مش مفروسة خااالص

ازيكم جميعا
يارب تكونا بخير
و تكون نفسياتكم اهدأ

خلص الماتش
و كسبنا و الحمد لله
و الناس كلها فرحت و زأططت
و بان قد ايه ان الشعب ده بيحب البلد
و بان قد ايه اننا غيورين على بلدنا و عاوزينها فى المرتبة الأولى
و بان قد ايه اننا لا نقبل من مين ماكان ان يرميها بأقاويل
طيب و بعدين؟؟؟؟
خلص الماتش و خلص معاه الحماس؟؟؟؟؟
خلص الماتش و انتها الحب لبلدنا؟؟؟؟
اكيد لأ
@@@@@@
امبارح طل علينا فى قناة دريم
الدكتور أحمد زويل
عجبنى اللقاء جدااااا
الراجل ده كنز حقيقي لبلدنا
بتعلم منه و من اللى زية حاجات كتيره اوي
ازاي بيتكلم
آداب الحديث...خصوصا لما المذيعة تقاطعه
و هو بكل أدب يقولها سيبينى اكمل
كعادة كل المذيعين اللى بيقاطعوا الضيف

مش اتفرست خاااالص
لما المشروع القومي اللى الدكتور زويل كان عاوز يعمله فى مصر
و واجهه عراقيل كثيرة
و طبقته دول أخري و تقدمت
كمثال تركيا
اللى كان يستشهد بيها فى اغلب كلامه
حتى انها عملت أشياء لم تفكر فيها امريكا اصلا
كام مرة يقولك تركيا عملت حاجة حلوة اوي
اول مرة اشوفها حتى امريكا مش عملتها

انا مش مفروسة خاااالص
بس اللى فكرت فيه
انه لو احنا كنا لازلنا تحت الاحتلال العثماني
كان زمانا دلوقتي متقدمين؟؟؟؟؟
و لا حتى كان زمانا خدنا الكاس؟؟؟؟؟

انا مش مفروسة خااالص
لما الوزيرة مشيرة خطاب تعمل مداخلة تليفونية
و تقولة اعمل حاجة لأطفال مصر
يعمل ايه يا سيادة الوزيرة
و انتى شايفة ان الحكومة اللى بتحارب قولا تشغيل القصر
و تلاقى فى مدينة 6 اكتوبر اللى بيكنسوا الشوارع ولابسين
الافرول الاخضر اطفااااااااااال
و عليهم ملاحظ محترم راجل كبارة
و بيزعق فى الولد من دول علشان يكنس كويس
ولا علشان يلم التراب
هو يظهر و الله اعلم انى انا بس اللى شايفة الاطفال دول

حاجة مش تفرس خااالص

اللقاء بصراحة كان ممتع 4 ساعات غنية جدااااا
منها ما اضحكنى لدرجة البكاء
لما حكى انه علشان يزور البيت الابيض عليه ان يدفع 100 دولار
و ده مش رسم دخول ولا حاجة
لأ
ده لأن زيارته مع الرئيس اوباما حيتخللها فترة غداء او عشاء
و ديه قيمة الوجبة اللتى سوف تقدم
حتى أتت المذيعة بمزحة دمها تقيل شوية
بس هو بكل بساطة قالها
البيت الأ بيض مخصص له بدل ضيافه فى اليوم 65 دولار فقط
و بما انه علامة و كبارة فلازم تكون المائدة تليق بيه
مش زتون و جبنة
فده سوف يكلف البيت الابيض اكتر من المصرح له
فلهاذا لابد ان يدفع تلك القيمة
لأنه كمان الدنيا عندهم مش سبهللة
يعزموا طوب الارض و ياخدوا من خزينة الدولة
و بعدين يطلعوها على جتة الشعب
لأ
كل شيء بنظام
رئيس الدولة ما هو الا موظف كأي موظف
و له عهدة ومصاريف وظيفيه مش مفروض يتخطاها
ياسلااام
حاجة مش تفرس خااااااااااااااااالص

