برادعي مييييييييييين!!!!!!!

ازيكم الاول كوووولكم

اخباركم ايه؟؟؟
يارب تكونوا اهدأ منى
و مش مفروسين زيي

لوحظ فى الأونة الأخيرة
بالناس اللى بتطالب بالبرادعي رئيسا
و عمالين يهتفوا... و يهللوا
و حيدخلوا الراجل اصلا فى سكة اللى يروح ما يرجعشي

برادعي مين يا شباب؟؟؟
ولا زويل مين يا شباب؟؟؟
ديه ناس محترمة
على قدر كبيييير من العلم
و ليها رؤية
و رؤيتهم ما تنفعشي تطبق فى بلدنا
احنا بلدنا الاول عاوزة
امنا الغولة
ابو رجل مسلوخة
خط الصعيد
او البرادعي اللى كان زمان فى مسلسل مش فاكرة اسمة
كان الواحد من دول يجيله تليفون
و تلاقى المتحدث يقوله انا البردعي
و طبعا بتكون مصحوبة بالموسيقى اللى بترعب

با جماعة احنا شعب مش محتاج فى الوقت الحالى ان الدستور يتغير
احنا شعب محتاج اصلا انه هو اللى يتغير
ينسفونا و يجيبوا ناس احسن
احنا وحشين جداااااا
و مش عاوزين نتغير ولا نتحرك
و كبيرنا كلام و بس
يا اما فى تجمعات
او على المدونات
او فى الجامعات

احنا لازم نتغير
و حقولها بعلو حسي لازم نتغير
كفاية بقا اللى احنا فيه

مش كل صغيرة نقول الحكومة
ماهو علشان يبان الوحش فى اوله
لازم اللى حواليه يكون كويس
يا فرحتنا لما نقول الحكومة..و يبقى خلاص الموضوع استفحل ووصل للعمق
ولا اخد معاه ارواح ناس

انا حطلب منكم بس كل واحد
فى المكان اللى هوه فيه
انه يفتح شباك المنور و يبص
و يقول بكل صراحة
يا تري عجبه منظر المنور و مواسير الصرف؟؟؟
يا تري لاقى مية ناشعة فى الحيطان؟؟
ده اذا كانت الحيطان لسة موجوده مش بوشتها المية

يخرج من باب شقته و ينزل على السلالم
و يقول بمنتهى الصراحة فيه زبالة على السلم؟؟؟
فيه صفايح زبالة روايحها تجيب اللىف بطن الواحد ؟؟؟؟

يخرج من باب العمارة
و يبص حوالين البيت....فيه زبالة متكومة؟؟؟
ولا كله نضيف فى نضيف؟؟؟؟
من هنا بقا التغيير
لو كل واحد فينا عمل كده
الدنيا حتتغير

انا عن نفسي بعمل كده

بس مش حقولكم انا جالى الضغط مش بس بقيت مفروسة
لاني متنرفزة على طول
و جوزي بيقولى هو انتى حتصلحي الناس
حتربيها على حاجة مش متربية عليها؟؟؟؟

قلتله بس يا زوجي العزيز انت جبت التايهة
احنا شعب عاوز حد يربيه من اول وجديد
يربيه على النظافة و النظام و الزوق
و عدم الكدب و الفشر
هو ده بالظبط اللى احنا عاوزينه
@@@@
على جنب
@@@@
الناس اللى فوقي بيوضبوا شقتهم
ما كلفوش خاطرهم زوقيا
انهم يقولوا يا جماعه احنا حنوضب استحملونا
و سابوا الشقة للعمال
و هاتك يا خبط و دق على النفوخ بقالنا شهر
و طبعا العمال ما بتستعملشي مخها خالص
فخدوا عندكم بقا
شالو بلاط المطبخ و ماحطوش العازل و سابوا الحنفية مفتوحة
و قفلوا الشقة و مشيوا
و انا فضلت يومها طول الليل احط جرادل فى ارضيه المطبخ
لان طبعا المية نشعت و السقف باظ و الدنيا غرقت
كلمت صاحبة الشقة تاني يوم
قلتلها بقا ده اسمه كلام
انتى تحبي يتعمل فيكي كده؟
هيه ديه اصول الجيرة؟؟
قالتلى انا آسفة انا حظبطلك و حقولهم
قلتلها يا ستى لازم يكون حد موجود يفكرلهم
قالتلى حاضر و توبة من دي النوبة
و السيناريو يتكرر تاني يا حضرات
عملت فيهم محضر بقا...... انا اتفرست
تفتكروا اسم النبى حارصها و صاينها تقولى ايه؟؟؟
تقولى كده تعملى محضر فينا انتى كده خسرتي جيرانك
و كان ردى
اذا كانوا جيراني مش بيراعوا الاصول ولا الكلام المهذب
ولا بيراعوا اي حاجة
خسارتهم مكسب
و قفلت معاها

