حزيييييييييييييييييييينة

ازيكم جميعا
انا حزينة جدااااا، بالإضافة لكوني مفروسة طبعا
و حزني ده بسبب الانتخابات
حتقولولى انتى مالك انتى يا مفروسة بالإنتخابات
انتى كبيرك مجلة ميكي

حقولكم ما هيه الانتخابات السنة ديه كانت تعكس قصة من مجلة ميكي
و هيه عصابة القناع الاسود


نفسي اتعرف على العقل المدبر للعملية الانتخابية السنة ديه
لان مخه بجد فلة
خطط صح
و هو دلوقتي فى نشوة عارمة من ان مخططه نجح


البند الاول فى التخطيط
الإطاحة بكل من له صوت معارض واضح، و يلتف حوله الكثيرين
و من هنا كانت اللإطاحة بعمر اديب ووائل الابراشي

البند الثاني
محو صوت المعارضة فى المجلس الموقر
و من هنا كانت نتيجة الاخوان لم ينجح أحد

و المعارضين الاقوياء زي مصطفى بكري... وغيره
سقطوا

ثالث بند
غلوا اللحمة
علشان المواطن يبقى هفتان
يقوم عند الترشيح
يقوم المرشح بذبح العجول
الناس تجري عليها و هيه مدلدلة لسانها و بتقول نعم موافقون
على اي حاجة و اي حد

رابع بند
كيفية العمل على انجاح الاصوات اللى ما بتقولشي
غير نعم و حاضر

1-الغاء الاشراف القضائي
2-الغاء اي كاميرا تصور العملية الانتخابية
و عدم وجود اي مراسلين
3- التصويت عن اللذى لم يستطع الحضور
نوع من انواع الخدمة المرفهه يعنى
زي توصيل الطلبات للمنازل
4-ولو تبين ان الوضع حرج فى لجنة من اللجان
ينزلوا بالصناديق الاحتياطية المملوئة مسبقا
لتدارج الموقف
5-وجود (من باب الصورة تطلع حلوة) للرجال الأمن
اهو من باب ان كله بالشفافية


و نجح المخطط
و انشكح العقل المدبر
وسقطت مصر فى بير مظلم

احنا كده خلاص.....ولا فيه أمل

ازيكم جميعا

حد يقولى....
هو احنا كده خلاص؟؟؟
و لا لسة فيه أمل؟؟؟
انا مش عاوزة اتشائم..!!
.و لو ان الفرسة اللى انا فيها بتخليني على طول لابسة النظارة السودا الغطيس.
بس بجد هو فيه أمل؟؟؟
احنا كنا من سنتين زعلانين ان الاسعار بتزداد مرة فى اول السنة..
فى يومنا هذا...اليوم المشؤم...الاسعار بتزيد كل اسبوع
و ياريت زيادة بنسب..لا... زيادة عشوائية!!!
زي كل العشوائيات فى بلدنا....
ايه بقا؟؟؟؟؟
هو مش زيادة الاسعار ديه حتزود السرقات؟؟؟
القتل؟؟؟؟ الجرائم بصفة عامة؟؟؟؟
حتزود الفساد اكتر ماهو زيادة و بيطفح....
هو الغلاء ده
مش حينزل الناس..مش تحت مستوى الفقر
لااااااااااااااااااااا
ده فى القاع
انا حاسة ان الحكومة فلت منها زمام الأمور كلها،
مش عارفة تسيطر على حاجة فى البلد
كلمتها اصبحت غير مسموعة
الحكومة فقدت هيبتها
وباتت قرارتها عشوائية هيه كمان
يا تري واخدينا على فين؟؟؟؟؟

انا شخصيا مش عاوزة اروح فى حتة
و اهلى علموني ما اروحشي مع حد ما اعرفوش
انا ما يهمنيش مين اللى يحكم مصر
انا اللى يهمنى ان مين ما كان يتقى الله فينا
و يحاول الاصلاح
انا مايهمنيش مين مرشح فى مجلس الشعب
لانه مش حيفرق
لو كان بيعرف ربنا قبل الكرسي
بعد ما بيقعد على الكرسي بيعمل تحالف مع ابليس و ذريته
و يتسرع على الفلوس و النفوذ
انا عندى حالة من الإكتئاب...
عاوزة الدنيا تتصلح.....
حد يقولى انا اعمل ايه؟؟؟؟
انا فكرت ازرع فى بلكونتي فى صفايح الجبنة الكبيرة
طماطم ،وخيار،وملوخية
و اعمل تقفيصة اربي فيها فرختين، على كام ارنب
و ازرع ذرة
و ابقا اطحنه و اعمل منه العيش....

