فينك يا وز يييييير؟؟؟؟؟

ياربيييييييييييييييييييي
هيه الفرسة وراية وراية
و الله يا جماعة انا تعبت
و حاسة كده و الله اعلم انى حكون نزيلة عن قريب
للسراية الصفرا
و يمكن اخليهم يغيروا لونها للبمبي
لأنى مش بحب اللون الأصفر
المهم انا عاوزة اعرف احنا فيه ايه بقا؟؟؟
و الله بجد
لأ بجد احنا معمول لنا عمل يا جماعة
صدقوني
و مرمي فى خرابة...على فكرة.
قولولى ليه؟؟؟؟؟
علشان حياتنا مهرجلة ومش نضيفة زي الخرابات بالظبط


النهاردة رحت مطار القاهرة
صالة وصول (1)
انا عارفة ان الوزير جدد كل صالات المطار
و عارفة انه اندفع ملايين
ولا يمكن مليارات كمان على هذا التجديد
بس للأسف احنا بنجدد و نمشي ما نسألشي عن الحاجة بقا
الله انتو عاوزنا نجدد و نتابع؟؟؟؟
ده حتى يبقا عيب

نبدأ الفرسات

اولا الباب بتاع دخول الصالة
قاعد عليه 2 عساكر غلابة
محتاجين ياخدوا كورسات عسكريةويبقى منظرهم كده هيبة
سايبين الناس تدخل و خلاص ،ما هوا كيد مافيش منهم خوف
دول جايين فى استقبال ذويهم
و مين ما كان بقا يدخل و يقعد و يعمل اللى هو عاوزة من غير ما حد يستوقفه
ما علينا الدنيا امان يا مفروسة........
و ما تخافيش ما حدش يستجري يعمل اي عمل مشاغب......
ماشي........
جينا على الكافيتريا........
مش حتكلم عن الناس اللى بتخدم
لانهم بصراحة بيحاولوا يكونوا كويسين
انا بتكلم على وساخة الترابيزات و لا الزبالة اللى تحت الترابيزات
مش ممكن بجد
صحيح فيه واحدة ماشية تكنس المطار رايحة جاية
بس انا بتكلم على الناس
ايه السلوك ده
الناس بترمي فى الارض يا عااااااااالم
الباسكت فى كل كورنر.....
بس و ديه برضه تيجي
يقوم من على كرسية علشان يرمي فى الباسكت ده حتى مش اصول
ولا الجرسون حيجي يلم زبالته؟؟؟؟!!!
عيب ما يصحش......

لا حظت ان المطار كله ملزوق على حيطانة و بلأخص الكافيتريا
ممنوع التدخين
بس تقول لمين
اصلا اصلا
نص الشعب المصري .....امي..لايعرف يقرأ
و النص التاني...لا يرى
مدخنة......ولاحديقوله غلط ...و المصيبة ان الجرسون لما حد يسأله يقوله دخن يا بيه ديه منطقتنا
:(

و لا الموظفين بتوع مكاتب الليموزين
دول فيلم لوحدهم
واقفين على باب المكتب
كأنك فى موقف عبود ولا احمد حلمي
4 بهوات طول بعرض
واقفين على باب المكتب
وكل مسافر يطلع من جوة جارر شنطته
تلاقى واحد من دول شادة من ايده و يوشوشة فى ودنة

انا مش عارفة ايه حكاية الوشوشة فى المطار
ليموزين يا بية
شكرا
يمشي خطوتين و تلاقى التاني حلق عليه
و بعدين التالت
و بعدين الرابع
مش ممكن بجد
كأنه بينادي على ميكروباظ


قعدت .... وقلت يا بت يا مفروسة كفاكي هذا القدرمن الفرسات
حطى وشك فى مجلة وركزي فيها علشان مش تركزي مع الناس

بس تقولوا ايه بقا....يموت المفروس و عنيه بتدور على حاجة تفرسه

لمحت واحدة لابسة جلابية...و شكلها على قد حالها قلت ديه اكيد من عاملات النضافة
و ماسكة شنطتين بلاستك فيهم حاجة
انا طبعا مش عارفة ايه
و ماشية توطي على كل واحد و تقوله حاجة
انا برقت
قلت البنت بتشحت ولا ايه؟؟؟؟؟
و الاقيلكم البنت جاية عليا
و انا بقا مستنية اعرف حتقول ايه
و لاقيتها قالت جملة بصوت واطي جداااا
مش سمعت الصراحة
قلتلها ايه؟؟؟؟؟
قالتلى
كشري يا هانم؟؟؟؟
يالهويييييييييييييي
انا قمت و عليت صوتي
و ظهر الوش التاني لمفروسة
قلتلها ايه؟؟
انتى دخلتى هنا ازاي؟؟
ازاي دخلوكي بالكشري ده؟؟
و البنت بكل بجاحة و تناحة
ايييه يا مدام ده اكل عيش
ياخرابييييييييييييييييييي
كشري فى المطار
مش ممكن بجد
و الله حرام

