب المدونات
و بما انى عيانة و كامنة فى البيت و بزور ناس كتيرة
فلاحظت ان كتير منهم يمرون بقصص حب جميلة
فكرتني بايام الصيف
و ايام الشتاء الجميلة
اللى كانوا كلهم قبل الجواز
اصل بعيد عنكم بعد الجواز
الجو بيصبح خاريفي خماسيني
مصحوب برياح شمالية حنوبية شرقية غربية محملة بالأتربة و الزلط
و كثيرا ما يصاحبها الامطار و ساعات السيول الغزيرة من العيون

كفاية عليكو كده النهاردة لاحسن تتفرسوا
سلام حقوم آخد الدوا

28 زارونى......و اتفرسوا:

عاشقه الرومانسيه said...

بوست من غير فرسه؟
ده انتى فرستينى انا
ههههههههههههههه
ايه علاقهالحب بالفصول؟؟!!
اول مره اسمع عن الحب الموسمى ده
ههههههههههههههه
بس اهى فلسفه برضه
اما عن اصحاب المدونات فهما بصراحه فتحوا نفسى
هههههههههههههههه
ربنا يسعدهم لانى بحبهم جدااااااا

نعكشة said...

:D

نظرية غريبة
ولكن
تستحق النظر فيها


وبالنسبة للي بيحبوا

ربنا يتمملهم على خير
في الاتجاة اللي فيه الخير

سواء كدة
او كدهون

سلامٌ عليكِ

Mafrousa said...

عاشقة الرومانسية
--------------------
علاقة الحب بالفصول!!!!!! مش عارفة
هههههههههههه
ايون و فتحوا نفسي انا كمان

Asmaa Fathi said...

هههههههههههههههههه
أقولك ايه بس قسمتى الحب لمواسم
طب والربيع حبه بيبقى عامل ازاي
كده الواحده تخليها في المضمون وتحب في الشتاء
والله انتي رايقه
شوفي في مدونتي قصة (الضحك حد البكاء) وقوليلي هو كان في فصل ايه الحب اللي في القصة

تحياتي

Mafrousa said...

نعكشة
-------
نعكوووووووووووشة
اللى يارب تحبي يا شيخة
ما تقفلى التعليقات عندك
بتفرسيني
ركزي انتى بس
و حتلاقى اللى بيحبوا فى الصيف بينفصلوا على دخول الشتا واللى بيحبوا فى الشتا بينفصلوا على دخول الصيف
تحياتي

همس الاحباب said...

هههههههههه
على كده الواحد يفتح قلبه مساكن شعبية
الصيف بحرى
والشتاء قبلى
والربيع فى السطح
والخريف فى المنور
ولا عزاء للجيران بقى
هههههههه
بالذمة هو فيه فرسة اكتر من كده
ربنا يوفق الجميع ويسعدهم دائما
تحياتى

Empress appy said...

اغلبيه قصص الحب اللى بتبدا فى الصيف بتنتهى فى الشتاء فعلا
وده لان الشتاء عند ناس كتير بيقلب باكتئاب
فبيكونوا مش متحملين نفسهم وبتسقط قصص الحب زي ورق الخريف
موضوع الصيف ده حقيقى ناس بتقابل بعض بتقول عنقضيها بنت حلو ولد كوول كده يعنى نقضى الصيف مع بعض وفعلا مش دايما يستمر نادر جدا
بس ده فى مناطق مناطق يا اوختشى وانتى فاهمه

فاتيما said...

تصدقى بالله
انا من اول تلات اربع سطور
حسيت إن البوست دا فيه حاجة كدا
عمرى ما خدت بالى من حب الصيف
و حب الشتا بس انا مخلوقة شتوية عموما
و بعشق الفصل دا دوناً عن باقى
شهور السنة معرفش ليه؟!
ميرسى ع البوست
و التمنيات المدفوسة بين سطور البوست
و التشجيعات اللى طلة من بين حروفه
و سلامتك ألف سلامة يا فروستى
يا حبيبتى
بوسة و حضونات و متقوليليش أبعدى
ميهمكيش
أنا موافقة إتعدى
مدام هتيجى منك

بنت بتحلم said...

حلوه فلسفه الفصول دى لكن حضرتك نسيتى فصل الربيع
(:

ابتسامة حزن said...

