كلمنى شكرا..........

ازيكم جميعا
اخباركم اييييه كوووولكم
يارب تكونوا كلكم بخير

انا بقا مفروسة
و مفروسة جداااااا
بقالى فترة لا بأس بها يجي سنتين كده
بلح على زوجي انه يوديني سينما
و هو ما بين انا مش بحب السينما و ما بين مافيش افلام حلوةقال يعنى هو متابع
المهم صادفت يوم الجمعه
انى لما اقابل حد و اقول انا نفسي اروح سينما
تأتيني النصيحة روحي كلمنى شكرا
فيلم حلو بيضحك من اول لما تدخلى لغاية لما تخرجي
ايه فيلم كلمنى شكرا ده؟؟؟؟
ده بطولة غادة عبد الرازق
و انا اصلا مش بحبها الصراحة
هيه اوفر حبتين
و لا مين الممثل اللى معاها ده؟؟؟
المهم تناسيت الموضوع
و سبحان اللى يخليني اصبح يوم السبت
و اقابل ناس من صفوة المجتمع
و الله بدون مبالغة صفوة من سيدات المجتمع
و اذ تتفتح سيرة السينما
و الاقيلكم اغلبهن اجمع على فيلم كلمنى شكرا
بيضحك موت يا مفروسة
يعنى يا مفروسة هو صحيح فيه الفاظ الاحياء الشعبية
بس بيضحك موت
انا بقا فيه حاجة لعبت فى دماغي
و كلمت زوجي و عملت شبه خناقة و اتأمصت
و انت مش بتخرجني
و انت ناسيني
و الكلام الفارغ ده اللى بتقوله الستات
قوم الراجل مشكورا وافق انه يجي معايا سينما
و ياريته ما وافق
و انا بكل سذاجة ..........نروح فيلم ايه؟؟؟؟
اختاري انتى اللى انتى عاوزاه .....علشان اخلص من زعلك
و انا .....طيب فيه فيلم الكل بيقول عليه بيضحك
تعالى ندخله خلينا نضحك شوية
و ما كدبتش خبر
و رحنا السينما و احنا داخلين ببص على الأفيش
و بقى اتفتح
مين الممثلين دول؟؟؟
انا معرفش منهم غير غادة عبد الرازق
و شويكار و اخراج خالد يوسف
هو صحيح خالد يوسف ما لوش فى الضحك
بس قلت يمكن
و الفار بدأ يلعب
و جوزي مش مركز كان خالص
مشغول بتليفونات عمل
المهم انا جبت الفشار المتين و دخلنا
و بدأ الفيلم
اوله شوية عيال من منطقة شعبيه بيلعبوا فى خرابة
قلت عادى خالد يوسف بيحب الخرابات
و بس بدأ الضحك اللى على اصولة بقا
من اول الدقائق الاولى
ايه القرف ده؟؟
ايه البذائة فى الالفاظ ديه؟
ايه غادة عبد الرازق المقرفة ديه؟؟؟؟؟
انا لو فضلت اقولكم على التلوث البصري و السمعي
مش حتصدقوا بجد
فيلم جنسي فقط لاغير
بالألفاظ و المشاهد
و لا يمكن ان يتقال عليه غير كده
طبعا انا جوزي كان باين عليه الاستياء
و الصراحة انا كمان
و جت الاستراحة
و سالنى انتى عاجبك الفيلم
قلتله و انا ببلع كسفتى يعنى
ايوه يعنى عاوزة تكملية؟؟؟؟
يعنى اذا ما كانش يضايقك؟؟
و هو صامت و ماسك ياعينى اعصابه
و بعدين بصيت فى الاستراحة على السينما لاقيتها بدون مبالغة كومبلية
و نوعية الناس اللى قاعدة كلها كويسة
يعنى مش ناس بيئة
بس الفيلم بيئة
و رحت باصة فى الساعة و قلت لجوزي بقولك ايه يالله علشان مش تتأخر على مواعيدك
و قمت جري
و هو ماصدق
و خرجت من نص الفيلم
اللى خسارة الفلوس اللى اندفعت في تذاكرة
و خسارة كل مليم اتصرف عليه
فيلم انا مكسوفة و الله و انا بقولكم انى دخلته

