هل المواقف تغيرا لشخصيات؟

ازيكم جميعا

يارب تكونوا بخير

اولا وحشتوني كلكم

ووحشنى قرائة ما تكتبون

ووحشنى الرد على تعليقاتكم

و ان شاء الله استرد نشاطى من تاني

بس انا ليا سؤآل

حد فيكم مرة اتحط فى موقف، او حصله موقف

و حس بعدها ان شخصيته اتغيرت؟؟؟

سواء أكان التغيير بالسلب او الإيجاب

يعنى مثلا كان لا يكف عن الكلام

و بعد ان حدث موقف ما

اصبح نادراً ما يتكلم

كان يأخد مثلا الأمور ببساطة

و بعد مرورة بموقف ما

اصبح معقد؟؟؟

كان خجولاً و اصبح جريءً

يعنى المواقف ممكن ان تغير من شخصية الانسان

انا بقول اه

انا بعرف ناس كانت شخصية متحدثة لبقة

تجذب بحديثها و اسلوبها من حولها للأستماع اليها

و بعد ان مرت بموقف ما

عجزت فيه عن الرد ..و ذلك بسبب وقع الكلمات الغير متوقعة على مسامعها

و اخلاقها و تربيتها الرفيعة اللتى كانت العائق فى ان ترد الاسائة بإسائة مثلها

قولا او فعلا

هذا العجز اللحظى اصابها بنوع من الصدمة الدماغية

اللتى اثرت على شخصيتها

بالسلب و ليس بالإيجاب

اصبحت تتلعثم فى كلامها بعد ان كانت لبقة

اصبحت اكثر حساسية لوقع الكلمات على مسامعها

مع انه فى اغلب الاوقات كلام لو حد تاني سمعه

حيقول كلام عادى

بس هيه مش شايفاه عادى

اصبحت من الآخر شخصية مهزوزة

عكس ما كانت عليه فى السابق

بعد ان كانت حكيمة فى تصرفاتها و كلامها

اصبح الكل يؤآخذها على كلامها و تصرفاتها

(صعبانة عليا)

انا كانت نصيحتى لها

ان المواقف اللذى يمر بها الانسان فى حياته

وظيفتها ان تزيده صلابه

و ليس ان تضعفه

ولو شعر للحظه انها تسببت فى ضعفة

او عادت عليه بالسلب

فعليه ان لا يستسلم لها حتى لا تتفاقم الحالة

و يكون من الصعب ان يداويها

و ان تفاقمت

فعليه الاعتراف انه فى حاجة ماسة لمساعدة خارجية

متمثلة فى دكتور نفسي، او متمثلة فى اشخاص

يرجعوله ثقته بنفسه

ده كان رايي

و بعدها نظرت الى نفسى

و حاولت التركيز مع نفسي

هل شخصيتى اكتسبتها من مواقف مرت علىَ؟

متهيألى اه

يعنى الفرسة الى انا ببقا فيها ديه

اكيد انا كنت مفروسة زمان

او بمعنى ادق كان عندى الاستعداد

و اكيد حصل موقف فى حياتي زود الفرسة ديه

بس انا بحاول افتكر ايه ايه ايه ايه؟

مش فاكرة و ده اللى فارسنى

تحياتي ليكم

و ان كان عند حد فيكم مواقف ممكن حد يستفيد منها

المدونة بتاعتكم و انتم عارفين من زمان

تحياتي

33 زارونى......و اتفرسوا:

الجواز و سنينه said...

الله عليكى يا ممخمخانا يا جميل
موضوع رائع كالعاده
بصى يا ستى
اكيد شخصيتنا اللى بنوصلها يتتكون مع الوقت و مع تراكم المشاكل و تعاقبها
يعنى اكيد انتى النهارده مش زى سنه فاتت
بس الاكيد الاكيد
ان كل ما الواحد بيكبر بيفقد الرغبه فى الكلام
ساعات حتى بيفهم الناس من اول كلمتين و يبقى عايز يخيط بقهم اللى عمال يلك على الفاضى
اما بقى لو حد بسبب موقف معين فأتغير كلينا
اكيد ده هايكون موقف مش هين علشان يسيب الاثر ده عنده


" كنت عملالك عندى اهداء و لا حتى دخلتى شوفتيه "

Mafrousa said...