انا لوفضلت اتكلم عن لقاء الدكتور زويل
و الدروس المستفادة من هذا اللقاء
مش حبطل رغي
بس المشكلة مش فيا و لا فيكم
المشكلة فى أولى الامر منا
ياريت يكونوا شافوا اللقاء
و فهموا ما بين سطورة
و غاروا على البلد
و زعلوا عليها
و يحاولوا يعملوا و لو حاجة بسيطة من اللى عملته تركيا
و ماليزيا و الصين و كوريا

ازعل اوي لو مش شافوا اللقاء بسبب عزومة فى البيت الابيض المصري
كان فيها المشمر و المحمر
و اللى كلفتهم يجي 100 الف جنية ولا أكتر

حاجة مش تفرس خااااااالص

40 زارونى......و اتفرسوا:

Mahmoud Ahmed said...

و انا كمان شوفت اللقاء كله امبارح
و بيني و بينك كان ارخم حاجه فيه
مني الشاذلي و محمود سعد
و كل شويه مقاطعه و الراجل مش عارف يتكلم
...
و انما زياته للبيت الابيض ده الى كانت نكته ، يدفع عشان يتغدي
...
وشفتي لما كل مره كان بيقترح مشاريع و مش بتكمل عشان سياده الوزاراء دايمعا بيحطلوه عقبات في طريقه ، و خصوصا الحاجه عاطف عبيد ، و ادي احمد نظيف شايل ايده خالص من الموضوع اصلا

Mahmoud Ahmed said...

احنا مش عارفين نستغل احمد زويل صح
زي ما كل الدول بتستفيد منه صح
و خصوصا امريكا

امريكا خلت احمد زويل مستسار ليها

اوباما الى لسه ماسك الحكم خلي احمد زويل مستشار ليه في الشرق الاوسط

و في مصر حتي لما أخذ جايزه نويل ، برضه معبرنهوش و مش هنعبره برضه

Mahmoud Ahmed said...

و ايه بس كل شويه مش مفروسه ، مش مفروسه

لما انتي مش هتتفرسي هنا ، امال هتتفرسي امتي ^_^

ده انا اتحرق اعصابي امبارح و الله ^_^

شمس النهار said...

الحمد لله اني مااتفرجتش علي البرنامج

اصلا انا مش ناقصة فرسة

وده اللي عرفناه
اومال اللي ماعرفناهوش يبقا ايه

كمان الشخصيات الراقيه دي
بيصعبوا عليه لما يقعدوا تحت ايدينا
مذيعين الاعلام المصري
الهبل جدا

سلامي

مجداوية said...

السلام عليكم

عندك حق متتفرسيش خاااااااااالص

للأسف مشفتش من البرنامج غير جزئية اهداء الدبوس اللي ورتنا التنافس الشريف بين المذيعين وأد ايه حبهم لبعض
طبعا طبعا

أنا ليا رأى في الدكتور أحمد زويل مختلف تماما عن رأيك فيه
حاكتبه أكيد على المدونة عندي

لكن خلاصته إنه أمريكي من أصل مصري
حاولوا تنسوا إنه مصري أو صناعة مصرية أو فخر مصري
لأن ما وصل إليه كان بتمويل أمريكي وامكانيات أمريكية وولاءه غصب عن نني عينه لأمريكا
لكن طبعا هو لازم يقول وطني وبلدي
الراجل زوق جدا بصراحة على غير عادة الدماهرة لكن محتفظ بدهائهم الشديد
تركيا تحررت و لها أن تتطور
مصر لسه محتلة

عصـــــــــــام الــــديــن said...

