ناس فى ملكوت آآآآآآآآآآآخر

اه و الله
ناس فى ملكوت تاني
و تصيبنى بالفرسة

مش ممكن انى كل ثانية بتكعبل فى حاجة تفرسنى

النهاردة الجمعة
و من طبيعة يوم الاجازة ان الواحد بيصحى براحته
و يوم الجمعة ده من اول لما اصحا
و اولع البخور و اعيش يوم هاديييي
على اساس انه ان شاء الله يكون يوم هادي

اما زوجي
فأول حاجة بيفتح التلفزيون على قنوات اخبارية
قال يعنى هو مش بيعمل كده فى الأيام العادية
بس يعنى ....
المهم زوجى العزيز موقف على قناة الجزيرة
و انا طبعا على النت ماليش دعوة
و إذا ببرنامج بيعرض فيلم تسجيلي

و انا بقا ركزت مع الفيلم
و ححكيه
و انتوا قولوا


راجل فلسطيني يعيش فى الدنمارك
و تزوج من دنماركية
و انجب منها الاولاد
و عنده ارض مزرعة كبيرة
و يعد من الاغنياء جدا هناك
و عمرة حوالى 45 سنة

ابوه سافر بيه على الاردن من صغرة
و هو بيقول ان ليه قرايب فى فلسطين لسة
و ان قلبه معاهم بجد
و انه علشان مشغول اوي فى تكوين ثروته
مش عارف يتواصل معاهم



لا تعليق سوا
ناس عايشة فى هنا و من نفس دمهم
و ناس شايله الهم وهمه مش منهم
و عجبي

باظ يوم الجمعة الهادي

30 زارونى......و اتفرسوا:

سبايدرمان said...

ولا باط ولا حاجه
متتفرجيش على القنوات الوحشه دي تاني
^_^
و يوم سعيد
او الاصح عيد سعيد
ما هو يوم الجمعه ده عيد المسلمين
^_^

سبايدرمان said...

مش معقوله كده يعني كل مره
اول تعليق
اول تعليق
انا عايز جايزه على الموضوع ده بقي
^_^

عصـــــــــــام الــــديــن said...

مفروسه هانم
هو سعادتك مش عايش معانا فى مصر ؟
طيب لوكنت من كوكب تانى اقولك وافرسك
فى بلدنا اللى هى شمال شرق الشرقيه يعنى ممكن تكون اقرب لاسماعيليه يعنى ارض الخير دلوقتى اللى بتنتج اكتر من 90 % من الانتاج المصرى من الموالح والفول السودانى والفراوله والموز ووووو
فى بلدنا الحلوه دى حوالى 5 او 6 فلسطينين جم من زمان طبعا مطرودين من هناك وسايبين حالهم ومحتالهم وفجأه ياست الكل كل واحد اتجوز اجمل بنت فى البلد ستات على الفرازه واشترى كمية ارض فى الجبل اللى كان زمااااااان جبل ودلوقتى جنه وكتبهم باسماء زوجات مصريات وسبحان الله جت الفلوس منين الله اعلم طيب الملايين دى مصدرها ايه ؟ الله اعلم
صاحبك بقى لسانه زالف والفار بيلعب فى عبه العقله والشقلباظ
قلت ياجماعه الناس دى اكيد من اللى باعوا ارض فلسطين لليهود وجابوا فلوس وجم
انا قلت كدا والكلام وصل لسعادتهم وهات ياردح
اللى يسب فى تاريخ مصر واللى يلعن فى الملك فاروق والفساد وقال ايه احنا السبب فى النكسه
وكل شويه تحصل مصيبه فى بلدهم نقول خلاص بقى الوطنيه هتاخدهم ويساهموا فى تكاليف الجهاد ويرجعوا لبدهم حق عودة اللاجئين
لا سبحان الله صحتهم بتيجى على الضرب والاهانه وبيزعلوا لو حد قال لهم هترجعوا بلادكم امتى ؟
وكل مااسرائيل تزداد تعذيب فى ناسهم هما يزدادوا مال وغنى وعجبى

عاشقه الرومانسيه said...

