حااااالة لخبطة


ازيكم جميعا
و الله ليكم و حشة
بس انتو سيد العارفين، الفرسة بتعمل حالة من الإكتآب العام،
اللى بتكون نتيجتة القوقعة،و السكوت،والتناحة،وفى الآخر حالة من البلاهة و العياذ بالله،
و لله الحمد لسة ماوصلتش للحالة الأخيرة،لسة متماسكة،و ربنا يستر.
المهم انا جاية النهاردة اسألكم للمرة العشرتاشر،
هو فيه إيه؟؟؟؟
احنا مالنا؟؟؟؟؟
اه و الله احنا جرالنا إيه؟؟؟؟؟
ايه حالة اللخبطة الفظيعة اللى بيمر بيها كل البشر ديه؟؟؟؟؟
احنا مش عارفين عاوزين ايه....ولا عارفين ايه اللى ممكن يريحنا،
حالة من اللخبطة الغريبة ،
واحدة تتحجب مثلا.....و بعدين فجأة الاقيها قلعت الحجاب،ماشي ما علينا ربنا هو اللى بيحاسب،
وشوية تلاقيها زهقت قامت راسمة وشم على جسمها،يا خرابي!!!،وشوية تقولك انا زهقانة انا حروح دروس تحفيظ قرآن......ايه اللخبطة ديه؟؟!!
ولا واحد يقولك انا زهقان مش بشتغل، و يتمنى انه يشتغل ان شالله بياع جرايد...
و لما يشتغل يبقى قرفان و زهقان.و عاوز يسيب الشغل.
و تبريره اصله مش مجالى.. ولا المكان بعيد...ولا المرتب صغير.
لا بجد ديه حالة مستفحلة فى المجتمع
حالة من الشيزوفرينيا(مش هيه اسمها كده برضه ولا ايه؟؟؟)

من كام يوم كان فيه سوق خيري فى الشيخ زايد
فى قرية من القرى السياحية،على امل انه يجيب عائد كبير يروح للأعمال الخيرية
لغاية كده و جميل جداااا
و تلاقى سيدات المجتمع ايه بقا ما تقوليش،
كل واحدة بتدعو الى عمل خيري احسن من التانية
و فجأة تطرق الحديث الى استحسان احداهن لشنطة الاخري
و كان هذا الحوار
وااااو شنطتك تحفة....(وكانت الشنطة ماركة من الماركات العالمية)
مرسي
انتى جايباها من هنا..ولا من برة؟؟؟؟
لا انا ناصحة يا ختى..جبتها من اوبن داي سكاند هاند(اخيى ده انتى بيئة...وده فى سري طبعا)
واااو يا عفريتة برافوا عليكي ووقفت عليكي بكام(بكام يعنى...بتقولك ساكند هاند...كبيرها 50 جنية...)
2500 جنية(يا بلاش.. وده فى سري طبعا)
بسسسسسسسسسس ......برافو و الله رخيصة
اه طبعا اومال كنتى عاوزانى اجيبها ب 6000 و بعدين ازهق منها بعد شوية
ده كان جوزي يدبحنى
(فى سري بعد ما فتحت بقى من غير ما حد يشوف نظرة الازبهلال بتاعتى......جوزي انا اللى ممكن يدبحنى لو حكيتله اصلا)
لا و الله برافو عليكي
وفجأة تحول الحديث 380 درجة
على فكرة الحاجات اللى فى المعرض حلوة انا حشتري كتير علشان الفلوس تروح للمحتاجين..
ايه التناقض ده؟؟؟؟؟؟
انا مش بفهم فى التناقض و اللخبطة الفظيعة ديه على فكرة
اللخبطة ديه بتفرسنى جدااااا
@@@@@@
كلاكيت تاني مرة
اغلب اللى بشوفهم فى 6 اكتوبر ماشين عكس الاتجاة
يا اما شباب عرب مبرشمين و ده واضح
و العربية بنات على اولاد آخر لخبطة...
يا اما واحد بدقن و قاعدة جنبة واحدة منقبة
و المصيبة انه يشوح لك لو ضربت نور فى عنية
وتلاقى الست رميتلك كام كلمة من قاموس الشتايم
طيب ازاي؟؟؟؟
مش د ه برضه تناقض؟؟؟؟
حتتحجبى..احترمي حجابك و كوني صورة مشرفة له
حتربي ذقنك..على اساس انك بتقتدى برسول الله
يبقى اقتدى به فى كل حاجة....
ان كنتى حتتنقبى..على اساس انها زيادة فى الايمان و التقرب الى الله
يبقى لازم كل التصرفات تكون بزيادة،
و اقصد التصرفات الكويسة طبعا.
يعنى السلوك السليم يكون بزيادة..و اللسان يكون مربوط بزيادة،والنضافة تكون بزيادة،والصح يكون بزيادة.
اللخبطة اللى معيشانا فيها الحكومة يظهر بتنعكس علينا
و بقينا مش عارفين
نقفل الشباك ولا نفتحة
مش عارفين نريح ولا نستريح
مش عارفين نكون امة وسط
يا يمين اوي
يا شمال اوي
و سايبين خط الوسط فاضي
حاجة تفرس بجد

