.كل سنه و مصر طيبه و بخير...بكره شم النسيم
اغلب الناس حتفكر حتعمل ايه بكره..اللي سافر سافر ..
.و اللى لسه ...حيعمل اجتماع عائلى و يتشاور.... و يقترح...و يختلف...ويعارض...
..و يعترض... و يؤيد...ولا مجلس الشعب...و حتلاقى اللى يقول اى حاجه..
واللى يقول انا حقعد قدام التلفزيون ...
.معيا لب و سودانى ..و اللى يقول ترمس و حمص...واللى يقول انا حنـــــام......
..... و اللى يقول لا انا حخرج
المهم انه بعد كل هذه المداولات بنلاقى .انها كلها بتتعمل كل واحد على مزاجه
.تيجىبعد كده مداولات اخرى
و هى اهم من الاولى......حناكل رنجـــــه(يييييمممميييييمم)
ولا فسيــــــخ(...مش بحبه و لا اطيق رحته
و البيض
حنلونه بإيه .....الالوان دلوقتى مضره...
طيب نلونه بالوان طبيعيه....البقدونس..... اخضر...قشر البصل.... اصفر....البنجر...احمر
اما اللون الازرق ......فمش عارفه...بلاش لون ازرق ..ماعلينا ...كله حيتاكل
انا بقى حقولكوا انا بعمل ايه ....زماااااااان ...و خدوا بالكوا من الالف اللى فى زمان ديه علشان مانزعلشى من بعض........انا افتكر قبل مايجيلى الزهايمر...كان والدى الله يرحمه بيخرجنا الساعه 6 صباحا....حتقولولى ليه كده....حقولوكوا معرفش بس انا افتكر كان بيقول علشان تستنشقوا نسيم الصباح ......ماعلينا ...
.و افتكران الواحد كان بيشم تراب لانه دايما بيبقى الجو فيه تراب و حر ... و افتكر ان الدنيا بتبقى زحمه ... ,
وكنا بنرجع البيت....10صباحا........و نبدا يوم تانى فى البيت...اللب و السودانى و الترمس و الحمص...
و لكن الحاجه الجميله اللى كنا نتفق عليها ....اننا مابنحبش الفسيخ.....مافيش اى علاقه من اى نوع...بهذا المنتج اللى اسمه فسيـــــخ...
أولا رحته وحشــــــــــــه....الناس بتاكله ازاى.؟..معرفشى
.حتـــاكـله و هى ساده منخيرها...ولا لابسه كمامه....طعمه وحش ؟...ده اكيد.
..ده سمك نيييييييييييي
.حتقولولى ما هوه السوشى سمك نيييي...حقولكم بكل بساطه ...
.ماهو انا مش باكل السوشى.......
يييياااااااااااى ديموديـــــه
مش على الموضه يعنى...حقولكم مش مهم.........
اما دلوقتي فقـاعدة البيت هيه اللى كسبت على مدار السـنين واثبتت انها الافضل
انا لســه جيالى اخبارية من اختى و حبيبتى مفقوعه
ان فى الجرنال مكتوب فيه ان تسمم الفسيخ يحتاج الى حقنة
تكلفتها 20 الف جنيه
حتقولولى وانتى يعنى مستنبه مفقوعه تقولك الاخبار
حقولكم..اينعم.....انتو نسيتو ان ثقافتى ميكاويه
المهم يعنى الناس اللى بتجرى و تروح تشترى السمك النى ده
و اللى ريحته وحشــــه لازم تكون قاعده على خميره معتبره
وبعدين يعنى و هيه مالها الـرنـجــه
جميله..وحلوه ..وعامله بان دوسولايي
يعنى حمام شمس
وواخده لون برونزى جميل يزغلل العين
ولا طعمها المدخن بياخد العقل.
وياسلام عليها وهى مصاحبه البصل الاخضر و ماسكاه انجاجيه
..وهمه الاتنين ..بيعوموا فى بحر من الزيت و الليمون
..يممممممممممممم
اصلى انا باحبها قوى
خلينا فى المفيد ....اللى ناوى ياكل المنتج الوحش ده اللى ريحته و حششششه
يشــتريـه من مكان موثوق فيــه
قال يعنى الفسخـــــانى مكان موثووووق.
