اللى يعيش يا ما يشوف


اه و الله فعلا اللى يعيش ياما يشوف فى الزمن العجيب اللى احنا فيه ده

انا جاية النهاردة افرغ شحنة الفرسة اللى باين عليها مالاهاش حل معايا

الأول حد شاف البيت بيتك امبارح؟؟؟؟

المهم اللى ماشافشي بقا ححكيلة الوكسة اللى وصلنالها .......بجد حاجة تفرس

المهم بقا محمود سعد الله يكرمة كان عامل لقاء مع مجموعة من الشباب اللى زي الورد

شباب الله ينور....بيعكسلنا ما وصل اليه شباب مصر الجميل ولاد و بنات

حكايتهم ايه بقا ؟

بقا بالصلاة على النبي الشباب دول مصنفين نفسهم على حسب الموسيقى اللى بيسمعوها

يعنى اللى بيسمع الموسيقى اللى بتبقى غطيان حلل بتخبط فى بعضها يبقى شباب ميتال

و اللى بيسمع مش عارف ايه يبقى شباب ايموس

حاجة تفرس بجد

يعنى بكرة اللى بيسمع شعبان عبد الرحيم حيبقى اسمه لولا

واللى حيسمع عبد الحليم يبقى ليمو

و اللى يسمع موسيقى كلاسيكية يبقى اسمه سيكو

يادى النيلة

المهم ان الشباب دول قعدوا يجي نص ساعة كاملة مش عارفين يتكلموا ولا عارفين يعرَفوا يعنى ايه اللمسمى العبيط ده

اللى فهمته من التقرير ان الشباب دول بيجتمعوا على سماع موسيقى صاخبة جداااا

و الموسيقى ديه بتخليهم هايبر و تخليهم يرقصوا و يأتون بحركات جسدية زي الزار

و طبعا فيه منهم من يفرفش عن نفسه بكاس ويسكى ولا سيجارة محشية

و فيه منهم من يثار جنسيا و ياتي بما حرمه الله

و منهم بقا اللى بيشرط نفسه بالموس

قال طقوس قال

و طبعا لازم يكونوا متخنفسين نسبة اللى الخنفسة البريئة من المتشبهين بإسمها

و يلبس اسود فى اسود....قال شياكة

ولا التيشرتات اللى عليها جماجم و هبل كده

ده طبعا غير البنطلونات المدلدلة و مبينة البوكسر لزوم الشياكة

ايه ده؟؟؟؟؟

ايه اللى بيحصل؟؟؟؟؟

المهم لما الشباب دول اتسألوا انتو بتصاحبوا بعض على اي اساس

الرد كان: اشوفه شكله حلو اصاحبه

يالهوىىىىىىىىىىى

هيه الصداقة بقت بالشكل اليومين دول؟؟؟؟

و الاوكس بقا انه كمل جملته ب:

المرء على دين خليلة

ايوووووووووووووه اسكندراني من هنا للأسكندرية

شوفتوا الوكسة

فيه ايه يا شباب مصر فيه ايه؟؟؟؟

ده انا عندي الولاد دول يلعبوا الكورة الشراب فى الشارع احسن

ولا يقعدوا يتنيلوا يلعبوا بلاي ستيشن فى البيت احسنين

انا بس مزبهلة من الأهل

همه فين من كل ده؟؟؟

انا حفترض مجازا انهم مش يعرفوا ولادهم بيعملوا ايه علشان مش اتنقط و تجيلي فرسة قاضية

للدرجة ديه الشباب مش بيشغل مخه؟؟؟؟؟ المخ ده منظر؟؟؟؟حشو جمجمة زي الرز فى المحشي؟؟؟؟؟

و الأدهى بقا اللى شوفتهم فى البرنامج طلبة جامعة...و فيه منهم مربيين دقونهم

لأ بجد حد يقولى فيه ايه؟؟؟؟؟

مش عاوزة اسمع بطالة...لأن دول طلبة جامعة يعنى بيذاكروا المفروض

ولا حد يقولى فراغ و كتاكيت

ما كلنا بتيجي علينا فترات من الاحساس بالفراغ مش عارفين عاوزين نعمل ايه

او مالناش مزاج نعمل حاجة

بس مش للدرجة ديه

انا بقول ده تقليد اعمي

و لما اقولكم ان مصر ارض خصبة لكل البلاوي اللى عاوزة تيجي من برة ماحدش يقولى لأ

الشباب دول بيقلدوا الغرب بس للأسف بيقلدوا الاقلية البايظة اللى متلطعة فى الشوارع

ليه بنقلد الوحش بدون تفكير؟؟؟؟ ليه؟؟؟؟؟

صحيح ان الواحد ساعات علشان مش يفكر او يسمح للأفكار المحبطة انها تسيطر عليه بيحاول يسمع موسيقى صاخبة بس بعد شوية الواحد بيصدع