اتفرست بزيادة ودمي غلى و قمت اشوف الطيارة اللى انا مستنياها جاية امتى...انا حاسة انها اتأخرت
ادور على الشاشات التلفزيونية اللى بتكتب جدول الطيارات...ديه وصلت،ديه اتأخرت كده يعنى
و الاقيلكم الشاشات كلها سوداااااااء

سألت الاستعلامات.....هيه الشاشات طافينها ليه؟؟؟؟!!!
الراجل بصلى و ضحك و قالى ديه عطلانة يا مدام بقالها شهور
طيب بزمتكم...انا راضية زمتكم اقول ايه؟؟؟

ماقلتش غير انى اسأله ...هو مافيش مديرللصالة ديه؟؟؟؟

قالى فيه.......طيب هو فين؟؟!!! مش بينزل يمر؟؟!!!
الراجل الصراحة رد عليا رد..انا مش فهمته.....شاورلى بإيده كده كأنه عاوز يقولى ....يغوووور


انا بقا عاوزة افهم
فين المدير المسؤل عن المطار ده؟؟؟؟؟
فين الرقابة و المتابعة؟؟؟؟

ازاي عاوزينا نتقدم والنبي؟؟؟
ولا عاوزين صورتنا تبقا كويسة؟؟؟؟
ولا عاوزين الناس تحترمنا ؟؟؟؟
احنا اصلا مش محترمين نفسنا ولا بلدنا ولا بنحافظ على حاجتنا

انا وقفت فى وسط الصالة
اتلفت حوليا واتحسر على بلدى
و صعبت عليا اوي
ولا قيت دمعة فرت من عيني

و قلت احنا مش حينفع مع الشعب ده غير يد من حديد
لازم بجد بجد حد يقفله بالمرصاد
لازم حد يطبق كل القوانين و التعليمات بصرامة بالغة
انا مش عارفه حنتصلح امتى؟؟؟؟
احنا ماشيين لورا
احنا بنصغر مش بنكبر
و للأسف احنا اللى بنصغر روحنا
انا مفروسة اوى جداااا خالص
فينك يا وزير

29 زارونى......و اتفرسوا:

صيدلانيه طالعه نازله said...

الوزير بيطلع فى التلفزيون يتكلم عن انجازاته الجباره
و ازاى خلق من الفسيخ شربات
و يحكى و يتححاكى عن الملايين اللى اتصرفت من اجل التطوير
احنا بنعمل الحاجه كويس قوى
بس مش بنتابع و لا نصون
عندك مترو الانفاق
شوفى من بعد الشركه الفرنساويه ما سابته بقى قذر ازاى و حاله يصعب على الكافر

سايقه عليكى النبى ما تتفرسى
لان اللىبيحصل ده بقى عادى للاسف
و انتى كده حتتحولى لواحده مفروسه قوى جدا خالص

Mahmoud Ahmed said...

هما اليومين دوول بيقولوا فيه تجديدات في المطار
و الدنيا مقلوبه ومتشقلبه على الاخر
انا كنت هناك يوم الجمعه الى فاتت
طب الوصول و على الاقل في مكانه متغيرش
انمال السفر بقي ده الى بقي مشكله كبيره قوي قوي قوي
مكانه اتغير
و اتنقل للمطار القديم
و محدش يعرف
ده كل ده مفاجئات
و نقعد نلف نالساعه عشان نوصل مكان السفر
و حتي الاتوبيسات بتوصل الناس في امكان تانيه خالص
حاجه تكسف بجد

Mahmoud Ahmed said...

انا اول مره اسمع عن حكايه الكشري دي
عمري ما شوفتها هانك
بس لو حصل معايا كده
اكيد اكيد اكيد كمان مره
كنت عملت بلاووي هناك
هههههههههههههههه
و لا يمكن عشان السياح ترجع من تاني
اهو برضه
يبقي مياه النيل و اكله كشري
يعني هترجع هترجع
ههههههههههههههههه

Mahmoud Ahmed said...

