ماليش مزاج

هوه ليه انا حاسة انى ماليش مزاج؟؟؟

اه ماليش مزاج خااالص
ليه الكلمة ديه على لسانى اليومين دول؟
ياتري ديه آخرة الفرسة اللى ماليهاش آخر
ولا ده بداية إكتئاب
تعالى نخرج يا مفروسة
ماليش مزاج
كلمى اصحابك يا مفروسة
ماليش مزاج
تاكلى ايس كريم يا مفروسة؟
ماليش مزاج
تروحي سينما يامفروسة؟
ماليش مزاج
اتفرجي على فيلم فى روتانا سينما يا مفروسة
ماليش مزاج

ايه الحكاية؟؟؟
حاولت انى اخرج من المود الكئيب ده
بس لاقيت نفسي ماليش مزاج اصلا انى اخرج منه
ياتري ده من كتر اللى قريته و بقراه عن الحوادث اللى بتحصل اليومين دول؟
ولا من الاحداث العالمية اللى بحس فيها ان الناس مش بتفكر ولا بتشغل مخها و لا بتحسبها صح علشان تعيش صح؟
ولا يمكن علشان كل حاجة مابقاش ليها طعم؟
اه و الله حتى الأكل ما بقاش ليه طعم
ده الايس كريم اللى بعشقه ما بقاش ليه طعم
و لو مسكت كتاب و أقول اقري يمكن القصص تعيشك فى احداثها و تخرجي من المود ده
الاقى نفسي ماليش مزاج
طيب امسكى المصحف و اتوضي و صليلك ركعتين
بعمل كده بس برضه ماليش مزاج
اضغط على نفسي و اخرج
الاقى الناس ماشية على رجليها بتخبط فى بعضها
مش طايقة نفسها و لا طايقه غيرها و عاوزة تتخانق و خلاص
الاقى نفسي ارجع البيت و اقول قعدة البيت احسن
اروح السوبر ماركت ابعزقلى قرشين يمكن افرفش
ما هو الصرف بالنسبة للسات بيعدل المزاج
الاقى الناس من حواليا ماشية متنحة
و اللى ماشي بيحط حاجات فى عربية السوبر ماركت
خطوتين و طلع الحاجه و ركنها فى مكان تاني
كأنه مالوش مزاج
ادخل محل الطرح و الايشاربات
اقول اشتري حاجة يمكن افرفش
الاقيني و الاقى الستات من حواليا مسكنا كل البضاعة و خرجنا من غير شرا
كأننا كلنا مالناش مزاج
ده حتى الكناسين فى الشارع
ركزت معاهم شوية
لاقيتهم بيكنسوا مكان و يكوموا الزبالة فى ركن
و يعدى واحد منهم اللى بيلم بقا
الاقيه يبص للكومه كده و يمشي
كأنه مالوش مزاج يشيلها
ده حتى البواب اللى بينضف العربيات الصبح بدري
الاقيه بينضف جزء وراح باصص للعربية و يمشي يبتدى فى غيرها من غير ما يخلصها
كأنه مالوش مزاج
هوه فيه ايه؟؟؟
حد عارف؟؟؟

44 زارونى......و اتفرسوا:

بت خيخة وأي كلام said...

ايوة انا عارفة فيه ايه
انا عارفة سر
الحالة اللى عندك يا مفروسة
واللى عند كل الناس

بس
.............
بس
.................
بس
..............
بس انا ماليش مزاج اقوله

نيهاهاهاهاهاهاهاهاهاع


سلام
اختك خيخة

AhMeD RaDy said...

امممممممممممممممممم

بصى يا مفروس .. بكل الارتاحية الضميرية النابعة من اللاضمير الداخلى

احب اقولك .. البلد كلها بقى مالهاش مزاج .. ودا بناءا على مايحدث من اننا للاسف فقدنا اعز ما نملك

ما تفهمنيش غلط .. اقصد الابتسامة

خلاص اهم شئ فى حياتنا ...

بيحتضر .. يارب نلحق ننقذه

AhMeD RaDy said...
This comment has been removed by the author.
Ahmed Talk said...

علشان ناسين ربنا ومركزين أواي في بكرة

احساس طفلة محبة للرومانسية بس واقعية said...

تؤتؤتؤتؤتؤ دا كسل بقى
انتى حالتك ممكن تكون زهق او ملل لان كل اللى قلتي علية حاجات ترفيهية

لكن الناس اللى مش بتأدى شغلها دا كسل او برضو زهق وملل بس دا
مش هينفع مهو لو كل واحد زهق وكان ملوش مزاج مش هنعمل حاجة والوضع
هيزداد سوء

بتهيألى لو اخدتى اجازة ترفيهية كاملة وعملتى حاجة جديدة حتى لو اكلتى ايس كريم نوع مختلف دا هيفيدك كتير
يمكن بس محتاجة تغيرى

ربنا يخفف عنك ويبقى عندك مزاج لكل حاجة

تقبلى مرورى

maiosha said...