6 زارونى......و اتفرسوا:

فاتيما said...

الله

يعنى برضو لما ترجع يا جميل
تبقى راجع مفروس كدا ؟؟؟

انا ملاحظة حاجة بقى

انتى كل خروجاتك تفرس
صح و لا انا يستهيألى ؟؟

مش معقول
اقولك ايه بس
اقعدى ف البيت و لا تخرجويش ؟؟

ما الفرج ع الدش و قراية الجرايد و النت هتفرسك برضو

طب حيث ان مفيش فايدة
اعلق بقى ع الفرسة
و اقولك معلشى ى ى ى ى
يا فروستى

احنا بقينا بنتدين شكلياً
و بنشتغل شكلياً
و نتعلم شكلياً
و نتجوز شكلياً
و نعمل كل حاجة شكلياً

الحياة بنعيشها
من برا بس
لكن من جوا
لا فيه عمق و لا مضمون
و للأسف كل دا سببه
يتلخص فى جملة واحدة

مفيش ضمير بيحاسب بشدة

فالدنيا تلاقيها مايعة كدا
و ملهاش طعم يا فروستى

انتى وحشتينى
و يسلم لسانك يا فندم

بوسات و حضونات
بفرسات او من غير فرسات
مش هتفرق خااااالث
على قلبى زى العسل

واحدة مفروسة said...

فاتيمااااااااااا
-------------------
ازيك يا قمرة
و الله وحشتيني يا تمتم
اسكتى فعلا كل لما اخرج من البيت بتفرس
افتح التلفزيون اتفرس
افتح النت اتفرس
كله بقا يفرس يا تمتم
قلت حعزل علشان خاطر داليا فى مدونتى التانية ارض الاحلام
مش عرفت اقعد فيها من كتر ما انا مفروسة

انا ما جبتش سيرة الجواز
لان ده عاوز بوست لوحدة
البنت من دول تفضل تندب حظها
و تقولك معمول ليا عمل
و كلام كتير
و اول لما ربنا يفرجها عليها و تتجوز
تلاقيها عاوزة تتطلق
يووووووووووووووووو
يا بنتى ما حدش مرتاح
لا قاعدة البيت بتريح
ولا الخروج بيريح
حاجة تفرس و الله
وحشتيني يا تمتم
بوسات و حضونات من غير فرسات ليكي انتى بس
:)))))

AHMED SAMIR said...

على فكرة انا بدأت اتأكد ان الحياة منظومة واحدة كاملة متكاملة لا تتجزأ
بمعنى ان فوضى السياسة بتنعكس عليها فوضى اخلاقية و اجتماعية و اقتصادية
اعتقد
ان الانهيار وحدة واحدة لا تنفصل
تحياتي

safa7_karmooz said...

انا مفروس لوحدىىىىىىىىىىىىىىىىىىىىىىىىىىىىىىىىىىىى

Hina wi Hinak said...

وسيادتي اللي لسه بيفكر إنه ينزل زيارة... نفسي إنسدت بعد قراية موضوعك ده! للدرجة دي إتدحدر بينا الحال؟

Me7'o said...

كل اللى بتقولى عليه ده سببه

النفاااااااااااق

لإننا بنظهر عكس ما نبطن

تحياتى

صورة البوست 10/10