سو ييا سو

  • على فكرة ديه مش اغنية محمد منير
  • ده اسم الاخت ســــو اللى شرفتنا بالزيارة
  • تبدأ القصة الساعة التاسعه و النصف صباحا من يوم 26 مارس اللى هوه امبارح
  • أكتشفت ان زوجى العزيز واخد اليوم أجازه
  • لانه يوجد ضيوف من استراليا اصدقاء لاخو زوجى المقيم هناك و هو الان فى مصر زيارة
  • طيب يا حبيبى انت واخد اجازه ليه
  • علشا يمكن نتقابل مع الضيوف و نعزمهم برة
  • ( الضيوف رجل و امرأه و هى الاخت سو)
  • مخبيش عليكم كلمة نعزمهم بره ديه عجبتنى وخلتنى ريلاكس
  • بعد الفطار و الشاى و القهوه و اللذى منه زوجى قالى تيجىنخرج
  • قلت يا سلام قوى قوى ...ماهو محسوبتكم تكون تعبانه ... مرهقه.. و اول ما تسمع كلمة خروج يدب فيا النشاط .. مش عارفة ازاى
  • سبت البيت يضرب يقلب قلت مش مهم ابقى اروقه لما اجى ... و المطبخ اثار الفطار.. قلت مش مهم الخروج اولا
  • هو انا فى ديكالساعة لما جوزى يقولى حنخرج....
  • قمت لبست هوا .. حنروح فين يا حبيبي؟
  • اخويا و مراته عاوزين يعملوا شوبنج ..
  • كلمة شوبنج خلت عيونى تلمع لمعان اقلق زوجى
  • قلتله.. اوكى اهو الواحد لو لقى حاجه حلوة يبقى يشتريها
  • لمحت فى عيون زوجى نظرة اعلمها جيدا و بعض التعابير على وجهه اعلمها ايضا جيدا
  • بس استعبطت و عملت نفسى مش فاهمة
  • المهم نزلنا و اتسوقنا و اختكم ما توصتش.....
  • وخلال رحلة التسوق الموبايل تقريبا مانزلش من على ودن زوجى
  • شوية شغل و شويه يتابع مع الضيوف خط سيرهم .. الى ان وصلوا للاهرامات
  • و حوالى كده الساعه الرابعة بدا النقاش ياخذ مسارة ...الناس تعبانة.. بس برضه لازم نعمل الواجب
  • كحال اغلب المصريين.... الجمال.... اهل الكرم
  • الضيوف:... احنا حنرجع الفندق تعبانين...
  • زوجى:.... ابدا ....لازم نعزمكم...تحبوا تاكلوا اية.....لحوم و لا اسماك؟
  • الضيوف:.. احنا لسة متغديين فى الهرم
  • زوجى: ما هوه لسه بادرى احنا مش حناكل قبل الساعة 8 و لا 9
  • امام الحاح زوجى لم يجدوا سبيل الا الموافقه على ان نتقابل .. و بعدين نبقى نقرر
  • و اختكم طبعا مش واخدة خوانة.. و رلاكس على الاخر ... و انا يهمنى.. نروح اى مكان
  • انشالله فول و طعميه .. انا مش فارقة معايا....
  • بعد المناقشات و المحادثات و و صول الساعة الى 530 مساء....
  • و مايمنعش فى بعض المحادثات الجانبية لزوجى و اخوه...بينى و بينكم كان شكلهم ما يطمنش
  • المهم لقيت زوجى واخدنى على جنب.. قلت حياخد رأى.. أو يمكن حيسألنى معاكى فلوس كفاية بعد الشوبنج
  • لقيت زوجى الحبيب يطلق القنبلة فى وجههى بس بيحاول يلقيها فى لطف.. بس برضه قنبلة
  • زوجى: انا يقول بما انهم متعبانين من التور و مرهقين.. احنا نعزمهم فى البيت احسن...
  • انا لمعت عيناى و احمرت و اخضرت و اتفتح فمى كلبلهاء ووقفت الكلمة فى زورى كنت حتخنق
  • بيت؟ انهو بيت.؟.... بيتنا؟
  • اه طبعا امال بيت الجيران.. علشان يبقوا قاعدين براحتهم .. و اللى عاوز يدخل ياخد دش.. يعنى يبقوا براحتهم
  • طيب و الاكل؟
  • حنطلب ...ياكباب و كفتة .. ياسمك لسة ما قررناش
  • طيب بص بقى انا عاوزه اروح .. البيت يضرب يقلب و الست اللى بتساعدنى بقالها كتير ما جتش
  • و لاازم اروق البيت .. ممكن تروحنى.. و قرروا على راحتكم بعد كده
  • اوكيه ما هو احنا كمان عاوزين نشرب قهوة علشان نصحصح