كان نفسى اسيب تعليق والله

بس مليش مزاج

maiosha said...

ههههههههههههههه
لأ بجد يا مفروسة
أنا بتجيلى الحالة دى كتير بس بتبقى ايام الإمتحانات

إنتى عندك إمتحانات ولا إيه؟؟

مش عارفة بصراحة وصف الحالة دى إيه غير إنها زهق وملل وقرف عام
حتى أنا وشلة الأنس بنروح الكلية نفضل قاعدين على السلم وخلاص ملناش مزاج نعمل أى حاجة فى الدنيا

إلا الأكل طبعا
هههههههههههههههه

كله كوم والأكل كوم تانى

ههههههههههههههههههه

ربنا يعديها وعلى خير

وروقى يا مفروستى وكبرى دماغك

ولو سمحتى متقوليش مليش مزاج اكبر دماغى

ههههههههههههههههه

سلام

MǿиY El-Shreef said...

بصي يا اختي

بيتهيألي كل ده من الروتين

نفس الحاجه نفس الطعم نفس المحلات

كللللللللله شبه بعضه

حاولي تغيري شويه ف كل حاجه

وانتي المزاج هيرجعلك تاني

موناليزا said...

واضح ان الشيطان عامل شغل جامدومش عايز حد يفوق حتى للعبادة
بصى قومى اغسلى وشك بشوية مية ساقعة وماتستسلميش للحالة دى

ســـهــــر said...

بصى يا مفروستى الحاله دى عادية جدا مش عرضيه دى بتيجى للواحد قولى خمستاشر مرة فى ال عشر تيام كده

مش هقولك اخرجى فرفشى غيرى جو والكلام التقليدى ده لان الحالة دى بتاخد وقتها وتنقطنا على اد متقدر وتروح تغيب شوية عشان تيجى تانى
هههههههههه
انا هفرسك شكلى كدة

بس بتمنا انك تخرجى من الحالة اللامزاجية دى بسرعه

تحياتى يا قمرايتى انا

فاتيما said...

متهيألى حالة زهق
و هتعدى لوحدها يا فروستى
إن شاء الله يا حبيبتى تروح

نعكشة said...

بتحصلي كتير
ومن كتر منا مبعرفش اخرج منها

بقيت مبعملي حاجة فعلا لما بتيجي


بس اعتقد بما انها حالة جديدة تصيبك
فا فيه أمل

يا رب يفرحك و يرضيكي يا مفروسة
و يصلح حالك كدة

قولي آمين

سلام عليكِ

صيدلانيه طالعه نازله said...

طب و الله حسيت بيكى اما كلمتك فى التليفون بس انا قلت زعلت منى انى جيت اكتوبر و مش كلمتها اتارى دى حالتك من قبلها
ظلمتك يا مفروسه و ملقيتش كلام اقوله رحت قفلت
بصى يا دودو الحاله عامه و كلنا مالناش مزاج من غير سبب محدد ربنا يهدينا جميعا و يبعتلنا مزاج مضبوط

حاسوباتيه said...

والله مافيش مزاج ولا نفس ولا اي حاجه اصلا دي حاله عندي بس مزمنه وليها اسبابها يلا الحمد لله وربنا يهدينا

لو بطـلـنا نـحـب نـمـووووت said...

مرحبا مفروسة
بصراحة مدونتك لذيذة جدا ورائعة
بس بصراحة بقي
ليه ملكيش مزاج
اعترفى يلا
بينى وبينك اللى بيحصل الايام دى يسد النفس
بس تعالى نحب نفسنا شوية
لا شويتين
كبرى دماغك يا ست مفروسة
محدش واخد منها حاجة

تقبلى تحياتى

Jana said...

ايوة صحيح
انا ملاحظة برده انك سايبة مزرعتك على الفيس ومطنشاها
عمر ابنى قالى
برده مالكيش مزاج!!؟
:))))

حاجات جوايا said...

ومين سمعك

مفيش حاجة فى الدنيا ليها طعم
كل حاجة بقينا بنعملها بآليه وروتينية من غير حماس ولا مزاج

مش لوحدك اكيد اللى ملكيش مزاج
:(


عجبنى اوى التعليق ده

Ahmed Talk said...
علشان ناسين ربنا ومركزين أواي في بكرة



فعلا دى الحقيقة للاسف
مشاكل الحياة واخدانا خالص
ربنا يصلح حالنا وحال المسلمين

عاشقه وغلبانه said...

