سو ييا سو

  • على فكرة ديه مش اغنية محمد منير
  • ده اسم الاخت ســــو اللى شرفتنا بالزيارة
  • تبدأ القصة الساعة التاسعه و النصف صباحا من يوم 26 مارس اللى هوه امبارح
  • أكتشفت ان زوجى العزيز واخد اليوم أجازه
  • لانه يوجد ضيوف من استراليا اصدقاء لاخو زوجى المقيم هناك و هو الان فى مصر زيارة
  • طيب يا حبيبى انت واخد اجازه ليه
  • علشا يمكن نتقابل مع الضيوف و نعزمهم برة
  • ( الضيوف رجل و امرأه و هى الاخت سو)
  • مخبيش عليكم كلمة نعزمهم بره ديه عجبتنى وخلتنى ريلاكس
  • بعد الفطار و الشاى و القهوه و اللذى منه زوجى قالى تيجىنخرج
  • قلت يا سلام قوى قوى ...ماهو محسوبتكم تكون تعبانه ... مرهقه.. و اول ما تسمع كلمة خروج يدب فيا النشاط .. مش عارفة ازاى
  • سبت البيت يضرب يقلب قلت مش مهم ابقى اروقه لما اجى ... و المطبخ اثار الفطار.. قلت مش مهم الخروج اولا
  • هو انا فى ديكالساعة لما جوزى يقولى حنخرج....
  • قمت لبست هوا .. حنروح فين يا حبيبي؟
  • اخويا و مراته عاوزين يعملوا شوبنج ..
  • كلمة شوبنج خلت عيونى تلمع لمعان اقلق زوجى
  • قلتله.. اوكى اهو الواحد لو لقى حاجه حلوة يبقى يشتريها
  • لمحت فى عيون زوجى نظرة اعلمها جيدا و بعض التعابير على وجهه اعلمها ايضا جيدا
  • بس استعبطت و عملت نفسى مش فاهمة
  • المهم نزلنا و اتسوقنا و اختكم ما توصتش.....
  • وخلال رحلة التسوق الموبايل تقريبا مانزلش من على ودن زوجى
  • شوية شغل و شويه يتابع مع الضيوف خط سيرهم .. الى ان وصلوا للاهرامات
  • و حوالى كده الساعه الرابعة بدا النقاش ياخذ مسارة ...الناس تعبانة.. بس برضه لازم نعمل الواجب
  • كحال اغلب المصريين.... الجمال.... اهل الكرم
  • الضيوف:... احنا حنرجع الفندق تعبانين...
  • زوجى:.... ابدا ....لازم نعزمكم...تحبوا تاكلوا اية.....لحوم و لا اسماك؟
  • الضيوف:.. احنا لسة متغديين فى الهرم
  • زوجى: ما هوه لسه بادرى احنا مش حناكل قبل الساعة 8 و لا 9
  • امام الحاح زوجى لم يجدوا سبيل الا الموافقه على ان نتقابل .. و بعدين نبقى نقرر
  • و اختكم طبعا مش واخدة خوانة.. و رلاكس على الاخر ... و انا يهمنى.. نروح اى مكان
  • انشالله فول و طعميه .. انا مش فارقة معايا....
  • بعد المناقشات و المحادثات و و صول الساعة الى 530 مساء....
  • و مايمنعش فى بعض المحادثات الجانبية لزوجى و اخوه...بينى و بينكم كان شكلهم ما يطمنش
  • المهم لقيت زوجى واخدنى على جنب.. قلت حياخد رأى.. أو يمكن حيسألنى معاكى فلوس كفاية بعد الشوبنج
  • لقيت زوجى الحبيب يطلق القنبلة فى وجههى بس بيحاول يلقيها فى لطف.. بس برضه قنبلة
  • زوجى: انا يقول بما انهم متعبانين من التور و مرهقين.. احنا نعزمهم فى البيت احسن...
  • انا لمعت عيناى و احمرت و اخضرت و اتفتح فمى كلبلهاء ووقفت الكلمة فى زورى كنت حتخنق
  • بيت؟ انهو بيت.؟.... بيتنا؟
  • اه طبعا امال بيت الجيران.. علشان يبقوا قاعدين براحتهم .. و اللى عاوز يدخل ياخد دش.. يعنى يبقوا براحتهم
  • طيب و الاكل؟
  • حنطلب ...ياكباب و كفتة .. ياسمك لسة ما قررناش
  • طيب بص بقى انا عاوزه اروح .. البيت يضرب يقلب و الست اللى بتساعدنى بقالها كتير ما جتش
  • و لاازم اروق البيت .. ممكن تروحنى.. و قرروا على راحتكم بعد كده
  • اوكيه ما هو احنا كمان عاوزين نشرب قهوة علشان نصحصح