انا مش عاوزة احبطكم
ولا عاوزة اكئبكم
ولا عاوزة ابهت عليكم بفرستى
بس انا مش شايفة اى بصيص من اي أمل
وخايفة من العواقب
على جميع المستويات
اللهم احفظنا يارب
اللهم اضرب الظالمين بالظالمين و اخرجنا من بينهم سالمين يارب العالمين

رجعنا

كل سنة و انتم طيبين

و بعد الكحك و اللذي منه

و بعد رمضان و ايامه الجميلة

و لياليه الاجمل

رجعنا للتدوين

و رجنا للحاجات اللى تفرس

و اللى طبعا لم تخلوا الايام السابقة منها خااااااااااااااااالص

بس كنت بشيلها فى ارفف الذاكرة الى ان يؤون الآوان و افرسكم بيها

نيجي لأول فرسة

و هيه المسلسلات

اه و الله

صحيح انا مش تابعت غير مسلسل واحد بس

و الباقيين كنت بشوف لقطات بالصدفة ، فى اوقات الفطار والسحور.

يعنى ساعة لما بحط الاكل و اشيله

غير كده كنت بحاول ابعد، آمله ان الفرسة تهدأ شوية.

ايه بقا الكم المهول من المسلسلات اللى اتحفونا بيها ديه؟؟؟

كأنه كان مخطط مرسوم بدقة ما بين الممثلين و المخرجين و المنتجين و اعداء الدين و اصحاب القنوات الفاضائية فى الهاء الناس بشتى الطرق.

يعنى لو الواحد و هو صايم شاف مسلسل زهرة و ازواجها الخمسة، يفطر و الحمد لله و ذنبه يكون فى رقبة المخرج على المنتج على غادة عبد الرازق، اللى اتمنى من الله ان ينور بصيرتها، و يستر عليها دنيا و آخرة بالملابس

حاجة تفرس

ولا هند صبري بقا و الأفورة فى الآداء.

ده عيب مخرج اكيد

لأن الورق اللى كاتباه غادة عبد العال جميل

و كلنا دخلنا و قريناه ووقعنا على روحنا من الضحك.

و حتى لما هيه زودت حلقاته بعرسانه

اكيد كملت بنفس اسلوبها

بس ايه اللى عملته هند ده!!!! افورة، أفورة بالجامد جدااااا

مافيش اي نوع من الطبيعية فى الآداء خاااالص

فرستنى الصراحة..

مسلسل الجماعة: الكل اجمع على انه متميز جداااااا من كل الجوانب

ححاول اتابعه لما يتعاد

خصوصا انه حيتعمل اجزاء

يعنى لسة فيه جزء تاني و الله اعلم باجزاءه.

الباقي بقا من اللى لمحت لقطات منهم

مسلسل يسرا و ليلي علوى

مش حقدر احكم غير لما اتفرج على كله علشان اشوف مقدار الفرسة اللى حتصيبنى

المهم اتمنى من الله انكم تكونوا بخير

اشوفكم فى فرسات قادمة

تحياتي ليكم

الطم يقولوا عليا اتجننت؟؟؟؟؟؟؟؟

فعلا ده اللى حيحصل حاااااااااااااااااالا

من شوية الاستاذ تامر امين و ضيوفه

واحد من شركة الكهربا

.و التاني من شركة البترول

خدوا بقا عندكم اللى اتقال

و قولولى اتفرس؟؟؟؟؟

ولا الطم على وشي و يقولوا مفروسة اتجننت خلااااااااااااص

و عليه العوض و منه العوض

بقا بالصلاة على النبي، انقطاع التيار ، اللى كتير مننا لاحظوه مؤخرا

و احنا يا ولداه زي الغلابة

نقول طبعا الناس مشغلة التكييفات على ودنة

و اللى مشغل مراوح البيت كله

و ده غير بقا تلفزيونات جمهورية مصر العربية كلها مفتوحة علشان المسلسلات.

اتاري يا ولداه

شركة البترول اللى كانت بتدى شركة الكهربا غاز طبيعي علشان يشغل المولدات

قوم جت قالتلك احنا بندى ولاد العم الغاز الطبيعي

و بندى الجيران و جيران الجيران.