انا كان عندي الحاله دي من كام يوم وقلبت معايا باكتئاب لحد دلوقتي

انا رديت علي البوست رغم اني والله ماليا مزاج ولا عايزه اكتب
حاله
زهق
قرف
خنقه
اكتئاب
مزاج تحت الصفر

اعتقد انه من الجو الحر والرطوبه العاليه..((

اصحى يا مصر : اسلام ديو said...

طبعاً كلامك جميييييييل

ربنا يصبرك هههه
الكل عاد مفروس ليه بس
ههههههههههه

المدونةجميلة جداً والبوست هااايل
تحياتى

شلاطة said...

كانت زمان تيته الله يرحمها تقول ان دا من الجو
من الجو ازاي مش عارف بس كانت بتقول ان دا عشان الواحد يوم شم النسيم مصحاش بدري
بس طبعا طبعا طبعا في ظل الظروف الملعلعة اللي احنا فيها دي ولا صحيان بدري ولا متاخر بيفرق
استهدي انت بالله كده وصلي عالنبي وهتلاقي الحكايه عدت وقولي ورايا وربنا يفك كربك ان شاء الله
لا اله الا الله الحليم العظيم لا اله الا الله رب العرش العظيم لا اله الاالله رب السموات ورب الارض ورب العرش الكريم
شرفيني في مدونتي الجديدة
http://nakadxnakad.blogspot.com/
هي مش نكدية على فكرة بس الاسم اخترته في وقت غلط هههههه

soly88 said...

لا دى شوطه وماشيه مع المدونين
انا لسه كاتب عن الموضوع ده من يومين
ربنا يسهل هيه هتفك لوحدها
ما تكليش حاجه لا بسمنه ولا زيت

Foxology said...

كلنا كدة

الأسباب كتيرة لكن النتيجة واحدة

ربنا يعديها على خير

تحياتى :)

حسن ارابيسك said...

الحقيقة مش عارف
ده فيروس ولا ايه
كنت ناوي اعلق على البوست ده لكن بعد ماقرأته
تراجعت وحسيت اني ماليش مزاج
تحياتي
حسن ارابيسك

wanna b a physician said...

انا مليش دعوه اصلى مليش مزاج ارد ههههههههههههههههه

هو بجد ده المووود العام فعلا مفيش مزاج
وعشان كدا مليش مزاج اكمل تعليقى


سلام

جنّي said...

السلام عليكم

من عاصروا نكسة 67 ذكروا نفس الحالة التي صورتيها في بالبوست والتي يمر بها الكل تقريبا الآن .. الواضح اننا نعيش في ظل الحزب الفاسد وحكوماته الغير رشيدة في حالة نكسة .. نحتاج الى قيادة جديدة تتقي الله لتخرجنا من النكسة ..

well said...

كشرى وبلاش تبتسمى
البسى نضارة سودا
لو سمعتى نكتة ما تضحكيش
لو حد كلمك قاطعى كلامه وماتسمعيش
بصى لنص الكباية الفاضى وادلئى النص المليان
سعتها بس هتكونى مفروسة ومالكيش مزاج وهتشوفى الناس كلها مالهاش مزاج
ارجعى تانى ابتسمى
البسى نضارة الوان
اضحكى قولى انا سعيدة
حولى تسمعى اللى حواليكى
الناس فى الشارع والعصافير عالشجر
شوفى الورد لما يفتح
ولما الليل يجى شوفى القمر
سعتها بس هتكونى ...معرفش اسمك اى ..بس مش هتبقى مفروسة
وهتبقى صحبة مزاج
وابقى ادعيلى
وربنا يصلح حالك وحال المسلمين جميعا

أحمد عاطف said...

عايزة تعرفي سر حالة ماليش مزاج

الحالة المصاحبة لكل المصريين جوه مصر وبره مصر

حالة اللامبالاة

حالة التبلد الشعوري

اسألي حكومة نظيف

اللي نضف ادمغة الناس من كل حاجه وخلاهم زيهم زي تنابلة السلطان

قلب ارهقته الاحلام said...

اممممممم

كلنا مالناش مزاج لاي حاجه مش انتي بس يامفروسة

عارفه قريت البوست وعاوزة ارد عليه بس ماليش مزاج :)

مش عارفه ايه الملل ال احنا فيه ده

يمكن محتاجين حاجه جديدة ؟؟

مش عارفه

تحياتي

Israa El-sakka said...

و أنا كمان والله ماليش مزاج عارفة ليه أو مش عارفة ليه الحال من بعضه يا مفروسة يا أختي معرفش إيه السبب الناس بقت كئيبة يا ريت لو حد عارف السبب أو أنت عرفتي السبب تبقي تقلولي

رئـــــيسـة حزب الأحلام said...

والله الموضوع خرج من ادينا يامفروسه راح ادينا التانيه
حالة ماليش مزاج دى الصراحة عندى من زمان بس هنعمل ايه حياة ولازم تتعاش رضينا ام ابينا بمزاج او من غير مزاج
تحياتى لكى
بس لعلمك ممكن الحر

قلب ينبض بالحب said...