طبعا جوزي بقا ما سابنيش
ابقى نقى الافلام ده فيلم ندخلة؟
ما كان عندك مليون فيلم
اشمعنى ده؟
طيب ما سالتيش عن قصته؟
طبعا انا بأنب نفسي تأنيب عالى بجد
ازاي لم افعل كل ما قاله
و بدأت الدموع تنسال و كأني انا اللى مثلت الفيلم
و حسيت بالخجل الشديد من نفسي
و لاقيته بيقولى
انتى مالك انتى مالكيش ذنب انتى مش كنتى تعرفي
و بعدين الناس اللى كانوا فى السينما ناس مستواهم عالى
بس غريبة بجد ان النوعية ديه هيه اللى بتشوفه


انا مفروسة جداااا
مفروسة من نفسي
و مفروسة من الممثلين
و مفروسة من المخرج
و مفروسة من الناس اللى كانت بتضحك و ضحكتها ملعلعة
على إيييييييييييه مش فاهمة
و مفروسة انهم دخلوا الفيلم اصلا
و انا منهم
مفروسة من الرقابة اللى أجازت الفيلم
و مفروسة من الناس اللى قالتلى حلو
و مفروسة انى مش دخلت فيلم اولاد العم
مع انه كان معروض فى نفس السنما
و نويت اني مش ادخل سنما تاني
الا لما اقرأ قصة الفيلم

و اللى فارسنى اكتر انى حاسة ان جوزي مطمئن نفسيا
انى مش حجيب سيرة السينما على لسانى تاني

تحياتى ليكم و اوعوا تدخلو الفيلم

27 زارونى......و اتفرسوا:

عصـــــــــــام الــــديــن said...

بصراحه انا اول مره امر على مدونتك وبصراحه ممكن تكون الاخيره لانى بقيت مفروس ذيك والضغط ارتفع .. بس ماتخافيش انا مش مفروس منك انت ..انا مفروس من الذوق العام. الناس فى مصر بقت بتحب حاجات غريبه والاغرب اننا كلنا بقى عندنا تلوث ثقافى ممكن تقولى انه تلوث مقصود ... مقصود اننا نضحك على اللارجوزات اللى سكنين العشوائيات ... طيب هما سكان العشوائيات لقيوا سكن فى اماكن محترمه وقالوا لا؟. ... طيب هى مصر مابقاش فيها حاجه حلوه ممكن نعمل عليها فيلم؟ ليه كل الافلام بتتكلم على العشوائيات والرقصات والكباريهات والشواذ والمدمنين؟... ليه كلها بتقدم صوره مغلوطه عن المجتمع المصرى ؟ ليه بيصدروا كل ماهو سيئ للناس العرب علشان يعايرونا بيه ؟ ليه بيشوهوا صورة بلدنا ؟... بصراحه انا بقيت مفروس ذيك والفار بدأ يلعب فى عبى...!
تحياتى

قوس قزح said...

ههههههههههههههه
معلش يا روسة
تعيشى و تاخدى غيرها
و اعتقد الناس صفوة المجتمع عجبهم الفيلم على اساس انه حاجة حرشة كده و مش محتاجة تشغيل دماغ
و من باب شوفتوا الناس الشعبية بتعمل ايه ..يعنى مش بس ولاد الناس اللى بفلوسهم بيقلوا ادبهم

و بعدين مالها الافلام الاجنبى ؟
حد يدخل هربى فى السينما ؟
ما بكرة يجى على روتانا سينما و نقعد انا و انتى نرغى و نتفرج عليا

يلا معلش تعيشى و تاخدى غيرها

هي وظروفها said...

اول زياره ليا عندك
الفيلم باين كده من اعلانه وعمرو عبد الجليل قايل افيهات زباله متتقلش في مناطق شعبيه لان اهل المناطق الشعبيه محترمين عن عمرو عبد الجليل وعمرو سعد وخالد يوسف مدعي الفضيله وكره التطبيع
المفروض اعلان الفيلم بيوضح مضمونه انتي اكيد مشفتيش الأعلان صح؟؟؟؟

انا متفق معاكي في كل حاجه عن الفيلم ومتفق معاكي ان ده فيلم بورنو
في شكل كوميدي هي دي كوميديا المرحله واللي مش عاجبه الكوميديا خالد يوسف جاهز بحين ميسر اه والله عالم زباله ولالاسف بقي عليا القوم

ليه بقي تحفظ علي كلمه عندك العالم الصنايعيه مش كلهم بيئه فيهم والله ناس عندها ادب واخلاق ودين اكتر من خالد يوسف واللي خلفوه ومبيسبوش فرض ومثقفين وشهادات عليا مش معني ان حد يشتغل صنايعي بسبب ظغط الظروف وقله الشغل فب بلدنا انه يبقي بيئه اسف طولت عليكي بس حبيت ابينلك وجهه نظري

Mafrousa said...

