نصف ليمونة و ملح خشن

زمااااان و انا صغيرة كان فى بيت جدتى واحدة بتساعدها فى شغل البيت اسمها ( ام فيفي)،
الست ديه  مش افتكر شكلها بس كنت اسمع جدتى تقول ام فيفي عملت... ام فيفي سوت... ام فيفي جت...ام فيفي راحت...كده يعنى الكلام العادى بين جدتى و بنتها اللى هى امى ربنا يخليها  عن ام فيفى
حوار عادى بيحصل فى كل البيوت المصرية..و بين الصديقات فى النوادى
اسكتى مش الزفته لاقيتها ما بتلمعشي تحت التلفزيون...ولا الشوك لاقيتهم ناقصين اكيد الزفته رمتهم فى الزبالة
...كده يعنى
بس للحق جدتى عمرها ما شتمتها على حد سمعى.....اصل محسوبتكم من صغرها تحب تقعد تسمع الحكايات من اولها و لو فاتتها كلمه تخليهم يعيدو من مكان ما فاتها
المهم مش ده موضوعنا
موضوعنا بقا ان  انا لا أتذكر ام فيفي لكن اتذكر بنتها (فيفي)
بنتها فى العشرين من عمرها يمكن اقل او اكتر....سنى لم يكن يسمح ان استنتج السن جيداااااا
المهم كانت فيفي بعد ما بتخلص شغلها فى بيت جدتى كانت تقعد على الارض و جنبها طبق فيه ملح خشن و فى ايدها نص ليمونه... بس ليمونه من بتوع زمان...اللى ريحتها تفحفح فى البيت كله أول لما تقطعها....المهم كانت فيفي الله يمسيها بالخير ان كانت عايشة او الله يرحمها بقا لو ماتت- كانت تغمس نصف الليمونة فى الملح الخشن و تبدأ فى دعك ايديها من اول الكوع الى أطراف الأصابع.....و من الركبة مرورا بالكعبين و صولا الى اطراف اصابع القدم
و كان الملفت للنظر ان ركبها  رغم ركوعها على الارض لمسح الارضيات كانت بيضاء و ناعمة
هيه  ايديها و رجليها الصراحة كانت ناعمة جدااااا
المهم مرت الأيام و السنين و كبرت البنت الصغيرة اللى هو انا
و من حوالى شهر او اقل كنت بعمل مانيكور و بدى كور

(manicure-pedicure)
و يشاء القدير ان البنت اللى كانت بتقوم بالاهتمام بى....قالتلى يا مدام حقولك على نصيحة
تخلى ضوافرك جميلة و مش محتاجة تعمليهم
قلتلها هاتى ما عندك...انا أساسا باجى مرة فى السنة
قالتلى عليكي بنص ليمونه و ملح خشن و ادعكى بيهم ايدك و خصوصا العقلة اللى فيها الظفر
حتشيل الجلد الميت حوالين الظفر و تنعمه و تضيف بريق على ضوافرك و صحة
ولا داعى لشطف ايديكى...لان الليمون مش بيلزق و الملح نفضيه من ايدك و خلاص
و لو عاوزة نصيحتى اعملى نفس الشىء على ركبك،، كوعك،، كعب رجلك...و ادعيلي
ان جيتو للحق اول لما البنت قالتلى الموضوع ده افتكرت فيفي
شوفتوا النصايح المفيدة تتوارثها الأجيال و تنتشر انتشار واسع
او يمكن البنت حفيدة فيفي...انا نسيت اسألها الصراحة
المهم انا جربت النصيحة
بس خلاص انا قلت اقولكم نصيحة مفيدة
جربوها و ادعولى...بس المهم المواظبة