جم بقا النهاردة بعد اسبوع من الحادثة الاولى
و الاقيلكم العمال بتكسر فى حيطان و بترمي الكسر
ولا بتبص اصلا الطوب ده نازل على ايه؟
و طبعا نزل عندى و عند الجيران و الدنيا اتردمت
تفتكروا اعمل ايه فى الحالة ديه؟؟؟
لأ..... غير انى اتفرس لأن ده العادى
عملت محضر تاني
شوفتوا بقا الناس؟؟؟؟؟
بقا واحدة زي جارتي عاوزة البرادعي يرؤسها؟؟؟
ديهه عاوزة رية و سكينة
@@@
ولا امبارح و انا خارجة من كومبوند فى 6 اكتوبر
و الاقيلكم عربية نمر جمرك
العربية مرسيدس سوداء
و جواها ناس مش مصريين
باين من شكلهم انهم عرب
و الراجل مصمم و دماغه الف ..مشعارفه ايه
انه يخرج من باب الدخول
و لما جاله بتاع الامن
كان حيشيله..
انا بقا كنت حعمل زي الافلام و اطارد العربية
و اعمل فيلم اكشن
بس يا خسارة مش ده اسلوبي
اتفرست
و قلت يا بشر احنا عاوزين واحد ماسك فى ايده عصاية
علشان يجبر الشعب و الضيوف انهم يحترموا الارض اللى عايشين عليها

طبعا انتو مش فهمتوا حاجة من الكلام بتاعي....غير انى مفروسة
و مش عارفين مفروسة من ايه؟؟؟

بصوا انا من فترة كتبت لمحمود سعد
و قلتله
عاوزين الشعب يحس بانتماء؟؟
خلوا كل صاحب محل او كشك او سكان عمارة
و قولولهم نضفوا و بلطوا و ازرعوا شجرة
و احنا حنعفيكم من فاتورة الكهرباء شهر
ولا المحلات حنخفض ليكم الضرايب
و لا المية مش حنحاسبكم عليها فى شهر

كده الناس حتحس انها بتعمل حاجة ايجابية للبلد
و الحكومة بتقدرها
و بكده الشعب يساعد الحكومة
و يساعد نفسه اولا
لانه هو اللى حيعيش فى بيئة نضيفة
بس كفاية بقا لأني مفروسة جداااااا
و لو فضلت اتكلم على اللى فارسنى مش حسكت

قال البرادعي قال....برادعي مين بس

26 زارونى......و اتفرسوا:

عصـــــــــــام الــــديــن said...

بس كفايه حرام عليك
هو فيه ايه بس ؟
كلام فى كلام ؟
البلد دى مافيهاش حاجه حلوه خالص عجباكى

يامفروسه
بالله عليكى اكتبى على اول المدونه على الباب ممنوع الدخول لمرضى الضغط والسكر ربنا يسترك دنيا واخره
المهم نرجع للبوست من الاول كدا
البرادعى دى كان فى مسلسل غوايش الله يرحم ايامها كانت مصر كلها ماتلاقيش فيها صريخ ابن يومين فى الشارع والمسلسل بيتعرض
يلا المهم
المشكله مش فى الرئيس مين المشكله فى الناس واحنا بامانه محتاجين حد يربينا من الاول على النضافه والنظام وانا معاكى فى كدا
بس المشكله هو بعد ماشاب ودوه الكتاب؟ والله لو جبنا لكل واحد فى البلد واحد يقف على دماغه يقله اعمل كذا وماتعملشى كذا برده مافيش فايده
الله يرحمك ياعم سعد زغلول اكيد موت من الضغط واتفرست منهم
بس ايامه الله يرحمه مصر كانت جنه كانت شبه فيينا او هى فيينا الشرق
النهارده تقدررى تقولى بقينا بومباى الشرق حى زنوج الشرق
اقولك على حاجه تفرسك