و لو لا قدر الله و حصله حــاجه ميجيش يعيط للبت مفروسه علشان تساعده ب 20 الف جند على رأى الرايق
يجرى بسرعه على اقرب مستشفى علشان يعملوله غسيل معده
اسيبكو بقى علشان اقوم أروح للرنجــه حبيبتى
اصلى مش بحب اسيبها كتير لوحدها مع الواد البصوله
كل سنه و انتم طيبين .....وكل واحد عايز يشم حاجــه يشـمها
اللى عايز يشـم النسيــــم ...................يشـمـــه
و اللى عايز يشـــم .................. بصل يشــــم
و اللى عايز يشــم فســـيخ.......يشـم بـس بعيد عنى
واللى عايز يشــم رنجــه......يشــم و يشـممنى معاه
*************************************************
44 زارونى......و اتفرسوا:
ازيك يا مفروسه يا حبيييبشي عمله ايه أعرفك
فنانه مفروسه صاحبت تاني بلوج علي ايدك الشمال تلات مطارح (يعني تلات مواضيع)سمعت ياختشي انك مفروسه انت كمان قولت اما احط فرستي علي فرستك ونفضفض لبعد مهوا اتلم المتعوس علي خايب الرجا هههههههههههه وانا قاعده في البلوج بتاعي شميت ريحة فسيخ ورنجه كل سنه وانتي طيبه لاقيت معاديه الفسيخ ليه يا حبيبشي يا سلام عليه وهوا عند الفسخاني ملموم عليه الدبان ايه لللللوووز .
ولاقيتك بتحبي الرنجه الله يا سيدي هيا ديه الناس اللي بتفهموالله
أنا سعيده اني عرفت ان فيه مفاريس غيري يعني مش لوحدي واما تبقي فاضيه ابقي زوريني في البلوج بتاعي اهو نسلي بعضينا يلا بقي معطلكيش سلام يا جميل
مفروسه حبيبتى
عازماكي بكره على فسيخ بيتى معتبر ولا ريحه وبتاع زي الفل
ولا حقن بقى ولا بتاع ده بيتى ومش بنعديه على مرحلة التجييف ولا بتاع زي العالم المقرفين التانين لا بس بيطلع مالوش حل
والبيض بقى دي هوايه ياامي لازم اقوم الصبح اعمل حوالي 3 اربع حلل الوان مختلفه والووووووون بقى
وبعدين كركم وكركديه وبنجر وقشر بصل وبقدونس او برسيم حتى اي حاجه خضرا وشاي وربنا يسهل بكره يمكن نلاقي الوان تانيه
وعلى فكره الكركديه بيطلع لون ازرق مش احمر
جربيه حتى .
وكل سنه وانتم طيبين ومش هاخرج انا من البيت عشان ذكرى الحادث الاليم بتاع السنه الى فاتت لما قضيت شم النسيم فى قسم البوليس .
السلام عليكم
كل سنه وانتى طيبه يا مفروسه
بس يرضيكى اول مرة اجى عندكالقيكى بتكرهينى فى حاجه بحبها طيب انا اعمل ايد دلوقتى انا بحبه اوى وبعدين ما الرنجه ساعات بتعمل تسمم برضه بطلى رنجه وانا ابطل فسيخ
بس بجد كلامك زى العسل ومرة تانيه كل سنه وانتى طيبه
سلالالالالالالالام
مفروسه
ايميلي
yokka_art@hotmail.com
yoka_artist2000@yahoo
اتمني نبقي صحاب محتاجه حد دماغه عاليه اوي كده اتكلم معاه اتمني تضيفيني
وبالنسبه لللون البمبي توارد فكري صدفه والله مش اكتر
مستنياكي يا قمر
وربنا يجعل كلامناعلي اقسام البوليس خفيف عليه
سلام
الفسيخ مش وحش اوى انا اينعم مش باحبه بس عادى
وكمان احنا بنجيبه من مكان موثوق فيه
اما الحقنه فعادى ياستى خليها علينا
كل سنة وانتى طيبة
كل سنه وانتى طيبه ياحبيبتى
وانا م عاشقىىىىى الفسيخ
وباذن الله مش نحتاج لايوتها حقن
هههههههههههههه
اهلا مفروسه
------------
نورتينى........والله يااختى حطى معطر و مولعه بخور ...هيه الريحه لسه طالعه
ههههههههه
انا عديت عليكى النهارده ....ربنا يوفقك .....
