كلمنى شكرا..........

ازيكم جميعا
اخباركم اييييه كوووولكم
يارب تكونوا كلكم بخير

انا بقا مفروسة
و مفروسة جداااااا
بقالى فترة لا بأس بها يجي سنتين كده
بلح على زوجي انه يوديني سينما
و هو ما بين انا مش بحب السينما و ما بين مافيش افلام حلوةقال يعنى هو متابع
المهم صادفت يوم الجمعه
انى لما اقابل حد و اقول انا نفسي اروح سينما
تأتيني النصيحة روحي كلمنى شكرا
فيلم حلو بيضحك من اول لما تدخلى لغاية لما تخرجي
ايه فيلم كلمنى شكرا ده؟؟؟؟
ده بطولة غادة عبد الرازق
و انا اصلا مش بحبها الصراحة
هيه اوفر حبتين
و لا مين الممثل اللى معاها ده؟؟؟
المهم تناسيت الموضوع
و سبحان اللى يخليني اصبح يوم السبت
و اقابل ناس من صفوة المجتمع
و الله بدون مبالغة صفوة من سيدات المجتمع
و اذ تتفتح سيرة السينما
و الاقيلكم اغلبهن اجمع على فيلم كلمنى شكرا
بيضحك موت يا مفروسة
يعنى يا مفروسة هو صحيح فيه الفاظ الاحياء الشعبية
بس بيضحك موت
انا بقا فيه حاجة لعبت فى دماغي
و كلمت زوجي و عملت شبه خناقة و اتأمصت
و انت مش بتخرجني
و انت ناسيني
و الكلام الفارغ ده اللى بتقوله الستات
قوم الراجل مشكورا وافق انه يجي معايا سينما
و ياريته ما وافق
و انا بكل سذاجة ..........نروح فيلم ايه؟؟؟؟
اختاري انتى اللى انتى عاوزاه .....علشان اخلص من زعلك
و انا .....طيب فيه فيلم الكل بيقول عليه بيضحك
تعالى ندخله خلينا نضحك شوية
و ما كدبتش خبر
و رحنا السينما و احنا داخلين ببص على الأفيش
و بقى اتفتح
مين الممثلين دول؟؟؟
انا معرفش منهم غير غادة عبد الرازق
و شويكار و اخراج خالد يوسف
هو صحيح خالد يوسف ما لوش فى الضحك
بس قلت يمكن
و الفار بدأ يلعب
و جوزي مش مركز كان خالص
مشغول بتليفونات عمل
المهم انا جبت الفشار المتين و دخلنا
و بدأ الفيلم
اوله شوية عيال من منطقة شعبيه بيلعبوا فى خرابة
قلت عادى خالد يوسف بيحب الخرابات
و بس بدأ الضحك اللى على اصولة بقا
من اول الدقائق الاولى
ايه القرف ده؟؟
ايه البذائة فى الالفاظ ديه؟
ايه غادة عبد الرازق المقرفة ديه؟؟؟؟؟
انا لو فضلت اقولكم على التلوث البصري و السمعي
مش حتصدقوا بجد
فيلم جنسي فقط لاغير
بالألفاظ و المشاهد
و لا يمكن ان يتقال عليه غير كده
طبعا انا جوزي كان باين عليه الاستياء
و الصراحة انا كمان
و جت الاستراحة
و سالنى انتى عاجبك الفيلم
قلتله و انا ببلع كسفتى يعنى
ايوه يعنى عاوزة تكملية؟؟؟؟
يعنى اذا ما كانش يضايقك؟؟
و هو صامت و ماسك ياعينى اعصابه
و بعدين بصيت فى الاستراحة على السينما لاقيتها بدون مبالغة كومبلية
و نوعية الناس اللى قاعدة كلها كويسة
يعنى مش ناس بيئة
بس الفيلم بيئة
و رحت باصة فى الساعة و قلت لجوزي بقولك ايه يالله علشان مش تتأخر على مواعيدك
و قمت جري
و هو ماصدق
و خرجت من نص الفيلم
اللى خسارة الفلوس اللى اندفعت في تذاكرة
و خسارة كل مليم اتصرف عليه
فيلم انا مكسوفة و الله و انا بقولكم انى دخلته