فاكره العباره؟ فاكره اللى ماتو فيها ؟ طيب فاكره عمى ماهر الراجل الغلبان اللى ابنه غرق فيها؟
عم ماهر خد التعويض عمل بيه ايه ؟ بنى جمعيه خيريه ورصف بيه مدخل القريه تفتكرى اهل بلده يجازوه بايه ؟
صلى على النبى الاول
اربع مجرمين من جيران عمنا ماهر الغلبان الطيب خطفوا ابنه التانى والوحيد وطلبوا منه فلوس التعويض فديه ولان الفلوس خلصت نفذوا التهديد قتلوا ابنه التانى ورموه فى مصرف بحر البقر
شايفه المصيبه ؟ شايفه القلب الميت ؟ شايفه بنعمل ايه فى بعض ؟
المهم ربنا كرمهم الاربعه المجرمين وخدوا من اسبوع اعدام
بلدنا اللى هى بلد عمى ماهر عايشه فى فرح من يوم الاعدام اللهم لاشماته
عارفه بيقولو ايه ؟
ابن عم ماهر الكبير مات ومعاه 1200 مصرى واللى قتلهم ماخدش اعدام. ابنه الصغير مات واللى قتله اربعه خدوا اعدام شوفت ميزان العد مال ولا لا؟
يلا ربنا يهدينا ويهدى الناس فى مصر

واحدة مفروسة said...

يا مفرووووووووووووووووووووووووووووووووسة ياني
عصام الدين
-------------
انت فرستنى و فرستنى و فرستنى
الفرسة اللى فرستهاني اكبر من اللى فرسوهالى جيراني
تفتكر كده اللى احنا بنعملة فى بعضينا الحكومة ليها دعوة بيه؟؟؟
اه انا معاك ان الحكومة ليها دعوة ان اللى غرق العبارة مشي بسلامة الله من ارض الوطن ولكن الراجل ذات نفسة هو المسؤل الاول قبل الحكومة
ضميره مات مش موجود...الجشع..و الصرعة بتاعة الناس لفلوس بتخللى كل واحد يقتل فى اخوه و يسمه بالمبيدات..علشان ياخد قرشين زيادة

مش بقولك شعب لازم يتنسف
اتفرج على مقر مجلس الشعب فى بلاد العالم المختلفة
و تعالى اتفرج على كجلس الشعب عندنا
يا شيخ ديه حاجة تكسف
ولا محاكم دول العالم
و تعالى بص على المحاكم بتاعتنا و العنكبوت المعشش ولا المجاري اللى طافحة
احنا ما عندناش ثقافة الصيانة...احنا مش بنعرف نصون حاجتنا
انا اتفرست يا عصام تاني
يالله ابقى سلملى على عم ماهر
و شكرا على مرورك

star in the sky said...

مفروسة هانم

عند حق وصوح جداااا كلامك
وهاكتبس من كلامك ان فعلا الشعب محتاج يتربى من اول وجديد بطريقة مختلفة وتكون برده صح بس الاساس بيكون من البيت اللى هو نفسه بيطلع المدرسين اللى بيدرسوا للطلبة والناس اللى بتحكم البلد

Wanda said...

مفروسة هانم
:-))))
عايزة تنسفينا

حرام عليكى
:-))))

بخصوص النظافة خذى عندك البوست ده
http://wanda-wanderer.blogspot.com/2010/02/dna.html

اما بخصوص الجيران
بصى هو سؤال المحاضر جابتلك حقك ؟؟
معتقدش
لو حتقوليلى تعلمى ايه حقولك تكلميهاكذا مرة
و تطلبى منها تسيب نسخة مع حد زى البواب يلحق الشقة قبل ما تبوظ
اصل المياة الى بتاذيكى بتاذيها هى كمان قبلك بس لانها بتوضب فبتتلافها
المهم طولى بالك معاها

حتبطل توضيب انشاء الله قريب :-)
و تستريحى
من الفرسة :-)))

مجداوية said...