***********************
صبرنى يارب
--------
كل سنة و انتى طيبه يا حبيبتى ..وولادك طيبين..
اما بالنسبه للقتيل..قصدى الفسيخ.....بألف هنا يارب ....بس و لو فيها رزاله يا اختى ..بتدفنيه فين فى البيت؟بس سيبك انتى باين عليكى شاطره....اما بالنسب للبيض..فنظرا ان البيضه بقت ب 75 قرشا فنويت الون 2بيضه فقط ابيض..واصفر...ومستنياكى تبعتيلى بقية الالوان هههههههه
حروح جرى اشوف واقعة القسم ديه
***************************
حنين القلب
------------
اهلا فسخلا....كل سنه و انتى فسيخه طيبه
انا مش بكرهك لا سمح الله انا اقدر برضه...بالف هنا..(((بس محدش يجيلى يستلف منى تمن الحقنه ههههههههه
*********************
wanna b a physician
--------------------
اهلاااااااا يا دكتور الحمد لله انك جيت ..والنبى بكرة....خليك ستاندباى...لحسن شكل البلوجريه كلهم حيكلو الفسيــــخ.....وامن نفسك من ناحية الحقن......وحسابها عند عبده الرايق....كل سنة وكلكم بالف خير و يبعد عنكم الشر يااااااااااااااااااااااااارب
حبيبتى اجدع بنوته.....
------------------
بالف هنا يارب ..وكل سنه و عليتكوا كلها طيبه و بالف سلام.....اما بالنسبه للمفقود..قصدى للمفسوخ
فبلاش تتقلى...محتاجينك ستاند باى انتى كمان........ويكون معاكى الحقن....وحقها عند عبده الرايق...متبرع بتمنها...لاخواته البلوجاريه....
بعوده الايام
كل سنه وانتي طيبه
الفسيخ فعلا مضر جدا
فيه سم البوتيولينم
مش بخرف دي حقيقه
بالمناسبه الحقنه ام 20000معمله برا وهما عندهم انواع م السم غير اللي عندنا
فيدتها مش منتظره اوي فنسيبنا م الفسيخ اصلا
فعلا الرنجه اصعم والذ الذ الذ الذ
ايه الي انت عاملاه ده
على فكره انا ارفع علم الرنجة معاكي ولنقول معا لا للفسيخ
20 الف
انشالله عنه ما اتاكل .. ليه .. يعني طعمة وحش وتسمم والادهى والاكثر مصيبه
20 الف جنيه
مالها الرنجه .. حبه خل وزيت مجهول المصدر ولمونه وعيش وحاجة بسيطه كده منها تعمل جو ..
قال فسيخ قال..
انا عارف بتجيبوا الحجات ديه منين؟؟
المرادي انا الي مفروس مش انتي
كل سنه وانتى طيبه
وعقبال العيد الكبير
وما تكتريش فى الاكل
تحيات بهيه
دكتور بهدوء
------------
ازيك يا دكتور ..نورتنا و الله ...و انت طيب و بصحه يا رب..........هوه سم البوتيولينم ...موجود فى الفسيخ بتاعنا ...ده الفسيخ بتاع مصر جبار ..و متحوقش فيه الحقنه اللى معموله بره....خلينا فى الرنجه ...حبعتلك طبق حالا
ahmed mubarak
--------------
ابعتلى العيش و انا ابعتلك طبق رنجه معتبر
غنى يا بهيه
---------
وانت طيب ...وما تنساش اللحمه فى العيد الكبير
تحياتي
اول زيارة لمدونة حضرتك.
أتضامن مع حضرتك في عدم اكل الفسيخ..
و ربنا يستر علي من سيأكله.
و زمان كان يوجد مساحات و حدائق نظيفة تخرج اليها الناس لتقضي بعض
الوقت و يأكلون.
الأن...الخروج مغامرة...لان المواصلات زحام....المرور يكاد يكون بسرعة السلحفاة...الحدائق مكتظة و بها من النفايات ما تنوء به...
احب الرنجة بزيت الزيتون و البصل الاخضر و الفلفل الاخضر...و يا حبذا ان
كانت مجهزة و موجودة قبل شم النسيم باسبوع...جربوا معها الطحينة...
تحياتي و تقديري...و اوقاتا سعيدة للجميع ان شاء الله.