طبعا جوزي بقا ما سابنيش
ابقى نقى الافلام ده فيلم ندخلة؟
ما كان عندك مليون فيلم
اشمعنى ده؟
طيب ما سالتيش عن قصته؟
طبعا انا بأنب نفسي تأنيب عالى بجد
ازاي لم افعل كل ما قاله
و بدأت الدموع تنسال و كأني انا اللى مثلت الفيلم
و حسيت بالخجل الشديد من نفسي
و لاقيته بيقولى
انتى مالك انتى مالكيش ذنب انتى مش كنتى تعرفي
و بعدين الناس اللى كانوا فى السينما ناس مستواهم عالى
بس غريبة بجد ان النوعية ديه هيه اللى بتشوفه


انا مفروسة جداااا
مفروسة من نفسي
و مفروسة من الممثلين
و مفروسة من المخرج
و مفروسة من الناس اللى كانت بتضحك و ضحكتها ملعلعة
على إيييييييييييه مش فاهمة
و مفروسة انهم دخلوا الفيلم اصلا
و انا منهم
مفروسة من الرقابة اللى أجازت الفيلم
و مفروسة من الناس اللى قالتلى حلو
و مفروسة انى مش دخلت فيلم اولاد العم
مع انه كان معروض فى نفس السنما
و نويت اني مش ادخل سنما تاني
الا لما اقرأ قصة الفيلم

و اللى فارسنى اكتر انى حاسة ان جوزي مطمئن نفسيا
انى مش حجيب سيرة السينما على لسانى تاني

تحياتى ليكم و اوعوا تدخلو الفيلم

هل المواقف تغيرا لشخصيات؟

ازيكم جميعا

يارب تكونوا بخير

اولا وحشتوني كلكم

ووحشنى قرائة ما تكتبون

ووحشنى الرد على تعليقاتكم

و ان شاء الله استرد نشاطى من تاني

بس انا ليا سؤآل

حد فيكم مرة اتحط فى موقف، او حصله موقف

و حس بعدها ان شخصيته اتغيرت؟؟؟

سواء أكان التغيير بالسلب او الإيجاب

يعنى مثلا كان لا يكف عن الكلام

و بعد ان حدث موقف ما

اصبح نادراً ما يتكلم

كان يأخد مثلا الأمور ببساطة

و بعد مرورة بموقف ما

اصبح معقد؟؟؟

كان خجولاً و اصبح جريءً

يعنى المواقف ممكن ان تغير من شخصية الانسان

انا بقول اه

انا بعرف ناس كانت شخصية متحدثة لبقة

تجذب بحديثها و اسلوبها من حولها للأستماع اليها

و بعد ان مرت بموقف ما

عجزت فيه عن الرد ..و ذلك بسبب وقع الكلمات الغير متوقعة على مسامعها

و اخلاقها و تربيتها الرفيعة اللتى كانت العائق فى ان ترد الاسائة بإسائة مثلها

قولا او فعلا

هذا العجز اللحظى اصابها بنوع من الصدمة الدماغية

اللتى اثرت على شخصيتها

بالسلب و ليس بالإيجاب

اصبحت تتلعثم فى كلامها بعد ان كانت لبقة

اصبحت اكثر حساسية لوقع الكلمات على مسامعها

مع انه فى اغلب الاوقات كلام لو حد تاني سمعه

حيقول كلام عادى

بس هيه مش شايفاه عادى

اصبحت من الآخر شخصية مهزوزة

عكس ما كانت عليه فى السابق

بعد ان كانت حكيمة فى تصرفاتها و كلامها

اصبح الكل يؤآخذها على كلامها و تصرفاتها

(صعبانة عليا)