الجواز و سنينة
--------------
انا آسف يا جميل حاجى حالا اشوف الاهداء الجميل
اللى يهدى من الفرسة شوية
ههههههههههههههه
بصي
بالنسبة للتقدم فى السن
و اللى يعيش يا ما يشوف
انا معاكى
بس ساعات بيحصلك موقف مثلا مش كنتى تتوقعيه
يأثر عليكي بالسلب
و تحسي بعديه ان شخصيتك اختلفت
هههههههههههههه
بقيتى نكدية مثلا
و ده طبعا حيكون بعد الجواز
ههههههههههههه
عصبية
و ده طبعا بعد الخلفة
بس ممكن يحصلك موقف يأثر عليكي بلإيجاب
اتحطيتى فى موقف و نجحتى فى الخروج منه
ده بقا حيزيدك ثقة بالنفس
و حيكون تأثيره عبى شخصيتك بالايجاب
ههههههههههههههههه
تذاكري لواحد من اولادك و ينجح
هههههههههههههه
حيديكى ثقة انك ممكن تكونى مدرسة
هههههههههههههههها
نورتيني

صيدلانيه طالعه نازله said...

اكيد يا روسه كلنا بنتأثر بالمواقف اللى بنمر بيهاسواء بالسلب او الايجاب
الانسان اصلا الكائن الوحيد الذى له تاريخ و تاريخ كل واحد فينا اكيد هو خلاصه تجاربه اللى مر بيها
و اكيد يا روسه الانسان لو مر بموقف صعب عليه اكيد حيأثر فيه قوى يا اما يقوى شخصيته يا اما يهدها قوى
مش عارفه ليييييييييييييه حاسه انك بتلقحى كلاااام
هههههههههههههههههه
و لا اللى على راسه بطحه
بحبك يا روسه

Mahmoud البطراوى said...

عشان كده بيقولوا الزمن بيعلم
بيغير ازاى الا عن طريق اننا بنتغير من خلال مواقف بنمر بيها
ونتغير من خلال مواقف بنمر بيها
ونتغير من خلال مواقف بنمر بيها
لحد ما نبقى اتغيرنا ويبقى الزمن بيغير :D

Mafrousa said...

صيدلانيه طالعه نازله
-----------------------------
هههههههههههههههه
و الله ما بلقح ولا حاجة
ههههههههههه
ده انتى عفريتة
و انا كمان بحبك اوي

بس برضه مش جاوبتى لو التأثير كان سلبي
حنسيبه ولا نغيره ولا نستعين بصديق
ولا نستعين بدكتور نفساوي
و نتجنن و خلاص
هههههههههههههه

Mafrousa said...

بطوط حبوب
-----------------
ايوه يا بطوط
بس مش تنسا ان لو المواقف بتأثر علينا بالسلب
حتأثر كمان على اجهزة جسمنا
و خصوصا السنان
بتلاقيها تقع

و انت تشتغل
هههههههههههه
يعنى اللى بيأثر على حد بالسلب
بيأثر عليك بالايجاب
:D
حتشتغل يا عم و تركب اسنان
هههههههههه
تحياتي ليك يا بطوط يا حبوب

Empress appy said...

طبعا بيحصل تغيير فى الشخصيه
بس الاساس له دور يعنى لو هى شخصيتها قويه جدا بتقدر تتخطى ده وبترجع لعقلها تانى
واعتقد انك عارفه ده علشانى انا شخصيا

ميرام said...

اه المواقف تغير الشخصيات جدااااا
انا في موقف حصللي في 2 اعدادي
غير مسار حياتي بجد

كنت في حصة العربي
التعبير والانشاء تحديدا
وكان الموضوع تحقيق صحفي
ورحت عملت تحقيق على حق ربنا (:
واتصلت بسياسين وكلمت رجال دين وعملت تحقيق بجد

(:
ادتني 3 .. من 10 .. وقالتلي لمجهود النقل
(:
رحت اشتكيت في الادارة ...
قالو ان ده مستحيل انا اعمله (:
يا..... هاتولي المصدر الي نقلته منه وخدو الي انتو عايزينه
(:
مفيش فايدة
(:
رحت عملت ايه
بعته لمجله مشهورة
(:
واتنشر التحقيق كامل باسمي (:
وساعتها اخدت الدرجة .. وخدت حاجات كتير قووووي .. أولها نظرة المدرسة ليا بقى البنت الي بتنشر في مجلة وهيا في 2 اعدادي
(:
وبقيت على اتصال بالمجلة وبقيت بنشر شعر
(:
وبجد حاسة ان شخصيتي اختلفت قووي من ساعتها حاسة اني مش ممكن باي شكل من الاشكال اقبل الظلم او ان حقي يتاخد ولا ربعه حتى
بجيييييييييييييبه
(:

Anonymous said...