بس مش لدرجة انى اعور نفسي و اتفرج على روحي بخر دم يعنى

ولا اشوه جسمى

انا فاكرة زمان لما كنا صغيرين فى سن الشباب الجميل ده و يتعور

و يقعد يلعب فى قشرة التعويرة لما تنشف و يقشرها

اهلى ربنا يكرمهم كانو بيخوفوني بإنها حتسيب علامه

كنت اخاف بجد لاحسن يبقى شكل الواحد يبقى وحش

ايه يا بشر؟؟؟ ايه يا شباب

مخكم مش بتشغلوه ليه؟؟؟؟ ده لو مش اشتغل يصدى

لأ يا جماعة بجد

انا مفروسة جداااا و فيه كلام كتير فى دماغي و مش عارفة اتكلمه كله

و إلا البنت اللى منضمة ليهم و ده فيه كتير زيها

طيب الولاد حنقول انهم لما بيكبروا الاهل بتفقد السيطرة عليهم شوية

طيب و البنات؟؟؟؟؟؟؟

الأهل فين؟؟؟؟

ده حتى لو كان فيه تحرر

اليومين دول من اللى الواحد بيسمعه من بلاوي

تخليه يخاف على البنات و الاولاد انا مفروسة جدااااا

و شكلى حدخل فى دور اكتئاب من اللى بيحصل

ومن قلة الحيلة اللى بتصيبني

عاوزة اوعيهم عاوزة انصحهم

بس احنا فى زمن اللى ينصحك يبقى عدو

و اللى يوعيك يبقى عاوزك مش احسن منه

مش عارفة انا مفروسة اوي جدااا خالص خالص

سامحوني بس بجد انا مخنوقة جدااا من اللى بيحصل

الحمد لله انى مش عندى اولاد الحمد لله

ربنا رحيم بيا برضه

اسيبكم تتفرسوا بقا براحتكم

33 زارونى......و اتفرسوا:

Empress appy said...

ما هما دول امل الامه يا حبيبتى
شويه منفسنين
وشويه مهايبرين
وشويه ضايعين بجد والله بدات اقول الناس الكويسه انقرضت انا خلاص على اخرى

صبرني يارب said...

ما شوفتش الحلقه دي يا مفروسه

بس عااااااادي مش دول بس

بصي فى الشارع فى وشوش العيال وانتى تعرفي ان الموضوع اكبر من كونه شويه عيال ولا شوية موسيقى

بلاش تكتئبي يا اختي والنبى

هاتي بوسه عشان انتى وحشاااااااني موت يا وحشه

Unknown said...

ومين سمعك الواحد من اول ما سمع عن العيال دي وهو مفروس فرسة وأكثر شئ فرسنا اﻷعلام اللي عمال يجيبهم كل شوية

الشعب لابد له من حكومه تشكمه said...

الايمو مش بس بتجمعهم ميوزيك بيسمعوها.الايمو دول اكبر من كده بكتير ودول موجودين من فتره طويله على الفيس بوك بس مظهروش للعلن غير من قريب

الايمو دول شباب حاسس انه تايه ووحيد وعاوز يعبر عن مشاعره وبيحسوا باكتئاب فيعملوا ايه يجمعوا بعض فى جروب كبير وبيتقابلوا ومنهم اللى بيجرح نفسه بالموس زى ماقلتى وال ايه بيقول:
ان الالم الجسمانى يغطى على الالم النفسى

والايمو دول موجودين على مستوى العالم ومعروفين بالشذوذ لكن شباب مصر قالوا احنا اخدنا منهم كل حاجه الا الشذوذ..
فاكرين انهم كده فالحين اوى..

من الاخر هم شباب مظلوم يصعب عليكى والله مش يفرسك,,

شباب تايه فين الاهل وسايبينهم يحسوا دا كله وهم فى مرحله المراهقه..