  • و رجعنا البيت يا سادة يا كرام الساعة السادسة مساءا...
  • و من الساعة السادسة .....مش عارفة احكيلكم غير انى كنت اتمنى ان يكون لدى 10 ايدين مش اتنين
  • بدات فى الترويق السريع و التنظيف السريع.....ابو سريع السريع .......
  • و فى خلال لهوجتى فى الترويق....جوزى:خلاص احنا قررنا حنجيب سمك ...اطلبيه عبل ما اروح اجبهم
  • بس كترى بلاش الشح بتاعك كل واحد سمكة.. يعن اعملى تشكيلة .. اشى مشوى و اشى مقلى و جمبرى....و اعملى انتى الارز
  • و خلى الاوردر الساعة 730 و انا حعدى و اجيبة.. و ماتنسيش اعملى حسابك فى السوفت درينك...و الفاكهة
  • و العيش الطازة...و المياه المعدنيه....و ياريت برضه تجهزى ....فوط علشان يمكن ياخدو دش....
  • و برضه حاجه ممكن يلبسوها علشان يبقوا مريحين اصلهم طول النهار ما بين المتحف المصرى و الاهرامات يا عينى زمانهم هلكوا
  • طااااااااااااااااااااااااااااااخ ده باب الشقة اللى اترزع و خرج يا سادة ياكرام مع اخوه علشان يروحوا يجيبوا الضيوف و السمك
  • ... والله كنت حعيط .. يعنى حتى مادنيش فرصة اقول كلمه و احده.......امرى الى الله ما هو احنا (المصريين) اهل كرم
  • قلت سلفتى.. حخليها تعمل حاجات صغيرة كدة... قوم الست المبجلة(استرالية برضه) كملت علي... يقى هى تعبانه و حتريح الساعة ديه لغاية لما يوصلوا........بزمتكوا اقول ايه ...

  • المهم ما بين تليفون للخضرى... و السوبر ماركت .....و الترويق.. و عمايل الارز .......
  • كل حاجة كانت على سنجة 10 الساعة 730 .. ازاى معرفش....
  • وصلت الست سو(اختصار سوزن)... امممممه.......اممممه
  • هالو....هاى...ولكم......شوية كدة.. من الترحيب اللى قلبكم يحبة
  • عرضت على الست سو المبجله انها تدخل تطس وشها بشويةميه .. و لو حبت تاخد دش فى حمام الملاطيلى و ممكن اشوفلها حاجه تلبسها.....قوم ايه الست ســـو بنت الاسترالية.. تقولى لو ادتينى حاجة و عجبتنى ..مش حرجعها..
  • ياخبر اسود الست داخلة طمعانه من اولها .. طيب مافيش شوية خشا ..قلتلها مش مهم يا حبيبتى...سوفنير....
  • ههههههههههههههههه يجماعة ناكل بقى انا على لحم بطنى من الصبح...و ده كان حوالى الساعة 830
  • ااوكى .. مافيش مانع...ده همه اللى بيقولوا..