ما هو احنا ناس كريمة برضه

و بعدين احنا حنلحق على اللى برة ولا اللى جوة

لأ احنا ندى شركة الكهربا مازوت تقوم المولدات بتاعتها

و خلينا احنا منظرنا محترم قدام الاجانب

قوم شركة الكهربا يا ولداه اخدت المازوت

و قالت الشاطرة حتغزل برجل حمار

قوم لقت الحمارة عارجة

و المازوت مغشوش

قوم المولدات بتقف و النور بيتقطع

شوفتوا الوكسة؟؟؟؟؟

شوفتوا المصيبة؟؟؟؟؟

شوفتوا الخيبة؟؟؟؟؟؟

و قال ايه فى الآخر

يقولولكم

احنا بناشد الشعب انه يرشد استهلاك الكهربا

.

قولولى بقا الطم؟؟؟؟؟؟

مش عارفة الصراحة اعمل ايه؟؟؟

الموضوع ده اكبر من انى اتفرس

ربنا ياخد اسرائيل

على اللى عايشين فى اسرائيل

على اللى بيساعدوا اسرائيل

على اللى بينوروا اسرائيل و يطفوا النور علينا

حسبى الله و نعم الوكيل

بيااااااااااااااااااااااااان سريييييع

الى كل زوجة
و كل ست على ذمة راجل
و النبي يا اختى انتى و هيه
لو طقت فى دماغك و عاوزة تنعنشي حياتك بخناقة صغننه
وخصوصا ان رمضان على الابواب
و الاسبوعين اللى جايين مش حيخلوا من الخناقات
لزوم الياميش و اللذى منه
و بعديه العيد
و العيد ده بتاع الكحك
يعنى برضه ليه خناقة لزوم عمايل الكحك
و لزوم هدوم العيد

ابقوا خودولكم سااااتر
و خلوا فيه حيطة بينك و بين جوزك
ولا اقولك خليه شارع
يعنى ممكن تستأذنى الجيران تقفى فى شباكهم و تتخانقى مع جوزك براحتك

الدنيا مالهاش اماااان خااالص
أأٌقصد الرجالة
ما بقاش ليها امان خاااالص
لسة سامعة قصة المذيع اللميع
اللى اتخانق مع مراتة الساعة 2 فجرا
وراح طاخخها رصاصتين
ياعيني على البنية اللى راحت فى خبر كان
تلاقيكي يا حبة عيني كنتى عاوزة الياميش
ولا تلاقيكي كنتى عاوزة تدخلى الحمام و الراجل نايم جوه
ولا يا حبيبتى طقت فى دماغ جوزك تعمليلة كبدة اسكندراني
و انتى يا حبة عيني كنتى هلكانة من شغل البيت
ولا يمكن كان عاوز يتفرج على الاخبار و انتى عاوزة تتفرجي على الفيلم

أأأأأأأه
يا مفروووووووووووووسة ياني

رصاصتين؟؟؟!!!!

انا مذبهلة
و مفروسة
و محتارة
و من هنا و رايح
شكلى يا اما مش حتخانق
و ده طبعا مش اكيد
و مش مضمون
يا اما حتخانق عبر التليفون
الموبايل يعنى
اهو قفل السكة فى الوش ارحم مليون مرة
من رصاصتين فى النفوخ
العمر مش بعزقة يا اخوانا
سلام
اسيبكم بقا و اقوم انام قبل ما جوزي يجي
و يحلاله ندب خناقة
تصبحوا على خير

ياربييييييييييييييي

ايه االكلام الجميل ده 

بجد بجد مش عارفة اقولكم ايه؟
كل واحد وواحدة دخلوا و سابوا تعليق
بجد انا بحبكم كوووووووووووووووووولاتكم
و بعزكم جداااا جدااااا
و ما تخافوش عليا ان شاء الله رااااااجعة
اومال حطلع فرستى فى مين
خصوصا ان الفترة اللى فاتت كانت الفرسات بالهبل و العبيط
اصابتنى بخرسة موقته
لكن و حياتكم عندى لازم انفس عن نفسي و افك زنقتى المفروسية معاكم
اومال اتفرس لوحدي؟؟؟
ده حتى اللى يتفرس لوحده يبقا شرير
و انا مش شريرة
تحياتي ليكم جميعا
وكل رمضان و انتم طيبين
يالله اروح اجهز لوازم رمضان
و اعلق الفانوس
و آجي
تحياتي ليكم جمييييييييييعا 