بالنسبه بقي للموزين و الناس بتوعه دووول
فلا امل في التغير ابدا ابدا في الناس دي
مش فاهم ليه كل واحد ميقعدش في مكتبه بكرامته و الى عايزه يجيله لحد عنده
ايه لازمه انه يجري ورا الناس

لا و الناس بتوع الخليج و السعوديه بيهزقوهم تهزيق ، و دووول ولا اكن في حاجه خالص

:(

سلام سلام يا مصر

فاتيما said...

يا لهوى !!!

لنا عديت كله

و جيت لحد الكشرى و مقدرتش بصراحة

كشرى ف المطار على حد تعبيرك ؟!!!!!

كشرى ؟؟
بعد اللى كتبتيه
معنديش حاجة اقولها غير

عندك حق

توفى said...

الوزير بيتصور عشان يطلع فى التلافزيون
عشان يجى فى الجرنان و يقولوا طبقا لتعليمات سياده الزوير و نزولا على رغبه الشعب الكادح

من الاخير الوزيييييييييير فى الزييييييييير

عاشقة القمر said...

سلام عليكم
أنا نزل مصر نهايى شهر داه غير رايه مش نزل مصر ولاأيه هههههههه

AHMED SAMIR said...

بالأمانة
نجحتي انك تفرسيني معاكي
ربنا يسامحك
واضح ان الفوضى دة جين في مكونات الانسان المصري
و مفيش فايدة

هي وظروفها said...

مالك بقي ومال احمد شفيق

بصي يا ستي اقولك بما اني شغال

هناك ايه التيته

الكافتريا التدخين فيها مسموح علي اساس انهم بيدفعوا حوالي 30 الف شهر ومن حقهم يستغلوا المطار براحتهم وبفلوسهم

علي اساس ان القرش في البلد دي بيشتري اي حد

ثانيا لو كنتي لحظتي جمب الشاشه اللي مهنجه ومش شغاله

فيه ساين جمبها مكتوب فيه

ذكريات لن تناسها

بالصلاه علي النبي ودي تتنسي

رجاله اليموزين اللي انتي بتتكلمي عليهم عادي جدا ودي خدمه بتتقدم للي واصل بس محتاجه تنظيم لانها فعلا قالبه علي موقف عبود

انا في ضاله 3 والله يا مفروسه قبل الجوازات وانا مندوب استقبال بستني الناس جوا الصاله

من قله التنظيم وكتر المناديب

وهيئه المينا واللي جاي من جده يختم شمال واللي جاي من مدريد يختم يمين

كنت بقف والله العظيم ماسك الساين واول ما الطياره تنزل ركابها

افضل اهرج واقول مكرم عبيد تامن وعاشر تبه محكمه
اول حاجه الجست بيوشفها الجوازات يلعن مصر واللي جابه واللي قاله يجي مصر

نيجي بقي للمصريين المفروض في الجوازات يكون ليهم شباك جوازات او شباكين لوحدهم انما ودي تيجي يقف يطلع ميتن اهله ولا اكنها بلدها ولا زفت

وبخصوص بائعه الكشري هي فين كتير بدور عليها ومبلقهاش خدتيش منها رقم الموبايل ينوبك ثواب

بدل ما الواحد بيتهري جبنه رومي وكانز وبرجر لحد ما قربت اختفي

هي دي مصر يا عبله وعلي راي اخويا وحبيبي egyptions never change

همس الاحباب said...

هههههههههههه
كشرى فى المطار
يبقى اكيد المطار نقلوه عبود يا مفروسة
سيبك انتى البلد كلها بقت اتفرس ومع الاسف نحن فى تراجع مستمر واكاد اجزم اننا سوف نبقى فى ذيل الامم ده على اعتبار انه هيفضل ذيل اساسا
كنتى جيتى معايا ابو الريش النهاردة وشوفتى الفساد واللامبالاة عاملة ايه فى بلدنا
تحياتى

Me7'o said...

