المصري الل على حق يقول للغلط لأ

ليه الناس مش بتفهم؟؟؟؟
ليه الناس عندها لا مبالاة كده؟
هوه فيه ايه؟
يمكن حاجة بيرشوها على الاكل تخلى الناس كده؟
ولا يمكن بيحطوا خلاصة التناحة و الا مبالاة فى المية اللى بنشربها
و لا يمكن بيرشوا الهوا اللى احنا بنستنشقة
طبعا مستغربين انا ليه داخلة شمال كده و خصوصا اننا خارجين من ايام مفترجة
حقولكم علشان تتفرسوا و تقولولى احنا ايه اللى جرالنا
طبعا كلكم شايفين على قنوات التلفزيون الارضية و الفضائية
كم الاعلانات اللى بتوعي الناس بالنسة لأنفلونزا الخنازير
و كلكم طبعا شايفين انهم حتى المدارس أجلوها خوفا من ان الأاطفال مش حيكون عندهم الوعي الكافي للمحافظة على النظافة و ياخدوا حذرهم
بدون وجود اهاليهم اللى المفروض يكونو اكثر حرصا و خوفا من ان اولادهم بتصابوا ولا حتى همة يتصابوا و يعدوا اولادهم و عيليتهم
و التوعية زي ما انتو عارفين من البرد فى العموم لان ممكن يكون انفلونزا الخنازير بس احنا مش نعرف
يعنى اللى عنده برد فى المطلق يلزم بيته و ينعزل فى اوضة لحد ما يخف خوفا من انه يعدى اي حد
تكون مناعته ضعيفة يروح فيها
و على فكرة حتى البرد العادي لو اصاب حد مناعته خفيفة بيكون خطر عليه
برضه حتقولو هاتي من الآخر و قولى ايه اللى فرسك كده
اقولكم
بقا انا امبارح كنت فى الهايبر و بعيد عنكم الاقيلكم كم الناس اللى عندها برد و بتنف و مناخيرها بتسح و عيونها بتدمع بالكوم
كأني دخلت مستشفى
و النصيبة لا لابسين كمامة ولا حاجة
و تلاقى الست من دول ماشية فى افاك و توفاجأ انها بتنف فى ودنك او بتكح فى ودنك حاجة تقرف
ولا تلاقى الست ماشية و معاها عيلتها و تقف عند الفاكهة ولا الخيار و الطماطم
تنف و تحط الكلينكس فى الشنطة(نضيفة و الله) و بعدين تلاقيها مسكت الخيار كله تنقى منه واحدة
يالهوييييييييييييي ايه النيلة اللى احنا فيها ديه؟
الصراحة انا من فرستى كنت ببرطم بصوت عالى على الناس ديه
و توقعت ان حد فيهم حيزقلنى بطوبة
بس تصدقوا بلله ولا حسوا اصلا ان الكلام عليهم
ولا حسوا انهم بيعملوا حاجة غلط
ولا حتى حسوا انهم بيئذوا اللى حواليهم
طبعا انا اتفرست و اتنرفزت و مشيت
وقلت انا مش حمشي من غير الكمامة أأمنلى
برضه انا ليه بكتبلكم و بصوت كده؟
اهئ اهئ اصلى انا حاسة ان زوري بيوجعنى
اااااااااااااااااااااه
ياريتنى كنت اخدت تليفونات الناس اللى كانت فى الهايبر
علشان لو جالى برد عادى ولا حتى بتاع الخنازير
كنت رفعت عليهم قضية تعويض
ادعولى ما يكنشي اي حاجة و يكون بس بسبب المية المثلجة اللى عمالة اشربها
و امانة عليكم لو لاقيتم حد عنده برد جرسوه و زعقوله و خليه يقعد فى بيتهم الى ان يتم شفاءة
المصري اللى على حق يقول للغلط لأ

33 زارونى......و اتفرسوا:

موناليزا said...

انتى بتتكلمى مع مين أصلا
المشكلة الحقيقية ان محدش مقتنع ابداً انه غلط
وممكن تلاقى اللى بيخطب فى الناس نفسه تصرفاته متناقضة مع كلامه
وعشان كده الكلام المتغطى ده ماينفعش
انا عن نفسى بقولها صريحة كده
فيه اختراع اسمه مناديل ورق والباكت بنص جنية مش مبلغ يعنى

سلامتك يامفروستى وان شاء الله هيكون من الميه الساقعة:)

Mafrousa said...