انسحاااااااااااااااب

اعزائى المحترمين

اللى كل انسان محترم فى مجال التدوين


انى انسحب

نعم الانسحاب ليس جبن

و لكن احترام للذات

صبرت على دخول بعض الناس المرضى فى وسط المدونين

صبرت على امل ان الناس حتتغير

حتتعلم الاحترام من غيرها

سبقتنى اختى و صديقتى العزيزة قوس قزح

بالانسحاب

ولكن انا قلت خليكي يا مفروسة لعل و عسى

الناس تتعلم الادب و تتغير

لاقيت الحال من سيىء الى اسوأ

و قرارى هذا نابع من دخولى الصبح على الريء

فى الريدر

ولاقيت موضوعين منشورين

فى مدونة

صاحبتها فى غاية الاحترام و محبوبة من الكل

وواضح انه تم القرصنة على مدونتها

يعنى صاحبة المدونة لا عمرها قالت كلام خارج

ولا عمرها شتمت

يعنى اللى عمل كده مريض...مريض

و انا خلااااااااص

ديه القشة اللى قسمت ضهر البعير

الانسحاب افضل بكثير

من الاحساس بالحزن اللذى اصابنى

انا مش ناقصة

الناس المحترمة الموجوده فى مجال التدوين

خدوا بالكم من المرضى

سلام


يوجد تهنئة هنا
لصديقتى العزيزة

حااااالة لخبطة


ازيكم جميعا
و الله ليكم و حشة
بس انتو سيد العارفين، الفرسة بتعمل حالة من الإكتآب العام،
اللى بتكون نتيجتة القوقعة،و السكوت،والتناحة،وفى الآخر حالة من البلاهة و العياذ بالله،
و لله الحمد لسة ماوصلتش للحالة الأخيرة،لسة متماسكة،و ربنا يستر.
المهم انا جاية النهاردة اسألكم للمرة العشرتاشر،
هو فيه إيه؟؟؟؟
احنا مالنا؟؟؟؟؟
اه و الله احنا جرالنا إيه؟؟؟؟؟
ايه حالة اللخبطة الفظيعة اللى بيمر بيها كل البشر ديه؟؟؟؟؟
احنا مش عارفين عاوزين ايه....ولا عارفين ايه اللى ممكن يريحنا،
حالة من اللخبطة الغريبة ،
واحدة تتحجب مثلا.....و بعدين فجأة الاقيها قلعت الحجاب،ماشي ما علينا ربنا هو اللى بيحاسب،
وشوية تلاقيها زهقت قامت راسمة وشم على جسمها،يا خرابي!!!،وشوية تقولك انا زهقانة انا حروح دروس تحفيظ قرآن......ايه اللخبطة ديه؟؟!!
ولا واحد يقولك انا زهقان مش بشتغل، و يتمنى انه يشتغل ان شالله بياع جرايد...
و لما يشتغل يبقى قرفان و زهقان.و عاوز يسيب الشغل.
و تبريره اصله مش مجالى.. ولا المكان بعيد...ولا المرتب صغير.
لا بجد ديه حالة مستفحلة فى المجتمع
حالة من الشيزوفرينيا(مش هيه اسمها كده برضه ولا ايه؟؟؟)