واللى يفرسك ان فيهم بنات ودى لوحدها مصيبه كبيره ان الاهل ميعرفوش حاجه عن بناتهم..

عارفه انا متزعلتش من الشبابدول واللى عملوه انا زعلت عليهم بجد

ســـهــــر said...

شوفى يا مفروستى انا شوفت شوية شباب منهم مع وائل الابراشى وبعد مطلعوا فى البرنامج جيرانهم مسكوهم ضربوهم وعدموهم العافية ههههه
وجبهم الابراشى تانى وهما بيقولوا انهم بعدوا عن الارف دة وبقوا ناس طبيعين

لكن المشكلة فين انتى عارفة ؟
ممكن جدا يكون فى شباب ساذج وما اكترهم لما لااعلام بيجيب شوية العيال المؤرفة دى ممكن جدا تلاقى 100 شاب بيقلدهم على اللى شافة مش اكتر من باب التغيير

وفى الاخر ربنا يعافينا ويهديهم يارب

جنّي said...

السلام عليكم

والله فرستينا معاكي بجد ..
وايه الداعي علشان الابله محمود سعد يستضيفهم في برنامج بيتصرف عليه من جيوب الشعب الغلبان المقهور .. الا ان الداعي يكون الدعوة لهؤلاء المسوخ والقطط الجرباء ..

حاسوباتيه said...

شفتهم كمان في برنامج الحقيقه دول شباب فاضي ومقززين جدا وربنا يحمي بقيه الشباب الكويس منهم

Anonymous said...

كخخخخخخخخخخخخخخخ
حلوة الحتة بتاعة القشرة والتعويرة
بصي يا مفروسة
ما بقتش ارح بيتنا والله غير مفروسة لدرجة اني عايزة اشوف براشيم عشان الفرسة دي احسن الضغط والصداع وحشين عليا
معلش يا مفروسة صدقيني احنا مش بنشوف دلوقتي غير النماذج الزفت
مع ان الكويسين موجودين
زيي انا وانتي كده
:)

مها ميهوووو

دعاء مواجهات said...

انا كنت شوفتلهم برنامج قبل كدة مع وائل الابراشى ومش عارفة صراحة هما بيعلنوا عنهم لمصلحة مين وهما مين اصلا عشان يجيبوهم يقرفونا بيهم

المهم ياستى ان الى فهمته
ان اسمهم ايموس من كلمة إيموشينال يعنى افراد عاطفيين لدرجة كبيرة عندما يخطئوا اى خطا يقوموا بعقاب انفسهم عن طريق التقطيع فى الجسد باى اداة حادة ودوول بقى الايموس ف الغرب

انما بقى لاعيال المخنفسين ف مصر فواخدينها منظرة وحركات وتميز وفرقعه ف الاعلام وكلو راجع للفراغ والهيافة والتفاهه اللى بدون حدود ومحددين لنفسم قصة شعر معينة واللون الاسود واكسسوار معين

اهو كلو من مبدا خالف تعرف
انما كمبدا عقلى او هدف ولا اى حاجة خوااء فقط حب للظهور والاختلاف مش اكتر

اما عن سؤالك عن الاهل فقد راحوا ف الحرب جميعا نساء ورجال

تحياتى ليكى

مفتقداكى..

يوميات شاب منوفى said...

خلاص شباب مصر بقى سوسم معدش فيكى رجالة يامصر غيرى ههههههههههههه مش هقول غير ان المجتمع المصرى ينحدر بسرعة الصاروخ وربنا يستر علينا

بنت الماضي said...

ماتفرسيش نفسك يا اختي والله ما مستاهله دي ناس فاضيه ورايقه وتافهه وكل حاجه ومش مستاهلين تتعبي نفك عشانهم
بس بيقولو منتشرين اوي الايمو دول مع اني مشفتش حد منهم
ربنا يهدي العاصيي

MǿиY El-Shreef said...

موضوع الايموز ده بجد مشكله

حاجه تخنق مابقوش رجاله خالص العيال دي

والمشكله ان المجتمع الاعلامي متقبلهم اغلبيته

ربنا يهديهم ويرضى عننا ويبعد عننا كل الحجات دي

وانتي بس بلاش اكتئااب مش طالبه الناس الكويسه تكتئب بقى

عمرو said...

