كل سنة و انتم طيبين

كل سنة و انتم طيبين يا بلوجرية
عدت سنة 2012 و كان نفسي اكسر وراها 60 زير
سنة كانت تقيلة على قلبى و على معدتي
كانت واقفة فى زوري وقفة سودة كانت حتخنقنى
مع انها كانت خفيفة على قلوب البعض و على معدة البعض
سنة حدثت فيها احداث كثيرة جدااااا
ماتت ناس علشان بتقول كلمة حق
اتحرقت قلوب امهاتهم
مات شباب بريء جميل كل ذنبه انه عاوز مصر تبقا احسن
ان اهلهم و اهل اصحابهم يكون حالهم افضل
شباب  ما يهموش لا اخوان ولا سلف ولا حازمون ولا ظباط شرطة ولا جيش
شباب رايد الخير و بس
موتهم حرق قلب  الكثيرين
و كان دمهم بارد على قلوب الكثيرين ايضا
و ناس انتهزت موتهم علشان توصل لاغراضها

سنة شالت اقنعة عن وشوش كتيرة جداااا
ناس كنت بتحترمها من قبل الثورة و هيه بتتكلم
و بعد الثورة بقيت تستغرب طريقة كلامهم
و اخيرا لاقيتهم بيدعوا اليهود للعودة الى مصر
كلام يخلى الشعر يشيب
يعنى الشباب كان عامل ثورة و بيموت علشان فى الآخر اليهود ترجع مصر؟؟؟

سنة  عملنا فيها استفتاء قلنا اخيرا مافيش تزوير
تقوم تلاقى الناس نفسها اللى كانت بترفع قضايا على مبارك و اعوانه علشان بيزوروا
تلاقيهم همه همه بيزوروا.....

ناس كانت بترفع صوتها تهاجم الفساد
لاقيتهم همه الفاسدين و المصيبة انهم مش شايفين نفسهم فاسدين
لانهم بيصلوا و بيقرأوا القرآن
و ديه الطامة الكبرى
انهم يزجون بالدين و آيات القرآن الكريم ليبرروا افعالهم الدنيئة
الظالمة...الفاسدة

ناس صرخت علشان  الاجانب تسيء لرسولنا الكريم
و هم بأفعالهم يسيؤن اليه اكتر و اكتر

انا لوفضلت اتكلم عن 2012 مش حسكت
من الآخر كانت سنة سودة الصراحة
يالله غارت
اتمنى من الله  ان ينقذ مصر

4 زارونى......و اتفرسوا:

الضاحكون said...

ذاتس ذا بروبليم
هى دى المشكله يا مفروسه انهم فاكرين انهم علشان بيصلوا ويصوموا ومعتبرين نفسهم كل الاسلام وكل المسلمين يبقوا معصومين
ولسه يا مفروسه هنشوف من ده كتييييييييييير للاسف الشديد
عموما كل سنه وانتى دايما بخير
امشى بسرعه بقى احسن هيئه الامر بالمعروف تقبض عليا بتهمه قول كل سنه وانتى طيبه فى الكريسميس

Bent Men ElZman Da !! said...

بالرغم من ان السنادى فى احداث كتير اوى حصلت فى البلد تدعو للأكتئاب
بس اكيد كان فى حياه كل واحد فينا حاجات اجمل بتخلية يعدى شوية
والا الواحد الحقيقة كان هينتحر
كل سنة وأنتِ طيبة
ويارب تكون سنة أجمل من اللى قبلها أن شاء الله :)

موجة said...

على فكرة إنتي ظالمة نفسك بعنوان المدونة.. أنا زرت مدونتك وقرات تأملاتك عن عام مضى وما (اتفرستش) هههههه بجد فعلاً الوشوش سقطت عن ناس كتير السنة إللي فاتت خاصة من كنا نظنهم حماة الدين وإكتشفنا كيف يطمعون في الدنيا :)

غني يابهيه said...

بسجل تحياتي بس بعد فترة غياب كبيره
كل سنه وانتي طيبه