من كام يوم كان فيه سوق خيري فى الشيخ زايد
فى قرية من القرى السياحية،على امل انه يجيب عائد كبير يروح للأعمال الخيرية
لغاية كده و جميل جداااا
و تلاقى سيدات المجتمع ايه بقا ما تقوليش،
كل واحدة بتدعو الى عمل خيري احسن من التانية
و فجأة تطرق الحديث الى استحسان احداهن لشنطة الاخري
و كان هذا الحوار
وااااو شنطتك تحفة....(وكانت الشنطة ماركة من الماركات العالمية)
مرسي
انتى جايباها من هنا..ولا من برة؟؟؟؟
لا انا ناصحة يا ختى..جبتها من اوبن داي سكاند هاند(اخيى ده انتى بيئة...وده فى سري طبعا)
واااو يا عفريتة برافوا عليكي ووقفت عليكي بكام(بكام يعنى...بتقولك ساكند هاند...كبيرها 50 جنية...)
2500 جنية(يا بلاش.. وده فى سري طبعا)
بسسسسسسسسسس ......برافو و الله رخيصة
اه طبعا اومال كنتى عاوزانى اجيبها ب 6000 و بعدين ازهق منها بعد شوية
ده كان جوزي يدبحنى
(فى سري بعد ما فتحت بقى من غير ما حد يشوف نظرة الازبهلال بتاعتى......جوزي انا اللى ممكن يدبحنى لو حكيتله اصلا)
لا و الله برافو عليكي
وفجأة تحول الحديث 380 درجة
على فكرة الحاجات اللى فى المعرض حلوة انا حشتري كتير علشان الفلوس تروح للمحتاجين..
ايه التناقض ده؟؟؟؟؟؟
انا مش بفهم فى التناقض و اللخبطة الفظيعة ديه على فكرة
اللخبطة ديه بتفرسنى جدااااا
@@@@@@
كلاكيت تاني مرة
اغلب اللى بشوفهم فى 6 اكتوبر ماشين عكس الاتجاة
يا اما شباب عرب مبرشمين و ده واضح
و العربية بنات على اولاد آخر لخبطة...
يا اما واحد بدقن و قاعدة جنبة واحدة منقبة
و المصيبة انه يشوح لك لو ضربت نور فى عنية
وتلاقى الست رميتلك كام كلمة من قاموس الشتايم
طيب ازاي؟؟؟؟
مش د ه برضه تناقض؟؟؟؟
حتتحجبى..احترمي حجابك و كوني صورة مشرفة له
حتربي ذقنك..على اساس انك بتقتدى برسول الله
يبقى اقتدى به فى كل حاجة....
ان كنتى حتتنقبى..على اساس انها زيادة فى الايمان و التقرب الى الله
يبقى لازم كل التصرفات تكون بزيادة،
و اقصد التصرفات الكويسة طبعا.
يعنى السلوك السليم يكون بزيادة..و اللسان يكون مربوط بزيادة،والنضافة تكون بزيادة،والصح يكون بزيادة.
اللخبطة اللى معيشانا فيها الحكومة يظهر بتنعكس علينا
و بقينا مش عارفين
نقفل الشباك ولا نفتحة
مش عارفين نريح ولا نستريح
مش عارفين نكون امة وسط
يا يمين اوي
يا شمال اوي
و سايبين خط الوسط فاضي
حاجة تفرس بجد

ناس فى ملكوت آآآآآآآآآآآخر

اه و الله
ناس فى ملكوت تاني
و تصيبنى بالفرسة

مش ممكن انى كل ثانية بتكعبل فى حاجة تفرسنى

النهاردة الجمعة
و من طبيعة يوم الاجازة ان الواحد بيصحى براحته
و يوم الجمعة ده من اول لما اصحا
و اولع البخور و اعيش يوم هاديييي
على اساس انه ان شاء الله يكون يوم هادي

اما زوجي
فأول حاجة بيفتح التلفزيون على قنوات اخبارية
قال يعنى هو مش بيعمل كده فى الأيام العادية
بس يعنى ....
المهم زوجى العزيز موقف على قناة الجزيرة
و انا طبعا على النت ماليش دعوة
و إذا ببرنامج بيعرض فيلم تسجيلي

و انا بقا ركزت مع الفيلم
و ححكيه
و انتوا قولوا


راجل فلسطيني يعيش فى الدنمارك
و تزوج من دنماركية
و انجب منها الاولاد
و عنده ارض مزرعة كبيرة
و يعد من الاغنياء جدا هناك
و عمرة حوالى 45 سنة

ابوه سافر بيه على الاردن من صغرة
و هو بيقول ان ليه قرايب فى فلسطين لسة
و ان قلبه معاهم بجد
و انه علشان مشغول اوي فى تكوين ثروته
مش عارف يتواصل معاهم



لا تعليق سوا
ناس عايشة فى هنا و من نفس دمهم
و ناس شايله الهم وهمه مش منهم
و عجبي

باظ يوم الجمعة الهادي

فينك يا وز يييييير؟؟؟؟؟

ياربيييييييييييييييييييي
هيه الفرسة وراية وراية
و الله يا جماعة انا تعبت
و حاسة كده و الله اعلم انى حكون نزيلة عن قريب
للسراية الصفرا
و يمكن اخليهم يغيروا لونها للبمبي
لأنى مش بحب اللون الأصفر
المهم انا عاوزة اعرف احنا فيه ايه بقا؟؟؟
و الله بجد
لأ بجد احنا معمول لنا عمل يا جماعة
صدقوني
و مرمي فى خرابة...على فكرة.
قولولى ليه؟؟؟؟؟
علشان حياتنا مهرجلة ومش نضيفة زي الخرابات بالظبط


