فرســـــــــــــــة صغنونه وارجع للتأمل



ياااااااااانااااااااااااس ياااااااااااااااااهووووووووووووو
طب قولولى أعمل إيه؟؟؟؟؟؟؟؟؟؟؟؟؟؟
اطسيت فى نافوخى النهارده و قلت اخرج اتفسح مع جوزى...واروح السوبر ماركت
قلت يا بت يا مفروسه انتى ناقصك شوية حاجات خدى بعلك
وروحى اشتريهم....
ورحت يا سادة يا كرام السوبر ماركت
همه مش برضه قالوا انه فيه حاجات حترخص...و لا انا كنت باحلم
انا متهيألى كده...اصل بعلى شجعنى على المرواح
وقاللى ديه الحاجه زمانها رخصت...تعالى و اشترى كل اللى نفسك فيه
أنا الصراحه الحاجات اللى كنت محتاجاها مش كتيره بس اهم حاجه....ورق التواليت
طبعاً كلكم عارفينه
و اللى مش عارفه ديه البكره اللى لما تدخل اى حمام تلاقيها علشان التنشيف....تنشيف أى حاجه ...ماعلينا..
المهم انا من زمان جوزى موعينى اشترى الباكت اللى فيه 24 قال توفير...و وحياتكم 24 ولا 8 و لا 12 الورق بقى نوعه زفت و بيبوش اصلا
المهم النوع اللى كنت باجيبه كان ب 10.50 !من اول الغلاء بقى 11.50 !!
و فى ابريل اللى هوه اول امبارح كان ب 12.75
قلت ما علينا ماهو لازم لل....الحمام
قوم النهارده 3 فى الشهر و لسه كلام سيادة الريس ما بردش قوم الاقيه ب 15.5 لييييييييه؟
اتفرس انا بقى و لا ما اتفرسش..انا راضيه زمتكوا ؟طيب قلنا الكماليات ..بلاش منها ...تضامناً مع الشعب...طيب وورق التواليت..برضه بقى من الكماليات
و بعدين خدتنى النححرره و سألت المسؤل فى السوبر ماركت ..هو ورق التواليت غلى ليه ...يقوم البيه المحترم يقولك اصل الورق غلى يا مدام
نعم ياخويا...نعم ياسيدى ورق ايه اللى غلى
ماالدنيا كلها عارفه ان الورق بتاع الحمام معمول من ايه
انت بتستعبط
ده يا حصره لو دورنا وراهم حنلاقيهم عاملينه من النفايات
طب بزمتكم بقى اجيبه و لا ماجيبوش...اعمل ايه
اهو ده مش كماليات...ده فى زمنا بقى من الاساسيات
و بعدين ما هوه الواحد لازم لما يدخل الحمام يلاقى الورق ده جوه
الواحد مش عارف يعمل ايه طيب حد من اللى بيقول فيه كماليات لازم نمتنع عنها او نستعيض عنها بحاجه تانيه
طيب يقولى استعيض عن ورق التواليت بإييييه
اكيد حيقولى حطى طبق رمل فى الحمام....اهو ده ارخص حاجه
معلش اتفرست..قلت مافيش غيركو افضفض معاه و ارجع تانى لحالة التأمل
يارب أهدى شوية بدل الفارسة اللى عمال على بطال ديه...

ملحوظه:

يوجد انواع مستورده فى السوق ب 24جنيه ال4 بكرات

انوع اللى بتكلم عنه مصرىىىىىىىىىىىىى


ملحوظه اخرى متختخه حبتين*
دلوقتى مابقاش فيه كسوف انهم يعرضوا الحاجات الغاليه
الفاكهه مثلا كاتبين عنب مستورد 30 جنيه
كمثرى مستورده ...شرحه
موز مستورد 8 جنيه و حاجه
و حجات كده كتير المشكله مش فى السعر
المشكله انى لاقيت ناس بيشتروها
طيب الحكومه ممكن تعمل ايه ؟
ولاحاجه انا لو تاجر و باستورد و جت الحكومه تقولى حاجه حقولها بين الشارى و البايع بفتح الله
فى ناس يتشترى انتى زعلانه لييييه؟
ما هو ده المنطق اللى ماشيه بيه ناس زينا
المفروض اننا نقول ربنا يرحمنا من بعض
احنا اللى بنفترى على بعض
واحنا اللى بناكل فى بعض
و احنا اللى قلبنا مش على بعض
ربنا يكفينا شر بعض
************************************************

فترة تأمل


انها فترة تأمل
وراحة نفسية
لترتيب الاوراق
واعادة تقييم لبعض الاشياء
لن أتوقف عن متابعه ألمدونات و ترك تعليق



*************************************************