كل عام و انتم بخير

ازيكم جميعا
كل سنة و انتم طيبين و بخير
و ان شالله اللى نفسه فى حاجة ربنا يحققهاله لو فيها خير


زي ما انتو كنتوا ملاحظين انا كنت قافلة المدونة
مش علشان حاجة بس كان نفسي اغير فيها شوية
و بعدين افتكرت اني لما بلعب و اغير فيها حاجات بتبوظ منى
قلت بلاها خلينا زي ما احنا،
و ده غير انى لاقيت صورة مفروسة فى مدونة تانية
زعلت مش عارفة ليه؟
مع ان الصورة اصلا انا جايباها من النت
يعنى اي حد ممكن ياخدها
بس حسيت فى التدوين ان الصورة كفيلة انها تعرفك مين صاحبها
و تغني عن انك تدور على الاسم
وده بالنسبة للناس اللى مش غيرت صورة البروفيل بتاعها و ثابته عليه
يعنى صورة فاتيما اول لما اشوفها اقول ديه فاتيما
و صورة البروفيل بتاع مفقوعة

و البروفيل بتاع كاميليا و رندا و قوس قزح و غيرهم
كلها صور من النت بس خلاص احنا المدونين عرفنا بعض بيها
و لسة مستنية يغير الصورة بس يظهر هو مبسوط انى مفروسة منه

المهم
انا طبعا مش ينفع اعيد عليكم و امشي من غير ما اقولكم على فرسة صغنونة كده

النهاردة شائت الظروف انى اتلاقى مع بعض الشخصيات
كان منهن السورية و الاردنية و المصرةي من اصل تركي

المهم ان الاحاديث اللى دار بيننا كان معظمها عن البلاد الاربعة
مصر و تركيا و سوريا و الاردن

مش حفرسكوا بتفاصيل الحديث
و لكن ما احزنني
ان هم اجمعوا على ان مصر دون عن البلاد الاخري
التى لا تحترم قوانين المرور و كل ما بها عشوائي
صحيح بيحبوها جدااا
و لكن السورية قالتلى احنا دلوقتى بنحب بشار جداااا
الشوارع بقت منظمة جداااا
يعنى مش ينفع تاكسي مرة واحدة ياخد يمينه علشان يركب ناس
على طول بيتاخد مخالفة بحوالى 2000 دولار
و ان الباسات ليها حارة مخصصة لايمكن ان تسير فى نفس المكان اللى بتسير فيه العربيات
ده غير ان التركية اكدت ايضا ان صحيح يوجد زحام و تكدس مروري فى بعض الشوارع
لكن يوجد نظام ده بالنسبة لتركيا
الاتوبيسات لايمكن لها ان تسير و بابها مفتوح مثلا
و اكدت ايضا ان التاكسيات ليها مكان مخصص تتوقف فيه مش فى اي حته ولا اي مكان
علشان تركب او تنزل ركاب
يعنى سوريا و تركيا بدأوا يبعدوا عن العشوائيات فى السلوك العام
و يلتزموا بالنظام
الاردنية ماقالتشي حاجة عن الاردن كانت ساكتة
يمكن حالها زي حالى

اتفرست جدا الصراحة
يعنى بلدنا و الهرجلة اللى احنا فيها ديه
نابعة على فكرة مننا احنا
احنا اللى مش منظمين
احنا اللى مهرجلين
و ديه حاجة برضه تؤآخذ عليها الحكومة
انها مش فاضية انها تجبر الناس على النظام
لأ هيه بس فاضية للم الفلوس من الناس
حاجة تفرس

حمدت ربنا اننا لم نتحدث عن النظافة
كان زماني دلوقتي منتحرة مش مفروسة بس


كل سنة و انتم طيبين و معايا مفروسين

13 زارونى......و اتفرسوا:

طوبه فضه وطوبه دهب said...

كل سنه وانتى بالف خير وصحه وسعاده ياقمر

Mahmoud البطراوى said...

لعمك بقى احنا المرور بتاعنا زى الفل
هه بقى
وانتى حره بقى تتفرسى متتفرسيش
احنا احسن مرور فى العالم

وكل سنه وانتى طيبه ومتمتعه بمرورنا :P :P

بسمه عبدالباسط said...

كل سنه وانتى طيبة

وبعدين بخصوص النظافة كويس انهم ما اتكلموش عنها لانك كنت هتتفرسى فرسة وكنا هنتفرس معاكى احنا كمان ولاننا اخر ناس نتكلم فيها
:))

Anonymous said...