اولا كلمة مفروسه مصدرها اللغوى ايه ؟ من الفراسه "الذكاء" ولا من االفرس ولا من ايه ؟
المهم علشان ماافرس حد
البوست بتاعك يفرس
مع انه يتميز بالفراسه الشديده جدا
اولا انا بحترم جدا منى الشاذلى وبحترم ذكائها الاعلامى لكن فيها عيب مقاطعة الضيف أحيانا وبقول أحيانا.
ومحاولة الاسقاط على المجتمع المصرى ومقارنته بالمجتمعات المتقدمه الى الامام " الناميه حقا" هتكون ظالمه جدا للمجتمعات دى
ليه؟
المجتمعات المتقدمه للامام لديها منظومة عمل محددة الاهداف والخطوات تقدرى تقولى عليها استراتجيه منظمه لتحركات الدوله ودى طبعا بيحدد لكل واحد فى المجتمع -مهما قل شأنه- دور محدد يؤديه علشان تتقدم واكبر مثال عندنا ماليزيا

اما بلدنا فللأسف الشديد تفتقد الى النظام والاهداف والخطط وكل مايقال عن التخطيط للمستقبل عباره عن حبر على ورق وكلنا عايشين فيها بدون أهداف محدده وكل اللى علينا نعمله نشتم فى بعض ومنتظرين واحد ينزل من السما يصلح لنا الكون
وللأسف دى اسمه سلبيه
وصدقينى مصر لوحبيتى توزعى اسباب تأخرها هتلاقى نصيب الشعب اكتر من 70% من الاسباب
لاننا اصبحنا نفتقد للاجابيه نفتقد للعمل نفتقد للرغبه فى تغير بلدنا بايدينا نحن وذى ماقلت منتظرين حد ينزل من السما يعدل لنا الحال
انا بتفرس بجد بقى من واحد قاعد مالوش شغلانه وماحولشى يشوف شغلانه وقاعد يشتم فى مصر وكأن مصر دى شخص حى وظالم صاحبنا
بحس انه بيجسد مصر كعدو قدامه تمثال كل ماينزنق يشتم ويضرب ويلعن سلسافيله
اسف لو كنت فرستك لكن الواقع يفرس
تحياتىه

Anonymous said...

السلام عليكم
هو عالم جليل بدون أنى شك وأنا شخصياً مفتقده
لكن بصراحة غير مقتنع بأغلب انتقاداته وحججه

يعني هو رجل فاضل آه لكن عاوز يبني في ظل ظروف لا نملكها

لا أعلم لماذا لم ينظر للدكتور مصطفى السيد .. ما هو زيه ورجل عالم فاضل ومشروعه الخاص بعلاج السرطان بواسطة الذهب كل تجاربه بتنفذ هنا في مصر وتم بناء معمل خاص للنانو وافتتحه هو مع السادة المسئولين والراجل شغال ومصر هتكون أول دولة في العالم بتطبق هذا العلاج

ليه هو محاولش يبدا بالإمكانيات المتاحة .. هو متخيل حينما بدأ ينفذ مشروعه أن إمكانيات دولتنا تماثل أمريكا وهذا خطأ

على فكرة أنا أكمل دراسات عليا في الخدمة الاجتماعية بجامعة حلوان وكنا ندرس حتى النصف الأول من العام الماضي بفرع لكلية الخدمة بجاردن سيتي وتم إخلاء هذا الفرع ليكون مقراص لأحمد زويل وهو مقر به منشآت من عهد الأسرة العلوية والكثير من الجهات كانت تصارع عليه وهو مقر كبير جدا وحصل عليه هو ..

بالطبع لا أستطيع أن أنكر دور الحكومة في التقصير فالطرفان ملامان .. لكني ألومه هو بالتحديد لأنه مع أول زنقه هرب وفلسع
كان نفسي يعمل زي ما عمل العالم الجليل الدكتور مصطفى السيد

Anonymous said...

الأخ سبيادر مان حابب أصلح معلومتك بخصوص تكريم أحمد زويل في مصر .. أحمد زويل اتكرم بعد نوبل من مصر تكريم كبير سواء على المستوى الرسمي أو الشعبي وحصل على أعلى وسام مصر
وحصل على قلادة النيل
وبالنسبة لتعيين أوباما له كمستشار للشرق الأوسط باختصار
أمريكا أغلب علمائها من أصول أخرى ولتحسين صورة أمريكا أمام العالم تم تعيين مستشارين لكل المناطق في العالم من أصول هذه الدول
وكان من ضمنهم زويل لمحاولة تحسين الصورة الأمريكية لشعوب هذه المنطقة

Anonymous said...