السلام عليكم

محاضرات التنمية البشرية بتقول إن أساس أى تغيير من فشل لنجاح هو الايحاء
ومخاطبة النفس بصورة ايجابية
وكل اللي ذكرتيه صحيح وواقع مرير عايشينه من سنين لدرجة إننا خايفين نغيره ولن يكون التغيير مهما كان مخيف حيكون أسوأ مما نحن فيه
فلما تجيبي ناس محترمة تمسك شعب فوضوي لأن ولاة الأمر دربوه على الفوضى وتعطيهم الايحاء أنه شعب محترم وله تاريخ بالفعل من النخوة والبطولة والوطنية وتفكره بأمجاده وتعطيه الأمل أكيد حيتغير
الناس مبلطجة عشان عتدها يأس واحباط وشايفين إن لا قانون بيطبق ولا أخلاق بتنفع وغذا كان رب البيت بالدف ضاربا فشيمة أهل البيت الرقص
لكن لو كان رب البيت شخصية محترمة لازم حنتعلم منها الاحترام والرقي واحترام القانون احنا محتاجين فقط قدوة صالحة
لكن حكم بالحديد والنار حنطلع الظلم والغلب على بعض واحنا شبعنا ظلم وبلطجة

لهذا فأنا من أشد مؤيدي البرادعي رغم اختلافي معه في مرجعيته الفكرية ولكني لن أترك فرصة تغيير هذا الواقع تمر دون أن أشارك فيها وان فشلنا فسنكون بالفعل مستحقين لهذا الظلم وهذه البلطجة

mostafa rayan said...

اتفق معك في كل كلماتك
ده اللي يغيظك انك لما بتنضفي تلاقي الناس ترجع تحط زباله في المكان اللي تعبتى في تنظيفه احنا محتجين نتغير من جوانا الاول وده مش هيحصل لا بزويا ولا البرادعي دول ممكن يفكرو ويحطو سياسه عامه لكن صعب انهم ينفذوها
تحياتى لك يا مفروسه ودمت بكل الخير والود

الجواز و سنينه said...

و الله يا بنتى اظاهر اننا فينا كتير اوى من بعض
انا لسه حالا عند صبرنى كنت بقول احنا عايزين واحد يشكمنا
صايع و محدش يلفه
الناس المؤدبه دى مش هاتمشى معانا مع الاسف
لازم يبقى عندنا كرامه الاول

Haytham Alsayes said...

من غير مافرسك
انا اول مرة ادخل مدونتك واتفرست جدا بس عجبتني
اما عن موضوع البرادعي فانا لسة داخل علي خبر بلاغ للنائب العام ضده لانه يثير النعرات السياسية
ههههههههههههههههههههههههههه
ال نعرات هي دي بلد فيها نعرات لا والانكد سياسية هي فين السياسة دي بلد تدار زي الوسية
اما من حيث التغيير فهو قادم امتي لما احنا نغيير نفسنا والتاريخ مليان امثلة وعلي فكرة اكيد ربنا بيدبر
وراء الكواليس ربك يمهل ولا يهمل
وسواء البرادعي او غيره ان شاء الله البلد دي ربنا عينقذها ودة مش معناه ان ننام ومنعملش حاجة لا لازم نتحرك كل واحد في مجاله
معلش طولت عليكي
وارجو ان تنوريني في مدونتى المتواضعة
وسلام

فارس الجبالى said...

السلام عليكم
بصراحة أنا معك فى أن الشعب المصر يحتاج لتغيير جذرى
نحتاج إلى شعب لا شخص
وأنا ( مفروس من الاول علشان كدة متفرستش
مودتى

زهرة الكاميليا said...

بلاش البرادعي
بلاها البرادعي
امشي يا برادعي
خدي رشدي
ههههههه

المشكلة يا مفروسة ان دايما المرشح للرئاسة يكون مرشح في نفس الوقت للقبر
يعني البرادعي عنده 67 سنة
طيب بالذمة يعني راجل كبير في السن ده .. هيصلح ايه؟
ركب رجليه مثلا؟

واللهي حاجة تجنن


صباحك سكر يا سكر

Baskouta said...

Baskouta is here
Hello sweet Mafrosa
How are you? hope you get less mafrosa.

Thanks for your comment and for your concern , I so much appreciate it...
I am fine now , it was just some moments of frustration.

I am about to finish my first level in Spanish ...it is a very lovely language ...I so much liked it.
As for this post... I do agree with you... it is not always the government ...Reformation starts from the base not from the peak and we - citizens of this poor country - are the base.
We have to start with ourselves...Corruption that prevailed and spoiled every aspect of our life did not stem from nothing ...it came from us ...corrupted mentalities and irresponsible person are the real disease of our country ... we need to love ourselves , our country and our lives ... we need to aspire for better life through developing a new lifestyle.
A lifestyle free from indifference , ignorance , greedy.... and the list is so long.