موناليزا ياقمرة
وحشتيني جدااا
يا بنت ما هيه الست اللى فرستنى كانت بتنف فى مناديل ورق و بعد ما نفت و مسحت عنيها و مناخيرها حمرا و عنيها حمرا حطت الكلينكس فى الشطة و بدأت تنقى الخضار

و انتى الصادقة انا حشتري الديتول البخاخ
و امشي ارش حواليا
هههههههههههه
يا اما اللى اشك فيه ارش فى وشة
ههههههههههههههه
يارب يا اختى تطلع المية الساقعة
نحياتي ليكي

شوكولاتة said...

لا لالااا ده دور برد عادي أصلي أنا واخداه وطاحني بعيد عنك وطبعا مأنتخة في البيت مش للأسباب اللي انتي اتكلمتي عنها بس لأني عرفت إن اللي عنده انفلونزا عادية أكثر عرضة للإصابة بالمرض وحرام عليا برضو الناس

تحياتي على البوست الرائع

Mafrousa said...

شوكولاتة
-------
سلامتك يا قمرة
عليكي و على الينسون و الليمون و الديتول
هههههههههههههه
بس اوعي تشربي الديتول
ههههههههههههههه
بس جادعة خليكي فى البيت لغاية لما تخفى
و اوعي اوعي تاكلى شيكولاته
هههههههههههههههههههههههه

مواطن شووجااع said...

حاجة تفرس كماااااااان
هو ممكن يكون عنده برد أو أنا ممكني كون عندي برد
ولازم ولابد وحتماً ولا يمكن إنه يسلم من غير ما يبوس الخدين وياخدكـ بالحضن والنفس في النفس والفيروسات تنتقل عادي ما بينا


طب بلاش بوس وأحضان كفاية تسلم بالأيد بس
يا راجل هو إحنا بنشوف بعض كل يوم خلي البساط أحمدي ومتخافش الأعمار بيد الله ودا كله كلام فشنكـ

مواطن شووجااع said...

لو حضرتكـ هتخليكي كدا مركزة مع تصرفات الناس التانيين في حكاية النظافة دي وثقافة الصحة العامة دي هتتفرسي أكتر ما إنتي مفروووووووووووووووووسة
وهتموتي من فرستكـ


الناس اللي بتبقي واخده بالها من حكاية العدوي دي الناس بتبصله شذراً وتقول ماله ده هو مش مستنضفنا ولا إيه
نصيحة خلي البساط أحمدي

اقصوصه said...

اممم

منم حقك تتفرسي اكيد

فعلا شيء يرفع الضفط

لو الراشدين ما عندهم وعي صحي

ولا ثقافه صحيه

شو بنتوقع من الصغار؟

الله يعننا ويرحما

ويبعد عنا وعن المسلمين

المرض وشره يا رب

mimi said...

تلاقيكي رحتي وقت تصوير حلقات الكاميرا الخفية
هههههههههههههههههه

طيب كنتي لابسة كمامة؟؟؟؟؟؟

أنا بصراحة مش لاقيالها لازمة

لو الوباء أنتشر ... الكمامات اللي في مصر كلها صيني

ولا بتعمل حاجة
إسأليني أنا

مدوباهم دستين

( الكمامات طبعا) اوعي تفهميني صح

Mafrousa said...

مواطن شووجااع
---------------
اخي المواطن شكرا على مرورك الكريم
اه صحيح نسيت موضوع البوس و الاحضان و الله يا مواطن
و ده تفتكر من ايه اللى بيحصل ده؟؟؟؟
و بالنسبة انى مش اركز مع الناس
هوهوهووووووووووو
انت مش تعرف مفروسة بقا
اومال هيه مفروسة من ايه اصلا من التركيز
هههههههههههه
و اللى يعرفني حيقولك...
واحدة حبيبتي لما بتصادف و تخرج معايا
ههههههههههه
دايما تقولى يا بنتى متركزين مع الناس كده
ههههههههههههههه
تحياتي

Mafrousa said...

اقصوصة:
-------
و الله عندك حق اذا كان الراشدين اللى المفروض ياخدوا بالهم مستهترين
ما بالك بالاطفال بقا
شكرا لمرورك

Mafrousa said...

mimi
-----
و النبى يا اختى ما كانت الكاميرا الخفية
دول ناس بجد
و مش لابسين كمامات و عندهم برد

mohamed said...