عصام الدين
------------
اولا خطوة عزيزة
و فرستنى انك مش حتيجي تاني
اومال انا حفرس مين بقا؟؟؟؟
صحيح انت كلامك صح
كل التركيز على الاشياء السلبية فى مجتمعنا
و ياريت عرضها بيكون معاه حل

حتى الاسلوب بتاع الكلام المنحدر جدااااا
فكرة عرضه على الشاشة من باب الشفافية
بيتخذه البعض لازمة من باب انه كوووول
و فانكي
حاجة تفرس بجد
تحياتيو شكرا لمرورك

Mafrousa said...

قوس قزح
-----------
اه و الله يا دودو
قلة عقل بعيد عنك
حد يدخل افلام عربي برضه
ديه حاجة تفرس

Mafrousa said...

هيه و ظروفها
-------------يعتذر عن المسمي
بس كنت اقصد الناس اللى همه اسلوبهم بيكون خارج فى الكلام و الالفاظ
مش اقصد حاجة تانية
و حشيلها حاضر و اكتب حاجة تانية
تحياتي لمرورك

شمس النهار said...

تعيشي وتاخدي غيرها
وحياتك تعملت فيه قبل كده
وبرضه طلعت من نص الفيلم

وعلي فكره مش شرط ان تكون قصة الفيلم كويسه ويبقا السيناريو كويس

فيلم باللالوان الطبيعيه قصة كويسه جدا
لكن السيناريو والتصوير والهبل اللي اتعمل ظلمها

سلامي

Anonymous said...

السلام عليكم
تعرفي بصدق كنت هكون عنك انطباع غير جيد لو واصلت لنهاية التدوينة ووجدت رأيك في ختامها كرأيك في بدايتها

لم أستمع للفيلم ولكن شاهدت إعلاناً له وقرأت تصريحاً لفنان محترم عنه وهو نبيل الحلفاوي

وبصراحة أنا مفلوق من هذا السفه وهذا الانحطاط

وهذا المدعو خالد يوسف لا سامحه الله على ما يفعل بنا وبالناس من ترويج لمثل هذا الإسفاف والانحلال

لازلت أتذكر موقف في بطولة كأس العالم الأخيرة التي نظمتها مصر في شهري سبتمبر وأكتوبر الماضيين حينما انتقل النتخب الإماراتي لمدينة السويس ليلعب بها وقام مجموعة من ممشجعيه بتصوير مدينة السويس الجميلة وعرض صورها على أحد المنتديات الرياضية التي أتابعها وفي قسم المنتخب الإماراتي وجدت تعليقات الشعب الإماراتي تضحك وتبكي

وجدت الغالبية تبوح وتقول : ما دامت مصر كده ليه أفلامها مبتورناش غير السفة والفقر والغش والفساد

الله المستعان

أنا على فكرة مؤيد لأي فن محترم مهذب ولائق .. لا يروج للفساد والعري وكذلك ليس عندي مانع في فن يكشف الفساد شريطة ألا يحاكيه بصورة مختلة تغرس مشاهد الفساد في النفوس

دمتِ بود وعذراً على الإطالة

Anonymous said...

مفروسه
جزاكم الله خيرا على توضيح حقيقه الفيلم
ده شيء متوقع من اللى بيطلعوه دلوقتى
وكمان انا لا اتوقع خير من واحد زي خالد يوسف
ومش شايف سبب للهاله اللى بيطلعوها عليه
وانتى شفتى بنفسك اهه

اما عن الرقابه فطبعا عادي منها برضه انها توافق على مصايب زي دي انما لو كان الفيلم فيه كلمه كده ولا كده سياسيه كان اصحابه اتبهدلوا
انما مادام بذاءات لفظيه وبصريه فمفيش مشاكل

حسبنا الله ونعم الوكيل
بس بصراحه انا شايف ان فيه غلط على الناس
انهم بيروحوا للناس دي وبيدفعوا لهم فلوس
ربنا يكرمك ويسعدك

ميرام said...