  • و رجعنا البيت يا سادة يا كرام الساعة السادسة مساءا...
  • و من الساعة السادسة .....مش عارفة احكيلكم غير انى كنت اتمنى ان يكون لدى 10 ايدين مش اتنين
  • بدات فى الترويق السريع و التنظيف السريع.....ابو سريع السريع .......
  • و فى خلال لهوجتى فى الترويق....جوزى:خلاص احنا قررنا حنجيب سمك ...اطلبيه عبل ما اروح اجبهم
  • بس كترى بلاش الشح بتاعك كل واحد سمكة.. يعن اعملى تشكيلة .. اشى مشوى و اشى مقلى و جمبرى....و اعملى انتى الارز
  • و خلى الاوردر الساعة 730 و انا حعدى و اجيبة.. و ماتنسيش اعملى حسابك فى السوفت درينك...و الفاكهة
  • و العيش الطازة...و المياه المعدنيه....و ياريت برضه تجهزى ....فوط علشان يمكن ياخدو دش....
  • و برضه حاجه ممكن يلبسوها علشان يبقوا مريحين اصلهم طول النهار ما بين المتحف المصرى و الاهرامات يا عينى زمانهم هلكوا
  • طااااااااااااااااااااااااااااااخ ده باب الشقة اللى اترزع و خرج يا سادة ياكرام مع اخوه علشان يروحوا يجيبوا الضيوف و السمك
  • ... والله كنت حعيط .. يعنى حتى مادنيش فرصة اقول كلمه و احده.......امرى الى الله ما هو احنا (المصريين) اهل كرم
  • قلت سلفتى.. حخليها تعمل حاجات صغيرة كدة... قوم الست المبجلة(استرالية برضه) كملت علي... يقى هى تعبانه و حتريح الساعة ديه لغاية لما يوصلوا........بزمتكوا اقول ايه ...

  • المهم ما بين تليفون للخضرى... و السوبر ماركت .....و الترويق.. و عمايل الارز .......
  • كل حاجة كانت على سنجة 10 الساعة 730 .. ازاى معرفش....
  • وصلت الست سو(اختصار سوزن)... امممممه.......اممممه
  • هالو....هاى...ولكم......شوية كدة.. من الترحيب اللى قلبكم يحبة
  • عرضت على الست سو المبجله انها تدخل تطس وشها بشويةميه .. و لو حبت تاخد دش فى حمام الملاطيلى و ممكن اشوفلها حاجه تلبسها.....قوم ايه الست ســـو بنت الاسترالية.. تقولى لو ادتينى حاجة و عجبتنى ..مش حرجعها..
  • ياخبر اسود الست داخلة طمعانه من اولها .. طيب مافيش شوية خشا ..قلتلها مش مهم يا حبيبتى...سوفنير....
  • ههههههههههههههههه يجماعة ناكل بقى انا على لحم بطنى من الصبح...و ده كان حوالى الساعة 830
  • ااوكى .. مافيش مانع...ده همه اللى بيقولوا..