شوفى
لو الى ماتوا من مليون سنه صحيوا
ولو التراب الى فى الارض بقى كله دهب
ولو الفحم بتاع الشيشه اتحول الى ماس
ولو كل الى مش متجوزين اتجوزوا
ولو ازمه الاسكان اتحلت والشقق بقت بلاش
يبقى الى انتى عايزاه هيحصل
احنا شعب مبيعرفش يزعل
كله عادى
اقولك اشربى ينسون مغلى كل يوم
ومش تكلمى فراخ
وبس خلاص
اصلى طهقت مننا كل سنه وانتى طيبه

nagwa said...

الناس مستبيعه!
على حاجات وحاجات
وانفلونزا الخنازير دى
مش مأثرة فيهم أو مش مقتنعين
انها خطر وموجودة فعلاً من كتر ما اتعودوا على عدم صدق الحكومة
وناس تانية تقولك :الموت أحسن
هى دى عيشة؟!!

صيدلانيه طالعه نازله said...

بس يا فروستى اللى بتحكى فيه ده للاسف انا شفته و انا فى اكتوبر و برضه فى هايبر
بس انا شفته فى جزء اللحوم يعنى الخضار ممكن تغسليه بالمطهرات لكن اللحمه يتعمل فيها ايييييييييييييه
للاسف النظافه فى بلدنا تعتبر من الرفاهيات ده راى ناس كتيره فعلا و زى مااتفقنا امبارح انا و انتى انه الناس عايزه تتربى من اول و جديد و يا نفع يا منفعش
حاولى يكون معاكى كولونيا فا او خمس خمسات فى الشنطه و كل شويه اديها رشه و علبه مناديل مبلله ديتول و ربنا يستر
و سلامتك يا قمر

حمدى جعوان said...

هقول راى من غير ما افرسك ياستى

الاول الدخله الاولى اللى فى البوست دى .. حقيقيه فعلا ...وهى انهم بيرشوا حاجات على الاكل .. حاجات مسرطنه ومنيله بستين نيله.. وبيحطوا فى المية او بيسيبوا فى المية او بيخلطوا فى الميه حاجا تجيب التناحه والزهايمر وكل امراض الدنيا..
والهوا ياستى بقى ... دا كوم تانى من النفايات والتلوث اللى ملوووش حصر..

شوفى بقى من دا كله ايه اللى ممكن يحصل للمواطن
هيصاب بحاله توهان اشبو بالغيبوبة .. يعنى الواحد يبقى ماشى عنده اعتقاد اساسا انه مت فمش فارقه معاه بقى

الحاله اللى فيها الشعب دى من اللامبالاه وعدم الوعى دى ثقافه زرعها فينا ونماها النظام الفاسد اللى يعتبر هو الوباااء الحقيقى مش حاجه تانيه

ابقى خلى بالك بقى ومتسبيش الكمامه .

safa7_karmooz said...

ههههههههههههههههههههههههههههههههههه

اسكندرية كلها كانت انلفونزا وعك اخر حاجه

طب ده الهايبر

امال لو سوق بلدى كنتى عملتى ايه

صحتك مفروسة هانم

^_^

فرنسا هانم said...

ههههههههههههههههه
لسه شقيه زى مانتى يا مفروستى
وحشتنى كتباتك الجميله والقيمه
قبل ما ارد عليكى احب اقولك انى والله مبسوطه جدا بوجودى فى مدونتك مره تانيه
وبعدين بقى يا حبيبتى للاسف الشديد احنا شعب غير متحضر
سيبك من الهايبر ومن اتفلوانزا الخنازير بصى لسلوكياتنا فى الحياه تجدى كم هائل من اللاوعى اللا مبالاه وده الشىء اللى بيدى اى مرض عندنا اكبر من حجمه
صحيح ان انفلوانزا الخنازير خطيره
لكن من الممكن بقليل من الوعى للمصاب يستطيع ان يتدارك اصابه من حوله الا ما شاء الله له ان يكون
وبقليل من الوعى للسليم يمكن ان يتجنب الاصابه بالمرض الا من شاء الله له بشىء
لكن من هنا يجى دور الحكومه والاعلام
اعلان واحد مبهم غير كافى للتوعيه
لازم يكون فى حمله توعيه اعلانيه مكثفه فى كل وسائل الاعلام خاصه التليفزيون
ويكون فى شرح وافى من الدكاتره الاخصائيين لاعراض المرض وازاى نقدر نفرق بينه وبين الانفلوانزا العاديه
وطبعا ان هنا مش بنفى مسئوليه الست اللى كانت بتنف وتمسك الخيار او اى شىء اخر
الف سلامه ليكى من البرد

