تاج الجزيره ........قصدى البلوجريه



بما انى لسه جديده فى عالم التدوين...و ماكنتش اعرف يعنى ايه تاج...






و دلوقتى اتنورت...و يقيت لهلوبه....اقدر اقولكم التاج ده عباره عن شوية اسئله لازم الواحد يرد عليها و يبعتها لخمسه تانيين علشان يردوا عليها و هكذا .............يعنى زى رسالة انشرها و لك الثواب .. و حتشوف الخير كله.....




<>





>و بما ان زوجى العزيز ربنا يخليهولى واقف ورايا فى موضوع التدوين ده...ربنا يخليه يارب






و بيراقب عليا كانه بيراقب على امتحنات....رايح جى يقولى حسبى اوعى تقولى اى كلام يوديكى فى داهيه...خايف عليا طبعا....و يرجع تانى اوعى تقولى اى بينات عنك ...اصل كل الكلام اللى انتى بتكتبيه مراقب






....من كل الحكومات......طبعا انتو عارفين مين همه الحكومات












وبما انى معروف عنى انى ساعاااااات بعمل اللى فى دماغى و مش بسمع الكلام.......و بقول رأأي و افضح ماسترش......بس واعيه و اعجبكم.....












فانا نويت و النيه لله انى ارضى جميع الاطراف..........






...ارضى زوجى علشان ربنا يحبنى






وارضى البلوجريه اصحابى...و خصوصا الاتنييييييين الحلوييييين اللى دبسونى فى الموضوع ده و انعموا عليا بتاااااااااااااااج الجزيره












السلطانيه












اححححممممممم هنبدأ جاهزين ..






اول سؤال ..و ربنا يكفينا و يكفيكم شر يوم السؤال الاعظم






اذكر عشرة اشياءعن نفسك












1-انثى






2-متزوجه






3-متوسطة العمر






4-برج العقرب... وما ادراك ما برج العقرب....






5-الطول متوسط






6-الوزن......................ما بحبش اوزن علشان ماتفرسش






7-بيقولوا طيبه.........بس انا بقول هابله ساعات






8-حساسه جداااا






9-بحب الضحك...الخروج......واللعب مع الاطفال و اشترى لعبهم






10-بحب كل الناس...و اجدلهم دايما مبرر لتصرفاتهم....بس حسب الموجه العامه...يعنى لو الموجه لطيفه و المزاج رايق و مش مفروسه






بأجد لهم مبررات كويسه...و العكس صحيح................






المفروض بقى دلوقتى انى اختار خمسه حلوين


ابعتلهم التاج...


احممممممممممم


1-بطوط


2-سنوهى


3-هناوهناك


4-sampatik


5-foxology


تم بحمد الله








*************************************************

40 زارونى......و اتفرسوا:

shahy said...

صباح الفل

اية يابنتي دة
انتي كأنك بتتكلمي عني بالضبط
انا كمان برج العقرب

بس ممكن اعرف انتي مفروسة من اية يمكن نطلع في دي كمان زي بعض
حقيقي حقيقي حقيقي
تلاتة حقيقي
انا مبسوطة جدا

تحياتي وان شاء الله هاتعرف عليكي اكتر من كدة
دة لو انتي ماعندكيش مانع

shahy said...

هههههههههههههه
هههههههه
دة زوجك كمان زي زوجي في موضوع العزومات
وللأسف انتي خايبة زيي برضة في حسن معاملة الضيوف اللي ماعندهمش دم
سوري
بس حكاية الست سو تشبة حكايتي مع ضيفة زيها برضة بس ضيفتي كانت 17 سنة بس

هاروح اكمل باقي المواضيع

كلبوزة لكن سمباتيك said...

هههههههه
طيب انا ذنبي اية انت جالك تاج البسه انا ليه
تعرفي انا عاملة يافطة عندي في المدونة كاتبة فيا التاج ممنوع و الزعل مرفوع علشان اول و اخر تاج عملته معرفتش اكون صريحة فيه و مينفعش اكون صريحة يعني اول سؤال مثلا في حد حيكتب على نفسه اي صفة وحشة؟ لا يمكن حتى لو كانت فيه
كله حيكتب انه جميل و امور و هايل
فاذا من قصيرها كده انا برجعلك التاج هجمة مرتدة ههههههههههه
و انتي بقى لبسيه لاي حد تاني
تحياتي

Mafrousa said...