هههههههههههه
وأنا راجع من السعودية أنا ومراتى
واحنا لسه فى المطار بنركب طيارة مصر للطيران وأول ما حطينا رجلينا فى الطيارة
مراتى قالت إفففف إيه الريحة دى
قلتلها دى ريحة مصر يا أمى

المضيفة سمعتنى وضحكت وقالت للتانية وضحكوا هما الجوز
ده على أساس إنهم مش مسئولين عن أى حاجة

الكباية اللى جايبينها علشان نشرب فيها الشاى ولا القهوة ما رضيناش نستخدمها عارفة ليه

لإنها مدهننة ووسخة تقرفى تمسكيها حتى

وفى الآخر بنقول إن هو ده عنوان بلدى

تحياتى

رنونة حكومة ميخو said...

مش كتر خير البلد انها عاملة مطارين اصلا
ده احنا نحمد ربنا ونبوس ايدينا شعر ودقن ووالله المطار الجديد تحفة نضيف وشيك وشاشات شغالة و محلات بتسرق السياح وحاجة اخر شياكة
:) :) :) :)
فرستك زيادة صح

يلا كلنا مفروسين يا بنتى سيبك م المطار ع الاقل المطار مش هتقعدي فيه مجرد مكان بتعدي منه انما الطيارة زبالتها مقرفة جدا الكوبايات والله موسخة كان ايد مدهننة ماسكاها شوفي القرف بقى والريحة يا لهويييييييييي والله من ع الباب لسه مدخلتش شميت ريحة مقرفة

الطيران السعودي حاجة والمصري حاجة تانية ...

Me7'o said...

الطيران السعودى .. أم المصرى

شمس النهار said...

ازيك
يارب تكوني بخير
وحشتيني

ايه يابنتي انتي كنتي في مطار المنوفيه بتاع شبرا ولا ايه
لأ بجد ده انهي مطار
انا بسافر من مطار القاهرة ده كتير وماشوفتش اللي بتقوليه ده
بالعكس المطار بقا جامد جدا
اومال لو كنتي شوفتيه في السبعينات كنتي عملتي ايه
ولا لما كنا بنتوه فيه في التسعينات
ده حتي المطار الداخلي عايزة اقول لك انه معمول بنفس نظام مطارات امريكا حتي الممرات المتحركة بين الصالات الداخليه
ونظافة تتعجبي لها
فعلا
لكن بجد انتي كنتي في انهي مطار
؟؟؟؟؟؟؟؟؟؟
:))))
سلامي

سواحة said...

اعتقد كده و الله اعلم كنت فى المطار 2

انا اصلى بسافر عادة من مطار واحد 1
بصى فى الاول كان 1 قديم و 2 لسه جديد و منه سافرت زمان كان ايه تحفة من جوه بعدين دلوقتى بقى مزززززززبلة

ثم وضبوا مطار 1 (القديم) لحاجة جديدة شكلا حلوة عمليا :-( مش قوى
اصلى لفيت على مطارات و ترنزيت كثير للاسف مطارتنا تيجى مرتبة الى قبل الاخيرة بخمس درجات :-))

موضوع الكشرى معداش عليا بس بصراحة
بس شكله شافتك خسة و تعبانة و خمنت انك جعانة

مفروسة كلى و ربربى علشان تبعديهم عنك :-))

المطار الجديد 1
عيوبة من جوه ياستى (معلش حفرسك لانه ملوش عيوب فعلا :-)

1- اماكن الانتظار فوق و البوبات تحت و مفيش لوحات تقولك البوابة فتحت (لازم كل شوية تجر الهاند باج و تنزلى :-)) حاجة متعبة و خصوصا لو كابس عليكى النوم)

محلات قليلة و مبالغة فى الاسعار ججججججدا (انا شوفت الاسعار السياحية فى دول كثير هى ممكن تكون اغلى 30 % كحد اقصى مش 300% زى عندناو الله لو سعروا عادى السائح ممكن يخلص البضاعة من المحل بس دماغات) مفيش نظام محدد كله بيمشى بمزاج كبير الامن بتاع المطار و تلاقى اقل شاويش رجعك لان لسه على الرغم ان اللوحة بتقول البوابة فتحت :-(

و الاسواء اماكن الانتظار و الوصول لمطار 2 و موقف و اتوبيس و تدفعى مبلغ و تركنى اخر الدنيا

و الا المنتظرين فيه ناس بتيجى بالعائلة او ممكن نقول القبيلة كلها :-) تودع الناس و لا تستقبلهم
حلو الروح ديه بس مش بمبلغة :-)

:-))
و حمد الله على السلامة
تعرفى عمرى ما عديت على السوق الحرة و انا راجعة :-) معرفش ليه

Mafrousa said...