غياب القدوه
غياب الهدف
غياب رب البيت ورا لقمة العيش
تبادل الأدوار الأسريه داخل البيت
اٍختلاط المفاهيم و القيم
آدى شوية أسباب للو وصل له شبابنا من وجهة نظرى
و لسه و لسه
البوست حلو تقبلى تحياتى و تقديرى

dreem said...

الحكاية دى يا مفروسة كانت موجودة من زماااااان وكان اسمهم عبدة الشيطان لو تفتكرى ..
علشان كده انا بقى ما بتفرجش عالتليفزيون
ربنا يلطف

الجواز و سنينه said...

مفروسه حبيبتى
خافى على صحتك يا بنتى
الناس الهبله دى مش كل مصرو الحمد لله
دى قله منحرفه تفرس
بس احنا بنسلط عليها الضوء علشان مانشوفش الاهم
شفت حلقه عن الايموز مع وائل الابراشى
و اتفرست جداااااااااا
بس فى النهايه دى شكله مراهقين و مسيرهم يروحوا لحالهم

Heba Faruq said...

بصراحة أشاركك فرستك لكن الواحد مش عارف يتفرس من إيه ولا من إيه..عموما حكاية الأولاد دول نتيجة طبيعية للي احنا فيه وحال المجتمع المقلوب من كل النواحي وتمسكه بمظهر الدين وقشوره وبعده عن عمقه وجوهره.. ولاأعتقد إنه سيكفي معهم نصحتين ولا تلاتة فالمشكلة أكبر بكتير من كده وربنا يستر علينا وخصوصا الأولاد الصغيرين

hasona said...

السلام عليكم

اختلف الادوار وضاعت
فضاعة صبغة هذه الادوار

دور الام أصبح باهت وبلا معني
وكذلك دور الاب أصبح لا يتعدي ماكينة صراف آلي
حتي ضاعت القدوة فالأولاد اتجهوا الي القدوة الخطأ في المكان والزمان الخطأ

ضاعت الادوار الحقيقة في حياتهم فضاعت الاجيال وانحصر المستقبل

وأصبحنا نري ما نكره في كل مكان
في الشارع والتليفزيون وعلي النت وفي كل مكان

فأصبحنا نري في الشارع أشباه رجال وأشباه نساء

ولا نعرف أين الحقيقة

ولكن أري أن لكل منا دوره
الاب والام والاخ والأخت
لنبني أسرة تكون نواة لمجتمع سوي

تحياتي

صيدلانيه طالعه نازله said...

انا شفتهم مع محمود سعد و مفهمتش حاجه و طول الحلقه فاتحه بقى و بحاول امسك اى خيط يوصلنى لحاجه و فشلت قلت يمكن العيب فيا بس الحمد لله انتى كده طمنتينى ان الحاله عامه للاسف انا بقالى فتره بتكلم مع اصحابى عن حال الشباب اللى اتنيل مش عارفه البنات بقى مالها بيلبسوا عجب و معظمهم مش لايق عليهم و الاولاد شرحه و فى الاخر نقول ليه الاغتصاب كتر و الشذوذ انتشر ماهو من البلاوى دى كلها

الـسـيـدة نـون said...

شكرا يا مفروستى على اليوم الجميل بتاع امبارح

القاعدة معاكى ومع داليا كانت تجنن

مش عايزة اقول انها باليوم كله
علشان باقى البنات مايزعلوش
بس بجد كانت باليوم كله

سبهللة said...

انا كمان شفت الحلقة دى بس بصراحة خمس دقايق واتخنقطت وحسيت ان ضغطى هايرتفع فقلبت القناة
بس بصراحة حاجة تفرس
ربنا يلطف بينا
اهو الواحد بعد الحلقة اطمن على مستقبل اسرائيل فى المنطقة
=====
بوسيلى نفسك بوسة كبييييييرة اوى لحد ما نتقابل ان شاء الله

إيثار said...

انا معاكي ان في فرق كتيرة
اغانيهم بطريقة دي
لكن صدقيني في موسيقى صخبة
محترمة
و بتساعد في تقدم المجتمع
مش كلهم بايظين
و من اكتر الفرق اللي
فعلا اثروا فيا
فرقة بلاك تيما
جربي تسمعلهم

لسة في امل

ساعد نسرين الايمن said...