  • الست المبجله سو اول ماقعدت على السفرة .. مسكت الطبق تقلبه..... و عنيها فيها اعجاب...
  • قلت يا بت حطى عينك على الطقم للحجه ســـــــو تقولك الطبق اللى اكل فيه اخدة.. وده طقم التشريفة...اه ما كل واحدة لما تتجوز بيكون عندها طقم تشريفة...بيطلع للضيوف....
  • م م م اترصت السفره ا شى سمك مقلى و اشى فيليه و اشى مشوى و اشى جمبرى.
  • .ديه طبعا سفرة اكيلة السمك زيي
  • و جوزى كان مفطمنى انهم بيحبوا السمك مممممموووووت
  • والله يا حبيبتى لازم تجربى النوع ده.. و المخلل ده...اا عاملاه بادييا...و المشوى ده وووووااااااوووو
  • و الاخت .. ســـــو متنحة و مابتقولش حاجة..غير اوكى اوكى....
  • قلت يا بت سيبيها على راحتها .....و الاقيلكم يا سادة يا كرام.. الحاجه ســـــــو تحط حتة فيلية صغننة واحدة فى الطبقو معلقة واحدة ارز
  • ..و نقطة واحدة طحينة... و دمتم
  • الطبق بتاعها فكرنى بالمطاعم الخمس نجوم... تكون دافع دم قلبك فى طبق كله عينات للدوقان...
  • المهم.. ماتاكلى يا حاجة.......ثانك يو .. اصل السمك فية شوك؟
  • نعم ياختى .. ما هو السمك لازم يكون فيه شوك.. و ده فيليه يعنى بكتيره ان قابلتى شوكه. تبقى محظوظة..
  • طيب يا حبيبتى ممكن انضفلك لو عاوزه......؟
  • و طبعا قبل ما اسمع اوكى ... كنت منضفة طبق فيه مشوى و مقلى و جمبرى.. مش باقولكم اهل كرم.....
  • و جوزها يا حبة عينى .. مطيع...من النوع....اللى مطرح ما تحطيه ينحط
  • جبر بخاطرى الله يجبر بخاطرة.. و اكل من الطبق اللى كنت منظفاه......
  • اما الحاجة سو استنت لما كنت ببلع الاكل و قالت بامتعاض
  • ايه الاكل ده كله.. احنا عندنا فى بلدنا ما نقدرش نحط الكمية ديه على السفرة..
  • والله يا جماعة احنا كنا سبعة... و بناكل.. و الاغلبية.. حريفة سمك..
  • ده تبزير و اسراف.. انا لما شفت الاكل بالكتر ده ... انسدت نفسى....
  • طبعا انا اقولوكم الحق اتفرست .. بقى انا دايخة الدوخة ديه النهارده علشان تشريف سيادتك.. و انتى فى الاخر تكبسينى .. طيب والله فى اول فرصه حكبسك انا كمان......
  • حاولت افهم فيها ان المصريين اهل كرم .. و اغلب المصريين ترحيبهم بيكون بسفرة عامرة بما لذ و طاب...
  • و هى تهزلى فى دماغها.. يا اما مش فاهمه .. يا امابتاخدنى على قد عقلى......
  • المهم يا سادة كل واحد من الموجودين تقولوش اتاثر بكلام الست ســـو
  • قمت لقيت كل اللى كان قبل كدة بياكل السمك بشوكه ..(. ماهو حريف اكل السمك مش بيسيب فتفوتة)...
  • لقمة و قام
  • قلت ما علينا مكسوفين و لا حاجة مش مهم الاكل ده حيفيض لبكرة و حاكل براحتى....
  • بعد الاكل و تحويل السفره كاملة الى المطبخ....و طبعا من كتر الحاجات اللى فيه و الكركبة بقى مشحكيلكم ....
  • قوم الاقى الحاجة ســـو دخلت الصالون .. من غير ما تغسل اديها...
  • يا ست .. يا خالة.. مش حتغسلى اديكى.. ده سمك .. و انا يا جماعة ان جيتو للحق محسوكه .. حبتين.. بالنسبة للنظافة
  • و هى ولا على بالها......طبعا مش حوصفلكوا قلبى كان بيتقطع.....طيب شاى يا جماعه بعد الاكل .. الفاكهه.. ايس كريم .. اىحاجة تحلو.........راحت الاخت هابدانى كبسة تانية.......ايه اللى انتو بتعملوه ده .....بعد كل الاكل ده و عاوزين تحلوا ؟
  • قلت بس ده نق ..استرالى على اصوله.......الله اكبر انتى جايه تحسدينا ولا ايه؟
  • نو..نو..از...تو..متش........انا مش باشرب شاى.. ولا قهوة.. و لا سوفت درينك.......ولاباكل كتير
  • قلت فى سرى اللى يسمعك تقولى كده يفتكرك رشيقة... بس هيه نونونونونو.......
  • على فكرة نسيت اقولكم ان الاخت ســــو خطوتين كده و تبقى على ابواب الستين .. ما علينا .. انا مش بانق
  • تقوم الحاجة ســو تقول اية....انا محافظة جدا على صحتى ... يدوبك بيرة و سجاير و بس...
  • وبس... الست حتفرسنى اكتر ما انا مفروسة..........و نعم المحافظة على الصحة
  • تخن ...و كلسترول.....حاجة يايي....اما سل و كبد.. يا محلاه و نعمة الصحة صراحة
  • ..الاخت اسنبى حارسها و قفت قدام البوفية اللى قدام تربيزة السفرة
  • و كرهتنى فيه..
  • ماله كبير كده ليه.......... و دخلتيه اشقة ازاى...................... و بكام............ و الشقه صغيرة
  • ان جيتو للحق حسستنى انى عاوزه اعزل
  • على 10مساءا قالوا احنا تعبانين و لازم نرجع الفندق.. و طبعا زوجى الشوفير....
  • قلتلها مع الف سلامة يا حبيبتى.. ماتبقيش .. تقطعى الجوابات .....
  • تقوم الست المبجلة.....وهى على الباب ماشية خلاص.. و لابسة جلابية محترمة من عندى
  • تقولى معندكيش كام زجاجة مياه معدنية زيادة أخدهم الفندق اصل ثلاجة الغرفه مافيهاش مية
  • .
  • لولا انى متربية ... و خريجة مدارس اجنبية .. انا كنت سمعتها كلام مش ولابد
  • و جبتلها المياه و بلسلامه روحت على الفندق