للدرجة ديه تقليد اعمى؟؟؟؟




سبحان الله
و تشاء الأقدار انها تكون نفس الحركة
لا تعليق

طلعت بعمل فتنة :((((

صباح الخير عليكم جميعا
انا داخلة النهاردة افضفض ليس الا
يعنى ولا عاوزة اتكلم عن اليومين اللى فاتوا ولا حاجة
ولا عاوزة اتكلم عن الاتحادية و الاحداث اللى حصلت فيها أقصد اللى اتهيألنا انها حصلت ولا حاجة
ولا عاوزة اتكلم عن حمادة و اللى حصله لانه ما حصلهوش ولا حاجة
انا داخلة اتكلم عن حاجة حصلتلى النهاردة
صديق عزيز كان كاتب على صفحته فى الفيس بوك صباح الخير
و دخل اغلب الاصدقاء يردون هذا الصباح الجميل اللذى اعتاد ان يصاحبه بموسيقى جميلة و باقة ورد
و اذا ب صديق له لعله من المقربين اليه
رد عليه الصباح بصباح الخير يا مسيحي
رايت هذا الرد و استأت جداااااا و قلت يا بت اتهدى شوية استنى لما صاحب الصفحة حيقول ايه
لاقيته بيرد عليه الصباح و قاله كنت افضل ان تقول لى يا مصري
قام التاني رد عليه انت مصري غصب عن الكل انا بهرج
انا الدم غلى فى عروقى و نافوخي الصراحة كان حينفجر من الفرسة
مسكت نفسي على قد ما اقدر و رجعت تاني اعلق
بدأته بالاعتذار على تدخلى(الصراحة ما كانش له لازمة انى اتنيل اتدخل خالص)
و قلت بمنتهى البساطة نوع التهريج ده يكون ان بوكس احسن
لاننا فى زمن منيل بستين نيلة
زمن الفتن و القرف ،ونوهت اني حشيل تعليقى بعد شوية يعنى بعد ما تقروه و خلاص
و بس يا سادة يا كرام
و شلت التعليق بعدها فعلا
:(
بس لحقته واحدة عابرة سبيل من ام لسان 7 متر اللى زي الكرباج
و قالت ما سكتتش
و ان اللى يهرج يهرج زي ما هو عاوز و يقول اللى هو عاوزة
و كلام من اللى يفرس
بلاش منه علشان برستيجي قدامكم بس
المهم انا فعلا شلت التعليق
و ارسلت لصاحب الصفحة اعتذاري على تدخلى


بس انا بسأل سؤال مش ممكن النوع ده من التهريج يقلب بغم؟؟؟؟
انا ما بحبش التهريج من النوع ده لانه مليون فى المية حيخلق حزازيات(مش هيه بيقولوها كده)
حتفضل تتراكم الى ان تنفجر
الناس بتهرج تهريج تقيل و تزعل لما اللى قداممها يزعل منها
طيب ليه ما احترمشي حالى من الاول؟؟
(سؤال عجيب صح
المهم انا بحكى بس الموقف
انا فعلا غلطانة انى تدخلت
.....................و على راي المثل ياللى داخل بين البصلة و قشرتها
و بعدين انا بحكى لانى اتفرست اكتر من تعليق عابرة السبيل اللى اخدت الامر ببساطة و طلعتنى انا الغلطانة و انى انا اللى بعمل فتنة

حو انا فعلا زودتها؟؟؟
هو فعلا التهريج اللى بالمنظر ده ما بقاش يضايق و انا اللى حساسة زيادة عن اللزوم؟؟؟
مش عارفة
يالله شكل الواحد كبر و عجز
و شكل البلد اتلخفن حالها القانون لا يحترم
و المحاكم لا تحترم
و الانسان لا يحترم
والكلمة لا تحترم
اييييييييييييييييه زمن قلة كل شىء
صباحكم فل....

كل سنة و انتم طيبين

كل سنة و انتم طيبين يا بلوجرية
عدت سنة 2012 و كان نفسي اكسر وراها 60 زير
سنة كانت تقيلة على قلبى و على معدتي
كانت واقفة فى زوري وقفة سودة كانت حتخنقنى
مع انها كانت خفيفة على قلوب البعض و على معدة البعض
سنة حدثت فيها احداث كثيرة جدااااا
ماتت ناس علشان بتقول كلمة حق
اتحرقت قلوب امهاتهم
مات شباب بريء جميل كل ذنبه انه عاوز مصر تبقا احسن
ان اهلهم و اهل اصحابهم يكون حالهم افضل
شباب  ما يهموش لا اخوان ولا سلف ولا حازمون ولا ظباط شرطة ولا جيش
شباب رايد الخير و بس
موتهم حرق قلب  الكثيرين
و كان دمهم بارد على قلوب الكثيرين ايضا
و ناس انتهزت موتهم علشان توصل لاغراضها

سنة شالت اقنعة عن وشوش كتيرة جداااا
ناس كنت بتحترمها من قبل الثورة و هيه بتتكلم
و بعد الثورة بقيت تستغرب طريقة كلامهم
و اخيرا لاقيتهم بيدعوا اليهود للعودة الى مصر
كلام يخلى الشعر يشيب
يعنى الشباب كان عامل ثورة و بيموت علشان فى الآخر اليهود ترجع مصر؟؟؟

سنة  عملنا فيها استفتاء قلنا اخيرا مافيش تزوير
تقوم تلاقى الناس نفسها اللى كانت بترفع قضايا على مبارك و اعوانه علشان بيزوروا
تلاقيهم همه همه بيزوروا.....

ناس كانت بترفع صوتها تهاجم الفساد
لاقيتهم همه الفاسدين و المصيبة انهم مش شايفين نفسهم فاسدين
لانهم بيصلوا و بيقرأوا القرآن
و ديه الطامة الكبرى
انهم يزجون بالدين و آيات القرآن الكريم ليبرروا افعالهم الدنيئة
الظالمة...الفاسدة

ناس صرخت علشان  الاجانب تسيء لرسولنا الكريم
و هم بأفعالهم يسيؤن اليه اكتر و اكتر

انا لوفضلت اتكلم عن 2012 مش حسكت
من الآخر كانت سنة سودة الصراحة
يالله غارت
اتمنى من الله  ان ينقذ مصر