النهاردة رحت مطار القاهرة
صالة وصول (1)
انا عارفة ان الوزير جدد كل صالات المطار
و عارفة انه اندفع ملايين
ولا يمكن مليارات كمان على هذا التجديد
بس للأسف احنا بنجدد و نمشي ما نسألشي عن الحاجة بقا
الله انتو عاوزنا نجدد و نتابع؟؟؟؟
ده حتى يبقا عيب

نبدأ الفرسات

اولا الباب بتاع دخول الصالة
قاعد عليه 2 عساكر غلابة
محتاجين ياخدوا كورسات عسكريةويبقى منظرهم كده هيبة
سايبين الناس تدخل و خلاص ،ما هوا كيد مافيش منهم خوف
دول جايين فى استقبال ذويهم
و مين ما كان بقا يدخل و يقعد و يعمل اللى هو عاوزة من غير ما حد يستوقفه
ما علينا الدنيا امان يا مفروسة........
و ما تخافيش ما حدش يستجري يعمل اي عمل مشاغب......
ماشي........
جينا على الكافيتريا........
مش حتكلم عن الناس اللى بتخدم
لانهم بصراحة بيحاولوا يكونوا كويسين
انا بتكلم على وساخة الترابيزات و لا الزبالة اللى تحت الترابيزات
مش ممكن بجد
صحيح فيه واحدة ماشية تكنس المطار رايحة جاية
بس انا بتكلم على الناس
ايه السلوك ده
الناس بترمي فى الارض يا عااااااااالم
الباسكت فى كل كورنر.....
بس و ديه برضه تيجي
يقوم من على كرسية علشان يرمي فى الباسكت ده حتى مش اصول
ولا الجرسون حيجي يلم زبالته؟؟؟؟!!!
عيب ما يصحش......

لا حظت ان المطار كله ملزوق على حيطانة و بلأخص الكافيتريا
ممنوع التدخين
بس تقول لمين
اصلا اصلا
نص الشعب المصري .....امي..لايعرف يقرأ
و النص التاني...لا يرى
مدخنة......ولاحديقوله غلط ...و المصيبة ان الجرسون لما حد يسأله يقوله دخن يا بيه ديه منطقتنا
:(

و لا الموظفين بتوع مكاتب الليموزين
دول فيلم لوحدهم
واقفين على باب المكتب
كأنك فى موقف عبود ولا احمد حلمي
4 بهوات طول بعرض
واقفين على باب المكتب
وكل مسافر يطلع من جوة جارر شنطته
تلاقى واحد من دول شادة من ايده و يوشوشة فى ودنة

انا مش عارفة ايه حكاية الوشوشة فى المطار
ليموزين يا بية
شكرا
يمشي خطوتين و تلاقى التاني حلق عليه
و بعدين التالت
و بعدين الرابع
مش ممكن بجد
كأنه بينادي على ميكروباظ


قعدت .... وقلت يا بت يا مفروسة كفاكي هذا القدرمن الفرسات
حطى وشك فى مجلة وركزي فيها علشان مش تركزي مع الناس

بس تقولوا ايه بقا....يموت المفروس و عنيه بتدور على حاجة تفرسه

لمحت واحدة لابسة جلابية...و شكلها على قد حالها قلت ديه اكيد من عاملات النضافة
و ماسكة شنطتين بلاستك فيهم حاجة
انا طبعا مش عارفة ايه
و ماشية توطي على كل واحد و تقوله حاجة
انا برقت
قلت البنت بتشحت ولا ايه؟؟؟؟؟
و الاقيلكم البنت جاية عليا
و انا بقا مستنية اعرف حتقول ايه
و لاقيتها قالت جملة بصوت واطي جداااا
مش سمعت الصراحة
قلتلها ايه؟؟؟؟؟
قالتلى
كشري يا هانم؟؟؟؟
يالهويييييييييييييي
انا قمت و عليت صوتي
و ظهر الوش التاني لمفروسة
قلتلها ايه؟؟
انتى دخلتى هنا ازاي؟؟
ازاي دخلوكي بالكشري ده؟؟
و البنت بكل بجاحة و تناحة
ايييه يا مدام ده اكل عيش
ياخرابييييييييييييييييييي
كشري فى المطار
مش ممكن بجد
و الله حرام