Calm down my pretty mafrosa...you are right and what you did to your neighbor was the best procedure to be taken with such personalities.

Have I told you that I love you.

Gracias
Hasta la vista
Spanish Baskouta

Shaimaa said...

والله يا بنتى انتى بتتكلمى صح 100% ... مليار فى المية... وده اللى أنا بقولوه لوالدتى طول النهار وبتقول عليا مجنونة...
كل ما أمشى فى الشارع أقول فيها ايه لو كل بيت فى الشارع جمع من بعضه ولو 10 جنيه كل شهر واشترينا صندوق زبالة ... وزرعنا شجر فى الحتة دى... وصلحنا لمبة النور دى.... وشوية شوية ندهن البيت الفلانى من برة...و...و

تقوم ماما تقولى .."اعقلى شوية ربنا يهديكى" لحسن الناس تقول عليكى اتجننتى

والله العيب فينا احنا صدقينى الحكومة مش ماشية ورا كل واحد وبتملى عليه يعمل ايه وميعملش ايه ومبتقولش لحد ارمى فى الشارع.... وارتشى.... وكسر اللمبة الفلانية...وبلاش تخلص ورق الراجل الغلبان اللى عايز يتعالج....الخ

الموضوع مسألة ضمير .....ضمير وبس هوه اللى بيحركنا ... والحمد لله مات واندفن من زمان

Hina wi Hinak said...

حلولك دي صعبة أوي إنها تتحقق... أنا بأه عندي حل جبار... كلنا ناخد مراكب ونهاجر على حته بعيدة... نروح اليابان أو الصين... الحل ده فوايده كتيرة أوي... منها إن اليابان أو الصين بعاد أوي بالنسبة لإيطاليا أو اليونان، فإحتمال غرق معظمنا في البحر هيكون كبير أوي إن شاء الله، وبكده نحل مشكلة الزيادة السكانية، ومنها إننا (اللي هيفضل منا يعني) ننغص على الصين عيشيتهم زي ما منغاصين علينا عيشيتنا وداخلين في كل حاجة...، ومنها إن البلد هتفضى وده هيحل أزمات كتير أوي زي المرور وحوادثه والزبالة ونتانتها وغيره وغيره

م/محمود فوزى said...

السلام عليكم
ازيك

مبدايا اناعن نفسي عندى بعض التحفظات على البرادعى
وده لايقلل منه ابدا طبعا
ولكن المشكله فى الحاله السياسيه الموجوده اللى بيخلى ناس كتيره بتبص لاى بارقه امل

لكن برضه بالنسبه للناس
طبعا الناس مش ملايكه
وعارف ان فيه اخلاقيات بقت مفقوده فى الناس
الا من رحم ربي

وكويس انك بتحاولى تصلحى من اللى حواليكي
وانا باعمل كده برضه قدر استطاعتى
حتى ولو كان فيه موقف فى المواصلات او فى الطريق او اى منطقه متواجد فيها حتى ولو مكنتش ساكن فى المنطقه دي

لان من راى منكم منكرا فليغيره بيده فان لم يستطع فبلسانه وان لم يستطع فبقلبه وهذا اضعف الايمان
مش ده معنى الحديث الشريف
طبعا يكون بالذوق مش بالعنف

بس برضه فيه حاجه مهمه
لما الناس تحس ان حقها مهضوم وان اللى بيغلط مش بيحاسب
ده بيقلل الانتماء للبلد او حتى للشارع اللى هو فيه
طبعا الحكومه عليها دور كبير

وهنا برضه الناس عليها دور فى التوعيه والتحرك لاصلاح العيوب
واعتقد ان ده قليل ربما لان العمل العام اصبح بيقابل عقبات كتير
وبقى معروف عند ناس كتيره انه بيجيب وجع الدماغ

بس برضه لازم الناس تحاول
على الاقل لاصلاح الشارع او المنطقه التى هو بها

معلش
طولت
ربنا يكرمك ويوفقك

طوبه فضه وطوبه دهب said...

صح احنا محتاجين غسيل مخ قبل ما نحتاج نرشح رئيس او حتى عضو فى مجلس الشعب ان الله لا يغير ما بقوم حتى يغيروا ما بانفسهم وواضح اننا مصرين نفضل كدا فرستينى معاكى اكتر ما انا مفروسه

قيس بن الملووووح said...

نحن في حاجه دائما الي ارائكم في رسائل القراء وفي رسالة جديده علي مدونة
دقات قلب بعد الخمسين

طهر فؤادك said...

