ده بجد؟؟؟؟!!!! ولا انا بحلم؟؟؟؟؟!!!!!


ياحلييييييييييييييييلة
انجلترا حتسد الثغرات فى القانون بتاعها
علشان عيب و غلط
انهم يطلعوا مذكرة بإعتقال الست ليفة
على انها مجرمة حرب


و بكده يصبح الانجليز ا اعداء للسلام ، و مش ينفع خااالص
انهم يستمروا فى مباحثات السلام فى الشرق الاوسط

و هددت اسرائيل انجلترا
قالتلها حتندم يا جميل على الحكم ده
و والله حخاصمك و مش حلعب معاكي تاني
انتى لازمن ولابد تغيري القانون بتاعك اللى مليان ثغرات

قوم انجلترا خافت و اترعبت
و قالت لاااااااااااااااااااااااا
انا ازعل اسرائيل حبيبتى !!!!!!
كلا انا اغير ام القانون و ابوه كمان

هيييييييييييييييييييييييه

اسرائيل بتلعب بالدول كلااااااااااااتها
ياحلييييييلة

انا مهيسة و مفروسة
يعنى انا زعلانة من روحي أوي علشان لاقيت
الشمعدان فى لعبة من الألعاب

و على رأي الزميل احمد سمير
الشمعدان زي ما بتحبه بيحبك كمان

انا بقا أكيد بحلم علشان مش اتفرس


يااااه انا نفسي نتعلم من اسرائيل ديه حاجة واحده فقط
و هو تعزيز مواطنيها فوق كل الدول و القوانين
و علشان خاطر مواطن حتى لو كان مسؤل
بتغير قوانين دول

ياربي
هو احنا رخاص اوي كده ليه؟؟؟؟؟؟
ليه حكومتنا مش بتعززنا
يعنى احنا بس نصدر شغالين ؟؟؟!!!
ايوه عندنا علماء
و ادباء
و مبتكرين و مبدعين
البلد اللى فيها كل دول
ما ينفعشي يصدروا شغالين
يصدروا حرفيين اه
شغالين لأ
خلوا الشغالين فى وسطينا....مننا و فينا


حاجة تفرررررررررررررس

16 زارونى......و اتفرسوا:

فاتيما said...

روووق يا جميييييل
و يا حلييييلة دى اللى كنت بدور عليها لما جيت أكتب الصباحات عندى
أصلهم خلاص يا فروستى
سحبوا قرار الإعتكااال اكمنه إكتشفوا إن الست هانم ليفنى المصونة مش على أراضيهم خلاص ...
شوفتى الوكسة الفحقلى ؟
عموما إنتى قولتى الاهم
و مربط الفرس
تعزيز قيمة البنى آدم
يعنى عندنا ف مصر مثلاً فيه ناس و ارقام
المواطن الامريكى
و الأسرائيلى و الاوربى
رقم واحد
المواطن العربى الأسيوى و الخليجى بالذات رقم واحد مكرر
المواطن الأسيوى
و احياناً العربى الأفريقى رقم اتنين
المواطن المصرى ذو النفوذ
و السلطة رقم تلاتة
و بعدين الباقى بعد كدا
ملوش رقم خالص
قوم لما أبو من غير أرقام دا
لما يروح شمال و لا يمين فى أى مكان ف الدنيا ... مستنية إن حد هيعبره
أو يحترمه ؟؟
بإمارة إيه
و هوه ملوش رقم
و لا يتعداش ضمن
البنى آدمين أساساً
انا منضمة لفرستك ع الصبح
و مليون مرة اقولك
روقى يا فروستى
و صحتك يا ست
إحنا عاوزينك

!!! عارفة ... مش عارف ليه said...

في قاعدة ذهبية بتقول

أبدء بنفسك


بمعنى لما يكون المواطن محترم داخل وطنه

يبقى أكيد أكيد هيكون محترم خارج وطنة

علشان الناس هتحترمك لما تشوفك بتحترم نفسك

وبناء عليه يبقى لك شخصية وهيبة

واحنا طبعا منعرفش يعني أيه "هيبة" دي ... بلا خيبة

اقصوصه said...

اممم

للاسف انا مش ملمه بتفاصيل الموضوع!

صيدلانيه طالعه نازله said...

و الله انا ساعه ما سمعت الخبر استغربت شويه كده بس فقت بسرعه و ملحقتش اتفرس
لان مع اسرائيل كل شيىء عادى و مبااااااااااااااااااح
و ساعه الجد محدش بيقدر يمس شعره من ايتها حد منهم
انتى مش شايفه الاستاذ شاليط حيستبدلوه بالف من الفلسطينيين
شوفتى احنا رخااااااااااص قد ايه؟؟؟؟؟

blue-wave said...