(:
بس ببتسم
الكتاب بيبان من عنوانه
(:
تعرفي ان مشكلة كبيرة فعلا بقت في الناس
الناس مابقتش عارفة تقيم ؟!
عشان كده فيلم فاااشل ومالوش قصة زي عمر وسلمى ياخد ايرادات عالية جدا
(:
دايما لما الاقي ممثل أهبل وفاكر نفسه نجم او للاسف نجم فعلا بقول ليه حق
احنا الي عملناااه (:
ربنا يهدينا جميعا
ومعلش خيرها في غيرها (:
بكره تدخلي ( اشحنلي شكرا)
هههههههههه

صيدلانيه طالعه نازله said...

هههههههههههههههههههههه
و بالمناسبه السعيده دى احب اوجه لجوزك نداء انه عقابا ليكى على اقتراح الفيلم ده تفضلى سنتين كمااااااان من غير سينما
بلا دلع ستات

تعيشى و تتسكى يا رووووسه

سواحة said...

:-))
معلش مفروسة هانم على الفرسة

بس عارفة فعلا الواحد مفتقد فى الافلام العربى التصنيف بتاع الافلام الاجنبية
يعنى تلاقى مواقع الافلام الاجنبية يقولك ازى كان فى الفيلم كلام بذئ او عرى او مناظر خادشة للحياء او عنف
و درجتها و عدد المشاهد
يعنى يعرفى الفيلم قبل ما تتصدمى فيه جوا السنيما

المهم انا ما شوفتش اعلانه و لا حشوف الفيلم خالص
انا اتجننت اتفرج على فيلم لخالد يوسف
:-((

و بعدين انا عندى بابا
عادل
http://www.blogger.com/profile/13760479324391446778

خبير الافلام و حاخذ اذنه قبل ما ادخل فيلم عربى قبل الاجنبى :-))
ابقى خذى رايه المرة الجاية

شهد الكلمات said...

و نبي يا ست مافروسة انا ما عارفة الاعلام هايوصلنا لفين

من كم يوم كنت في الشغل و واحد زميلتنا و ست كبيرة و كومل كدة دخلة بتسالني انا و بنات زمايلي
شوفتوا اعلان كلمني شكرا
قومت انا و بدون تردد قولتلها اه ده جميل اوي
الست بصتلي بستغراب فيما معناه اية البجاحة دي
قولتلها مش هو بتاع حولي شكرا حول ادفع لغيري حول العرايس الجميل ده
راحت بصتلي بستغراب اكتر بس المرة دي مصحوب ببصة اية الهبل ده
و حكتلي ع الاعلان اللي عجبها جدا
و بصراحة انا مش عارفة عجبها في اية

بس واضح ان الناس مكبوتة و عايزة تنحرف
و الله اعلم

WhItE HeArT said...

ازيك يامفروسة

يارب تكوني فاكراني

تصدقي بأه انا فعلا هتفرس

والله اول مرة اسمع عن الفيلم ده ؟؟

ده نزل امتى وله ايه حكايته ده

؟؟

وبعدين هو مبقاش في افكار في السينما بتاعتنا غير القرف ده ؟؟

بجد في نوعيه افلام في غاية القرف

انا طبعا مشغول في كليتي ومباخدش بالي من يومين بالظبط كنت معدي من جنب التليفزيون ولقيت اختي الصغيرة بتتفرج على اعلان فيلم انا معرفش ده فيلم ايه بالظبط بس بالامانه حاجة منتهى الكسوف

المصيبه انا بجد مش عارف لما بنت في سن اختي تتفرج على حاجة زي دي ايه اللي هيخطر في بالها او ايه اثر التراكم الثقافي ده عندها

بجد بجد

حاجة تفرس

تحياتي

حروف said...

بصراحه انا استغربت من ان الناس كلها بتقوللك بيضحك انا شفت بس الاعلانات بتاعته ف التلفزيون وعرفت اللي فيها

وغادة عبد الرازق دية بقت حاجة استغفر الله العظيم انا مش فاهمه ايه اللي جري ويكفي اسم خالد يوسف عشان مدخلش اي فيلم

دمتي بالف خير

احلام جوليا said...

معلش خيرها في غيرها وابقى اختاري فسحة غير السينما او اجنبي اكثر ادبا صدقيني من السينما المصرية وخصوصا خالد يوسف تركيزه كله في السكه دي مش عارفة ليه وعلى فكرة لو شفتي اعلانات الفيلم كنت عرفتي نوعية الضحك الي فيه بس شكلك مش متابعة ومتزعليش بقى يالله سلام

donya said...