هذه معلوماتعن وشاح النيل أو قلادة النيل أرفع تكريم رسمي مصري
http://ar.wikipedia.org/wiki/%D9%88%D8%B4%D8%A7%D8%AD_%D8%A7%D9%84%D9%86%D9%8A%D9%84
ومتفق مع رأي الأستاذ عصام الدين

mohamed ghalia said...

أنا كمان شفت الحلقة فعلا حاجة متفرس خالص ههههههههه

Mahmoud Ahmed said...

الأخ احمد شريف
___________

فين التكريم ده ؟؟
بقي هو ده تكريم لعالم مصري كبير
وسام و شكرا على كده

و بعدين هو المفروض ان مصر تكرمه الأول و لا العالم هو الى يكرمه الاول ؟؟

و بعدين كان لازم نستفيد منه و من علمه

و على فكره مش بتلكم عليه هو بس
انا بتكلم على كل عالم مصري

Anonymous said...

الأخ سبايدر مان
عاوزنا نعمله إيه يعني
طول عمره بياخد تكريم وأوسمه من مصر من الثمانينات وبيستقبل استقبال الرؤساء في كل حتة في المطارات وفي قصر الرئاسة ومعمول عنه مواضيع كنا بنمتحن فيها في كتبنا المدرسية أنا لسه فاكر موضوع عنه في الاعدادية مكنش معمول لرئيس من رؤسائنا

عاوزنا نعمله إيه أكثر من كده
الراجل ادناله مقر كامل يعمل أبحاث فيه وشغل ولا شفنا منه حاجة
هو الراجل حابب عشته بره .. متجوز من سورية وعاش في أمريكا وواخد جنسيتها ومرتاح هناك .. عاوزنا نعمله إيه تاني ؟

Anonymous said...

وعلى فكرة في علماء مصريين كتير هنا بيشتغلوا وبيحبوا البلد ده بجد .. أينعم ميزانية البحث العلمي مش كبيرة لكن ده ظروف البلد احنا طول عمرنا كنا في حروب وعايشين اقتصاد حرب ولما فقنا بدأت الأمور تنضبط وكل شوية الوضع بينصلح وحاليا في مراكز بحثية مصرية عالمية وواخدة اعتراف دولي وشهادة جودة عالمية وفي شغل جامد من بداية القرن ده بيتعمل فيها وفي براءات اختراع مصرية طلعت

احلام جوليا said...

انا اتفرست واتغاظت واتقهرت يا ساتر يارب امتى اولي الامر يسمعوا ويشوفوا احساسي بيقول انهم متفرجوش على البرنامج وانهم كانوا متابعين قنوات الكارتون وقتها

Anonymous said...

إيه اللي فارسك بس؟ ما فيش أي سبب يخليكي تتفرسي. تركيا مين وأمريكا مين بس؟ طيب هيه تركيا أو أمريكا حد منهم خد كاس أفريقيا؟! طبعا لأ... إحنا أفضل منهم لأننا أخدنا كاس أفريقيا! طيب هيه تركيا أو أمريكا عندهم أهرامات؟ طبعا لأ... إحنا أفضل منهم... وبعدين، مصر أم الدنيا

صبرني يارب said...

انا مشوفتش اللقاء بس لقيت ماما بتحكى عليه برضه

ده انا هادور عليه واشوفه بقى

انا بقى مش مفروسه

انا حتى شلت المراره من ست سنين

صبرني يارب said...

انتى يا بت يا مفروسه

انا اتفرست بجد لما رجعت قريت التعليقات بس مش راده على حد ماليش نفس

Mafrousa said...

spidermanسبايدرمان
---------------
اولا شكرا لمرورك

فعلا كل شوية منة الشاذلى كانت بتقاطعه
و ياريت بطريقة كويسة....الا انها كانت بتستزرف بشكل فظيع

عندك حق و الله
سبحان من يولى علينا من هم يخافون الله و يتقونه
تحياتي

Mafrousa said...

spidermanسبليدرمان
---------------
اخي الفاضل
احنا مش عارفين نستغل اي حاجة كويسة تعود علينا بحاجات كويسة

امريكا بتعرف تقيم الناس
احنا هنا مالناش قيمة
حتى الدكاترة ولا العلماء ولا الكتاب
و لا حتى الصنايعي الشاطر
احنا مالناش قيمة
امريكا بتدى قيمة للبنى آدم
ربنا يهدي و يبقى لنا قيمة فى الدنيا ديه قبل ما نسيبها
تحياتي ليك

Mafrousa said...