السلام عليكم
طبيعي أن سلوك الناس وخبراتهم تتطور
هذا طبيعي والطبيعي والمسلم به أن تكون من السلب للإيجاب

عن نفسي أظن أن مع المواقف الحياتية التي مرت علي أكيد تغيرت في بعض الآليات واكتسيت بمزيد من الخبرة

لا أرى تتطور سلبي في عن نفسي يستحق أن يذكر ، لكن هناك تغير وسيظل هناك تغير مع اكتساب خبرات جديدة طول ما الزمن ماشي

دمتِ بود

شمس النهار said...

شوفي الخبطه اللي ماتموتش تقوي

الانسان المفروض انه يتعلم من التجارب

والخبطه تقويه

وممكن يتغير بس للأحسن طبعا

لكن في ناس ربنا خلقهم كده
الخبطه اللي ماتموتهمش ويرتاحوا
تضعفهم وتسيب لهم عاه مستديمه في الشخصيه

واحيانا نفور من الاخر

سلامي

الجواز و سنينه said...

بقيتى نكدية مثلا
و ده طبعا حيكون بعد الجواز
عصبية
و ده طبعا بعد الخلفة

ياسلالالالالالالالالالالالالام

كأنك ماشيه ورايه
تصدقى بصيت ورايه
هههههههههههههههه

Mafrousa said...

Appy
-----
مش شرط يا آبي
لأن الموقف بيكون ساعات اقوى من قوة الشخصية
و بيأثر جامد
فالشخصية القوية مش شرط خالص
و ساعات قوة المواقف اللى بتأثر بالسلب
بيتوقف عليه مدة التخطي

Mafrousa said...

ميرام
----
برافو عليكي بجد
اهو الموقف ده عاد على شخصيتك بالإيجاب
تخيلي بقا ان كان رد فعل المدرسة ساعتها اقوى من قوة شخصيتك
هل كان سيعود عليكي بالإيجاب و لا السلب؟؟؟؟

Mafrousa said...

أحمد شريف
-------
أحمد المواقف الحياتية تاثيرها لا يحس
زي ما انت بتقول -أظن
انا بتكلم عن المواقف اللى ممكن تكون مريت بيها و لمست بعدها تغير شخصيتك
سواء اكان بالسلب أو بالإيجاب
تحياتي ليك
و شكرا على مرورك

Mafrousa said...

شمس النهار
---------
صح ده المفروض ان الخبطة اللى ما تموتشي بتقوى
و صح فيه ناس الخبطات بتموتهم
انا بقا بتكلم عن الخبطات اللى بتسيب عاهه
و العاهه ديه غيرت من الشخصية
سواء اكان بالسلب
او الايجاب
مرسي لمرورك
و تحياتي

Mafrousa said...

الجواز و سنينه
---------------
ههههههههههههه
لا مش ماشية وراكي
بس ده حال كل اللى متجوزين
ههههههههههههههههه
و انا اولهم
مع انى ما عنديش اولاد
ههههههههههههههههه
بس جوزي بمدرسة بحالها
ههههههههههههههههههههه

أحمد عبد الحميد said...

طبعا كل إنسان بتحصله مواقف بتأثر فيه حتى لو هو نفسه ماخدش باله من التأثير ده
أنا شخصيا ليا موقف صعب شوية أيام الجامعة خلانى خسرت بعض أصدقائى لفترة وخسرت اكتر إنسانة كنت بحبها للأبد بسبب إنى كنت سلبى ومتخيل إنى محترم ومن بعديها قررت والحمد لله قدرت أبقى إيجابى و محترم

Anonymous said...

ساعات المشاكل والهموم لما تكون كتير حوالينا، بنحس إننا بنغرق، فنستسلم، وتكون النتيجة إننا فعلا نغرق... عليكي إنك تذكري الناس دول أد إيه كانوا بيجيدوا العوم في يوم من الأيام، فإن إستسلموا للغرق، تعمل إيه الناس اللي مبتعرفش تعوم

سواحة said...
This comment has been removed by the author.
Mafrousa said...

ابو حميد
-----------
كويس ان الموقف اللى تعرضتله عاد عليك بالإيجاب
و دي حاجة كويسة
تحياتي و شكرا لمرورك

Mafrousa said...