يعني انتي مفروسة عشان هم بيقلدوا بس
يعني لو ظهر الشعبانين ( نسبة الي شعبان عبدالرحيم )
او السعديين الصغيرين نسبة لسعد الصغير
او البلعومين نسبة لخالد الصاوي في كباريه
هيكون كويس كده

اللي بيحصل ده تاكيدا لقول الشاعر
اه يا بلد زي الرصيف بتنكس
ناس بتسمع طاهر شريف
وناس بتسمع ميكي فنس

في النهاية منه لله محمود سعد ومواضيعه الرخمة
ومنه لله اللس شغل محمود سعد اساسا في التليفزيون
اما العيال دول فخليهم اللي عايز يشوي نفسه يولع
واللي عايز يسيح دمه
مفيش مانع
بجد انا مش عارف الناس دول اتخلقوا ليه ؟
انتي عندك اجابة ؟

amr elsharqawy said...

يبكره مخبى ايه تانى
واقف وتايه فى مكانى
مالى بنشوفه وهنشوفه
وربنا يستر

تسلم ايديك يامفروسه

BlackIceNo said...

هو فعلا في ناس كدة , بس زي ما بيقول المثل صوابعك مش زي بعضيها يعني الي بيسمع اغنية لطارق الشيخ ويعيط والي يسمع اغنية لمش عارف مين ويضحك دلوقت الدنيا تطورت والناس طلعت القمر ولفت حوالين الارض وهما عالقمر تخيلي وهما عالقمر اصل القمر بيلف حوالين الارض فهما قالوا ما نلف معاه , وطلع الميتل وبعدين طلع بلاك ميتيل وبعدين طلع ديث ميتل وحاجات غريبة يعني واشكال غريبة وعادي يعني انتي عيشي حياتك لنفسك وبنفسك يعني مش هتحتاجيلهم علشان تعيشي حياتك والدنيا فانية والسلام في الختام

Mowatten Ardi - مواطن أرضى said...

3azizty mafroussah, Dah mawdou3 ta3leem mosh aktar, el Heavy Metal mowgood fee kol makan, we mish moshkelah enni el wa7ed yesma3ouh. Ana gatlee fatrah kont basma3 AC/DC. El moshkelah el ta2leed el a3ma men 3'eer tafkeer, law el batten kewayess ana ma3ndeesh mane3. 3ala fekrah, wa7ed zay "marilyn mason" is very intelligent we fahem howa beyoul eeh. Unfortunately, I didn't have a chance to see the show to know if they ever asked deep questions to test the intelligence of those kids.

Salaam,
Mowatten Ardi.

well said...

اولا صوابع ايدك مش زى بعضها
يعنى مش كل الشباب كدة
ثانيا انا قربت اتفرست
ثالثا ..ربنا يرزقك الزرية الصالحة
رابعا ..تقبلى تحياتى وافترساتى

blue-wave said...

ربنا يلطف بينا

صدفة جميلة said...

السلام عليكم
انا باه واحد من الشباب بعتزر طبعا لانتسابى للكلمه دى لانى عمر معشت سنى للاسف وايه الحصل غير انى حاسس انى ولا حاجه تفكير وشغل وقلق وسهر وخوف ووووو
عادى يعنى يمكن سعات بضحك على الناس دى وسعات بتمنى اكون زيهم انسى القلق والحياة الصعبه الناس دى ليها بابا وماما يسرفوا ويفكروا لكن هما يعيشوا ويرتاحوا سبيهم للزمن كفيل بيهم حتى بعد مايخدوا اقصد يشتروا الشهاده هايلاقوا باب جايب لكل واحد منهم شغلانه تمام
كمان مع احترامى ليكى ليه تسمعيهم انتى كده مدياهم اهتمام ليه نجبهم اصلا على التلفزيون هما عملوا ايه علشان نهتم كده بصراحه انا مش شايف غير اشخاص نكره بنديهم اهتمام وبنجادل ونتكلم معاهم وعليهم المفروض دول مجهولين بصراحه الموضوع مش كويس انتى نرفزتينى بجد فيه شباب غيرهم من حقنا اننا نتكلم عنهم يمكن غيرهم يقلدهم لكن احنا بنقول للمعرفشى اعرف اختى الفاضله كفايه التلفزيون بيكلم عن الخيابه ياريت تحاولى تتكلمى انتى عن حاجات مفيده لشباب بجد تستاهل اننا نتكلم عنهم اسف ان كنت طولت او عكيت بس بجد انترفزت

كلام فارغ اوى said...