شمس النهار
--------------
بالعكس يا شموسة
انتى لو كنتى اتفرجتي كنتى حتستفادى جداااا جدااااا
من اللى قاله
انا على قد ما بتفرس
على قد ما بستفيد من كل حاجة
بستفيد انى لما اكون بكلم حد مش اقاطعه و اسيبه يسترسل فى كلامه للآخر
لأن المقاطعه مش بتخليكي تفهمي كويس
و تفضلى تسألى اسئله مالهاش معنى
و بتعلم الناس ديه بتفكر ازاي
و بترتب تفكيرها فى الكلام ازاي
ده فن على فكرة
و بستفاد من وجهات نظرهم اللى فى اغلب الاوقات بتكون صحيحة جداااا
تحباتى ليكي و لمرورك

Mafrousa said...

مجداوية
----------
اختى العزيزة
مش عارفة ليه حاسة من نبرتك انك فى حالة يأس
و غضب

انتى يمكن شوفتى البرنامج فى توقيت مش مناسب ..و محمود سعد بيهدى له الدبوس اللى على شكل علم مصر
هو صحيح ما كانش له لزمة على الهواء
بس محمود سعد عفوي...و تقدير منه لدكتور زويل

اما ان دكتور زويل يكون ولائه لامريكا و مش عارفه ايه؟؟

ليه بتقولى كده
و احد بلد قدرنه و عارفه قيمته كويس
و حطته فى القالب اللى يستحقة
ما اسموش ولاء
اسمه اخلاص فى العمل
و ربنا امرنا بلاخلاص فى العمل
اينما تكوني

و الراجل مش نسي مصر
بل بالعكس من 10 سنين قال على المشروع
اللى لسة مصر بتمرره و كل عبد الروتين يوقفه شوية
اصل مش معقول مشروع يمشي من غير استفاده
ما انتى عارفه البلد ماشية ازاي

الراجل وطني او مش وطني
اعرف الاول ايه معنى الوطنيه عندك


مثلا
-----
انتى بتشتغلى فى شركة
و الشركة ادتك كورسات
و اخلصتى فى العمل
ووصلتى لأعلى المراكز
و الناس اللى بتشتغلى معاهم عارفين قيمتك كويس

اكيد حتحنى لجامعتك و لمدرستك
و لو زرتيهم حيبقى نفسك تعمللهم حاجة

عادى
انا لما بزور مدرستى دلوقتي ببقا نفسي اعملهم اي حاجة
او افكر لهم فى فكرة ينفذوها


مصر بالنسبة لزويل الجامعه
الاقارب
و الاخوات
زويل رجل محترم
نتعلم منه و من اللى زيه حاجات كتيره اوي


اما كون ان مصر محتله
و الله يا مجداوية مش عارفه
يا تري محتله بالفاسدين اللى همه الشعب
و الشعب بكل مستوياته
ما هو من كبيرها لصغيرها ...شعب برضه

و لا محتله بلأفكار الدخيلة علينا من ايران و غيرها
علشان تخلق الفتن بكل انواعها؟؟؟؟

تحياتي ليكي
و شكرا على مرورك

Mafrousa said...