هنا و هناك
-----------
:)
اللى ما بيعرفش يعوم مش بينزل المية اصلا
ههههههه
تحياتي

Mafrousa said...

wanda
------
تصدقى انا قريت التعليق بتاعك اكتر من مرة
و كل مرة اقول لو انا مكانها
طيب لو انا مكان مديرتها
طيب لو انا مكان الكبار
بصي يا قمرة
طبعا الموقف اللى انتى تعرضتى ليه ده ربنا حوله بمشيئته لكى ترجع ليكي ثقتك بنفسك و فى آرائك
و انك كنتى على حق فيما كنتى تقولينه
بس انا بقا مش فاهمة انتى سبتى ليه؟؟
ده الموقف ده زادك قوة
تخيلي بقا ان لو واحدة تانية
و طلع فى العقد مصيبة
و دخلت السجن و لا اتشطبت من نقابة الاطباء؟؟؟
تفتكري ساعتها حتفقد الثقة بنفسها؟؟
حتشك فى الناس كلها
حيصيبها خوف من الهوا الطاير
حتخاف اصلا انها تشتغل فى اي مكان
متخيله معايا ؟؟؟
بصراحة الموقف ده عجبنى
و اللى عجبنى فيه انى كنت بفكر فى كل جوانبة
مرسي كتير لانك عرضتى الموقف ده
تحياتي ليكي

dreem said...

هالون عليكي يا مفروسة يا اوختشي
تعالي بقي لحكاية التغير والتغيير في شخصياتنا وفقا لما نمر بيه من احداث في حياتنا واللي فعليا بتنحت فينا
يووووووووه يا اوختشي ما تعديش بس علشان ما تتفرسيش اكتر من كده هقول علي فتفوتة كده من التغيرات اللي حصلت لي :من كام سنة كتير كده ما كنتش اعرف اشتري ايوها حاجة خالص ابدا ولا اعرف اسعار اي حاجة وده لان جوزي كان بيشتري كل لوازم البيت وانا كنت هنومة وستوتة مع بعض ولما انفصلت يا اوختشي لقيت حالي زي الكتكوت اللي وقع فالمسقي وهوبا ابتديت اتعلم وبقيت لهلوبة لدرجه اني حتي اتعلمت النقاشة والنجارة والكهربا وبقيت ولا اجدعها اسطي .
وده بالنوسبة للمواديع الحياتية العادية اونما فالسخصية بقي فحدث ولا حرج والمدونة بتاعتك موش هتكفي للسرد
فوتك بعافية من غير فرسة

سواحة said...

بصى يا مفروسة هانم
اولا انا صيدلانية مش طبيبة
بس المهنة حكمت ابداء افهم فى الاداريات و القوانين
و بصراحة
اقولك

اعتقد الى سترها معايا
ان ربنا عالم بيا، بقلبى و نيتى و ضميرى فى الحياة و الشغل
الموقف ده كانت صعوبته عارفه فى ايه
انا كنت خايفة انطق لااهلى بالمشكلة ده
كنت مصدقة انهم ممكن يسجنونى
و انا معرفش حاجة
بس
على راى المقولة هما مالهم القانون لا يحمى المغفلين و انا مدام اتخرجت من كلية كيمة على رايهم ابقى اكبر مغفلة انى صدقتهم

تخيلى تدخلى على اهلك العالم الطيبة الغلبانة بان بنتهم ممكن تتسجن بسبب اوراق فى الشغل مش فاهماها

حتقولي اكيد البنت دى دلوقتى مبتصدقش حد :-)))
لا
بالعكس
تقدرى تقولى الاصح انا مبقتش اكذب حد

اصل الخبط ده كله
وصلنى لحالة شبه بارانويا انى كرهت زملاء العمل كلهم
لحد ما خبط فى قاع نفسى ، و توصلت ان مدام فى راى الناس مجتمعه على انها تكرهنى يبقى العيب فيا مش فيهم
و كملت انى كرهت نفسى
بس لما توصلى للقاع بتقدرى لو فيكى حيل انك تضربى الارض بعزم قوة رجليكى و تططلعى صاروخ للدنيا ثانى
و ده الى حصل
بدات ارجع لواندا القديمة الساذجة :-) بتاعت الدراسة و بدات احبهم كلهم الى ساعدنى و الى اذانى
فاكتشفت ان شبه محبوبة من اغلبهم بس انا الى اخذت جنب و هما مش عايز يفرضوا عليا ، اكمنى صعبانة عليهم من الى الخبط الى كنت باخذه و لاقيت انى بيضرب بيا المثل فى التحمل :-))

انا مهربتش قوى للدرجة
بس اخترت انى اعانى بعيد عنهم و اخلص الخطوة الثانية بعيد عن المديرة بتاعتى لحد ما تسيب المكان
حسب نظرية جحا فى تعليمه للحمار :-))