  • و اختكم قعدت محتاسة فى الترويق و غسل الصحون و التطهير الى الثانيه صباحا
  • حاولت ان انام....و لكن ان جيتو للحق ماعرفتش..فكرت فى كلام الاخت ســـو
  • صحيح هوه احنا بنعمل كده ليه؟
  • لماذا نربط المناسبات بلطعام
  • الترحيب بالضيوف .. بالاكل
  • لو فكرنا .. اى مناسية او اى خروجة مرتبطة بالطعام
  • حتى الاطفال من صغرهم بنربط الافعال الحسنة بالحاجات الحلوة
  • لو سمعت الكلام يا حبيبى حجبلك حاجة حلوة
  • ان جيتو للحق انا مانمتش.. كله بسبب الاخت ســـــــو
  • حد فيكو يقولى احنا بنعمل كده ليه..........بنقلد مين؟
  • ماهو احنا شاطرين فى التقليد و اكيد احنا بنقلد حد
  • ميييييييييييييييييييييين؟

23 زارونى......و اتفرسوا:

سنووايت said...

هههههههههههههههههه

بجد العزومات دي بتبقي مهلكة جدا
وفعلا احنا عندنا بنقدم كميات كبيرة والحلو والحادق والمشروبات البارد والدافي يعني اوبن بوفيه اتنقل في البيت
بس اللي بلاحظه اكتر ان اللي بييجي ياكل بيحط في طبقه كل الانواع وبكميات رهيبة ويمكن ما يقدرش يكملها كلها ودي باشوفها اكتر في اي اوبن بوفيه مش عارفة العادة دي ليه موجودة عندنا؟؟

بس واضح ان سو مزوداها شوية يعني طبيعي ان يكون يه اكل كتير وطبيعي الترحيب بالضيف دي عزومة مش يوم عادي
وبعدين استغربت اوي انها طلبت مياه وهي ماشية.. من الواضح انها اقتصادية جداااااااااا

الحمدلله انها مشيت بالسلامة

wanna b a physician said...

مش بنقلد حد احنا اهل كرم المصرييييييييييييين مش لاقيين ياكلوا اه بس لو فيه ضيف ياخرابى وسع ياجدع
احنا اهل الكرم ولو حد بيعمل كدا يبقى بيقلدنا
تحياتى للحاجة سو وليكى

Foxology said...

احنا مش بنقلد حد ولا حاجة

كل الفكرة اننا عندنا موروث شعبى باننا لازم نبقى مبذرين ومسرفين علشان نبين اصلنا الكريم :))

ربنا يستر ونلاقى حاجة ناكلها بعد كدة :))

مجداوية said...