  • الست المبجله سو اول ماقعدت على السفرة .. مسكت الطبق تقلبه..... و عنيها فيها اعجاب...
  • قلت يا بت حطى عينك على الطقم للحجه ســـــــو تقولك الطبق اللى اكل فيه اخدة.. وده طقم التشريفة...اه ما كل واحدة لما تتجوز بيكون عندها طقم تشريفة...بيطلع للضيوف....
  • م م م اترصت السفره ا شى سمك مقلى و اشى فيليه و اشى مشوى و اشى جمبرى.
  • .ديه طبعا سفرة اكيلة السمك زيي
  • و جوزى كان مفطمنى انهم بيحبوا السمك مممممموووووت
  • والله يا حبيبتى لازم تجربى النوع ده.. و المخلل ده...اا عاملاه بادييا...و المشوى ده وووووااااااوووو
  • و الاخت .. ســـــو متنحة و مابتقولش حاجة..غير اوكى اوكى....
  • قلت يا بت سيبيها على راحتها .....و الاقيلكم يا سادة يا كرام.. الحاجه ســـــــو تحط حتة فيلية صغننة واحدة فى الطبقو معلقة واحدة ارز
  • ..و نقطة واحدة طحينة... و دمتم
  • الطبق بتاعها فكرنى بالمطاعم الخمس نجوم... تكون دافع دم قلبك فى طبق كله عينات للدوقان...
  • المهم.. ماتاكلى يا حاجة.......ثانك يو .. اصل السمك فية شوك؟
  • نعم ياختى .. ما هو السمك لازم يكون فيه شوك.. و ده فيليه يعنى بكتيره ان قابلتى شوكه. تبقى محظوظة..
  • طيب يا حبيبتى ممكن انضفلك لو عاوزه......؟
  • و طبعا قبل ما اسمع اوكى ... كنت منضفة طبق فيه مشوى و مقلى و جمبرى.. مش باقولكم اهل كرم.....
  • و جوزها يا حبة عينى .. مطيع...من النوع....اللى مطرح ما تحطيه ينحط
  • جبر بخاطرى الله يجبر بخاطرة.. و اكل من الطبق اللى كنت منظفاه......
  • اما الحاجة سو استنت لما كنت ببلع الاكل و قالت بامتعاض
  • ايه الاكل ده كله.. احنا عندنا فى بلدنا ما نقدرش نحط الكمية ديه على السفرة..
  • والله يا جماعة احنا كنا سبعة... و بناكل.. و الاغلبية.. حريفة سمك..
  • ده تبزير و اسراف.. انا لما شفت الاكل بالكتر ده ... انسدت نفسى....
  • طبعا انا اقولوكم الحق اتفرست .. بقى انا دايخة الدوخة ديه النهارده علشان تشريف سيادتك.. و انتى فى الاخر تكبسينى .. طيب والله فى اول فرصه حكبسك انا كمان......
  • حاولت افهم فيها ان المصريين اهل كرم .. و اغلب المصريين ترحيبهم بيكون بسفرة عامرة بما لذ و طاب...
  • و هى تهزلى فى دماغها.. يا اما مش فاهمه .. يا امابتاخدنى على قد عقلى......
  • المهم يا سادة كل واحد من الموجودين تقولوش اتاثر بكلام الست ســـو
  • قمت لقيت كل اللى كان قبل كدة بياكل السمك بشوكه ..(. ماهو حريف اكل السمك مش بيسيب فتفوتة)...
  • لقمة و قام
  • قلت ما علينا مكسوفين و لا حاجة مش مهم الاكل ده حيفيض لبكرة و حاكل براحتى....
  • بعد الاكل و تحويل السفره كاملة الى المطبخ....و طبعا من كتر الحاجات اللى فيه و الكركبة بقى مشحكيلكم ....
  • قوم الاقى الحاجة ســـو دخلت الصالون .. من غير ما تغسل اديها...
  • يا ست .. يا خالة.. مش حتغسلى اديكى.. ده سمك .. و انا يا جماعة ان جيتو للحق محسوكه .. حبتين.. بالنسبة للنظافة
  • و هى ولا على بالها......طبعا مش حوصفلكوا قلبى كان بيتقطع.....طيب شاى يا جماعه بعد الاكل .. الفاكهه.. ايس كريم .. اىحاجة تحلو.........راحت الاخت هابدانى كبسة تانية.......ايه اللى انتو بتعملوه ده .....بعد كل الاكل ده و عاوزين تحلوا ؟
  • قلت بس ده نق ..استرالى على اصوله.......الله اكبر انتى جايه تحسدينا ولا ايه؟
  • نو..نو..از...تو..متش........انا مش باشرب شاى.. ولا قهوة.. و لا سوفت درينك.......ولاباكل كتير
  • قلت فى سرى اللى يسمعك تقولى كده يفتكرك رشيقة... بس هيه نونونونونو.......
  • على فكرة نسيت اقولكم ان الاخت ســــو خطوتين كده و تبقى على ابواب الستين .. ما علينا .. انا مش بانق
  • تقوم الحاجة ســو تقول اية....انا محافظة جدا على صحتى ... يدوبك بيرة و سجاير و بس...
  • وبس... الست حتفرسنى اكتر ما انا مفروسة..........و نعم المحافظة على الصحة
  • تخن ...و كلسترول.....حاجة يايي....اما سل و كبد.. يا محلاه و نعمة الصحة صراحة
  • ..الاخت اسنبى حارسها و قفت قدام البوفية اللى قدام تربيزة السفرة
  • و كرهتنى فيه..
  • ماله كبير كده ليه.......... و دخلتيه اشقة ازاى...................... و بكام............ و الشقه صغيرة
  • ان جيتو للحق حسستنى انى عاوزه اعزل
  • على 10مساءا قالوا احنا تعبانين و لازم نرجع الفندق.. و طبعا زوجى الشوفير....
  • قلتلها مع الف سلامة يا حبيبتى.. ماتبقيش .. تقطعى الجوابات .....
  • تقوم الست المبجلة.....وهى على الباب ماشية خلاص.. و لابسة جلابية محترمة من عندى
  • تقولى معندكيش كام زجاجة مياه معدنية زيادة أخدهم الفندق اصل ثلاجة الغرفه مافيهاش مية
  • .
  • لولا انى متربية ... و خريجة مدارس اجنبية .. انا كنت سمعتها كلام مش ولابد
  • و جبتلها المياه و بلسلامه روحت على الفندق