اقفلى التليفزيون
وطنشى
ويومك سعيد برضه
(:

MR.PRESIDENT said...

ربنا يجعل أيامك كلها هدوء وسكينة ، وعلي فكرة معظم القنوات الم تكن كلها موجهه يعني الجزيرة زي النيل زي العربية زي بي بي سي كله زي بعضه بيخدم اجنده معينة للدولة المنشأة للقناة

همس الاحباب said...

مع الاسف ده حال معظم الفلسطنين خارج فلسطين ثروات وعيشة رغد ومبسوطين جدا بوجود اسرائيل على ارضهم بالرغم من تشتتهم فى بقاع الارض وخاصة استراليا واوربا فمنهم اغنى الاغنياء هناك
ولا يحلمون يوما بالعودة الى هناك
عكس سكان فلسطين بالداخل قتل وذبح وحروب ومتمسكون بارضهم وعزتهم وهؤلاء هم المرابطون
تحياتى

قبلاوى said...

طيب مفروسه ليه

ماهى دى طبائع الامور يعنى

واحدة مفروسة said...

سبايدرمان
-------------
ههههههههههههه
جايزتك انك اول واحد تتفرس
يا سيدي و الله انا المفروض فعلا اوزع على باب
المدونة حبوب مهدئة
و على العموم حتلاقى بوست هادى فى المدونة التانية
ويمكن تلاقى حد بيوزع بونبوني ولا شوكولا
تحياتي
و يارب دايما اول تعليق

واحدة مفروسة said...

عصام الدين
---------------
ربنا يكرمك يارب
و الله كلامك ده ريحنى شوية
و الله فعلا انا بقرأ الرد بتاعك
و باخد نفسي بإرتياح
الله يكرمك
التعليق ده لوحده
لازم يتعمل بوست
علشان الناس اللى بتجري
و تقول مش عارف ايه
و بتعمل مظاهرات ايه
يشوفوا الوجهه الآخر من العملة
باعوا اراضيهم و ادوها للصهاينة
و جاين دلوقتى يقولولهم برة؟؟
ازاي دول ملاك
و ليهم حق يحطوا صوابعهم فى عنيهم
و ليهم حق يقولولك مش من حق الفلسطنيين انهم يضربونا
دول همه اللى وحشين
طبعا
واحد معاه عقد و انت عاوز تمشي
بأمارة ايه؟؟؟
ايوة انا معاك ان فيه اقلية رايحة فى الرجلين
لكن انا حيبقى قلبي عليهم اكتر من الناس اللى فى جنسهم
و الله انت بردت ناري شوية بكلامك ده
الله يكرمك بجد

و بكرة تبقى تقول مفروسة قالت
حتلاقى ناس بتبيع هنا فى مصر كده
و كان اولها بنك الاسكندرية اللى اتباع لبنك اسرائيلي
و المباني اللى فى وسط البلد اللى برضه حتتباع لليهود
و ساعتها يقفلوا منطقة و يقولولك ديه بتاعتنا
ياريت الناس تصحى و تفوق قبل فوات الا,وان

واحدة مفروسة said...

عاشقة الرومانسية
--------------------------
و النبي يا اوختى بقفلة
جوزي هو اللى غاوي اخبار
و يظهر كلام فى سرك
شكله كده و الله اعلم بيعملها بالقصد علشان اتفرس
ههههههههههه

واحدة مفروسة said...

MR.PRESIDENT
--------------------------
ماشي انا معاك بيخدموا
بلد القناة
بس ديه حقيقة فعلا
ان الفلسطنيين خارج فلسطين من اغنى الاغنياء
و دول اللى باعوا
اما اللى ما بعشي
بيتقتل
و بيسف التراب
شكرا على مرورك

واحدة مفروسة said...