يا ستى اشترى دماغك
يعنى هيا اول مرة؟؟؟
يا عينى علينا والله

donya said...

صباح الخير

انا لما قريت الخبر ضحكت جاااااااامد
وقلت اه انجلترا وقعت في الفخ

وطبعا اوام لحقت نفسها المملكه التي لاتغيب عنها الشمس
مش هضحي بحبيبتها اسرائيل دي هي اللي زرعتها لنا

والشمعدان ده يهودي مش اسرائيلي

ويجب ان نفرق بين اليهوديه كاديانه والصهيونيه كازفت علي دماغ العالم

تحياتي

nody said...

طب بس امسكى اعصابك لانهم فى مصر عمالين يجاهدوا علشان يلغوا عقوبه الاعدام

يعنى يرضيكى هشام طلعت يتعدم يامفروسه
من قال لها ياعوره يتلعب بيها كوره وبدام احنا دمنا هان علي الى حاكمنا
مش عوزاه يهون على حد تانى

Mahmoud البطراوى said...

تلات حاجات لا يجوز الفرسه منهم

عمايل اسرائيل
عمايل حكومتنا
عمايل د عواطف بتاعه الباثولوجى

دا لو عايزه مرارتك متتفقعش يعنى

Anonymous said...

السلام عليكم
الاخت مفروسه
من حقك المره دي تتفرسي
صحيح انجلترا عامله حساب الصهاينه ومش عايزه تزعلهم
لانها بتستفيد من وراهم
مثلا انها بتنفذ خطط الغرب فى المنطقه وكمان المستثمرين الصهاينه وبرضه رضا الامريكان
انما احنا باه
لو زعلونا ايه اللى هايحصل لهم من الحكومات
طبعا كل واحد يقدر يجاوب بنفسه
وده من الاسباب المهمه انهم بيعملوا حساب ليهم

وبعدين تلاقي الصهاينه قالوا لانجلترا انتم زعلانين ليه
اذا كان حتى اتفاقيه الغاز مع مصر (مش حرب غزه يعنى) الحكومه اعترضت على حكم المحكمه واستانفته
يبقى انتى هاتبقى عايزه مصلحه العرب والمسلمين اكتر منهم
ربنا يرحمنا

بسمه عبدالباسط said...

لا عادى ده الطبيعى فى أى مكان الانسان له ثمن الا عندنا

:(((

Sameh Ezzat - (خواطر خاطر) said...

هو طبعهم فلما التعجب

مش عايزين نظهر كالسدج في الزفة

بريطانيا هي من صنعت اسرائيل وهي التي تحميها
ازي هيا اللي هتقوم بمحاكمة قادتها ..
كمان بعد الموضوع ده ما طلع للعلام
خرجت بريطانيا مره اخري تندد بتك المزكره علي لسان براون رائيس الوزراء بتاعهم
وغيروا القنون عشان عيون اسرائيل ..علي رايك

Cute Kitty **sookra said...

يادى النيله
هو انتى غاويه تفرسينى ولاايه
وبعدين اهم من كل دا
احنا اللى بنعمل كدا فى نفسنا
بجد لازم تكون لنا وقفه
صباحك شيكولاته مفروسه

حسن ارابيسك said...

هو ده الفرق اللي بينا وبينهم في مدى وقوة وشكل العلاقة اللي بينك وبين الدول الخارجية من خلال سياسات خارجية تعرف كيف تتحرك ومتى وفي أي إتجاه لتضغط بكل قوتها وبأقل مجهود إسرائيل تعرف من أين تؤكل الكتف
موضوع فعلاً مهم وله وزنه
طرح جيد جداً
تحياتي
حسن أرابيسك

حبات التوت said...

يابنتى ارحمى نفسك شوية

مش تاخدى على اعصابك كدة


ياربيهو احنا رخاص اوي كده ليه؟؟؟؟؟؟ليه حكومتنا مش بتعززنايعنى

والله شكلنا عند الحكومة رخاص اوى

حاجة تفرس بجد

Anonymous said...

حقيقة لم يعجبني قياسك

على كل حال هدفك بتعضيد دور الدولة في حماية مواطنيها في أي زمان ومكان لا خلاف عليه بالمرة

دمتِ بود

كاميليا بهاء الدين said...

صباحُك مُعطر برياحين الجنّة

مستغربة ليه يا روفى إن إنجلترا تغير القانون عشان شخص حتي لو كانت ليفة؟

سوريا غيرت الدستور عشان بشار
مصر غيرت الدستور عشان الجميل

أوباما وقّع بالموافقة على زيادة الجنود الأمريكان بمقدار 35000 جندى في الصباح ، وأعطوه جائزة نوبل للسلام فى المساء ..!


عالم مجنون فعلاً



سيبك أنتى ،، وحشتينى جداً جداً يا نصف أسمى الثاني
- غمزة