Mafrousa said...

mohamed
-------
شكرا على مرورك يا استاذ محمد
و والله كلامك حكم
بس تصدق فيه حاجة مش حقدر اعملها من كلامك
و هوه انى مش اكلم الفراخ
هههههههههههههههههه
مقدرشي لازم اكلمها علشان اعرف الاخبار
هههههههههههههههههه
بس ديه و كانت انفلونزا الطيور
هههههههههههههه
نورتني و بلاش تطهق ممكن تجيج عندى تتفرس
هههههههههههه من باب التغير يعنى
تحياتي

Mafrousa said...

nagwwa
-------
فعلا الناس مستبيعة
و مش هاممها حاجة
عارفه انا بحس انهم يائسين خلاص
يعنى الناس الغلابة حيلاقوها منين ولا منين
ربنا معاهم جميعا
تحياتي و شكرا لمرورك

Mafrousa said...

صيدلانيه طالعه نازله
---------------------
فعلا يا علا الناس عاوزة تتربي
بس ياريت يسيبوهوملى اربيهم بمعرفتي
هههههههههههههههه
و حياتك يا اختى ما حينفع غير ديتول رش
هههههههههههه
ارشه فى وش الناس طول ما انا ماشية
نورتيني يا قمرة

Mafrousa said...

حمدى جعوان
---------
و الله يا استاذ حمدى عندك حق مليون فى المية
الاهي ياكلوا بالغلط من الحاجات المرشوشة و يجيلهم اللى بيجي للشعب
و يجيلهم كلهم زهايمر و نشوفهم ماشين تاييهين منعكشين ورا عربيات الرش
هههههههههههه
علشان الفرسة تهدى شوية
و الكمامات يا سيدى اتشالت من السوق
هوه انا لاقيه و قلت لأ
ديه حاجة تفرس
نورتني

Mafrousa said...

safa7_karmooz
--------------
زعلتنى
كان نفسي اسافر اسكندرية
كده حخاف
منورني دايما يا سفاح

Mafrousa said...

فرنسا هانم
----------
فرنسا عندى يا ولااااااااد
لأ بقا عيا ايه ؟
ده انا بقيت زي الحصان و حقوم ارقص كمان
هههههههههههههههه
طبعا يا فرنستى شقية و مفروسة على طول الخط
ههههههههههههه
وحشتيني موووووووووووت
انا خفيت خلااااااص
تحياتي و منوراني

Ahmed Mubarak said...

كمامة
يخبر .. بس لا يقولوا بتشتميهم

Anonymous said...

الف سلامه
ربنا يقومك بالسلامه

فيه ناس كتير معندهاش فكره الذوق فى التعامل
بغض النظر عن موضوع انفلونزا الخنازير
المفروض اى واحد يعطس او يكح يبعد وشه عن الناس ويحط منديل وكده

على الاقل خالص الناس متقرفش منه
طبعا غير العدوى

فيه حاجات كتير عايزه تتظبط فينا
وعلى فكره الحاجات دي موجوده فى ديننا بس مش كتير اللى واخدين بالهم
يعنى مثلا فيه دعوة للشرب من كوب او ماشابه بعيدا عن اناء المياه الكبير
وده طبعا مفيد لعدم نقل العدوى
وفيه غيره كتير

بس الاحسن لو حد شاف غلط زي ده ينبه اللى عامله
صحيح ممكن يلاقى تعليقات غريبه
بس طبعا البنات تاخد بالها فالافضل لا تعطى النصيحه لرجل لانها لا تضمن رد الفعل خاصه فى ظل قله الاخلاق هذه الايام
اسف للاطاله
بس الموضوع يفرس فعلا وانا باتفرس من الحاجات دي

كلام فارغ اوى said...

ههههههههههههه
الف سلامه عليكي يا جميل
والله الواحد بقى بيتحرج لما بيعطش مجرد عطسه بريئه قدام الناس
وبعدين على الفكره الجمله الاخيره عاوزة تعديل

"المصري اللى على حق مايقولش للغلط لأ

تحياتى

maha zein said...