همس الاحباب
------------------------
فعلا
بس اللى برة الاغنيا باعوا من زمان
و اللى مبيتقتلوا ما بعوش

و برضه حقولك ان الاغنيا دوا اتغنوا على حساب اخوانهم الفقرا اللى بيموتوا

واحدة مفروسة said...

قبلاوى
------------
لأ
مفروسة علشان ما اغتنى فلسطيني الا على حساب واحد فلسطيني فقير
وما عاش فى حياة كريمة الا على حساب واحد فلسطيني بيسف التراب و بيموت
ده اللى فارسنى
و يجوا بقا المصريين يعملوا فيها 7 سباع فى بعض
اتفرس ولا ما اتفرسشي
خلونا نركز مع روحنا و نسيب الفلسطنين للفلسطنين يعملوا ما بدالهم
قال يعنى همه كانوا سمعولنا قبل كده
الا كله هات هات هات
تحياتي
و شكرا لمرورك

محمد بدر said...

لقد اسعدني تشريف بيتك الجميل
مدزنة تستحق المتابعة
ادعوك لزيارة مدونتي
اللغة العربية لها حق عليك فشارك بقراءة الموضوع والتعليق عليه ونشره بين اصدقائك
http://badr4all.blogspot.com/
"انحطاط اللغة العربية وفساد الذوق العام وظاهرة مايدعي ابو الليف"

مجداوية said...

السلام عليكم

وتروحي بعيد للدنمارك ليه , في نفس فلسطين داخل اسرائيل عرب مش عايزين يعيشوا غير مع الاسرائليين لأن عيشتهم أفضل وأحسن وناس منفصلة تماما عن القضية وهنا في مصر ناس عايشة في قصور وناس عايشة في جحور

اومال ربنا حيحاسب مين لو كانت كل الناس حاسة ببعض ؟!!!

مجداوية said...

معلش , مكنتش قريت تعليقك قبل ما أعلق تعليقي السابق

كتبتِ تقولين :

اتفرس ولا ما اتفرسشي
خلونا نركز مع روحنا و نسيب الفلسطنين للفلسطنين يعملوا ما بدالهم
قال يعنى همه كانوا سمعولنا قبل كده
الا كله هات هات هات


!!!!!!!

أنا بأحزن لما بأقرأ كلام زي ده لأني بأحس إنهم نجحوا يخلونا منحسش ببعض
يا أختي الحبيبة الفلسطيني الغلبان اللي بيسف التراب مش مسئولية أخوه الفلسطيني الغني فقط لكن مسئوليتنا جميعا لأننا أخوة في الدين وده أكبر وأهم من أخوة الدم أو المكان
الفقير المحاصر المسلم في أى مكان مسئولية كل المسلمين
ده أخوكي في الدين
المفروض مفيش فرق بين مصري وفلسطيني وماليزي
ولا نحسب مؤمنين إلا باستشعار أخوة الدين

قال رسول الله صلى الله عليه وسلم :
لا يؤمن أحدكم حتى يحب لأخيه ما يحب لنفسه


والايثار درجة أعلى فعلها الأنصار مع المهاجرين قد لا نتخيلها في هذا الزمن المادي

فإذا أثم الفلسطيني بتخليه عن أخيه فنحن أيضا نأثم إذا تخلينا عنه ولو فكراً
فأضعف الايمان أن نقف معهم ولو بالقلب

مش نقول نفكر في روحنا !!!
للأسف نجحوا إنهم يخلوا فيه فرق بينا
فأرجو إعادة النظر وتدبر كلام رسول الله

والله المستعان

الشـوكة الــنـاعـمـة said...

السلام عليكم
هههههههههههههه
بجد مدونتك جميله ضحكتنى اوى وانا من زمااااااان ماضحكتش
جزاكى الله خير
تعرفى عندك حق فى ناس كتير كده بتتواصل بقلب كداب ومن كتر ماهو بيكدب على نفسه بعد مرور الوقت بيصدق نفسه فاتلاقى رد فعله طالع طبيعى اوى
على كل حال تحياتى
تقبلى مرورى

واحدة مفروسة said...