لا كمان انا قريت عنهم انهم بيبقوا ملحدين انا ماشوفتش اللقاء بس قريت عنهم
معرفش انا ده ايه
الله يقرفهم
وحسبي الله ونعم الوكيل

النسر المهاجر said...

أنا عندى راى لو تسمحى

العرض إللى شوفناه فى التليفزيون ده من حقيقتهم ده كلام بس هما ليسوا عبدة شيطان ولكنهم يحوزون نفس الفكر عندهم نزعه لحزن لايتفائلون .ولو لحظت انهم عايزين يبانوا بشكل حلو علشان كده كانوا مغيرين ملابسهم ومكياج البنت كان عادى رغم ان مكياجيهم مايل للاسمر كثيرا يشربون المخدرات والمسكرا ويمارسون الشذوذ والجنس الجماعى مسالة الموسيقى هذه حه فقط والبرنام كان معمول مخصوص لكى يبانوا بمظهر كويس لانهم ولاد ناس كبار فى البلد يعنى البرنامج قايم على النفاق فى الحلقة دى ولما أحد المتصلين قلتلهم أنتوا بتصلوامحمود سعد دافع عنهم يعنى القصة متفبركه والا ليه محمود سعدرجح فكرة الموسيقى فى الاخر ومسمحش خالد الجندى يعلق رغم انه كان بعد لقائهم مباشرة هذه هى طبيعة الاعلام المصرى الأن يهدم ولا يبنى

أسطى في زمن البلي said...

حضرتك حاولتي تغيري المنكر بقلبك .. و زودتيها حبتين و حاولتي تغيري بلسانك بس من على بعيد .. لغاية كدا و مقبول


ها نفترض انه واحد شلامبوش زي حالاتي واقف في الورشة صوته جايب من طلخا لميت غمر .. و جماعة من المفاعيص دول معديين في حدايق القبة .. قام الواد بلية شافهم و ما عجبوش منظرهم .. و قال يا اسطى العيال الخنفس دول مش نازلين لي من زور .. تسمحي لي يا اسطى دقيقتين بس ؟

الواد بلية خد خمس دقايق خلص معاهم ..

يا ترى ردة الفعل ها تكون ايه ؟


الامن المركزي ها يقفل الورشة بامر من اونكل .... و الواد بلية سامع واحد منهم بيكلم اونكل ...... في التليفون بيقول له بليز اونكل البربري دا ها يقطعنا

شعبنا شعب متدين .. ها يبعتوا لسيدنا المفتي يستفتوه .. قول يا مولانا .. مولانا ها يقلبها دروشة .. و لو حصل و اتكلم بما يرضي الله .. اونكل ....... ( يا ترى مين المرة دي ؟ ) ها يسوحه و يفسحه و يجيب له بديل تاني يوم

و لو كاتب اتنيل على عين اللي جابوه و كتب عنهم حاجة كدا و اللا كدا .. اااااااه و الف ااااه .. الظلامية و الرجعية و الانتكاسية و الحوركاشية و ها يتوصف باوصاف اقلها انه كفاية كدا عليه .. فسحووووه


تجار الكيف و المفسدون في الارض و الشواذ بيحميهم قانون الطوارئ

أما بقى السادةالمصلحون .. فقانون الطوارئ كالسيف على رؤوسهم




انا آسف اني فرستك

و اتمنى ما تكونشي آآآآخر فرسة

.

حلم بيعافر said...

م الااااااااااخر
دول شوية شباب فاضى مالقوش اللى يعملوه
فراغ يعنى
الواحد منهم لو نزل اشتغل وجرب الشغل والارف يوم
مش هيرجع يعمل كده تانى
واللى ياكد كلامى
ان كل الشباب دول من طكبقة واحدة
الطبقة اللى مش عارفة تودى فلوسها فين

بنت الغربة said...

حبيبتى مفروووسه..
انتى نسيتينى ولا ايه ؟؟؟؟
بجد واحشانى قوى ..ياستى زورينى فى الشهر مرة ..وبلاش تنسينى كده بالمرة..........................
بجد واحشانى