شاهى
-----
شكرا على مرورك... و ربنا يخليكى ...مانع ايه اللى حيكون عندى ده احنا نتشرف يا فندم....ده احنا حتى بلديات ..من محافظه واحده ههههههههه
نورتينى

Mafrousa said...

sampatike
-----------
اااااااااااااىىىىىىىىىىىىىى
ليه كده يا سمبا ..تدينى هجمه مرتده كده .....و بعدين يا ستى اعدم نظرى ما شفت اليافطه اللى انتى معلقاها على الباب ...بس الصراحه ان كنت شفتها كنت عملت نفسى ما شفتهاش...ههههههه
اهم من ده كله انك شرفتينا بالزيارة.. سيبك انتى سلطانية ايه.. و بتاع ايه ديه حتى السطانيه فاضيه...و احنا فى زمن ابجنى تجدنى.....هههههههه
نورتينى

MAKSOFA said...

كلها صفات حلوه يامفروسه ، برج العقرب طيب بس بيلدغ لما يحب يلدغ ساعاتها على الدنيا السلام

Anonymous said...

وده هلبسه ده ولا أعمل بيه إيه؟ ما ظنش هييجى على مقاسي... ما عندكيش حاجة أحسن من كده شوية؟ أصل شكله عامل زي سلطانية

أوكى... إيه المفروض أعمله ناو؟ أرد هنا ولا عندي ولا فين بالظبط؟

د/اجدع بنوته said...

اجابات خفيفه وظريفه يامفروسه يااوختى

تحياتى ليكى ولزوجك

Mafrousa said...

ههههههه حلو الندبيسه ديه ... بص يا سيدى تقول 10 اشياء عن نفسك و بعدين تختار 5 اشخاص تحول لهم التاج بس ماينفعش تحط اسمى تانى...ودور على اى صوره الصراحه انا لقيت الصوره ديه قلت استعبط و اقول عليه تاج و خلاص......و بتكتبها مدونه عندك... و تبلغ الخمسه اللى حتختارهم انك بتديهم تاج.......فهمت حاجه؟

Mafrousa said...

]
د\اجدع بنوته
شفتى النصاحه...

Mafrousa said...

maksofa
--------
ده انا غلبااااااااااااااااااااانه
عمرك شفتى واحده برج العقرب تقول على برجها كده علنا.....زالا اذا كانت اكلت لحمه من اييييييييييييييييييييييااااااااها

Desert cat said...

هو من ناحية طيبة فانتى فعلا طيبة
تحياتى يا جميل

snohe said...

هو ده اللى كنت خايف منه
انا سعيد جدا باختيارك لى ضمن المجموعه
بس والله انا مش عارف اكتب
عموما هحاول وامرى لله
شكرا يا مفروسه هانم

حاجات جوايا said...

مبروك عليك التاج يا جميل
عقبال تاج السلطنة

بس عايزة اقولك حاجة بخصوص بياناتك عالنت
مش لازم تغيرى اسمك عشان متتعرفيش
انتى ناسية ان فيه تعقب للاجهزة عن طريق الأى بى
يعنى معروفة معروفة
طمنى جوزك بقى
ههههههههههههههههههههه

تحياتى يا قمر
دمتى بخير
سالى

Mafrousa said...

desert cat
----------
طيبه جدا...هابله بعيد عن السامعين ههههههههههههه

********************
snohe
------
اى خدمه
***********************

sally
-------
اولا تشرفت المدونه بالمرور....بس ايه البتاع ده اللى بيعرف كل حاجه ده .....مزيد من المعلومات من فضلكوا.....بسرعه

المـــفـــــــقــــــــوعـــــة مــرارتـهــا said...

ده أيه الصراحة دي
ماكانش العشم يامفروسة

Mafrousa said...