محمد بدر
-------------
حاضر يا فندم حنزورها
و شكرا لمرورك

واحدة مفروسة said...

مجداوية
---------
اولا انا سعيدة جدااا بمرورك
و سعيدة اكتر باختلافك معي بالراى
بصي يا مجودة
اولا حديث الرسول عليه الصلاة و السلام
لا يؤمن احدكم حتى يحب لأخيه ما يحب لنفسة
انا مش شايفاه لايق على الفلسطنين
و حقولك ليه
بس الاول خلينى اتفق معاكي انه يوجد بعض الفلسطنين الغلابة جدااا
اللى رايحين فى الرجلين
بس برضه ما تنسيش ان فيه اخوان ليهم من نفس ديانتهم و من نفس جنسيتهم باعوهم من زمااااااااااااان
و بيبعوهم دلوقتى كمان

و ما تنسيش انهم برضه اللى من نفس ديانتك اللى بيستغلوكي
و بيستنفزوا طاقاتك و بيخربوا من تحت لحت
زي ايران

و ما تنسيش قصة سيدنا موسي
لما نصر اليهودى على القبطى
و بعدين تاني بوم جه تاني يستنجد بيه
و قال له موسي انك لغوى مبين
و اهو نبي
و اهو من نفس دينه

انا بيطمئن قلبي لحديث الرسول علىه الصلاة و السلام
انى اللى بحبه لنفسي من خير احبه لاخى
و ربنا ماقالشي اخويا مين
المسلم ام القبطى ام اليهودى
سابها مفتوحة

ماجدة
انتى معايا بان الغرب بيطبقوا كتير من تعاليم الاسلام اكتر من المسلمين انفسهم
كونهم انهم بيشركوا بالله ولا لأ ده بينهم و بين ربهم

ما كان ربنا سبحانه و تعالى قال فى كتابه العزيز
اهل الكتاب
مين همه اهل الكتاب؟
فى صورة البقرة
ربنا بيقول ان النصارى اقرب الينا
لان فيهم قسيسين و رهبانا
و ربنا عارف انهم بيقولوا على المسيح ربنا
بدليل انه قال لعيسي
هل طلبت منهم ان يتخذوك الاها
قاله
فإن قلته فقد علمته
ربنا عليم بكل الامور

الدين معاملة
مافيه ناس كتيرة مسلمين قتالين قتله و ارهابيين
و حرامية
حقف معاهم بقا علشان من نفس ديني؟
لا طبعا
انا شايفة ان ربنا عاوزنا نعيش كلنا فى سلام
ما حدش يستغل حد
ماحدش يكدب على حد
ما حدش يسرق حد

بصي انا متأكدة اننا متفقين فى نقاط كثيرة
بس اسلوبي فى طرحها مختلف عن اسلوبك فى طرحها
و على هذا بنحس ان فيه تعارض
بس انا مش معاكي برضه فى موضوع الفلسطينين
و بكرة ربنا يديكى العمر
و تقولى كان عندك حق يا مفروسة

انتى عارفة انا مع القضية الفلسطينية بس فى الجانب اللى بيعود عليا بالنفع
و لعلمك عمر ما اسرائيل حتسيب القضية تتحل
علشان تفضل شوكة فى الزور
و بتدفع لناس فى فتح و حماس علشان يفضلوا كده

يا بنتى دول كانوا فى الكعبة
ووراهم بيت الله الحرام
و قروا فاتحةو عملوا عمرة
و رجعوا ضربوا فى بعض
اسلام ايه اللى بنتكلم عنه
ذنب اهاليهم فى رقبتهم همه
مش فى رقبتى انا
تحياتي ليكي

واحدة مفروسة said...

