حزيييييييييييييييييييينة

ازيكم جميعا
انا حزينة جدااااا، بالإضافة لكوني مفروسة طبعا
و حزني ده بسبب الانتخابات
حتقولولى انتى مالك انتى يا مفروسة بالإنتخابات
انتى كبيرك مجلة ميكي

حقولكم ما هيه الانتخابات السنة ديه كانت تعكس قصة من مجلة ميكي
و هيه عصابة القناع الاسود


نفسي اتعرف على العقل المدبر للعملية الانتخابية السنة ديه
لان مخه بجد فلة
خطط صح
و هو دلوقتي فى نشوة عارمة من ان مخططه نجح


البند الاول فى التخطيط
الإطاحة بكل من له صوت معارض واضح، و يلتف حوله الكثيرين
و من هنا كانت اللإطاحة بعمر اديب ووائل الابراشي

البند الثاني
محو صوت المعارضة فى المجلس الموقر
و من هنا كانت نتيجة الاخوان لم ينجح أحد

و المعارضين الاقوياء زي مصطفى بكري... وغيره
سقطوا

ثالث بند
غلوا اللحمة
علشان المواطن يبقى هفتان
يقوم عند الترشيح
يقوم المرشح بذبح العجول
الناس تجري عليها و هيه مدلدلة لسانها و بتقول نعم موافقون
على اي حاجة و اي حد

رابع بند
كيفية العمل على انجاح الاصوات اللى ما بتقولشي
غير نعم و حاضر

1-الغاء الاشراف القضائي
2-الغاء اي كاميرا تصور العملية الانتخابية
و عدم وجود اي مراسلين
3- التصويت عن اللذى لم يستطع الحضور
نوع من انواع الخدمة المرفهه يعنى
زي توصيل الطلبات للمنازل
4-ولو تبين ان الوضع حرج فى لجنة من اللجان
ينزلوا بالصناديق الاحتياطية المملوئة مسبقا
لتدارج الموقف
5-وجود (من باب الصورة تطلع حلوة) للرجال الأمن
اهو من باب ان كله بالشفافية


و نجح المخطط
و انشكح العقل المدبر
وسقطت مصر فى بير مظلم

13 زارونى......و اتفرسوا:

شمس النهار said...

صباااااح الخير

كنت مفروسه زيك كده
وبعدين قلت طيب وهو يعني لما المعارضه كانت 88 عضو عملوا ايه
ماكل القوانين عدت من تحت مناخرهم ولا هشوها حتي

تفتكري انتي مصطفي بكري يسقط والارجوز اللي ينجح ده حتي ماعرفش يتكلم كلمتين امبارح

قزلي يااااااااافرج الله

AHMED SAMIR said...

انا عن نفسي مش مفروس خالص
لأني كنت متوقع الكلام دة تماما
انا لو متغاظ هكون متغاظ من الاحزا ب اللي المفروض اسمها احزاب المعارضة اللي شاركت في المهزلة دي و اعطتها جزء من الشرعية
تحياتي

Mafrousa said...

شمس النهار
----------
حبيبة قلبي
ايوه الاول كان فيه معارضين ، و صحيح مرت كل القوانين من تحت مناخيرهم
بس كنتى بتعرفي ايه اللى بيحصل جوة
اللى بيعترض بيعترض بصوت عالى
اما دلوقتي
أحلق شنبى
ههههههههههههههههههههه
لو عرفتى ايه اللى بيحصل جوة اصلا

Mafrousa said...

AHMED SAMIR
----------------------
احزاب ايه بس ؟؟
هو احنا عندنا احزاب؟؟؟؟؟

الفقيرة إلى الله أم البنات said...

مفروسه خلى بالك من ضغطك علشان لما بيعلى مبنعرفش ننزله وبنتحرم ال القهوة والنسكافيه وسندويتش الجبنه الرومى بالتحديد

ايامنا بقى كانت الانتخابات مفيهاش اى تصوير ولا أى حاجه وكان يجى النبوى اسماعيل ....واخونا زكى بدر ..الكبير مش الجونيور
ويقولك بالفم المليان وبمنتهى القداره والتجبر
99.9
والله العظيم دى نتيجة الاستفتاء
والانتخابات طول عمرها مزورة
بس المشكله ان الحكومه هتجننى بتتكلم كأنها بتتعامل مع اطفال فى الكى جى يطلع دكتور محمد افندى كمال يقولك الانتخابات نزيهه
الله يحرقك يانزيهه ونخلص منك وتيجى بقى شريفه
وان ده تشويش مقصود منه تشويه نزاهة الانتخابات

بصى هاقوم اخد حاجه توطى ضغطى ..واجى اتفرس جانبك

Mafrousa said...

الفقيرة إلى الله أم البنات
-------------------------------
فعلا و الله
ربنا قادر ياخد نزيهةة و نظيفة
و يبعتلنا شريفة بقا

Dr. Ibrahim said...

ولا تحسبن الله غافلاً عما يعمل الظالمون إنما يؤخرهم ليوم تشخص فيه الأبصار..

مذكرات موززه عانس said...

بجد انا مستغرباكى اوى مضطره افرسك زياده واقولك هو انتى يعنى ماكنتيش متوقعه ده يا بنتى ده فى غش فظيع هنا فى القليوبيه

كلمات من نور said...

لا لا معلش عصابة القناع الأسود عصابة جميلة وظريفه و إهانة ليهم تشبيههم بأي حد يا مفروسة يختي ...معلش عذرك معاكي بس ابقي اعتذري لهم بقى وانتي بتقري مجلة ميكي الجديدة .......تحياتي

Anonymous said...

ليه حزينة؟ الإنتخابات دي موش لينا إحنا... دي حاجة بتتعمل كل كام سنة بس علشان تلون صورتنا قدام العالم... آل يعني العالم مهتم أوي بينا... إحنا خلينا في الكورة والقعاد على الأهاوي وتربية الدقون

momken said...

والله عندك حق فى كل كلمه قولتيها دول ناس دزم

بس السؤال حضرتك

يعنى ايه انخابات
ويعنى ايه نزيهه
ويعنى ايه شفافيه
ويعنى ايه ديمقراطيه

متكلمنى عن حاجه اعرها وحافظها صم

كلمينى اكتر عن التزوير


تحياتى

momken said...
This comment has been removed by the author.
bastokka طهقانة said...

هو اللي يزهق يبطل يكتب؟
وحشتينا
انزلي بالجديد
تحياتي