كل سنة و انتم طيبين

كل سنة و انتم طيبين
و من الكحك واكلين
و من الفتنة محفوظين
و من الاخبار الكاذبة معصومين
وحشتوني جداااااا
بس الاحداث العامة كانت مخلياني مفروسة بزيادة
رمضان هداني شوية
بس لسة الشعب المصري محتاج يتغير
يغير سلوكياته اللى ازدات سوءا
ربنا يهديني و يهديكم ويهدى المصريين كولهم
و يهدى الامة العربية كلها
تحياتي ليكم

ياااارب كن معنا

السلام عليكم جميعا السلام و الآمان ان شاء الله انا من قبل 25 يناير و من بعدها لم اكتب اي شيء ولكن بعد الخطاب الاخير لمبارك استشعرت ان الفترة القادمة محتاجة تريث من الشعب المصري اللذي يأمل فى تغيير مصر للأحسن محتاجة الحكمة محتاجة لضبط النفس اكتر محتاجة العقل و التعقل نحن بدأنا بعد هذا الخطاب فترة حرجة جداااااا و امتحان شديد الصعوبة للشعب المصري هل سوف ينجح الشعب المصري فى الامتحان؟؟؟ هل تم مذاكرة كل ما حدث من يوم 25 امتحان صعب اتمنى ان ينجح الشعب فى هذا الامتحان نجاح الشعب سوف يجعل مصر و شعبها يعبروا لبر الآمان و يحطموا خط بارليف سابقا..ومبارك و اعضاء الحزب الوطني حاليا يارب كن معنا

الى يسمع كلام الشيطان...فرسته تكون دوووووبل

ليه على الصبح اتفرس ليه؟؟ ليييييييه؟؟؟

صحيت 5 الصبح و مش عرفت انام تاني
وزني الشيطان منه لله
و قالى يا مفروسة انتى وزنك زاد ولازم تتحركي شوية
قومي يا بنتى انزلى اتمشي قبل ما الناس تصحى
و انتى الناس بتفرسك اصلا
و قعد الشيطان يزن يزن يزن
لغاية لما ضعفت و لبست و نزلت على 7
و الاقيلكم الجو جمييييل وو هدووووووووووووووء و آخر حلاوة
قلت ايواااااا ما هو الشيطان لازم يحليلك المسألة
قلت اعوذ بالله من الشيطان الرجيم و حطيت السماعات فى ودني و مشيت
الى ان وزني الشيطان تاني و قالى ادخلى فى الشارع اللى فيه محلات اهو يكون ونس و ما تزهقيش
ابن اللذينة عارفني و حافظنى صم
و برضه ضعفت و قلت يعنى ممكن الاقى حد فاتح اجيب اي حاجة ولا حتى اجيب الجرايد
و دخلت يا كرام فى شارع...لايمكن ان يطلق عليه شارع...ده سوق...و سوق مزبلة
ايه القرف ده
مافيش محل ولا قهوة ولا اي دكان الا و حوالية مزبلة
تفولشي بينضفوا جوة و يرموا برة؟؟؟؟
ايه القرف ده؟؟؟؟
و طبعا ياعيني عليهم الكناسين ما كانوش لسة بدأو شغلهم
بجد كده اوفر و حرام بجد
لازم يطلع قانون بتوقيع غرامة على اي محل يرمي زبالته قدام المحل..و تفاديا لشغل العيال اللى يقولك مش بتاعتى
يكون القانون بغرامة لتواجد اي نوع من انواع المخلفات قدام المحل و خلاص
و اهو نشغل البلدية بس بعد تطهيرها
و ديه كانت اول فرسة