عصام الدين
--------------
و الله يا استاذ عصام اعتبرها الاتنين
و خليها فى سرك
انا كمان بحب منى الشاذلى
لأنها ذكيه
بس ساعات بتفرس ان الضيف يبقى قاعد قدامها و هيه بتسأل السؤال له و باصه فى الكاميرا
كأن الضيف هوا...انا بشوف ان ده مش لطيف يعنى

صح
هيه المنظومة
و هيه ديه اللى قال عليها زويل
و هيه ديه اللى بتنجح فعلا

بلدنا للأسف كل حاجة فيها عشوائية
حتى قوانينها

انا معاك مليون فى المية
انا بقا بقول 80 فى المية

مش عاوزة افرسك
بس الشغل موجود
بس الناس مش عاوزة تشتغل
مش عاوزة تتعب
انا قابلت واحد امبارح
بيقولى حيدى مرتب 500 جنيه لعامل غير البقشيش
و العامل يوم يجي و يوم مايجيش
يتأخر عن المواعيد
يستأذن بدري
و كلها حجج ان واحد مش عاوز يشتغل
عاوز ياخد مرتب من غير تعب
و الطبيعي ان صاحب العمل بيمشيه
ساعتها بقا
تلاقيهم نازلين شتيمة فى صاحب العمل...و الحكومة
و يقولك بطاله
على فكرة الناس هيه اللى مبطله نفسها بنفسها

تحياتي ليك
و سعيده بمرورك
و سعيدة بتعليقك الثري

Mafrousa said...

احمد شريف
------------
مرسي على التوضيح
و فعلا امريكا بتعمل كده
علشان تكون اكثر مصداقيه مع اعلب المناطق
و برضه فراسة منها
انها بتحدد لكل منطقة اللى يعرف يتعامل معاها
اسلوب فى منتهى الذكاء
و ده غير البنت المحجبه برضه اللى مستشارته

طيب يعنى احنا يكون لينا الفخر
ان مستشارين رئيس الدولة العظمي مصريين


شكرا على مرورك
تحياتي

Anonymous said...

مفروسه
ازيك
يارب تكوني كويسه
جزاكم الله خيرا على الموضوع الهام

طبعا موضوع المباراه مهم جدا
احنا كسبنا وده شيء كويس
والناس كانت فعلا عايزه حاجه تفرحها
لكن برضه الحماس اللى شفناه فى المباراه لازم نلاقيه فى كل المجالات
مش معقول نكون ككويسين فى الكوره وخايبين فى الحاجات التانيه

ده غير طبعا ان فيه المسئولين عندنا كانوا فعلا محتاجين الفوز ده عشان ينسونا اللى بيحصل فى البلد من بطاله وفساد وغيره

اما موضوع حديث زويل
فاكتر حاجه تشد فيه موضوع تركيا
مبدايا انا اعترض على كلمه الاحتلال العثماني
فالدوله العثمانيه لم تكن احتلال
صحيح كان فيها عيوب ولكن ايضا كان فيها مزايا
واحنا دلوقتى شايفين العالم بيتجه للتكتلات اشمعنا احنا يعني

اما تركيا الان فهى معجزه كبيره
منذ بدء حكم حزب العداله والتنميه الاسلامي وتركيا تتقدم بخطوات رهيبه جدا جدا
زويل مثلا حكى عن وجود 4 جامعات كبيره جدا جدا هناك انشئت فى السونات الاخيره فقط ده غير الجامعات الكثير ه جدا العاديه
ده بالاضافه الى المشروع العلمى الكبير الذى يتبناه
وهو ايضا الذى بداته قطر مع زويل
قد يتخيل البعض ان ده هيبهدل الميزانيه التركيه
لكن ده محصلش
لما الناس بدات تحس ان فلوسها هتبقى فى صالح البلد مش هاتروحببلاش
الناس اتبرعت للعلم
وكمان بعد المشروعات الكبيره جدا جداالميزانيه الرئيسيه مش بايظه ولا ضايعه
ده احنا لقينا ان متوسط دخل الفرد ارتفع فى سنوات قليله من حوالى 600 دولار الى حوالى 16 الف دولار

بعد ده كله عايز اقول كلمه معلش ممكن تفرس ناس كتير
تركيا بها اكثر من سبعين مليون نسمه
ومعدل النمو السكانى يقترب من معدل النمو السكانى المصري
يعنى عددهم زينا تقريبا ونموهم برضه زينا تقريبا
ولم نسمع منهم الصداع بتاع المشكله السكانيه

انا شايف انه بعد فضل الله يوجد اسباب للتقدم هناك
الخلفيه الاسلاميه للحكم
الشفافيه
العداله
الرجل المناسب فى المكان المناسب فى الوظائف المختلفه
فانه يستعينوا بالمستشارين المختصين وليس اهل الثقه
الرقابه الشعبيه عن طريق برلمان قوي وانتخابات نزيهه

ربنا يرحمنا
ربنا يكرمك ويسعدك

Mahmoud Ahmed said...