اتفرست بزيادة ودمي غلى و قمت اشوف الطيارة اللى انا مستنياها جاية امتى...انا حاسة انها اتأخرت
ادور على الشاشات التلفزيونية اللى بتكتب جدول الطيارات...ديه وصلت،ديه اتأخرت كده يعنى
و الاقيلكم الشاشات كلها سوداااااااء

سألت الاستعلامات.....هيه الشاشات طافينها ليه؟؟؟؟!!!
الراجل بصلى و ضحك و قالى ديه عطلانة يا مدام بقالها شهور
طيب بزمتكم...انا راضية زمتكم اقول ايه؟؟؟

ماقلتش غير انى اسأله ...هو مافيش مديرللصالة ديه؟؟؟؟

قالى فيه.......طيب هو فين؟؟!!! مش بينزل يمر؟؟!!!
الراجل الصراحة رد عليا رد..انا مش فهمته.....شاورلى بإيده كده كأنه عاوز يقولى ....يغوووور


انا بقا عاوزة افهم
فين المدير المسؤل عن المطار ده؟؟؟؟؟
فين الرقابة و المتابعة؟؟؟؟

ازاي عاوزينا نتقدم والنبي؟؟؟
ولا عاوزين صورتنا تبقا كويسة؟؟؟؟
ولا عاوزين الناس تحترمنا ؟؟؟؟
احنا اصلا مش محترمين نفسنا ولا بلدنا ولا بنحافظ على حاجتنا

انا وقفت فى وسط الصالة
اتلفت حوليا واتحسر على بلدى
و صعبت عليا اوي
ولا قيت دمعة فرت من عيني

و قلت احنا مش حينفع مع الشعب ده غير يد من حديد
لازم بجد بجد حد يقفله بالمرصاد
لازم حد يطبق كل القوانين و التعليمات بصرامة بالغة
انا مش عارفه حنتصلح امتى؟؟؟؟
احنا ماشيين لورا
احنا بنصغر مش بنكبر
و للأسف احنا اللى بنصغر روحنا
انا مفروسة اوى جداااا خالص
فينك يا وزير

ما قدرتتتتتتتتتتتتتتش


ماقدرتش افضل من غير ما اتفرس
شكلى مش بتاعة احلام ولا احزنون
شكلى بتاع فرسة و فرسات و بس

النهاردة و انا قاعدة و فى حالة استجمام و كوب النسكافيه فى ايدي
قلت يا مفروسة العبي فى الدش شوية
دوري على قنوات جديدة
و بالفعل
و اذا بي اتكعبل فى قناة تركية ناطقة بالعربي
و ركنت عتدها شوية
و ركزت مع مسلسلاتها و برامجها و اعلاناتها
قولوا ساعة اتنين مش فاكرة الصراحة
المهم يا جماعة انا عاوزة اقولكم
ان البلد ديه بتظهر كل ما هو جميل فى مسلسلاتها
و برامجها
ومعالم البلد الجميلة
و سلوكيات الناس اللى بتخر ادب و اخلاق

مع انى يعنى انا سافرت تركيا
و عارفه ان فيها الوحش برضه
بس الناس بتلمع فى بلدها
و بتلمع فى ناسها
قوم الناس تتكسف و تبقى كويسة و تخاف تطلع عكس اللى اتقال عليها


حتقولولى طيب يا مفروسة ما كل حاجة حلوة اهو
مفروسة ليه؟
حقولكم غيرانة على بلدى و على اهل بلدى المصرين
اللى مافيش برنامج الا و يظهر اوحش ما فيهم
الا مافيش فيلم
و خصوصا خالد يوسف
الا ما يظهر اوحش حاجة
الا ما فيه برنامج لمع المصريين و لا لمع مصر
الا كله شتيمة شتيمة
ابقو قابلوني لو اتغيرنا

طبعا شعب يكون محبط و ما عندوش ثقة بنفسه
ما دام عمالين نطلع اوحش ما فيه
و طبعا بنطلع صورتها مزبلة(هيه صحيح كده)
بس مش مفروض ننشر غسيلنا اللى مش نضيف قدام الناس