حاجة كده طارية في الجو يتعدي الكل ومخليه في الحالة دي متخفيش مش انفلونزا الخنازير دي حالة بتسيطر على الجميع ربنا يعافينا يارب ونخلص منهادمتي بكل الخير يارب

micheal said...

أخيرا..وصلت لمدونتك
:)
واضح أن اللينك كان اتغير
لأ..عاوزك تطلعي من المود ده وبسرعة
طب أقولك حاجة تعالي عندي البلوج حتلاقي بوست جديد من نوعه إحتفالا بيوم 4 مايو..يمكن ده ينفع معاكي
:))
تحياتي

:: أبو أدهم :: said...

يا ريت لو تسمح محتاج من وقتك خمس دقايق عندى , فى بوست عايزك تقراه الرابط هنا, شكرا

:: أبو أدهم :: said...

تصدقى مخدتش بالى من قول رأيك من غير ما تفرسنى دى

لا يبقى خلاص بلاش تيجى عندى

سورى

norahaty said...

بيقولوا والعلم عند
الله سبحانه وتعالى
ان دى حالة بتيجى
مع تغير الفصول وبالاكتر
الخريف والربيع وبتسبب الزهق
والملل اللى انتى بتحسى بيهم دول ضيف
اليهم الاحباطات اللى مالية حياتنا
وتسابق الجرايد والمجلات والقنوات الفضائية فى نشر الاخبار (الكئيبة
اللى بتجيب أكتئاب)بس خلاص
كفاية عليكى كده النهاردة
انتى مش ناقصة .ماتتفرجيش على التلفزيون وما تقريش جرايد
وما تسمعيش اخبار.

norahaty said...

ايه ده ؟
انتى بقى لك كتير
ما كتبتيش حاجة ؟
لأ كفاية كده ارجعى بقى
على رأى واحدة عودى ياهاميس:)

MaNoO said...

مش عارف بس نتى حسستينى انى مليش مزاج
لكن عارفة انا من رأيى تطنشى الحالة دى طنشى انك ملكيش مزاج اه والله عادى فكرى بدماغ اللى ليها مزاج حتى لو ملهاش مزاج اتصرفى بطريقة مختلفة يمكن الحالة دى تكون مرحلة انتقالية مثلا تقدرى تغيرى فيها حاجة فى شخصيتك مثلا او تقدرى تعملى حاجة جديدة فى حياتك
بس برده مش عارف فهمتى حاجة من كلامى لا طبعا ولا انا برده
يبقى انا برده مليش مزاج
تقبلى تحياتى واتمنى التواصل بالمدونات

شيمو said...

الحمدله انا كده اطمنت على نفسى...
انا كنت فاكره ان الحاله دى عندى لوحدى فوجئت لقيتها عندك وعند كتيرررررررر
يكونش فى فيرس فى الهوا...
بس عارفه عاوزه اغير المود ده بس مليش مزاج...
بقولك ايه شوفلنا حل والله يخليكو بلاش موضوع تغيير الجو ونطلع فى رحلات والكلام ده علشان مش بيأأأأأأأأأأأأأأأثر

اقولك انا هقوم انام ولا اقولك مليش مزاج هسهر شويه

فاتيما said...

الله
هوه لسه برضو المزاج مش رايق ؟
طب ربنا يروقلك الاحوال
يا رب
بس كدا

Mohamed Hamdy said...

احيانا من كتر الملل واحساسنا اننا مش قادرين نغير ابسط الحاجات فى دنيتنا بيجيلنا شعور "مليش مزاج" . أحيانا بحس ان الملل أخطر من الفشل . لان الفاشل جرب ومعرفش ومصيره يعرف . اما اللى ملوش مزاج؟ مصيره يبقا مفروس

:)


تحياتى ليكى وابقى زورى مدونتى

صيدلانيه طالعه نازله said...

مفروستى يا قمر مالك بس ايه اللى مزعلك
على العموم ربنا يطمنك و يطمنا عليكى

dreem said...

سلامو عليكو
انا الحالة دى بتكون عندى كتير ولو نكشتى جواكى هتعرفى هى من ايه ولو انى اظن انك عارفة وماسكة اللى معكننك !
مش هقولى معلش ولا ما تضايقيش نفسك بس هقولك حاولى ما تركزيش فى قلة المزاج والقريفة واعملى نفسك مش واخدة بالك وهى هتمشى لوحدها
واهو كله بيعدى
ربنا معاكى
سلام

sad_romantic said...

جميله اوي

واسلوبها سلس وسهل

لاسع افندى said...

حتى انا ماليش مزاج اعلق
بس الموضوع مغرى
وكلنا حاسين باللى جواكى
كلنا مفروسين



تقبلوا تحياتى ومرورى