مفقوعه يا اختى شفتى؟
انا مش عارفه جرالى ايه اليومين دول المعلومات بقت بتدلدق لوحدها...انا كنت زمان اوعا من كده
اوعدك اتعالج فى القريب العاجل

Anonymous said...

اولا الأجابات منطقية مفيش شك

ثانيا مش هينفع تمرريلى التاج يا مفروسة لأنى مسحت البلوج بتاعتى وتقريبا كدة اعتزلت التدوين :)

خيرها ف غيرها دبسى حد تانى بدالى :))

تحياتى

كاميليا بهاء الدين said...

جميلة
فى اوصافك
وكلامك عن نفسك
وصريحه ومباشرة

سعيدة انى اتعرفت عليكي

تحياتى

الـسـيـدة نـون said...

الا برج العقرب هتقوليلى عليه
انا اعرفه من بعيد
اصل جوزى بعيد عن السامعين عقرباوى اصيل
ربنا يكون فى عون زوجك العزيز

يلا سلاماتى يا قمر
بس تعالى هنا قوليلى هو انتى كمان من اكتوبر ولا ايه؟
لو من اكتوبر قوليلى
سلام
اختك خيخة

حاجات جوايا said...

انتِ قلقتى ليه كده ؟؟
اوعى تكونى انتِ اللى منظمة الاضراب من تحت لتحت ولا حاجة
هههههههههههههههه

شوفى يا قمر
لكل جهاز كمبيوتر حاجة اسمها
IP
عبارة عن ارقام مقسمة فى اربع خانات
مثال :
180.150.12.87
والآى بى ده هو ( الرقم القومى لأجهزة الكمبيوتر ) زى ما كل واحد فينا عنده بطاقة بيتعرف بياناته عن طريقها

وفى حالة حدوث شغب أو شغل مخابرات أو .. أو .. بتتمكن مباحث الانترنت من معرفة مكان الجهاز وصاحبه وتوصله بسهولة


يعنى الاسم من عدمه لا يمثل أى اهمية لأن الاسم بيتكرر كتير جداااااااا ويتشابه فى كل محافظات الجمهورية أما الآى بى فزى بصمة اليد لا يتكرر ولا يتشابه

بس خلاص

وعلى راى المثل " امشى عدل يحتار عدوك فيك "
هههههههههههههه
واللى يقدر يمسك علينا حاجة يورينا نفسه

يارب اكون قدرت اوصلك الفكرة

دمتى بخير
سالى

بطوط حبوب said...

انا حاسس اننا اتقلبنا
التاج ده اجاباته اطول من كده
الله يرحمك يا ابله هاله
يعـــــــــــــــــاد

ال بطوط اول واحد ال
استحملى بقى
ههههههههههههههه

Mafrousa said...

fox
-----
يادى النيله اعتزلت ليييييييييييييه
اوعى تكون سالى قالتلك على البتاع ده و اتررعبت و لا حاجهههههه و لا تكون اتفرجت على 90 دقيقه امبارح... لا لا يافوكس ...ارجع ......الجماهير بتناديك....راجع نفسك ياولدى....وحياة ابوك ماتسيب البت مفروسه لوحدها لحسن مانامتش من امبارح و قلبها متوغوش و سالى ربنا يكرمها كملت علي .. اهئ اهئ اهئ

Mafrousa said...

كاميليا
--------
مرسى على تشريفك....و انا اسعد

Mafrousa said...

خوخه
------- ازيك و ازى المود...ان شاء الله احسن..ازى شريف ربنا يخليهولك
...يا ماما برج العقرب بنات ..كومبليلى ديفرنت عن برج العقرب ولاد
ده انتى اللى الله يكون فى عونك ليكى الجنه..بالمناسبه انتى برج ايه؟؟؟
مش باقولك من بدرى احنا بلديات من محافظه واحده

Mafrousa said...

sally
قلقت....معقوله ياماما انا اقلك من شرح بسيط زى ده ...هووهووهو
انتى ماتعرفنيش و لا ايه..احنا جامدين اوي
و بعدين عاوزانى اقلق و انتى ماشاء الله عليكى مدخلالى اسمين ...لوحدهم يخلوا الواحد يعمل بي بى على روحه...الله يسامحك ...كده برستيجى اتبعتر قدام زمايلى البلوجريه

Mafrousa said...