اممممممممممممممممممممممم
مش عارفه
بس عموما متخافيش
ان شاء الله ربنا يحفظك
قولي انتي بس اذكار الصباح و المساء
وقولي بسم الله الذي لا يضر مع اسمع شىء في الارض و لا في السماء و هو السميع العليم
و متخافيش لا طيرة في الاسلام
يعني مفيش حاجة اسمها عدوى
لو ربنا اراد هيتم المراد
و ان شاء الله ربنا يحفظك
هتقوليل المفروض نأخذ بالاساب هقولك خلاص شغال البسي انتي الكمامة او اجتنبي اماكن التجمع
بس ان شاء الله خير

متتعبيش اعصابك بقه و تخوفينا كده
انا راخرة كان عندي برد وقلقت
قلت يبقه مفروسة عديتني

هى الست بتاعت الخيار دي خدت واحدةليه
هي مش نوية تعمل سلطة

الجواز و سنينه said...

هههههههههههههههههههههه للصبح يا بنتى
المصرى اللى على حق مش موجود اصلا هنا
سافر بره من زمان
اللى فاضليين هنا مش على حق اوى
يا نهار ضحك
بصى يا بنتى انا جوزى كان جاى من السفر
و كان اللى راكب جنبه عنده انفلونزا
اغيظك بقى باللى عمله
عمال يعطس فى الهوا و لا همه
و لا مناديل و لا يحزنون
يعنى احمدى ربنا على اللى كانت معاكى فى الهايبر
و هو هايتنقط منه
فى الاخر اداله منديل علشان يعطس فيه
هوم الراجل حس انه بيطنطط ع ليه راح سابله الكرسى
و اللى قدامه بقى مصيبه تانيه
عمال يعطس فى الهوا برضوا
بس الصراحه كان و هو باصص من الشباك
و الهوا يجيب المكروبات لغايه عنده
كان جاى على آخره الصراحه
و برضوا قعد الاجازه كلها فى البيت
عيان طبعا
و المصرى اللى على حق يقول للاعلانات و الفلوس اللى بتتدفع فيها لاء
هع هع هع

شفـقــة و إحســــان said...

واحشتينى اوى اوى
كل سنة وانتى طيبة

Unknown said...

تصدقي و تأمني بالله لما بقولهم عندنا بلاش كده عشان الإنفلونزا بعتبروني ببشر بالشر عليهم

يا شيخة دا انا في هم والله العظيم

----------------

عزيزتي محتاجة رأيك ضروري في البوست الجديد

غمض عينيك said...

ازيك ؟

المشكلة مش في اعلانات التوعية..المشكلة في التربية
احنا شعب عايز تربية من اول وجديد..تربية ع النظام والنظافة والعناية بالنفس والاحترام لرأي الغير

ولو ع الهايبر يبقى كويس...لأ انزلي الشارع وروحي اماكن زي رمسيس والفجالة وميدان عبد المنعم رياض او العتبة
بلاش دا كله...اركبي المترو
هتلاقي مهازل...مهازل

كفاية عدم التهوية والصهط اللي بيطلع من المترو لما الابواب بتفتح...انا بيتهيألي فيروس الانفلونزا ميقدرش يعيش اساسا في الكتمة دي

ربنا يستر علينا بجد

تحياتي ليكي
محمد سمير

قلم رصاص said...

اولا كل سنة وانتي طيبة

بكل أسف سلوكيات الناس نفسها عادت غير
محتملة.. يعني احنا ليل نهار بنلوم السلوك
الحكومي الفاشل..وناسيين عمايل الناس العادية اللي فاقت في احيان كتيرة تصرفات الحكومة النظيفة

ربنا يستر ان شاء الله الأيام الجايه

دمتي على خير

ومتاكليش لاسمك ولابيض

ههههههههههههههههههه

Anonymous said...

إنتي شكلك كده خايفة قوي من اللي ما تتسماش، أنفلونزا الخنازير... أراهن إن كل اللي شفتيه ده حاجة عادية كانت وحتفضل تحصل كل يوم، بس شكرا لوسائل إعلامنا ولمسؤلينا الأفاضل، الناس كلها خايفة ومرعوبة من الفلو، وأغلبهم ميعرفوش حاجة عن الفلو دي... بس في النهاية، أرجع وأقول معاكي حق تتفرسي... الحاجات الغلط اللي عندنا بقت من كترها لا تعد، وللأسف، كل يوم بنسمع ونشوف غلط جديد