  • و اختكم قعدت محتاسة فى الترويق و غسل الصحون و التطهير الى الثانيه صباحا
  • حاولت ان انام....و لكن ان جيتو للحق ماعرفتش..فكرت فى كلام الاخت ســـو
  • صحيح هوه احنا بنعمل كده ليه؟
  • لماذا نربط المناسبات بلطعام
  • الترحيب بالضيوف .. بالاكل
  • لو فكرنا .. اى مناسية او اى خروجة مرتبطة بالطعام
  • حتى الاطفال من صغرهم بنربط الافعال الحسنة بالحاجات الحلوة
  • لو سمعت الكلام يا حبيبى حجبلك حاجة حلوة
  • ان جيتو للحق انا مانمتش.. كله بسبب الاخت ســـــــو
  • حد فيكو يقولى احنا بنعمل كده ليه..........بنقلد مين؟
  • ماهو احنا شاطرين فى التقليد و اكيد احنا بنقلد حد
  • ميييييييييييييييييييييين؟

ارض الاحلام

ارض الاحلم بلوج جديد

افضح ما استرش

مش عاوزة اقولكم ان دية ثالث مرة اكتب فيها البوست ده
اولا اشكر كل من شرفنى بالزيارة و ترك لى رسالة
ثانيا كل سنة و انتم بخير
ثالثا كل سنة و كل ام بخير و بسلام
الموضوع بقى انى دايما باسمع ........اسكتى .... يا ساتر ده انتى تفضحى ما تستريش.........
بقى بزمتكوا هو الواحد لما يقول رأيه... فى حاجة معجبتوش يبقى بيفضح .. و ما بيسترش...
ححكلكم و انتو احكموا المره ديه
بقى انا قبل ما ارد على الرسائل .. فى مدونتى .. قلت آخد لفة و اشوف الردود على الرسائل اللتى تركتها فى مدونات اخرى.. و بينى و بينكم كان نفسى اعرف رد مدونة بعينها...
المهم جيت ادخل ما عرفتش يظهر ان صاحبتها قفلتها فى و شى .. ان جيتو للحق اتفرست ..
مش هيه المدونات معموله علشان نتشارك فى الافكار و الاراء ... مش كده ولا انا فاهمة غلط؟
أقولكم بقى الموضوع من اوله ما هو أنا لسة جديدة... لما كنت باتفسح من كام يوم فى المدونات... لقيت خير اللهم اجعله خير مدونة
استفزتنى.. و فزعتنى.... كلها حاجات بتنور بلاحمر و الاسود و الوان فاقعه .. و فجأة.. اناشيد و ناس بتتكلم فى المدونة .. اه والله انا مش ببالغ .. مش عارفة اتعملت ازاى......... و فضولى ... جزبنى لاعرف المزيد و القرائه........
نسيت ان اقول لكم صاحبة المدونة عندها 20 سنة .. الله يرحم الايام .. لما الواحد كان عنده 20سنة ..
المهم المهم مش ده موضوعنا ........الموضوع و العنوان اللى استفزونى لارد ... هو المقاطعة .............
و انا بصراحه لي رأى ما بيعجبش...وفى الموضوع .. كاتبه كام اسم بلد و مصانع .. و منتجات ...
ردى كان كلاتى بدون زيادة ولا نقصان :
انا معاكى مليون فى المية.. بس زى ما الموضوع ..له شق ايجابى ... له شق اكثر سلبية و مش حيقع غير على .. دماغنا احنا ..... ممكن تقوليلى الكام ألف دشليون عامل اللى فى المصانع ديه حيروحوا فين؟؟؟ العملية مش ناقصة ... هو اكيد فى حل بس عاوز رويه و تفكير بذكاء و حنكة .... و اذا كان مقاطعة و خلاص .. يبقى نقاطع الكمبيوتر و البلوجر لانهم امريكانى .. و كل دقة حرف بتعود عليهم برده......