تاني فرسة بقا
لما الشيطان لعب فى مناخيري و خلاني اشم ريحة العيش الطازة
و طبعا انصعت لاوامر الشيطان و رحت اجيب عييش من فرن متعودة اجيب منه
و اول لما رحت اتصدمت
وقفت مزبهلة شوية
الناس الامراء اللى بجيب منهم الشباب و العيال و صاحب الفرن
كووولهم طالقين ذقونهم و لابسين جلاليب
قلت يالهوى المحل احتلوه
و زعلت جداااا و اتفرست اكتر
و من فرستى لمحت ولد منهم بيرص العيش مش لابس جوانتى
قمت اتلفت لصاحب المحل و قلتله ايه ده؟؟؟ هو مش لابس جوانتى ليه؟؟
قالى ايده نضيفة
قلتله لأ وارد يعمل بايده اي حاجة من غير قصد
و بعدين ديه نظافة
مش هيه برضه النظافة من الايمان؟؟؟؟؟؟
بصلي كده بصه مش عجبتنى و قالى اه فعلا عندك حق كانه بياخدني على قد عقلى
و انا بقا اتفرست زيادة حطيت لنفسي العيش اللى انا عاوزاه و خرجت
و انا خارجة لمحت زبالة
قلت يا بت خدى بتارك ارجعي اديله كلمتين
و فعلا رجعت قلتله يعنى انت محل عيش لازم تكون كل حاجة نضيفة و حوالين المحل مش اسلامنا بيقول كده النظافة من الايمان
مش برضه يصح اننا نطبق تعاليم الاسلام بحزافرها علشان ربنا يفتحها عليك و يرزقك...الراجل سكت....هو غالبا كان حيرد
بس انا مش اديتله فرصه و مشيت بسرعة من قدامة
و بخطوة سريعة متجههة للبيت و انا بقول زمان الراجل حيبعت ورايا حد.... ما الدنيا خلاص بقت فوضى
بس بجد اتفرست
و بجد اتأكدت احنا شعب يخاف ما يختشيش و بجد احنا ما ينفعشي معانا نظام الديموقراطية ده
احنا اللى لازم يحكمنا واحد ديكتاتور بس يكون بيراعي ربنا و يخاف منه
و ارجع تاني اطالب بعسكري لكل مواطن...احنا شعب ما ينفعشي معاه الزوق..

وكول اللى الفرسة اللى انا فيها سببها وسوسة الشيطان
و آدى آخرة اللى يضعف قدام الشيطان و يسمع كلامة فرستة تكون دبل

اعوذ بالله من الشيطان و وسوسته

ياما دقت على الراس طبول

ده اسم مدونة
وهنا
حتلاقو موضوع
اسالكم ان تقرأوه
ولا تعلقوا قبل ان تقرأوه جيدااا
و تفكروا جيداااا
تحياتي ليكم جميعا
و حشتوني

هو فيه ايييييه؟؟؟؟!!!!

البوست ده كنت كتبته فى سنة 2008
و جاتلى عليه تعليقات
و خبأت ساعتها تعليقات علشان مش تولع نار
و اهى ولعت لوحدها
@@@@@@@@@@
التعليقات للمراحعة يعنى
هنا
هو فيه اييييه
---------
ايه اللى بيحصل ده.......ايه اللى بيجرى ده.......وليه؟... و علشان مين.....؟
مكانش كده.....الحال زمان...
زمان امى...و جدتى...وزمانى انا كمان... لما كنت صغيره...
.زمن دلوقتى.. بقى حاجه تانيه خالص....
زمان انا فاكره لما كنت فى المدرسه ..كانت الشطاره هى اللى بتميزنا...
عمرنا ما بصينا ..على الشكل .. و لا اللون ..ولا الديانه و ارجع اقول تانى ولا الديانه.....
انا كنت فى مدرسة راهبات....و ربونا على انه لا يوجد فرق فى الديانه...
عمرى ما حسيت انه فيه تفرقه.. بل بلعكس.. انا فاكرة انى كنت محبوبه جدا منهم.....
و فاكره كمان لما كانت اى بنت تاخد نمرة وحشه فى العربى و لا الدين ... كان بيبقى نهارها مش فايت...
مع ان المدرسه اللغه الاولى بتاعتها مش عربى ....و كنا ُجمال جدا مع بعض.. و اخوات.. الحاجه الوحيده اللى كانت تجعلنا نعيد حساباتنا من ناحيه الإبقاء على الصداقه.. هى الشخصيه نفسها...
و عمر ما كانت الديانه نقطه من النقاط....
كانت ايام جميله........حتى لما دخلت الجامعه...كنا اصحاب كتير..و الاديان مختلفه.....
.والتعامل بيننا كان زى المدرسه ...
اصلا الموضوع..لم يكن له اى محل من الاعراب فى دماغنا اصلا...ناس و بتتعامل مع بعضها...
ممكن اعرف هوه حصل ايه فى الدنيا بقى....ليه اتغيرنا؟
..اذا كانوا اجدادنا..واهالينا ... و احنا ماكانش عندنا مشكله...
ميييييييين اللى خلق المشكله اللى مالهاش معنى ديه......


ربنا سبحانه و تعالى قال...لا فرق بين عربى ولا أعجمى الا بالتقوى
التقوى يا بنى آدم التقوى يا ناس ..مش حاجه تانيه ....


ان الله لا ينظر الى صوركم و لكن ينظر الى قلوبكم............قلوبكم......لانها ملكه وحده...


الكلام واضح جداا .. سبحانه و تعالى .. و ليس به اى مجال للاجتهاد فى تفسيره...مفسر نفسه


اتصلت بى صديقتى اليوم .. و كلها فــرسه.. و غيظ.....و حكتلى قصه...قلت بعدها ربنا يستر

ملخصها........ ابنها عنده 6 سنين و بقاله فتره كل لما يشوف حد فى تلفزيون‘ فى شارع ‘فى محيط الاصدقاء‘ يسأل على ديانته..
و فى كل مره كان الرد عاوز تعرف ليه.. الانسان مش بديانته .. بمعاملته لك.. و يسكت الولد.