الى الاخ احم شريف
______________

لا طبعا ممكن نعمله حاجات كتير جدا كمان
نقدر نحطه في مكانه احسن
نقدر نوفرله كل حاجه عشان يشتغل صح
انما احنا هنا نحط للبحث العلمي جنيه و نحط للأفلام و الاغاني 1000 جنيه
عايزه يشتغل ازاي بس؟؟
ومازلت برضه مش فاهم ازاي تكرم عالم من علمائك بوسام بس ؟؟؟
بقي هو ده التكريم ؟؟
و فين الاستفاده الى انت استفدتها منه بس:(

....

سوري على التأخير في الرد

WhItE HeArT said...

بصي يامفروسة

انا الصراحه ماشفتش اللقاء وبحمد ربنا علشان كان ممكن يجيلي امراض الدنيا وانا بتفرج

انا بصراحه شايف ان احنا خلاص بقينا دولة سوري في التعبير متخلفة وبلد جاهله

انا هديكي مثال على تقدم دولة محدش كان ممكن يصدق اللي هي فيه دلوقتي

السعودية

ايوة السعودية انا عشت في السعودية وكانت زيها زي مصر " لإن اللي كان حاطت النظام المتخلف كان ناس مصريين معقدين" لكن في السنتين اللي انا بعدت فيهم ورجعت لقيت حاجة غريبة اوي الناس خلاص استخدموا النظام بتاعهم وحب البلد الدنيا كلها في السعودية بقت ماشية بالكومبيوتر اي حاجة عايز تخلصها تخلصها وانته على الكومبيوتر بتاعك في البيت

مشاريع ومعاهد ابحاث في كل مكان دولة بتنهض بجد

بجد بقيت بشوف الحاجات دي وبتحسر على البلد اللي المفروض بناسها تكون الاولى بتحسر على الناس المحترمة اللي عايزين يعملوا مشاريع تساعد زي الدكتور احمد زويل والمسؤولين بيبحبطو فيهم

بجد بجد انا كرهت نفسي علشان موافق على ناس زي دول هما اللي يحكمونا

تحياتي وبجد المرة دي اتفرست

Baskouta said...

هالوووو
انا جيت اقول لحضرتك اني بجد كنت مبسوطة جدا اننا اتقابلنا في المعرض
حقيقي اتشرفت بمعرفة حضرتك

http://pinkysequins.blogspot.com/
وده لينك مدونتي
تحياتي البسكوتية

محمد أبووردة said...

اه يانا
ياللي هتموت منقوط
من اللي بيحصل
انا مش عارف الحال هيتغير امتي
انا خلاص وهقت من الوضع ومليت
هوا سيادته مش عايز يحل عنا بقي
والله كفاية كده

مدونتي
قلم حر
www.freeqalaam.blogspot.com
تعالوا زورونا
باي باي

المـــفـــــــقــــــــوعـــــة مــرارتـهــا said...

بصي يامفروسة طول مااحنا بنتعامل مع رؤسائنا علي انهم آلهى لا يخطئون سيبقي الحال علي ماهو عليه
الريس هناك بيتحاكم لو اخطأ حتي لو أمر شخصي ناسية كلينتون
هناك توصل للحكم تبقي العين عليك قد كدة هنا توصل للحكم تلبس طاقية إخفاء وتسرق وتنهب وتبقي سفيه ولا عقاب او ردع

فارس القمر said...