صباح الخير

حد برضه يدخل فيلم لخالد يوسف وكمان بطولة غاده

بصراحة انتي الغلطانه
اهو كده انا اللي اتفرست
باي

Mahmoud Ahmed said...

هو اصلا مفيش افلام عدله بقت تتشاف خلاص
كل الافلام بقت خليعه
ولو معلموش كده مش هيجيلهم فلوووس
و انتي تعرفي الفيلم من الممثلين الى فيه
كفايه غاده عادل بس
ده بقت مشبوهه خلاص
و لا الثاني خالد يوسف المخرج تلميذ يوسف شاهين
كل الآفلام بقت بالمنظر ده
انا مقاطع السنما الحمد لله بقالي 3 سنين و هفضل كده لحد لما يعرضوا حاجه محترمه

!!! عارفة ... مش عارف ليه said...

اسمحي لي اقول لحضرتك على وجهة نظري

لإختيار فيلم

وإن شاء الله متكنش سبب فرسة لك ولا حاجة


أولاً اسم المخرج ثم السيناريست ويليه الممثل ثم الممثلة واخيراً مدير التصوير

ولو اجتمع عنصر مع اتنين تلاتة من دوول يبقى الفيلم يستحق المشاهدة

وبناء عليه أدخله

وبالتالي مؤكد إن مش مفروض أدخل فيلم

علشان حد بيقول إنه بيضحك


تحياتي
وليد

richardCatheart said...

هههههههههههههههههههههههههههههههههههههههههههههههههههه
والله موتنى من الضحك وليكى حق تتفرسى وطقى بعد الشر عليكى من الفرسه والله دا الكلام اللى قولته اول ماشوفت برمو الفيلم واتصدمت بناس صحبنا كتير حولينا دخلو واللى عايزين يدخلو الحقيقه مابحبش النصح بس قولتلهم كلمه واحده البرمو نيله وخالد يوسف نيلتين اشربو بقى

ياستى ولما توحشك السيما اوى عندك افلام اجنبى زى الفل تفرح اللى كميدى واللى رمانسى واللى اكشن
وفكك بقى من العربى دا خالص لانه بقى يا للاطفال يا زى ما انت شايفه والفيلم العربى الحلو قصه مسروقه
معلش تعيشى وتخدى غيرها

мαησηα said...

اول تعليق عندك .. شكلك هتحبى كلمنى وشكرا بس علشان ناس كتير علقت هنا بسببه :)

اولا تعيشى وتاخدى غيرها هههه

ثانيا انا يااوختى لقيت الناس كلها بتتكلم وبتعلق بكلام كده غريب اتصدمت لما اكتشفت انه من فيلم كلمنىشكرا ده انا بس شفت الاعلان حسيت انى عايزة اتقيأ سورى ف اللفظ

فيلم مقزز من اول المخرج حتى اصغر فراش شغال فيه

معلش معلش محدش بيتعلم ببلاش يا اوختى

جميلة انتى يا مفروسة دمتى بود

Dr. Ibrahim said...

كل فترة تظهر حاجات سماها مصطفى محمود فى كتاب علم نفس قرآنى جديد
"بالعلف الثقافى
"
هنا تخليص الكتاب

ولا حول ولا قوة إلا بالله

Dr. Ibrahim said...

أسف هنا

كيكى عوووووو said...

انا شوفت الفيلم الصراحه هو فيلم خفيف اوى بالنسبة لخالد يوسف
بس انا مقدرش اكدب واقول مضحكتش

عمرو عبد الجليل ممثل كويس بس لسه مكتشفينوا وخرى اوى
الصراحة الى مكنتش طايقها خالص ولا كان ليها اى مبرر هى غادى عبد الرازق
عمتا فيلم لايت

Ahmed Mubarak said...

والله انتي طيوبه خالص
:)

انتي بقى ممكن تقوليله المره الجايه يخش فيلم يكون اكيد هيحبه .. واديكي رجعتيه على الخط
:D

تحياتي

هي وظروفها said...

اللي يشوفك هنا ميشوفكيش علي حقيقتك

في الخقيقه

هااااااااااااااااااديه

خجوووووووووووووووله

ميتسمعش صوتها

نورتي امبارح بجد لقائنا كلنا وهضيفك عندي يا مفروسه وخجوله وهاديه

سمكه واحده said...

طب كويس انك قولتي
انا كنت فاكرها دمه خفيف
وكنت ناويه بصراحه
بس كده الله يطمنك