صيدلانية طالعة نازلة
--------------------
هو من ناحية الانجازات فيه انجازات طبعا
بس للأسف مافيش متابعة و صيانة
و هيه ديه المشكلة
اللى بترش التراب على اللى اتعمل
ولا كأنه اتعمل اصلا

Mafrousa said...

سبايدرمان
-----------
فعلا مشكلة كبيرة حكاية السفر من المطار الجديد
تحس انك فى بيت جحا
ولا يفط بتقول
ولا حد واقف اصلا عارف فين و منين نروح
حاجة بقت تفرس
مش تكسف و بس
لأ و تفرس كمان

Mafrousa said...

سبايدرمان
===========
و الله موضوع الكشري ده بجد
انا مش بألف ولا بفتري

اما بقا الليموزين
فعلا مالوش زي
الفكرة فى الناس اللى بتبقى واقفة
حبة حبة ينادوا
عتبة عتبة
ههههههه

Mafrousa said...

فاتيما
-----------
اه و الله يا تيما
ديه حاجة وجع قلب
يا بنتى الفرسات بتدور عليا
تحياتي ليكي يا قمرة

Mafrousa said...

توفي
-----
بصي خلينا عادلين
اولا الوزير ده فافى اوي
و عاوز بجد يعمل حاجة
و عاوز يرتقى بالمطار
لكن المشكلة فى اللى حواليه
و الناس اللى بتنفذ
هيه ديه مشكلتنا
الوزير جاي كله يبقى حلو
الوزير مش هنا
نبيع كشري
تحياتي

Mafrousa said...

عاشقة القمر
-----------
هههههههههههههههه
لأ تعالى ما تخافيش
و انا حستقبلك بنفسي
و ابعد المناظر الوحشة
هههههههههههههه

Mafrousa said...

ahmed samir
-------------
انت عاوز تقولى بعد المدة ديه كلها اللى قضيتها فى وسطيكم
و انت لسة مش كنت اتفرست؟؟؟؟!!!!1
لااااااااااااااا
ده انا كده فشلت
هههههههههه
انا لازم افرس الناس علشان اخف من فرستى
هههههههههه

Mafrousa said...

هيه و ظروفها
----------------
و شهد شاهد من اهلها

Mafrousa said...

همس الاحباب
----------
يادى النا يادى النور
خطوة عزيزة يا خالد
و الله انا لو اعرف ان سيرة الكشري حتجيبك لحد هنا
احط علبة على طول على الباب
هههههههههههه
الفساد خرج عن اي سيطرة للأسف الشديد
تحياتي

Mafrousa said...

ME7'o
------
تصدق فرستنى بزيادة

Mafrousa said...

رنونة حكومة ميخو
-----------------
اه اتفرست بالزيادة الصراحة
و بعدين حكاية الريحة الوحشة فى الطيارة و الكوبايات المدهننة ديه
حاجة تقرف بجد
و على فكرة
انا لما كنت لسة بشتغل فى المجال
ممكن و انتى على الطيارة تعملى شكوى مكتوبة عن اي حاجة مش عاجباكي
و النظام كان
ان السوبرفايزور
لازم تقدمها للطيار
حتى لو كانت الشكوى عليها
و بتديكي رقم للشكوي
و الطيار بينظر فيها فى ساعتها
و لو مش لحق بيبعتلك
لان الطيارة مسؤلية الطيار
فى فترة خدمته
يعنى له الحق انه مش يطلع على الطيارة لو مش نضيفه
ليه انه يوقف اي مضيفه عن العمل معه لو مش متبعه اساليب اللياقة مثلا
او اتعملت فيها شكوى
بس طبعا مع اللى بسمعه
متهيألى النظام اتغير
و الطيار بقا عامل زي سواقين الموقف
حاجة تفرس بجد

Mafrousa said...

Me7'o
---------
انا متهيألى اي طيران احسن من مصر للطيران
مش عارفة ليه الصراحة

Mafrousa said...

شمس النهار
----------
تحياتي ليكي
و انتى كمان و حشتيني

كانت صالة وصول 1
ربنا يعين الجميع

Mafrousa said...

wanda
-------
بصي انا كمان سافرت كتير
و المطارات اللى رحتها
كلها فيها نظام
و الكل بيحترم القانون
وهيه ديه مشكلتنا من 30 سنة
احنا لا بقينا نحترم لا قانون ولا نتبع اي نظام
و انصحك بلاش السوق الحرة فى مصر
لانها مش حرة خااااااااااااااالص
تحياتي ليكي