انا بقى مش مع حب الفصول ده انا مع الحب اللى بعد الجواز هوا ده الاساس
هوا ده اللى فيه كل الالوان وكل الاشكال وكل الفصول
اتجوزتك ومازلت احبك تعنى لى الحب الحقيقى

خواطر شابة said...

جميل تقسيمك قصص الحب لموسمين يعني عرض شتوي وعرض صيفي
التفسير الذي اعطيته للعلاقة في الموسمين فيه كثير من الحقيقة
لكن مع ذلك الحب الحقيقي هو الذي يعيش في كل المواسم عرض مستمر
تحياتي لك

donya said...

مساء الخير
بوست لطيف اوي
عجبني وصفك للحب الموسمي
ده مش حب ده كده حاجه علي الطاير
الحب الحقيقي مابينتهيش والا له موعد والا فصل
هو ممكن يكون فصل بايخ بس ههههههه

تحياتي

Somaya Kamal El Din said...

حلو موضوع الحب الموسمى
شكلك كده عاملة دماغ تومام اوووووى

بس تصدقى هو الواحد اصلا نفسه مفتوحه
بس ناقصه المصيف
ههههههههههههههههههههههههههههههههههههههههههههههههه

Cute Kitty **sookra said...

حلوه فكره البوست دا وجديده
حلو حكايه الحب الموسمى دى
زى المطر الموسمى كدا
ولا دا حاجه تانيه
وموش عاوزه تفرسينى
ربنا يوفق كل الاحبه
ويبقى كل الاحبه اتنين اتنين
ههههههههههه
الف سلامه عليكى من البرد والكحه
مساكى شيكولاته بس موش تكترى منها عشان البرد

amirelhob said...

معقول من غير فرسه انتى اكيد تعبانه جدا انتى لازم تكشفى وتزورى السيده والحسين ÷هههه
بجد انا بقعد اضحك اوى فى المدونه وبجد مش عارف ابطل مجيش هنا ادمنت الفرسه خلاص بس بجد البوست دايما تحفه ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

قوس قزح said...

:)
بصرة يا روسة
انا كمان بشوف الصيف موسم ازدهار الحب
يمكن لان البنات و الولاد بيكونوا اجازة و بيقدروا يخرجوا اكتر و يتقابلوا اكتر

بس مع كده حب الشتا احلى ..اصله بيدفى القلب :)

بس عارفة
مش بس الحب اللى بيدفى القلب فى الشتا
كمان الحنان لما تلاقيه من اى حد بيعزك

كل موسم و انتى طيبة :)

blue-wave said...

مممممممممممممممم
بيقولك الحب الشتوى بتكون فيه العواطف ممطرة
والأحاسيس دافئه
بوست فى المجمل
رائع

Dr. Ibrahim said...

هو يعنى مفيش حب فى الخريف ولا حب فى الربيع
؟؟!!!
يبقى كده محدش فهم الحب صح ومحدش وصل لمعنى الحب الحقيقى؟؟!!!!

الحب واحد على مر العصور والازمان وجميع فصول السنة

عاشقة القمر said...

هههههههههههه يوست جميل هو انتي شربت الشربوت طلعت منك فرسه ههههههههههه
ايضا شربوت خليكي تقولي كلام داه ههههههههههه
انا بصراحه مش عارفه الحب فصوله
بس عارفهفعلا ناس في الشتاء بيكون كسلان عشان برد
في الصيف مخنوقه من حار
احلي فصل هو الخريف تشعر ناس بارومانسية
يعني كلامك صح
اعطيك تاني كباية شربوت هههههههه

ameen said...

هههههههههههههههه


وربنا حاجه ممتازه

قال يعنى فيه حاجه اسمها حب اصلا


دا اسمه وهم الصيف والشتا

نايس بوست

Anonymous said...