السلام عليكم ورحمة الله وبركاتة
ربنا يكرمك يارب والمسلمين ...
شاركونا فى حملة "لا للتهويد " علشان نبدأ النشر بداية من السبت 6 /3 بأذن الله تعالى الله يكرمك ساعدونا
http://rasoulallah1.blogspot.com/2010/03/blog-post.html

مصطفى أبوزيد said...



السلام عليكم

مع احترامي الشديد ليكي

التغيير السياسي مطلوب جدا على التوازي مع التغيير الإجتماعي

اتفق معاكي ان التغيير الاجتماعي للافضل مطلوب

لكن ان لم يقابله تغيير سياسي للأفضل و لمزيد من الحريه هتكون الاستفاده لا شيء

مثال توضيحي بسيط

اختاري اي بلد نفسك نبقى زيها على مستوى تفتح المجتمع و الرقي

سويسرا - المانيا - انجلترا

مثلا و خلي قيادتنا السياسيه بتفكيرها و اسلوبها الخايب ده تدير البلد ده لمدة سنه

بكل تأكيد هتبقى خرابه مخربه

لذلك التغيير الاجتماعي مطلوب بالتوازي مع تغيير سياسي


تقبلي مروري

bastokka طهقانة said...

و الله عندك حق
احنا عايزين نغير من نفسنا الاول
حتى الاحياء الراقية بقت مليانة زبالة
و الغلاء غير اخلايات البشر
لا حول و لا قوة الا بالله
ربنا يصلح الحال

حطي فرستك على طهقي و تعالي نعمل حزب المنقوطين

اوروفوار

Guevara said...

مبدأيا المسلسل اللى مش فاكره إسمه مش غوايش زى ما أستاذ عصام الدين قال

المسلسل إسمه "و توالت الإحداث عاصفه" بطولة عبد الله غيث و سهير البابلى و حسن مصطفى .

ثانيا أنا مختلف تماما معاكى

لسبب أساسى و هو إن الإنسان بطبعه خطاء .. يعنى يميل للطمع و يميل للسرقه و يميل للزنا و يميل للحرام و الغلط فى المطلق إلا من رحم ربى .

و لهذا لابد من وجود حاكم أو رادع .. و اللى بيتمثل حاليا فى رئيس و وزراء و قانون

إحنا مش ملايكه بالتالى لو شايفين ان الرادع مش موجود أو حتى فاسد فمتطلبيش من الشعب إنه يمشى عالصراط المستقيم .

amirelhob said...

اول مره اشوف حد بيتكلم فى الموضوع من وجهت النظر المختلفه جدا دى بس مش يمكن جارتك تتغير لو اتغير الحال ولو العيب فينا يبقى مفناش حل ولا فى لسه امل

مش هنكر انى اتفرست بجد من كلامك واللى بيحصل من الناس ومن بس عندى لسه اعمل ربنا يستر يا رب ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

شمس النهار said...

تعالي اقعدي جنبي نتفرس جنب بعض

نفس اللي بقوله وبعمله
وساعات بعمل شوية حاجات كده علي خفيف

يعني انزل للمحلات اللي تحت البيت اقول لهم ماينفعش تبقوا محلات جميلة كده وقصادكم عامل كده
يعني وحركات كده الرصيف ينضف يوم اتنين وخلاص

ربنا يتولانا

سلامي

أحمد شريف said...

السلام عليكم
مقتنع بوجهة نظرك بأننا في حاجة لتعديل ثقافتنا المجتمعية فلا يصح أن نطالب الغير بإصلاح نفسه ولا نصلح أنفسنا وأتذكر معك حادثة موقف
سأل الزعيم الراحل سعد زغلول الأديب الراحل : عباس العقاد قائلاً له : أتعلم ما هي آفتنا .. فرد عليه العقاد طالباً الإجابة فقال له الزعيم سعد زغلول : إن آفتنا أننا نتعمد أن نحاسب الحكام قبل أن نحاسب أنفسنا
تخيلي الزعيم المناضل الثورجي سعد زغلول هو من يقول هذا ويقوله في زمن الاحتلال وحكومة القصر

الله المستعان

فاتيما said...

صباح الخير يا فروستى

كل سنة و انتى طيبة يا حبيبتى

عارفة انى من كام يوم
بفكر كدا فى حاجة


اكتشفت ان اجمل كلمة مامى
سمعتها فى حياتى كانت
لما انتى قولتيها مرة قصادى زمان ف لوقاء حريمى !!!