السلام عليكم
مبروك الافتتاح الجديد

بالنسبة لمصر فالقانون أتى ونُفذ لكن لا حياة لمن تنادي يا سيدتي الفاضلة ... نحن بحاجة لتغيير ثقافة شعب

انت مش شايفة إن قانون المرور الجديد جيد جداً ؟

لكن للأسف ما زلنا بحاجة لمزيد من الوقت لإجادة تطبيقه وتقبل الناس له وتلك ثقافة ستأخذ وقت كثير

لكن على كل حال أنا شخصياً ملاحظ إن في تحسن
وهقلك إن ثقافة المواطن بتتغير تدريجياً .. على سبيل المثال أنا أطل من البلكون الخاص لميدان جديد نُفذ في الشهرين الماضيين بكفر الشيخ والله يا ستي كانسلوم السيارات والمواطنين في البداية سيء جداً لكن مع الوقت أصبح هناك احترام للإشارة حتى في منتصف الليل والله العظيم كثيراً ما أخرج لأجد أناس ينتظرون بسيارتهم الإشارة رغم عدم وجود شرطي مرور في هذا الوقت

الحكاية مسألة وقت وتطبع

يمكن القاهرة مشكلتها متفردة لكثرة المركبات بشكل غير عادي وأظن أنه لا مثيل له حتى بلندن

على فكرة في لندن بيقسموا الوقت بين السيارات الملاكي والأجرة وهكذا
يعني في أوقات ممنوع سيارات النقل تخش فيها داخل لندن وهكذا

المهم أنا شخصياً أتوقع مع إنتهاء مشروع استبدال تاكسيات القاهرة وكذا المشروع الجديد الخاص باستبدال الميكروباص سيكون هناك شكل جديد للمرور بالقاهرة

دمتِ بكل ود

Unknown said...

ألف بعد الشر عليكى
من الفرسة ومن النحرة
ربنا يهدى بلدنا
حكومة وشعباً
نهارك ابيض
وكل سنة
وأنتى
بخيررررر

قوس قزح said...

كل سنة وانتى طيبة يا جميلة
و عادى تلاقى الصور و الاسماء بيشترك فيهم اكتر من حد و اعتقد ان اسم مفروسة موجودة فى اسماء مدونات تانية .. بس تعليقك و اسلوبك دايما له تاثير خاص على اللى بيقراه

اما عن المرور فاسالنى انا لانى اكتر واحدة متعذبة منه لان لو الناس كانت بتسوق على القانون كان زمان باخرج بره الرحاب و مش عاملة حظر تجول فيها

يارب تكون السنة الجاية فرستها اقل لكى و تكون كلها سعادة و حب و نظام :)

صيدلانيه طالعه نازله said...

كل سنه و انتى طيبه يا حبيبتى و ان شاء الله السنه دى تتحققلك امنياتك
ياااااااااارب
موضوع الصوره ده ملخبطنى جدا انا كمان
بس معلشى بقى حنعمل ايه بقى

دكـــــتور جدا said...

كل سنة وحضرتك طيبة

ومن غير فرسة

تحياتي

!!! عارفة ... مش عارف ليه said...

في البداية احب احييكي على موضوعيتك بالنسبة لموضوع الصورة ده

لإن اعترافك بإن الصورة من النت وإنها مش ملكيه خاصة وممكن جدا لما الحد ده يغير صورته تلاقي حد تاني واخدها بردو

وده وارد جدااا

ومش قصدي إني اسبب لك فرسة جديدة ولا حاجة

إنما طبعا كلامك عندك كل الحق فيه بالنسبة لموضوع الصورة ده

لأنها بتبقى زي الأيقونة بالنسبة لصاحبها

وبالسبة لموضوع المرور افتكر إن إحنا بردو فاشلين حتى في عدم الالتزام

لإن عدم النظام عندنا غير منظم


وإن شاء الله السنة الجاية تكون بدايتها اخبار حلوة

على الأقل بخصوص الأيقونة بتاعتك ;)


وليد

Anonymous said...

السلام عليكم
حمدا لله على السلامه
انا قلت يمكن المدونه مغلقه عشان مدفعوش الكهرباء ولا حاجه
ظلمتك
طلعت مغلقه للتحسينات

كويس برضه التظبيط كل شويه
بس المدونه زي ماهى
هى كويسه طبعا
بس انتى قلتى هاتظبطى وكده
فقلت يمكن هلاقى باه ناس شغاله تدهن واللى بيمحر
على فكره كويس انك معملتيش حاجه
هى كويسه كده

بالنسبه للمرور
دى حاجه تغيظ فعلا
المفروض الامور تبقى احسن عندنا
لكن الدول اللى حوالينا بتتقدم واحنا زي ماحنا
المفروض يبقى فيه قانون يمشى على الكل
وقبله ان الشوارع تكون متظبطه
مش تتروق قبل زياره السيد المسئول فلان او علان بس
مش ده حقنا برضه ولا انا غلطان
ولا كل شويه بس هاتوا ضرائب هاتواضرائب
وخلاص
ربنا يرحمنا
ربنا يكرمك ويوفقك للخير

اقصوصه said...

سنه زاخره بالطاعات

اتمناها لك :)

عاشقه الرومانسيه said...

كل سنه وانتى طيبه ومش مفروسه خالص
(:

Unknown said...

في حالة من الاهمال اصلا في البلد
الاهمال و الطناش
و عدم النظام في كل حاجة
كل حاجة فعلا بقت صعبة
و زحمة
و الناس بقوا سريعي الغضب و مقهورين و اخلاقهم اتأثرت من القهر النفسي
اللهم سلم