كنت مفتقدة الكتابة،و الحمد لله كتبت...بس لسة مفروسة

السلام عليكم جميعا

ياااااه قد ايه و حشتنى المدونة
قد إيه مفتقدة للكتابة فيها و افضفض لها
تمتص كل الفرسة اللى جوايا و تشيل عنى شوية
يااااه
انا من زمان ما كتبتش ،و لا كان ليا نفس اصلا انى اكتب
دخلت الفيس البوك ولا قيت ان اغلب اصحابي هناك
اكتب حاجة بيعلقوا عليها على طول،يا اما يتخانقوا معايا يا يتفقوا معايا
و ما اغلب الخناق و طبعا من بعد الاحداث اللى بنمر بيها بقالنا سنة اهة
ايوه سنة ماحدش عاوز يسمع للتاني
سنة ماحدش عاوز يفهم وجههة نظر التاني
سنة اخدت من الواحد مجهود جبار فى شرح وجهة النظر و الآخر لا يسمع ولا يحاول يفهم اصلا
سنة كانت خانقاني ،فرساني،ولازالت على فكرة
، اللى طلعت منها ان اغلب الناس اللى بتحسوها انها مختلفة و بتتخانق
هيه فى الاصل متفقة، صدقوني
يعنى انا من اول الثورة و انا كنت بتهاجم هجوم فظيع
و اتهموني انى كنت زعلانة على مبارك
و انى ضد الثوار
لكن الموضوع مش كده خااالص
النهاردة بعد سنة اقولكم،بس ياريت من غير شتيمة
انا مع التظاهر السلمي المتحضر
و انى بما انى بتظاهر سلمى يبقا لازم اكون واعية ان فيه حد حينتهز الفرصة
و يندس علشان يولعها
الشعب ده كله مش ملايكة على فكرة
و الفقر بيخلى الناس تعمل بلاوي فى سبيل انها تاخد فلوس و خلاص
من اناس فى قلبها حقد و كره لأي شيء و اي حد سوى ذاتها
بتفكر فى نفسها و بس
عارفين الجملة بتاعة (فيها لاخفيها) همه كده
اول لما ابتدت الثورة يوم 25 يناير 2011
هيه ما كانتش ثورة، كان اعتراض على الأوضاع،و الفساد اللى بقا عيني عينك
بيستفز كل الناس، كأن المسؤلين السابقين كانوا مش شايفين الشعب اصلا
كانوا بيتصرفوا كأنهم لوحدهم فى الوطن
و بعدين لما قلبت ثورة انا مافهمتش القلبة ديه
انا قلت ان فيه مؤامرة ، انتهزت و جود الناس و اندست لتوليعها
و بعدين بدأت صورة مبارك توضح امامى،بعد الكام خطاب اللى هل علينا بيهم
بان قد ايه هو ضعيف و منفوخ على الفاضى
لكن ده مش معناه انى اشتمه،، ده مش معناه انى اذلة
الهتافات فى التحرير كانت شتايم و قلة ادب بجانب الهتافات التانية
و ده اللى ما كانشي عاجبنى
انا مش مثالية،ولا بدور على المثالية،ولا شايفة الدنيا من برج عالى
لأ انا بس كنت فاكرة ان الناس الكويسة حتقدر تسيطر على الناس اللى ما تعرفشي فى ثورتها غير انها تشتم
ايوه فى ناس الشتيمة عندها حاجة كووول، و فيه ناس ما بتقدرشي تسيطر على انفعالاتها فى حالة الغضب و بتشتم
و انا فى كل الحالات بشوف ان الشتيمة ضعف شديد

نرجع لموضوعنا،،
المهم ان انا كنت شايفة ان يوجد مؤامرة و فيه من يريدون الفرصة المناسبة لتنفيذها
و حسيت ان بصورة او باخري تم استغلال غضب الناس من الاوضاع،ولعبوا على الونجين
يمكن تكون رؤيتي غلط و ده وارد جدااااا
و كل يوم بيمر يا بيوضح الصورة يا بيلخبطنى بزيادة
ما علينا
المهم انى شايفة من ساعتها ان فيه ناس عاوزة تكسب بونط على حساب ناس
و ناس بتسوق ناس
و ناس بتلعب بعقول ناس
و ناس بتنتهز الفرصة لعمل ما بدالها، ما هو مولد و صاحبه غايب
و لما آجى اقول انا مش مع المخالف
الاقى الطوب بيتحدف عليا من كل جانب
و يتهموني بالغباء
يمكن اكون غبية زي ما بيقولوا..و انى عاطفية،و انى خايفة،يمكن
لكن الغباء اللى همه بيتهموني بيه انا شايفاه فى الناس اللى بتتظاهر
الصراحة
زي ما كانوا عاملين لجان شعبية عند البيوت
كانوا عملوا لجان شعبية عند الاعتصامات
من باب حمايتها، و ردها عن اي افعال تؤخذ عليها
و تدى الشرطة العسكرية او الداخلية التدخل بعنف
لازم كانوا ياخدوا بالهم ان الناس الدخيلة اى فعل غلط بيعملوه حيتلزق فى الكل
ولازم كانوا يعملوا على ابقاء صورتهم نقية طاهرة
و ده كان يتم لو احتضنوا الباقى...اللى كان من السهل جدااا استخدامهم استخدام سليم
لكن ايه اللى حصل
كل واحد جري يشوف انتخابات مجلس الشعب و عمل حزب
و ساب فصيل من المجتمع لواحده
بيتصرف باسلوبة،بيتصرف بالطريقة اللى هو متعود عليها
حدف الطوب و الشتيمة الخارجة
و ده غير ان فيه البعض منهم تم استغلالهم
ولعبوا فى دماغهم
همه على فكرة مش شايفين انهم خونة،او عملاء،او عاوزين الوقيعة
لأ
همه شايفين نفسهم وطنيين جدااااااا
و ان من يعطيهم المال اليومي فانه بيساعدة على المعيشة
لأنه يا إما بدون عمل،او مرتبة ضعيف،او اتقفل المصنع او الورشة اللى كان بيعمل فيها
بس همه اتسابوا لناس تدخل فى دماغهم ان المؤسسات لازم تتهد علشان تتبنى من جديد
و مع كل هد تسيل دماء ،ودموع
و ده انا شايفاه مش ذنبهم
ده ذنب الناس المتعلمة اللى لمت نفسها عن طريق الفيس بوك و نزلت
و انضم ليهم نخبة من المثقفين
ده ذنب الناس الكبيرة اللى جريت ورا كرسي مجلس الشعب او الرياسة
ما نظموش صفوفهم
ما خدوش احتياطاتهم
ان يوجد من يلبد فى الدرة لانتهاز الفرص
ما وزعوش المهام،
و الكل بيتحرك بعشوائية
و الكل بيخبط فى بعضه
و اللى بيشغل مخه و بيدبر و بيخطط
هو الوحيد الكسبان
كل واحدفى البلد ديه شايف الصورة بمنظور مختلف
زى الصورة السريالية كل واحد بيشوف فيها حاجة التاني مش شايفها
بيفسر الخطوط لترسم شيء مختلف