طيب,, أنا أخدت الطفطف وقرأت عشان أعرف أرد عليك ,,بس لسه مش عارفه انتى مفروسة من مين غير من الاسترالية سو ولا دى بس بداية الغيث سو ,,المهم لو كانوا كتبوا على البلوجر للشباب فقط كنت برضه حادخل أكتب رغم انى عضمة كبيرة وسنى كبير لأن الكلام مش حكر على الشباب ,والناس اللى وصفتيهم قد والدك عندهم برضه كلام ولهم الظروف المختلفة اللى بتخليهم عايزين يتكلموا ,, وفيه حاجة اسمها انتقاء يعنى انتقاء من تزوريهم ومن تتحدثى معهم وانتقاء ما تتحدثى عنه أنا واحدة عملت مدونة لأعبر عن نفسى وأقول وجهة نظرى يمكن أفيد غيرى لكن أكيد حاستفيد من غيرى فالنية خير وفى وقت ممكن أسكت فيه لو السكوت لقيته أفضل من الكلام ,, شكرا على زيارتك مدونتى وحاعرف رأيك فيها من غير كلام ,,

مفقوعة مرارتي من حماتــــــــــــي said...

هي الحاجة سو مالها طالعة فيها كدة ليه .... حسيت انها أسترالية من السيدة ماعندهاش من اللي أسمه أوتكيت

أنتي يابنتي شبهي في حاجات كتييير أنا بأعشق الخروج وبتخنق من قاعدة البيت
وبحب الشوبينج بس جوزي حارمني منه بحجة انه اسهل يجيب طلبات البيت وحده من غيري


وأنتي بتحكي الحكاية دي فكرتيني بأصحابنا بس هما مصريين وعايشين في أستراليا هجرة يعني ... عقبالنا كلنا
كنا احنا بقي اللي بنزورهم عشان نسلم عليهم ونرحب بيهم في مصر يقوم جوزي يسيبني مع مراته وينزل هو وصاحبه يفرجه علي شقتنا
والشقة بقي ماأقولكيش كانت عاملة إذاي ...
الزيارات المفاجأة دي بتخضني
بس جوزي طمني وقاللي عادي البيوت بتبقي كدة ماهياش حاجة جديدة ان الناس تبقي خارجة من بيتها وسايباه يضرب يقلب
ومرة تانية اخدناهم وأتعشينا برة بس هما مصريين بقي والحمد لله أكلوا معانا

ورفضت أنا حكاية اني أطبخ وأجهز السفرة وممكن في الآخر يعتذروا ... العزومة برة أحسن ياشيخة وكان في يوم مطرة شديدة كمان

مفقوعة مرارتي من حماتــــــــــــي said...

بالنسبة لسؤالك
انا باحس اننا بنذودها في العزومات فعلاً.. رغم ان الواحد مش بيقدر ياكل أكتر من طاقته بس احنا كمصرييين أهل كرم بذيادة
تعرفي ان جوزي كان مرة عازم نفر واحد عندنا في البيت فعملت أكل يكفيينا بالظبط وكانت زيارة مفاجئة وكنا في رمضان .. انا قلت اهو ثواب
مش هاتصدقي لحد يومنا هذا جوزي بيعايرني بالعزومة دي وبيقول قصري رقبتي قدام صاحبي

صبرني يارب said...

بصي يا مفروسه
تعرفى ان انا اتفرست منك انتى .
اه وربنا على الاخر .
زعلانه ان جوزك قالك هايتغدوا عندكم 4 افراد زياده ولا حتى السبعه كلهم وجاب الاكل من بره ؟؟؟؟

أه يا مرارتي الى شلتها من اربع سنين من غير ما اعملها مقام ياني .