هههههههه انا بحب الفسيخ ومحدش له فيه بقى انتى مالك انا بقولك اهوووو وبأكله بالشوكه والسكينه خخخخخخخ
ماما هى بتعمله فى البيت يعنى ببقي ضمناه وكمان جابت ليه عشره بيضه ههههههه وانا بلونهم بس هما صغيرين بلدي يعني علشان كده هاكلهم كلهم لوحدياتى وانتى لااااااا ههههههه
انما الرنجه رعملها على النار واحط عليها طحينه وطماطم وزيت بس مانتى حبيبتى بتعملها تيجى تاكلى فسيخ بقى نيهاهاهاهاها
الربان
--------
ده انت بتحب الرنجه زي
بالطحينه رائعه
بس لو قبل شم النسيم ...مش حتلاقى حاجه حتفضا هههههههه ممكن كل يوم شويه عبل مايجى شم النسيم باكون خلصتها.هههههههههه
ابعتلى طبق من اللى وضبتها ديه لو لسه فاضل يعنى
appy
-----
اوعى تكونى جايه و معاكى المصورين
الواحد مش عامل حسابه هههههههههههه
ما طبعا بعد ما طلعنا فى التلفزيون عاوزه تاكلى الفسيخ يإيه...لازم بالشوكه و السكينه...ده و البيض كمان..........لا ياختى انا حاكل الرنجه لوحدى...لو ماظهرتش تانى لغاية بكره ابقوا دوروا عليا
ماتسيبي الرنجة لواحدها مع البصل جايز يخلفولكوا رنجة مبصللة
كل سنة وأنتي مشمشمة للنسيم العليل
اوك
وانا موافق
اللحمه عليه فى العيد الكبير
انا ضيفتك فى ابناء بهيه
تحيات بهيه
حسبنا الله و نعم الوكيل
---------------------
حلوه حكاية رنجه مبصله ديه
نورتينى
**************************
عنى يا بهيه
---------
و اللى يرجع فى كلامه؟
كل شم نسيم و انتى طيبة
على فكرة انا كمان مش بحب الفسيخ خااالص و اقصى انجاز انى ممكن آكل معاهم رنجة
بس الترمس و الحمص دة لاااااازم طبعا
و اكيد تلوين البيض
:D
شكرا
على
النصائح
الغذائيه
فعلا
عندك
حق
انا كمان
مبحبش
السوشى
ولا
الفسيخ
أحلى حاجة في مصر رغم المشاكل اللي بالطن والهم اللي من كتره مبقاش في أي وحدة وزن تحسبه...، بالرغم من كل ده، عندنا أعياد بالجملة، فيها بنحتفل، كل على طريقته... الغريبة في شم النسيم، إنه يوم الروايح... إشي فسيخ وإشي سردين وإشي بصل... الله يكون في عون الجناين
yuki
-----
هوه ده الكلام رنجه ترمس و حمص......جميل جدااااااااااااا
*********************
سنوهى
-------
ماجتش بدرى ليه....كنت لحقت شويه رنجه..اختك انقدت عليها ......و شكلها كده كترت
**************************
هنا و هناك
***********
الجناين انت حتقولى على الجناين ... النهارده كانت على بعضها كل عيله شدت ملاية السرير و فرشتها ....و قعدت....ان جيت للحق شكلهم كان جميل ...بس السلوك هوه اللى مش جميل
و شمشموا البصل و النسيم و العيال لعبت.......كل سنه و انت طيب ...بالمناسبه انت هنا اليومين دول و لا هناك
طيب انا عايزة اكل معاكى
اعمل اية انا دلوقتى
كل سنة وانتى طيبة
ويارب السنة الجاية نشم كلنا مع بعض
هههههههه
تحياتى
face moon
-----------
ان شاء الله.. و اجبلك طبق رنجه محوج بنفسى
يا حبيبي سوو ذكري وفاه والدته النهارده فعلشان كده مضايق
انا خرجت وشميت النسيم
تيررررا رااااا
لاء بجد اليوم كان جميل واكتر من رائع
بس من غير بيض وفسيخ ورنجة
كل سنة وانتى جميلة
appy
------
علم يا فندم
************************
قطة الصحراء
-----------
و انا كمان خرجت....واكيد من غير فسيخ ...و طبعا من غير رنجه.ليه بقى...لانى خلصتها قبلها بيوم ههههههه
يا سلام
إنتى بتتكلمى عن الرنجة ولا كإنك بتتكلمى عن المكرونة بالبشاميل
والله الواد ريقه جرى .. إعملى حسابى معاكى ربنا يخليكى
بس على فكرة
أنا لسه وكلة 3 فسيخات .. أصلى بحبه موت
متقلقيش هبقى أغلس سنانى وأحط برفان قبل ما ناكل الرنجة
إستنينى بقى
وعنيلى شوية رنجة
ههههههه
طيب يا مفروسة انا باكله من وانا عندى 6شهورررررررر
يبقى ادفع كام للحقن
هههههههههههههههه
تحياتى يا ستى
المهم كل سنه وانت طيب يادفعه
تحيــاتى
المصــــــرى
maisha
-------
3فسيخاااات و عاوزه تيجى اااااان اااااااان اهلا وسهلا و المدونه تنور يافندم بس و النبى على ايدك اليمين و انتى داخله حتلاقى زجاجة ديتول استحمى بيها و بعدين خشى.............