مش مفروض نشجع الناس على المظاهرات و التهليل و قلة القيمة
لازم افكر بقا بعقل
لازم الشخص يكون مميز علشان يتسمع
و التميز يجي من اتقانه لعمله
و تفوقه فى دراسته
و دول لوحدهم كفيلين بعمل تغير

مش يطالب بالتغير و هو من افسد الفاسدين
انا حزينة اوي على بلدى
وحزينة على المصريين
و حزينة على التقليل من قيمتهم و الاستهانة بيهم

شكلى حيفضل معاكم كام يوم لغاية لما داليا قوس قزح تجيب النقاشين
و بتوع الديكور و تخلص التشطيب
العتبة الجديدة حلوة برضه تغيير
و لو انى حاسة انى حسيبها لوحدها هناك
و حفضل انا معاكم
افرسكم و تفرسوني
تحياتي ليكم

:))))))) حعززززززززززل

ازيكم جميعا

ازيكم بعد شم الفسيخ؟؟؟؟

و أكل الرنجة و البصل؟؟؟؟؟

يارب تكونوا بخير

انا جاية النهاردة اقولكم انى نويت اعزل

اه حعزل لفترة اتمنى انها تدوم

و التعزيل المرة ديه من غير عفش

يعنى مش حاخد اي حاجة (ان شاء الله) من البيت القديم

و لا حتى الفرسة

بس حاخد اسمى بس

و هى مفروسة

و لعلمكم البيت اللى نويت اروح اعيش فيه شوية

انتو تعرفوه برضه

و جيتوا زورتوني فيه

و هي مدونتى التانية ارض الاحلام

اللى بدأت اكتب فيها شوية

و من كتر الفرسة و النكد

و المود الوحش

استقريت فى المدونة ديه

:(

هيه صحيح كانت مدونة لا تحتوي فقط على الفرسات

لكن لا تخلوا منها ابدا

حتى لو الموضوع خفيف و لطيف

المهم انا حعزل شوية

علشان ابدأ بالتغيير

مش بتقولوا ابدأ بنفسك

انا حبتدى

و حاخد معايا داليا قوس قزح

اللى بدأت التغيير بترك مدونتها

و لكن ان شاء الله تقتنع انها تيجي معايا ارض الاحلام

نكتب فيها بإيجابية

بموضوعية

بدون انحياز لا لدين

ولا للون( مع انها بتحب الالوان)

ولا جنسية

بس حنلتزم فيها بالاسلوب الراقى

المهذب

الخالى من التجريح

و الشتيمة

والنقد الغير بناء

اسيبكم بقا انا دلوقتى

علشان اجهز نفسي للعزال

واروح اوضب البيت الجديد

و ادعولى انى اقنع داليا قوس قزح

انها تيجي معايا

اهو نحس على الاقل اننا عايشين

مع بعض فى بيت واحد

تحياتي ليكم جميا

وحشتونىىىىىىىىىىى

تصدقوا انتوا بجد و حشتونى
و اللى وحشنى اكتر المدونة ديه
اللى بفرغ فيها الفرسة..علشان اعرف اشحن من تاني
انا بقالى فترة لا بأس بها متغيبة عن المدونة
و ده لأنى ماليش مزاج..و ده طبعا العادى بتاعي
انا واحدة مووودية
كل شوية بحال
و يمكن ده اللى فارسنى
المهم
ان واحدة من اصدقائي كانت كاتبة موضوع
حتلاقوه هنا
و انا حبيت اعلق
و افتكرت انى كنت كتبت بوست قبل كده عن نفس موضوعها
و ده اللى خلاني ادخل ادور على الموضوع
ياااااااه
اول لما دخلت حسيت قد ايه المدونة و حشتنى
ووحشنى تعليقات الناس
ووحشنى انى ارد على التعليقات
أو ما اردش و افرس اللى زارني و ساب تعليق
المهم وحشتوني جداااا
و اللى وحشنى اكتر الناس اللى انا عارفاهم
اللى بقالى معاهم سنتين او اكتر
لأن دلوقتى الدنيا اتزحمت اوي
اه و الله
فيه جيل جديد
لسة ما اعرفشي اتجاهاته

المهم و حشتونى
و اوعدكم انى ازور كل واحد فى مدونتة ان شاء الله
تحياتي ليكم جميعا

على فكرة شم الفسيخ قرب
و بما انكم عارفين انى انا ليا فى الرنجة بس
فا اللى حيجي يزورني يجيب معاه رنجاية معتبرة كده
و بيض ملون
تحياتي ليكوا