يا اختي انا دخل عليا بقى يجى 20 افراد كده تقريبا وجايين من سفر ولف فى دمياط على موبيليا جم الساعه 7 مساءا ومن غير غدا وقدامهم سهره على ما توصلة عربية الموبلياوبيستنوها عندي .
وتم الحاق بهم حوالي عشره تانيين ما كانوش مسافرين بس يعنى نوع من المجامله للعريس .
وعشان تغدي العشره الاولانيين لازم كمان تعشي العشره التانيين معاهم .
تخيلي المنظر وانتي اساسا ما عندكيش علم اصلا بالموضوع ولا انتى ولا جوزك ؟؟؟!!!!!
اظن لو أجرت مطعم انا من بابه مش هاكفيهم ده غير انه يبقى خراب بيوت يا حلوه .
الحقيقه طلعت كل الفراخ الى في الفريزر بتاع 3 او 4 مش فاكره وحاولت افككهم من التلج ما عرفتش .
جبت الساطوووووووور اه والله وقطعتهم وعملت تتبيله وحله كبيره وهما بتلجهم يا حلوه وطبختهم ومعاهم حلة مكروووووونه كبيره .
وتطوعت حماتي بانها كانت موصيه مش عارف مين من ولادها يقلي 5 كيلوا سمك ولوازمهم قالتلى تحبي ابعت اجيبهم ؟؟؟
كان ساعتها حصل هجوم العشره التانيين قلت لها هاتي بقى .
وغلاوتك يا اختي على بال ما فردت سفرتين وخلصت ما لحقتش اكل انا اساساااااااا .
واتمسح الاكل يا امي عن آآآآآآآخره
وعلى فكره انا لو حكيت لكي عن مثل هذه المواقف فى حياتي هاملا كتااااااب .
ولن تتخيلوا مهما قلت لكم ازاي انا باتصرف .
لكن طبعا احيانا باتخنق وابقى عايزه اكل دراع جوزي لكن بصراحه هو بيبقى غالبا مظلوم لانه بيتعرض لاحراج من الاخرين .
ما عليييييييينا
7 افراد ؟؟؟؟ والاكل من بره ؟؟؟؟ وما كالوش ؟؟؟ وانتى الى مفروسه ؟؟؟؟؟

ده انا اقل طالعه عندي فى العزايم 10 يا حلوه
اه يا نفوووووخي

واحدة مفروسة said...

سنو وايت
--------
بالنسبه للاوبن بوفيه.. الناس بتستخصر
تقوم تحط كل حاجه على بعضها.ز خايفة ما تلحقش.. و بعدين من عكة الطبق ما بتاكلوش

wanna b a physician
-------------------
فعلا احنا اهل كرم ....بس انا بحب المثل لاقينى و لا تغدينى.....مش بخل و الله ده انا بيقولوا علي مبزرة

fox
----
الموروث اللى عندنا ...لازم نغيره.. لانه .. ماينفعش مع الزمن ده


مجداويه
------
اولا شكرا على تشريفك المدونه
ثانيا...مافيش حاجه اسمها للشباب فقط...انا مع ان الشباب ....شباب القلب...و انا معاكى ان المدونه...بتوسع دائرة التعرف على آراء الاخرين..

مفقوعه
------
انتى بتقولى فيها .. خصوصا ان رمضان ربنا بيبارك فى كل حاجه....اكل اول يوم بيفضل منه لآخر الشهر
وعلى فكرة نفس الموقف حصل معايا مره ...ماهو لو تاخدى بالك قالى كترى بلاش الشح ده

صبرنى يارب
--------
انتى مفروسه منى ....ده انا غلبان على راى عادل امام ....
ربنا يصبرك فعلا.. لو ده بيحصل معاكى انا مقدرش ...ده انا مع اول 10 اسيب البيت و اجرى...
وبعدين ..مجايب الاكل من برة لان جوزى لا يعترف بحرفتى فى الطبخ مش اكتر...بس انتى واضح انك استاذه بجد .. طبختى الفراخ مجمده.. على البركة

بحبك يامصر said...

احنا مش بنقلد حد ولا حاجه
احنا اهل كرم انا عن نفسى لما بقعد على سفره زى اللى وصفتيها مش بقوم الا لما الاكل يخلص ههههههههههه
طبعا كل شئ فيه توازن بيبقى جميل
التبزير طبعا مش مطلوب

ayar said...

احنا عالم اكيلة يامفروسة وبنربط كل حياتنا بالاكل يعنى بنشتغل عشان ناكل وبنعيش عشان ناكل ..
سلميلى على الاخت سو اللى شكلها من باب الشعرية دى وقوليلها متقطعش الجوابات !!

Yuki said...

ههههههههه

ربنا يكون في عونك ..
بس فعلا " سو " مزوداها شوية , لأن عندهم بردو لما يحبوا يكرموا ضيف بيعملوا سفر كبيرة زي عندنا ..
و بعدين احنا عندنا في الإسلام اكرام الضيف يعني انتي عملتي الصح ..
و المفروض كنتي قلتلها كده لما اعترضت علي كمية الأكل اللي انتي قدمتيهالهم ..