لعلها خير
----------
كده اسهل
اللهم صلى على النبى و اتفطمت ولا لسه؟
المصرى
-------
و انت طيب يا فندم
السلام عليكم
طبعا أنا مجتش على ريحة الفسيخ ولا الرنجة لأنى استحالة آكل فسيخ ونادرا لما آكل رنجة أنا جاية على ريحة الانسانية كلها وعلى ذوقك وكلامك الجميل اللى كتبتيه وعظيم امتنانى لك
وردى على سؤالك بالنسبة للسن رديت هناك لكن أنا أكبر منك رغم انى متوسطة السن اللى كتبتيها تعرفى بيها نفسك مش محددة لكن أكيد أوائل التلاتينات يعنى أنا أكبر منك ,,ربنا يبارك فى عمرك ويمتعك بنعيم الدنيا وخير جزاء الأخرة
فيه اقتراح للحكومة انها للتخلص من الشعب تطرح كمية فسيخ فاسد تكفى الجمهورية وتسحب الحقن ,,مش فكرة برضه
بس للآسف اللى مبيحبش الفسيخ زيى حيفلت منهم
تحياتى وامتنانى
مجداويه
-------
هييييييييييييييييييييه وانا كمان فلت...الحمد لله
بأدعيلك من كل قلبي أن ربنا يتوب عليكي من الفسيخ وأعوانه
اهلا يا حبيبتى وشك و لا وش القمر و ختامه مسك ان شاء الله
انا و الحمد لله انا ربنا تايب عي من الفسيخ....لكن لو تقصدى ان الرنجه اعوانه....انا مش معاكى خالص ..ديه الرنجه جمييييييييييييييييله
كل سنة وانتى طيبه وهنشم اية بالضبط
قوليلى يا مفعوصه.. قصدى يا مفروسه
هو شم النسيم دا هايبقى امتى....
الكمنت جاي متأخر شويتين بس معلش انا والله قريت الموضوع من زمان بس مكتبتش كمنت ونفسي افتكر انا ايه اللي حصل وخلاني مكتبش كمنت
والله مش فاكر
المهم يعني انا بكره الفسيخ وممكن اسيب البيت من اول اليوم لاخره وارجع على الفجر كده لو اكتشفت انهم قامو باكل تلك الزباله المدعوه رنجه ومش بحب البيض اوي كمان
يعني من الاخر مش بشم النسيم
ههههههههههههههه
بوست دمه خفيف يامفروسه
رئيسة حزب الاحلام
----------------
يا رايقه..ايه ياماما الروقان اللى انتى فيه ده
شمى اى حاجه تعجبك ..ان شالله ورده
يافرسااااااااااااانى على روقانك ده
*******************
ابوعلى
-------
ازيك كده و ازى على
قوله مفعوصه بتسلم عليك.....شم النسيم ده حيكون 2009
*************************
wael
-----
صباح الخير انت صحيت؟
انت شميت ايه باظبط يوم شم النسيم
اكيد بصل ..خلاك تنام للنهارده
وعملت طيب انك ما سبتش الكمنت ده من زمان ....كنت زعلت منك....بقى الرنجه زباله.....
على العموم انا خلصتها خلاص فقول بقى براحتك
Post a Comment