عجبتنى جدااااااااا
عشان كدا لما شوفتك يوم المعرض طلبت منك تقوليها

طول عمرى اقول كلمة مامى
دى دلع خالص
و مبحبش اللى بيقولها
وبحسهم مدلعين قوى
و هيا ماما اللى متعودين
عليها و خلاص


انتى غيرتى مفهومى جداااااا
لما سمعتها منك
عشان كانت تلقائية
و جميلة
و شيك زيك

تصورى بقى ان بسكوتة
بقت تقولهالى

بقيت مامى

اه و الله العظيم


شفتى تأثيرك حلو عليا ازاى
من غير ما تقصدى

انا متاكدة انك سبب
فى سعادة ناس كتير من اللى حواليكى برضو و من غير ما تقصدى

اذا كنت انا من بعيد
و ممتنة أهو
ايش حال
اقرب المقربين بقى


كل سنة و انتى طيبة يا فروستى
و كل سنة و طنط (مامى)طيبة
و ربنا يديها الصحة يا رب

بحبك قوى

حَـبآيـۃْ.بـטּـدۉڷ said...

حرآآم عليكي يابنتي .. بجد انتي اللي بتعمليه فـ نفسك وفينا ده حرآم

انا اول مره ادخول المدونه دي .. بس عجبتني كتييير بجد ..

وفعلا البرادعي ده مينفعش ف البلد دي

بس طول مافي ناس زيك مش عاجبها حالنا ده .. طول مافيه ناس بتدور وبتنصح ان اللي بنعمله ده غلط .. والمفروض نصلح من نفسنا

ده دليل كبيييييير .. إن فيه ناس مش عاجبها الوضع وعايزه تتغير ..

وهنا بقى نلاقي حتة أمل .. ونخرج من الفرسه اللي هتجيب المراره بدري دي ..

إن شاء الله إحنا فينا امل نتغير للأحسن .. ونكون من افضل الناس

تسلمي عالبووست اللي يجيب الفرسه ده ..
^_^

مفروسه حامده ربها said...