بس انا لو منك
معملش عزومات في البيت تاني ابدااا
و تبقي استفدتي حاجه من الست سووو انها كانت اول و آخر مرة :D


اسلوبك لذيذ

اول زيارة لمدونتك :)

واحدة مفروسة said...

بحبك يا مصر
---------
المشكلة اننا شايفين تبزيرنا كرم .. الاعتدال هو المطلوب....ما هو انا اتكسفت بصراحه اعوم فى بحر السمك لوحدى .. بس وحياتك عوضتها تانى يوم

ayar
-----
مش كدة و النبى شكلها من باب الشعرية الاسترالية

واحدة مفروسة said...

yuki
-----
اهلا بيكى و شكرا على زيارتك...ماهو انا فهمتها .. بس هى قالتلى لما يعملوا عزومات بيحطوا .. طبق سلطة كبييييير فى النصف علشان يتشارك فية كل الناس.. و بعدين اى حاجة تانية بالواحدة

wael said...

انا طول ما انا بقرا الموضوع هموت من الضحك
وبعد الموضوع وانا بقرأ التعليقات كنت هموت من الضحك اكتر
على العموم هي عاده مصريه قدرك كده
بس ممكن سؤال ؟
هو جوزك عارف انك بتكتبي في مدونه؟
ههههههههههههههه

nody_1987 said...

اهلا يا مفروسه
اولا البوست لذيذ
ثانيا انا علشان كده ما بحبش اتعزم ولا اعزم
لانى ما بحبش اكل عند حد يعنى نوع من الوسوسه
ولا احب اتعب نفسى فى تحضير اكل او تشطيب المطبخ
علشان عارف بارضه فى الاخر انى مش ها سمع كلمه حلوه

د/اجدع بنوته said...

انا لو مكانك والله

كنت قومتها م ع الاكل

وع بره عددددددل


مفروض حتى لو مش عاجبها الحوار

تبقى زوق .. تقول انها عامله دايت

مبتاكلش كتير

مش جليطه كده

لا لا انتى ربنا وقعك

ف سايحه تفضح متسترش زيك

ههههههههههههههههههه

م اعمالك سلط عليكم

د/اجدع بنوته said...

انا لو مكانك والله

كنت قومتها م ع الاكل

وع بره عددددددل


مفروض حتى لو مش عاجبها الحوار

تبقى زوق .. تقول انها عامله دايت

مبتاكلش كتير

مش جليطه كده

لا لا انتى ربنا وقعك

ف سايحه تفضح متسترش زيك

ههههههههههههههههههه

م اعمالك سلط عليكم

واحدة مفروسة said...

wael
-----
اينعم .....جوزى عارف.... و قالى لو قلتى رايك بصراحه...فى موضوع كده و لا كده....اصلك تفضحى ما تستريش ...انا معرفكيش.......شفت حيبعنى..زحاجه تفرس

واحدة مفروسة said...

nody_1987
-----------
شرحه و حياتك ..

واحدة مفروسة said...

د/اجدع بنوته
-----------
كلامك صح.... من اعمالكم سلط عليكم

الهدهد الطائر said...

"إذا أكرمت الكريم ملكته.. و إذا أكرمت اللئيم تمرد"

أحسن و أسرع وسيلة لاختبار معدن أي شخص.. أن تكرميه و تشوفي رد فعله

أحنا الأصل.. و عالأصل دوّر!!.

mostafarayan said...

بصي يامفروسة انتي وجوزك اتصرفتو بطبيعتكوا واكيد لوكان العكس سو وجوزها ماكانوش هيعملو معاكوا كدة لكن دي موروثات احنا بنتصرف بيها طبيعي
جايز يكون لها اساس ديني في نصوص كتير من القرأن والسنة بتحث علي اطعام الطعام
بس انت بردة كان لازم تتوقعي ان البشردي صفاتهم في الأكل مش زينا
وعلي العموم ربناهيكرمك بالخير اللي بتعمليه

واحدة مفروسة said...

الهدهد الطائر
--------------طبعا احنا الاصل






----
mustafarayan
----------------
ربنا يكرمك....اه طبعاهمه عادتهم فى الاكل غيرنا...