دلوقتى تسمحيلى امسح التعليق
السابق و الحالى بعد ما تقريهم
انا اصلى متعودة انى لما افضضفض قوى
بشئ حصلى او جوايا
اكتبه و بعدين اخفيه

هو ليكى علشان ممكن يوعيكى
لو شغلك دخلك فى مواضيع قانونية او ادارية و انت مش عالمة بيها قوى
اسالى قبل الى فى الشغل الناس الى بره الشغل
صور الورق و خصوصا الى فيه امضتك و احتفظى بيه
اصل فيه ناس فى الادارات مهمتها فى الحياة تلم ورق لملفات الذل و البطحات علشان يستفيدوا من اخطاء الغير
و نصيحة كمان اوعى تامنى لحد بيغطلك غلطة لانه هو بيبقى فاكرهالك قوى و مستنى
ثقى اكثر فى الى يقولك عليها و يوريك الصح ايه

الحياة تجارب و العادى اننا نغلط بس الاصح اننا نصلح مش ندفن
و الاجمل اننا نتعلم منها و نعلم بيها

Mafrousa said...

dreem
------
ازيك انتى يا اوختش
ههههههههه

انتى الموقف اللى اتحطيتى فيه كان نقطة تحول ليكي و لشخصيتك
يعنى الموقف عاد عليكي بلإيجاب

تحياتي ليكي و لمرورك

Mafrousa said...

wanda
------
من فضلك خلى التعليق
لاني حاسة ان ممكن كتير يستفيدوا منه
تحياتي ليكي

رئـــــيسـة حزب الأحلام said...

ازيك ياقمر انتى اللى وحشانا يارب تكونى فى افضل حال
بصى فعلا ممكن الواحد يتعرض لموقف يخليه يخرس ومايتكلمش الا ماقل ودل لا كتر الكلام فى ناس ممكن تفهمه غلط فساعات الصمت احسن وعلى فكرة انا حصلى موقف فى الشغل خلانى مابنطقش بعد ماعرفت ان كل كلمة بتروح للراس الكبيرة وتتاخد على مزاج اللى بينقلها
تحياتى لكى ياقمر ونفسنا نشوفك قريب

Anonymous said...

انا بأه كنت من ييجي ست سنين شخصية.. والمواقف والظروف عملت مني واحدة تانية

غصب عني يا مفروسة.. اتغيرت.. للاحسن بأه ولا للاوحش مش عارفة احدد.. عشان الشخصية الجديدة بتاعتي ليها مميزاتها وعيوبها

مش هستفيض في الرغي في الحتة دي عشان بزعل أوي لما بفتكر اني كنت أشقى بنوتة وضحك وكركرة ورغي ودوشة

الفيرجن الجديد عملته سايلانت ^_^

شكلي هتفرس انا كمان... انا همشي من هنا

مها ميهوووو

طوبه فضه وطوبه دهب said...

ربنا يشفيها الانسانه دى بس كل شخص ليه اسلوب معين فى تقبل الصدمات ودرجه تحمل فعلا موضوع جميل والاجمل تناولك له ربنا يكرمك

Mafrousa said...

رئـــــيسـة حزب الأحلام
------------------
ازيك يا ريسة
واحشاااااااااااااااااااااااااني جدااا
مبروك لسحور على الكتاب نمرة 2
عقبال رقم 5
بس علشان الحسد
ههههههههههه
بصي يا قمرة
الموقف اللى انتى تعرضتى له فى الشغل
كتير بيتعرضو لمثله
تحياتي ليكي يا قمرة

Mafrousa said...

احسن تستاهل
------------
مهاميهو يا قمرة
وحشتيني
ما تتفرسيش ولا حاجة متقلقيش
حتمري اكيد بموقف تاني يرجعك لقواعدك
و تضحكى و تكركري
تحياتي ليكي يا قمرة

Mafrousa said...

طوبه فضه وطوبه دهب
-------------------
يارب
و مش بس قوة تحمل كل واحد للصدمة
و لكن قوة الصدمة كمان
تحياتي ليكي

Anonymous said...

مفروسه هانم
جزاكم الله خيرا
طبعا فيه مواقف بتاثر فى الشخص
وممكن تغير مسار حياته
لكن اعتقد ان ده بيكون لما بيبقى عنده استعداد داخلى للتغير ده
حتى ولو الاستعداد مش كبير
لان التغيير الجذرى صعب ان يطلع من فراغ

اما الفرسه اللى عندك فاعتقد انها صعب تتعالجي منها فى ظل ظروف حكومتنا
فانتى هاتلاقى مواقف كتير تفرسك
ربنا يصلح الاحوال
ربنا يكرمك ويسعدك