ازيك يا مفروسه هانم
والله كويس اني مش لوحدي الي مفروسه من جيراني انا بقي مش بس مفروسه من جيرانا الي طول اليوم خبط ورقع علي دماغنا الي ولا زوق ولا مراعاه للحقوق الجار ايه ده احنا بقينا بنقول حقوق الجار اهو, هيه فين بقي انشاءالله بدايه من اول من ترجع من الشغل وانتا هلكان وطلعان عين .... سوري بقي كملو انتو وتلاقي جيرانك المحترمين اوي حاطين سلاسل ادام العماره علشان هما بس الي يركنو مهيه طبعا عزبه ......وانتا تفضل تدور تدور لحد ما تدوخ من التدوير علي مكان تركن فيه وطبعا كالعاده زي كل يوم هتفشل وتضطر من كتر التعب واللف والدوران ترميها في الشارع وزي ما تيجي بقي عربيه بالوفات مالفه طلع عنينه لما جيبناها رميناها في الشارع تتخبط بقي تولع مش مهم اشمعنا هيه يعني الي هتبقي كويسه خلاص رميناها في الشارع واستعوضنا ربنا في شقي العمر نبيجي بقي ندخل العماره الي الشقه فيها بكذا الف جنيه نلاقي البيه البواب اوعي تطلب منه حاجه اوعي يموتك علي طول يديلك البصه الي هيه من تحت لتحت ويوقلك بصوت مخيييييييييييف مينفعش اسيب العماره لوحدها يا مودام مممممممممم طيب منتا طول الوقت مش موجود انا بس عاوزه عيش !!والله عيش بس علما باني كل حاجه من السوبر ماركت والله مش بتعب ساعاته خالص ,بس برده لما يبقي يجي حد وطبعا لازم تقولي حاضر كل ده وهوا قاعد رجله علي رجله التانيه وتطلعي وانتي محروق دمك ومفروسه طبعا تغيري هدومك وتروقي وتعملي الاكل وتغسلي وتنشري وتذاكري للعيال وكل الحاجات الجميله المفروضه كل يوم وكل ده والبيه البواب مجبش العيش انشاله ما اكلنا عيش مش مهم هيه جت علي العيش يعني خلصتي بقي عاوزه بالليل تمارسي حقك الشرعي في الراحه ده طبيعي يعني ولا غلط ده كمان اوعي تقولي طبيبعي امال جيرانا ليه مش بيعتبرو كده يبدا الساعه 10 بالليل طبعا مش الصبح بدايه الشغل والعمال بقي واصواتهم والغنا والخبط والصداع تكلمي البواب يستاذنهم بس الصوت شويه لان مفيش حد غير العمال صاحب الشقه هجرها وسابهلم يشطبوها بمعرفتهم علي زوقهم هما تلاقي البيه البواب ناااااايم في سابع نومه الساعه 10 طبعا لا تعليق بعدها بشويه بس كتير يعني يجي الغفير الي بيحرس العربيات بالليل قاعد بالشيشه قدام العماره واجهه بقي للعماره امال, حسك عينك تعترضي علي منظر الشيشه وانتي طالعه بالليل وهوا فارش وبيشيش تعترضي وتقولي لمين بقي مامور العماره مهو قاعد معاه بيشيش مش عارفه اقول ايه لابني ابن الاربع سنين وانا بفهمه ان السجاير والشيشه بيموتو وربنا يزعل مننا لو عملنا كده علي قد فهمه شايف البيه وهوابيشرب الشيشه المهم ما علينا تكلميه علي الانتركم والنبي يا حاج قولهم بس يهدو الصوت شويه معلش عاوزين ننام معلش احنا اسفين طلب غير مشروع يعني ,لو سمعك ابقي قابليني تقعدي تهاتي عليه ولا حيات لمن تنادي بعد مشوار اليوم الطويل تياسي من حياتك وتنامي بقي تصحي علي صوت خناقه ويرن الانتركم عليكي خير يا رب مين ايوه لو سمحتو العربيه بس واقفه قدام السلسله بتاعتي عاوز اركن عربيتي !!!!!!والنبي اعمل ايه ده كده العربيه في الشارع حاضر ينزل جوزي المسكين المهدود طول اليوم شغل علشان يحرك العربيه يدخل المحترم يركن ويحط السلسه لحسن العربيه تهرب ولا حاجه يرجع جوزي بالعربيه يركنها لا لو سمحت متركنش قدامي ليه بقي انا بتحرك الصبح لا اله الا الله ما انا كمان بتحرك الصبح لالالا هوا لسه هستني لما تنزل الصبح وتحرك العربيه لا سيب الفرامل مفكوكه كل الحوار ده باليل حاضر سيبنا الفرامل نصحي الصبح نلاقي العربيه في الشارع بره ومخبوطه ينهار مش باينله ملامح ليه كده حرام يعني تسال مين علي الخبطه بقي البواب الي نام بدري طبعا وصحي متاخر هنساله طيب مهو هنسال مين قالك بقي انا نمت بدري اوي ولسه صاحي معرفش مين خبطها طيب الغفير يمكن يعرف لالالا ده مشي خلاص وبعدين ده يا باشا مش بيسمع وبيحشش بالليل هيعرف منين بس مين خبط العربيه بس بقي اتخنقت ايه ده ولحد دلوقتي منعرفش مين بيبهدل العربيه كل يوم ومفيش حل لركنه العربيه طيب يا جماعه نعمل اجتماع اتحاد ملاك العماره ونشيل كل السلاسل وكل الناس تركن عادي ما كلنا جيران والي يسري عليك يسري علينا والي يجي الاول يركن يرد مامور العماره المحترم انا ارمي عربيتي في الشارع ابدا انا مليش دعوه انا مش هشيل السلسله بتاعتي ويرد الباقي ولا احنا تخرج من الاجتماع بعد مناهدات يا جماعه كده مينفعش يعني نركن فين طيب احنا ملنا عربيتي غاليه هرميها يعني لالا مليش دعوه وطبعا الي ليه دعوه هوا الغلبان الي بيرمي عربيته في الشارع الي هوا انا وجوزي طبعا ده شعب والنبي يحكمه حد ده كل واحد بيحكم علي الباقي لكن يراعي الباقي طظ في الباقي والبقاء لللاقوي طبعا وهوا مين يا شطااار مامور العماره الي تحت عبايته البواب واقرانه يااااه ده الواحد مقهور والله اعمل انا بقي زيك يا مفروسه واعمل محضر ضد مين لو اعرف بس مين الي بيخبط العربيه وبيجرح فيها بالليل حد يقولي اعمل اييييه