بطوووووووط
----------
انت فين يا بطوط ...كنت بتذاكر...برافوا عليك...عملت ايه فى الامتحان؟...ناجح ان شاء الله........
مين ده اللى يعاد انا ماصدقت جاوبت...حنشوف اجاباتك يا باشدكتور...طبعا اول واحد..اصلى كلام فى سرك لسه بقرا ميكى لغاية دلوقتى
ههههههههههه

الـسـيـدة نـون said...

طب ايه ؟
يعنى من محافظة واحدة ومش هانشوفك ولا ايه
انا برج الجدى
ياريت تبعتيلى الكتالوج بتاع رجالة برج العقرب
عايزة اعرف انا كنت بعمل الخطوات صح ولا ركبت مسمار مكان مسمار وعكيت الدنيا

تحياتى ليكى
اختك خيخة

غني يابهيه said...

اول زياره


مبروك عليهم التاج


وعقبال اللى جاى


تحيات بهيه

Bongo said...

كلنا لها
كلنا هذا الرجل ههههههههه

اجاباتك المختصر المفيد ..
مينفعش كده

اررررغي شوية :D

Mafrousa said...

خيخه
اكيد حشوفك ان شاء الله
و ساعتها حديلك الكتالوج

Mafrousa said...

غنى يا بهيه
----------
و ان شاء الله مش الاخيره
الله يبارك فيكى ...عقبالك

Mafrousa said...

bongo
------
ياهلا
لألألأ رررغى نونونو...مش علشان حاجه ...و لا سمح الله انا مش رغايه ... بس الرقابه الزوجيه خايفه عليا
و اختكم لو رغت ...الكلام بيبقى يتسابق على النزول فبيتكعبل مع بعضه
ههههههههههه

Ahmed Mubarak said...

مشكله الوزن مشكله عند كل الستات حتى الرفيعين

عادي يا جماعة مش جوزك بيحبك .. ايه لزمه الفرسه

تحياتي

رئـــــيسـة حزب الأحلام said...

والله انت باين عليكى واحدة رقيقة اوى
بس ايه هى صفات برج العقرب عشان نبقى على نور

FaceMoon said...

بصى بالرغم انها اجابات مختصرة بس انا عرفت ان الاختصار مقدرش اتكلم فيه عشان الراجل الكبير عايز كدة ولازم كلنا نقول امرنا لله حنعمل اية بقى
بس اجاباتك حلوة برضة خلتنا نعرف جانب ولو صغير من شخصيتك ودة شىء يفرحنى لان بحب مدونتك واكيد اللى يكتب الكلام الجميل دة تبقى انسانة اكثر جمالا ورقة
تحياتى وحبى

Mafrousa said...

احمد
-----
يعنى هوه مالفتشى نظرك فى الكلام كله غير حتة الوزن ديه
اتفرست انا كده
نورتنى

Mafrousa said...

رئيسة حزب الاحلام
---------------
انا مسمياكى بينى و بين نفسى .. الرايقه... ليه بقى ..اسالينى؟حقولك علشان تعليقى لما اقرالك اى تعليق فى اى مدونه ..تلاقينى لا شعوريا اقول يارايقه......شغاله انتى على الهادى...وانا مفروسه
اما صفات برج العقرب...فبلاش خلينا حبايب

Mafrousa said...

faceMoon
---------
هل هلالك ...ايه الكلام الجميل ده يا فندم اخجلتو تواضعنا...و لو اننا لسه خارجين من خناقه عند الاخت مفقوعه....و كنت باحاول الملها الاخوه البلوجريه من على نواصى المدونات علشان يقفوا معاها
ههههههه نورتينى

الغجرية ست جيرانها said...

انا لسة جديدة في قصة التدوين دي بس قلت لازم اسيب لك تعليق علشان تقري مدونتي وتسيبي لي تعليق بردوا