المهم علشان انا طولت...بس كنت مرتاحة و انا بكتب بجد
هناك مؤامرة على مصر
اه
هناك من يريد السوء بالبلد و شعبها
اه
يمكن من دول عربية و يمكن من دول غربية و يمكن من الزفتة اسرائيل
ويمكن و ده الاكيد بالنسبة ليا انا
انهم الثلاثة مجتمعين
فيه ناس بتحب البلد بجد
اه
فيه ناس بتبص على المناصب و بس
اه
فيه ناس لازالت من الزمن السابق تعبث فسادا
اه
فيه ناس معمول لها غسيل مخ و مفهمينها غلط
اه
فيه خيانة
اه
فيه عملاء
اه
فيه ناس بتتكلم صح و عاوزة تعمل حاجة بس مش عارفة
اه
فيه ناس عاوزة تلحق تطول حاجة مش من حقها فى الزحمة
اه
فيه ناس بتدور على مصلحتها و تولع البلد
اه
فيه كل دول
وفوق كل دول و دول فيه
الله
الله المتطلع على كل شيء
اللى عارف يفرق بين دول و دول
و يعلم بنواية دول و دول
و هو العليم القدير
أسأل الله العليم القدير
ان يحمينا من كل دول
و ان يضرب الظالمين بالظالمين و يخرجنا من بينهم سالمين
و يخرج مصر من بينهم سالمة من كل سوء

5 زارونى......و اتفرسوا:

فافى said...

اكيد طبعا مش هافرسك لانى مفروسه زيك
حمدالله على السلامه وكملى كتابه
اوافقك الرأى قلبا وقالبا لو دخلتى مدونتى هتلاقينى مفروسه زيك بالظبط :)
تحياتى لقلمك

ريري كربكه said...

ايه يا بنتي ده ده انتي كنتي جعانه كلام
والله عندك حق في كل اللي انتي قولتيه
وانا كمان كنت جعانه كلام والحمدلله كتبت بس لسه جوايا كلام اكتر
البوست حلو تسلمي يا مفروسه انا كمان ذيك تمام مفروسه اووووووووووووووي

dreem said...

والله وحشتينى
عاملة ايه ؟؟

Dr. Ibrahim said...

من حقك تقولى اللى انتى عايزاه واللى يهاجم يهاجم..
وكل واحد حر فى رأيه..
فعلا فيه مؤامرات بتحاك للبلد
وفيه واقع أليم بتمر بيه مصر
ومش كل مظاهرة فعلا بتبقى كل اللى فيها شرفاء..ومن هنا تكمن المشكلة..

هناك اجندات خارجية بالفعل فى هذه الايام لجعل مصر تحت وصاية أمريكا واسرائيل بأى طريقة كانت سواء عن طريق "علمنة"الدولة..
او عن طريق "عسكرة"الدولة..

وهناك الكثير من الشباب من يندفع بحسن نية لتنفيذ هذه الامور دون التفكير..

فهدم المؤسسات مثلا لبناء مؤسسات جديدة نظيفة ليست حلا للتغيير او الاصلاح لان الفساد منتشر فى كل مكان وفى كل قطاع فى الدولة من أصغر موظف الى الوزراء الا من رحم ربى..
ومحاولة تغيير ذلك الامر سيحتاج الى جهود جبارة وعن طريق الدعوة الى دين الله والبعد عن الاشياء الحرام وعن طريق تطبيق القانون..
ومثلا من ينادى باسقاط حكم العسكر هذا نوع من السذاجة السياسية لان اسقاط حكم العسكر لن يتأتى بمظاهرة تطالب باسقاطه فالنظام العسكرة متغلغل فى جميع قطاعات الدولة وفى الاقتصاد ولن يتم اسقاطه الا على المدى البعيد..اهم شىء فى المرحلة الحالية هو عدم اعطاءه اى امتيازات فى الدستور الجديد..

ونأمل ان ربنا يسترها مع كل من يحب الوطن ويعمل من اجله باخلاص.

Asmaa mahaba said...

فى وسط الصوره السيرياليه دى لو بصيتى حتلاقى خطوط باينه وواضحه مفيهاش شك بس احنا مبنحبش التركيز