السلام عليكم
الاخت مفروسه
جزاكم الله خيرا
ألف سلامه عليكي وربنا يقومك بالسلامه
بس حاولى تتاكدى كده ان الانفلونزا دي مش بتعدي حد عن طريق المدونات
عشان يعنى البس كماماه وانا بازور مدونتك
او انتى باه متبقيش تدوني وانتى عندك برد
معلش يعنى انا صريح زياده شويتين
بس معلش برضه المرض وحش وفيه حاجات كتير مش مضمونه اليومين دول
هههههههههههههههههههههههه


انا اول مره الاقى حد بيربط مابين الصي او الشتا وبين قصص الحب

انا عن نفسي مش لاقى رابط كبير بينهم الا اذا كانت قصص الحب مبنيه على الشكل والشكل بس
ودى غالبا ما بتفشل القصص دي
لازم تكون مبنيه على حاجات تانيه بجانب الشكل

وبعدين يعنى ليه ميبقاش بعد الجواز برضه يكون الجو ربيعي معتدل والرياح هاديه وفيها نسمه جميله
والجو شاعرى
ليه ميحاولش كل طرف انه يرجع الرومانسيه تاني ولو مثلا مره فى الاسبوع

ربنا يصلح الاحوال
ملحوظه فى الاخر
غريبه يعنى مفيش فرسه المره دي
ربنا يبعد عنكي الفرسه

snohe said...

صديقتى العزيزة سلامتك من البرد
انا معاكى اننا بنتغير فى الصيف والشتا
بس تعرفى اكيد ده مش حب بجد
عشان نقول اننا بنحب بجد لازم نفكر كويس ونختبر مشاعرنا فى الصيف والشتا
ونجرب نبعد شويه


المهم الصدق فى المشاعر

تحياتى

Che said...

اولا الف سلامه عليكى و يارب تخفى بسرعه .... متنسيش تاخدى الدوا
تانى حاجه دايما حب الشتا هو اللى بيعيش على رأيك
تحسى اكمن الواحد قاعد فى البيت فبيبتدى يبنى عوالم من الرومانسيه و يعيش فيها
غير الصيف ... أوام أوام و اللى بعده

احلام جوليا said...

الف سلامة عليك يا مفروسة يا حبيبتي كلامك الجميل فكرني بصراحة باي زمان ايام الجامعة وايام ثانوي وايام ما كنت بروح النادي مع صحباتي وايام وايام والنهاية ضحكتني النهاية الخريفية وطبعا ده كان ايام زمان لاني زيك برضه متجوزة وعندي قرطة عيال بتخليني احس اني معنديش وقت للرومانسية الا على الورق ومع الذكريات تسلمي يا مفروسة يا مفكراني بالجمال كله

سواحة said...

كلامك لذيذ ونظرة زمنية للقصص الحب

تعرفى فى مصر احنا تقريبا مابنحشس بفصول غير الشتاء و الصيف
الربيع خماسين و تراب
و الخريف الى مش عارفة تلبسى فيه ثقيل و لا خفيف بيوقوا من حساباتنا

فى اوروبا الربيع مميز قوى فى قصص الحب
بكون الطف جو و الالوان فى الطبيعة و اللبس مزهزة و حلو
و اليلى بتبقى داقئة و لطيفة و اغلبها حفلات فى الجناين

وهب يجى الصيف و تلاقى البطون امتلائت بالعيال :-) تطور طبيعى للطبيعة
انما اتستمرار القصص فمشكوك فيه قليل الى بيصمد الخريف (الى بيبقى امتحان فعلا للعلاقات :-)
واذا كان حيكمل للشتاء

well said...

حبيتك بالصيف حبيتك بالشتا

اللى بيتخلق فى ايام الشتاء...تعديل
اللى بينشأفى ايام الشتاء
تحياتى ..

صيدلانيه طالعه نازله said...

بصى يا فروستى موضوع الحب فى الشتا و الصيف دى صح جدا يعنى تلاقى حب الصيف ده بيكون للشباب الروش اللى اقصى طموحه رنه الموبايل و الجيل فى شعره
لكن حب الشتا ده للناس الهاديه الرايقه لان مشاعر الشتا بتبقى بطبيعتها هاديه و جميله
بس انا مش ملاحظه حاجه تفرس فى البوست ده و ده قلقنى جدا و حاسه انه تخاريف مرض
الف سلامه يا قمر

شفـقــة و إحســــان said...

سلامتك يا جميلة.....الانفلونزا دى وحشة اوى
بس ايه البوست العجيب دى؟؟
هو الحب كمان بقى موسمى صيفى وشتوى