وبس
بقى بزمتكوا انا قلت حاجة غاط؟
ليه تقفل الباب فى وشى مش هو الكلام اخد و عطا.....؟
و الناس اللى بتكتب فى المدونات ... غرضها ان حد يسمعها .. ويتفق أو يختلف فى الرأى .. و يرد عليها ... مش كدةولا انا فاهمة غلط......؟
ارجع للبداية سمعت نفس الكلام ,,,,, و انتى مالك زمانهم اهدروا دمك .. انتى كدة دايما .....
تفضحى و ما تستريييييييييييييييييييييش.....................................
بس برضة مش فاهمة استر على ايييييييييييييه
حد يفهمنى
***********************************************************************

  • سبحان الله
سبحان الله فى خلقه شؤن انا حديثة الانضمام الى البلوجر و منذ انضمامى و انا ابحر فى المدونات المختلفة لانى ببساطة عندى حب استطلاع اعرف الناس بتفكر إزاى و الى اى مستوى وصل تفكيرهم.
و هل بالفعل الناس مريحه نفسها من تشغيل مخها ولا سيباه للى يقودة الى اى اتجاه؟
و مع تصفحى السريع وجدت ناس على كل لون .. شباب جميل و بيكتب كويس و عنده ثقافة بدليل انه بليغ فى الكتابه و عنده درايه .. و مدونته فعلا محترمه حتى سخريته مافيهاش تجاوز.
وقلت لو اكثريه الشباب بهاذا الوعى و التفكير و الاحترام و ضبط النفس... يبقى الدنيا ان شاء الله بخير و كل ما يحدث ما هو الا اختبار من الله سبحانه و تعالى لانفسنا .. هل نحن من اللذين يتحكمون فى انفسهم و لا من اللذين سهل التحكم فيهم؟
و على الجانب الاخر وجدت شباب الله يكون فى عونه و افكاره و غضبه مش حتوصل الا للدمار لهم اولا ثم للى حواليهم.. و قلت يارب استرها لو الشباب اكثرريته كدة يبقى خلاص احنا قربنا من يوم القيامه لما يكون شباب بكر اعمار تتراوح ما بين ال17 و ال25 .. المفروض ان يكون شباب خلاق و تسيطر عليه افكار سوداويه مش عارفة دخلاله منين .. يبقى اكيد ربنا يستر و ادعو له بتنوير البصيرة علشان يعرف يميز.
وعلى الجانب الاخر و جدت شباب رايييييييييق جدا و فاضى و ده نحط عليه علامة ؟ كبيرة ....
و على جانب آخر و جدت ناس كبار فى سن والدى .. مش عارفه دخلوا البلوجر ليه ... و ما هو الغرض من الانضمام؟؟؟؟؟
انا كل تفكيرى ان البلوجر لكى ينفس الشباب عن نفسه و مع بعضه عل سبيل انهم لايوجد احد يسمعهم على الاقل يسمعوا بعضهم و يجدوا من يشاركهم و يختلف معهم و من هنا تاتى الاستفادة من تجميع اراء مختلفه و اساليب تفكير مختلفه.....يمكن الاستفادة منها.......... و لهاذا السبب انضممت للبلوجر
************************************************************....