السلام عليكم

انا خايف اقول كلام مايعجبش بعض المدونين

اسف ان اقول ان شعبنا شعب سلبى مش بيبص الا للحاجه اللى مش هتنفعوا ولا هيجيلوا من وراها اى مكسب

شعب بييخاف على نفسوا من اللى اعلى منوا وما اعلى الا العلى العظيم

وزارتنا لابتاعت مشاريع ولا يحزنون اهم حاجه ازاى يمصوا دم الفقير لامشاريع ولا كلام من دا اهم حاجه الاستثمار ياجماعه

عادل امام فى الفلم بيقول ياخونا انتوا بتقولوا ايه بلدنا جميله وزى الفل

صح الكلام يبقى احنا الشعب اللى مش عاجبنا العجب

حنقتونا ادونا فرصتنا بقى

انا ماشى من هنا

سلام

عايش... ولكن !!!! said...

كل احمد زويل وانتى طيبه
احمد زويل فى حقوق ملكيه امريكيه
ثانيا احنا دايما دوله مصدره للعلماء اصلهم بيبقوا تقال على قلبنا
حتى لما بيوصلوا زى د/احمد ما وصل كده مبنعرفش نستغله حتى
للاسف

Anonymous said...

مشفتش اللقاء كله

بس الدكتور زويل لوحده شىء مش ممكن يكون في زيه

اميره الصعيد said...

اكيد طبعا انا معاكي
اننا مش لازم نتفرس خاااااااالص
هو في ايه في بلدنا الجميله يدعو للفرسه
واحنا معندناش اطفال شوارع خالص
والشباب اللي مش لاقي شغل بياخد اعانه بطاله ولا مرتب المدير العام
والتقدم العلمي شغاااااااال
والجامعات بتقدملنا افضل خريجي العالم

احنا لازم نحمد ربنا
ان زويل مرجعش هنا
بعد ما كمل دراسته
والا مكناش شفناله اللقاء ده
علشان ساعتها مكناش حنسمع عن زويل

Humman being said...

واحدة مفروسة...
أنا أول مرة أدخل عندك ...حلو أوى البلوج بتاعك... وعجبنى جدا جدا لقاء د/أحمد زويل ده....ياريت السادة المسئولين يتكسفوا على دمهم ويحاولوا يعملوا حاجة- وياريت كل المذيعات المصريات يحاولوا يفهموا يعنى ايه حوار وامتى يسكتوا شوية ومع مين...
خالص تقديرى

Hanan Elshafey said...

انا جيييييييييت انا كمااااااااااااان
حضرنك قلت لحضرتك ان حضرتك اللي مفروسه مش انا نيااااااااااااااااهاهاهاهاهاهاهاها
ومع ذلك
اتشرفت بيكي جددددددددداااااااا جدا واظن كان وااااااااااااااااضح
واللي في القلب في القلب بقي
بس بجد بجد فرحت قوي لما لقيت كومنتك وكان نفسي اخد تليفونك نلوكلوك سوا بس اتكفست
ام هند
وحشتيييييييييييييينييييييييييي

عصـــــــــــام الــــديــن said...

يارب تكونى مبسوطه ومش مفروسه
وحشنا جديدك
والله انا مقروس جدا وعايز اى شئ اطلع فيه الغل
تحياتى

mostafa rayan said...

انا ماشوفتش الحلقه ولكن اظن ان الحومه شافتها بدليل مكالمه الوزيرة ولكن انا متاكد انهم مش هيعملو حاجه من مصلحه الحومه ان البلد تفضل كده سبهلله امال يسرقو ازاي يعنى
تحياتى لك

Baskouta said...

I just wanted to Say
Happy Valentine's Day to you and your family.
May love surrounds you all life long.
Wish you all the very best
Baskouta

Anonymous said...

امممممممممم

حلوة أوي حكاية ال 100 دولار دي

متفرسش خاااالص فعلا

فاتيما said...

أزيك يا فروستى
يا حبيبتى

انتى وحشتينى بس فقولت آجى أسلم و اغلس و كدا

و اديكى كام بوسة و شوية حضونات
عشان الفرسات تقل

بس خلاص