.و هى ياعينى بسزاجه..ونيه صافيه.. فاكره ان الموضوع خلص
..يرجع يسأل تانى ..فى يوم تانى.. .....و الاجابه.. تقريبا نفسها.. ان المهم الاخلاق.. و ياعينى عامله زى الاسطوانه المشروخه...و تكرر الكلام نفسه.. المهم اننا مانكذبش.. و مانقولش كلام وحش.. و مانزعلش حد.. و نحترم الناس كلها..و نقول من فضلك و لو سمحت.. حتى لو لزميل ليك فى الفصل.....

.متربيه شويه كتير صحبتى .. مش كده...؟
ماتعرفش يا حبة عينى .. ان الولد..فى حد بيلعب فى ودانه فى المدرسة.....(بيلعب مش بمعناه الصحيح طبعا)

قو م ...فى يوم فى جلسة الاعتراف يتاعة كل الامهات..مع ابناءهم.. و همه يا عينى جايين من المدرسه جعانين .. و ملهوفين على طبق مكرونه.. ولا حته فراخ فيليه..و شوية رز و خضار.....مش عاوزه اقولكم اللحظه ديه بالزات

و هو وشه فى الطبق.. و بياكل .. الام بتعرف اخبار المدرسه كلها.. من ساعة لما ركبته الباص.... الى ان رجعلها بالسلامه.....جربوها الطريقه ديه سرها باتع......وعلى فكره انا معنديش و لاد.....

بس مجرباها مع ابنى الكبير اللى هو جوزى..
ماعلينا.. خلينا فى الاهم.. فى الخيبه الاويه اللى جايه.......
قال ايه ..النهارده لما سمعت القرآن فى المدرسه .. سديت و دانى.....
ليه يا حبيبى عملت كده؟
صاحبى قالى كده...
بس كده ربنا يزعل مننا..لانه كلام ربنا.. انت تحب لما حد يسع الصلاه..فى الكنيسه يسد ودانه.....
لا ....طيب انت بتعمل كده ليه؟
بس (......)قالى مش حلعب معاك بعد ما كنا اصحاب علشان انت مش مسلم..

و انا زعلت..و سمعت كلام (...) و عملنا كده
و بدات صديقتى.. رحلتها اليوميه مع .. دليت للمعلومات اللغلط...و استبدالها بمعلومات تانيه.. مستعيته بالبراهين..و الادله...ان اصحاب باباه..واصحاب مامته اللى هو احنا ..مجموعه لا باس بها.......

و التعامل بيننا عادى ...كاننا اخوات وا كتر..

و اصحاب تيته... و اصحاب جدو...
و ياعينى عليكى يابنتى ديه التربيه صعبه.........فى زمن اصعب


انا بقى عاوزه اعرف.. اطفال ..لسه على الفطره..جابو الكلام ده منين.....
و اللى حط الكلام ده فى دماغهم...اهلهم بقى .. و لا الشغالين.. و لا التلفزيون .. اللى بعض الاهالى ما بتعملش رقابه على اللى العيال بتشوفه...


هو ده الجيل اللى بنامل فيه يكون احسن مننا ... منين .انشاء الله

ولا هوه ده الجيل اللى عاوزين ..نزرع فيه الحب من الصغر...ازاى؟


يا ناس يا هو ...........لو فينا ناس مش قادره تحب بعضها... تسيب عيالها يحبوا بعضهم
و لو فيه ناس مش قادرة تتعايش مع بعضها...تعطى لاولادها الفرصه...للتعايش.....

و ما تنسوش فى الاخر ان ربنا هو اللى بيحاسب..و هو اللى خلقنا شعوبا و قبائل لتتعارفوا..لتتعارفوا..
و هو القادر على ان يجعلنا....على ديانه واحده...و جنس واحد...و لكن لحكمته سبحانه و تعالى جعلنا مختلفين..علشان نتعلم من بعض..و نعلم بعض...الصفات الحميده..مش الدين..الاديان لله وحده...

و كفايه بقى لحسن انا شعرى و قع من كتر الفرسه.....

ربنا يعين كل ام بتحاول تغرز...معلومه صح فى جيل صعب

و ربنا يحافظ..على الجيل الجميل..و يحميه...من ال

virus

بتاع اليومين دول أ صل بعيد عنكم لما بيدخل الدماغ..بيعمل

delete..

.لكل المعلومات و ما بيفرقش

******************************************************