انا كانت نصيحتى لها

ان المواقف اللذى يمر بها الانسان فى حياته

وظيفتها ان تزيده صلابه

و ليس ان تضعفه

ولو شعر للحظه انها تسببت فى ضعفة

او عادت عليه بالسلب

فعليه ان لا يستسلم لها حتى لا تتفاقم الحالة

و يكون من الصعب ان يداويها

و ان تفاقمت

فعليه الاعتراف انه فى حاجة ماسة لمساعدة خارجية

متمثلة فى دكتور نفسي، او متمثلة فى اشخاص

يرجعوله ثقته بنفسه

ده كان رايي

و بعدها نظرت الى نفسى

و حاولت التركيز مع نفسي

هل شخصيتى اكتسبتها من مواقف مرت علىَ؟

متهيألى اه

يعنى الفرسة الى انا ببقا فيها ديه

اكيد انا كنت مفروسة زمان

او بمعنى ادق كان عندى الاستعداد

و اكيد حصل موقف فى حياتي زود الفرسة ديه

بس انا بحاول افتكر ايه ايه ايه ايه؟

مش فاكرة و ده اللى فارسنى

تحياتي ليكم

و ان كان عند حد فيكم مواقف ممكن حد يستفيد منها

المدونة بتاعتكم و انتم عارفين من زمان

تحياتي

مقتطفات لبداية العام

إزيكم جميعا
ترددت كثيرا قبل الكتابة اليوم
لاني ببساطة لا اريد ان افرسكم معى فى الايام الاولى من السنة الجديدة
اللتى يأمل البعض، بل الكثيرين و منهم انا
ان تكون احسن بكثير من السنة الماضية
و لكن ما باليد حيلةمفروسة و حفضل مفروسة
@@@@@@@

جيء فى كثير من البرامج التلفزيونيةو الجرائد
ما يدار حول تطعيم طلاب المدارس و الحوامل

ضد الفايروس القاتل
و هو الوصف الذى وصفته به جريدة المصري اليوم
سبحان الله دلوقتى الانفلونزا بقت فيروس قاتل
فكرتني بالفيلم اللى كانو بيوقولوا فيه
لا تشرب الدواء انه به سم قاتل
ما علينا
الآن انقسم الاهالى الى قسمين
قسم يؤيد و مبسوط و سعيد و فرحان
ان اولادة سوف يأخذون التطعيم و حيكونوا فى الآمان
و قسم قلقان و لا ينام الليل و يتكلف اتصالات دولية لكل اللى يعرفهم
فى امريكا و اوروبا حتى فى بلاد الواء الواء
و ده لأنه اشيع ان المصل بيسبب بعض الأعراض الجانبية
مثل الشلل الرباعي و العياذ بالله
و مثل الصرع
و غيره من الاعراض....
الغريب ان وزير الصحة عندما سؤل عن حكاية الشلل
قال بمنتهى الصراحة
ايوه لابد من تواجد اعراض جانبية
لكن من سوف يصاب بها؟ لا احد يعلم
و هل هيه حتمية للكل؟؟؟؟
لأ طبعا
زي اي دوا ليه اعراض جانبيةو انت و حظك
و من جانب آخر تؤكد وزارة الصحة على السادة المواطنين
ان تثق بكلام وزارة الصحة
و ان المصل آآآآآآمن

بس على كل ولى امر ان يمضيلي
على انه موافق على تطعيم ابنه

لا تعليق بس خلاص
@@@@@@@@@@
ماشاء الله ماشاء الله
ارى ان شركات المحمول
تسعى بكل جد فى حملة لتجميل الجمهورية
فزرعت فى جميع انحائها النخل العااااااااااالى
الذى لا يطرح بلح ابداااا
و لكن يطرح ذبذبات ربما نحصد نتايجها فيما بعد

@@@@@@@@@@

نفسي اعرف آخرتنا ايه؟؟
احنا كشعب
آخرتنا ايه فى الزبالة اللى انظارنا اتعودت على رؤيتها
الذبالة اللى جيوبنا الانفية
امتلأت سواء بروايحها
او روايح حرقها
روايح و مناظر تفرس

@@@@@@@@
رسالة الى كل من يعرف مفروسة شخصيا
او بشخصيتها الاعتبارية
اعلموا انى اكن لكم كل الحب
حتى اذا لم تتوافق شخصياتنا

كفاية عليكم كده
سلام