الشوكة الناعمة
---------------------
اهلا و سهلا بيكي دائما
كويس انك صحكتى مش اتفرستى
تحياتي

مجداوية said...

السلام عليكم

أختي الحبيبة
إقرأي معي ما سأعرضه عليك من آيات الله البينات
ثم أعقب على ما كتبتيه
قال الله تعالى في سورة الحجرات

وَإِنْ طَائِفَتَانِ مِنَ الْمُؤْمِنِينَ اقْتَتَلُوا فَأَصْلِحُوا بَيْنَهُمَا ۖ فَإِنْ بَغَتْ إِحْدَاهُمَا عَلَى الْأُخْرَىٰ فَقَاتِلُوا الَّتِي تَبْغِي حَتَّىٰ تَفِيءَ إِلَىٰ أَمْرِ اللَّهِ ۚ فَإِنْ فَاءَتْ فَأَصْلِحُوا بَيْنَهُمَا بِالْعَدْلِ وَأَقْسِطُوا ۖ إِنَّ اللَّهَ يُحِبُّ الْمُقْسِطِينَ (9)


إِنَّمَا الْمُؤْمِنُونَ إِخْوَةٌ فَأَصْلِحُوا بَيْنَ أَخَوَيْكُمْ ۚ وَاتَّقُوا اللَّهَ لَعَلَّكُمْ تُرْحَمُونَ (10)


يَا أَيُّهَا الَّذِينَ آمَنُوا لَا يَسْخَرْ قَوْمٌ مِنْ قَوْمٍ عَسَىٰ أَنْ يَكُونُوا خَيْرًا مِنْهُمْ وَلَا نِسَاءٌ مِنْ نِسَاءٍ عَسَىٰ أَنْ يَكُنَّ خَيْرًا مِنْهُنَّ ۖ وَلَا تَلْمِزُوا أَنْفُسَكُمْ وَلَا تَنَابَزُوا بِالْأَلْقَابِ ۖ بِئْسَ الِاسْمُ الْفُسُوقُ بَعْدَ الْإِيمَانِ ۚ وَمَنْ لَمْ يَتُبْ فَأُولَٰئِكَ هُمُ الظَّالِمُونَ (11)


يَا أَيُّهَا الَّذِينَ آمَنُوا اجْتَنِبُوا كَثِيرًا مِنَ الظَّنِّ إِنَّ بَعْضَ الظَّنِّ إِثْمٌ ۖ وَلَا تَجَسَّسُوا وَلَا يَغْتَبْ بَعْضُكُمْ بَعْضًا ۚ أَيُحِبُّ أَحَدُكُمْ أَنْ يَأْكُلَ لَحْمَ أَخِيهِ مَيْتًا فَكَرِهْتُمُوهُ ۚ وَاتَّقُوا اللَّهَ ۚ إِنَّ اللَّهَ تَوَّابٌ رَحِيمٌ (12)

إنما المؤمنون أخوة
ولكن هذا لم يمنع أن نكون مؤمنين بالله وبيننا من يمشي بالنميمة ومن يسىء الظن ومن يقاتل أخيه
لكننا مشتركين في الايمان بالله وبأن محمدا رسول الله

وهذا غير متوفر في اليهود ولا النصارى أو بمعنى أصح من بقى على كفره بالله وبرسول الله

وسأضرب لك مثلا ولله المثل الأعلى

لو هناك من يتعامل معك بكل المعاملة الحسنة ولكنه لا يعترف بوالدك ولا بوجوده ويتهمه بالكذب والسرقة ومهما قدمتي له من أدله أنه والدك وأنه صادق وأنه لم يسرق يصر على اتهاماته فماذا كنتِ ستفعلين له ؟
هل كنتِ ستظلين على محبتك وودك واحترامك له ؟ رغم اساءته الشديدة لوالدك ؟
أعتقد أن الجواب سيكون لأ بالتأكيد فحبك لوالدك ويقينك أنه والدك وأنه صادق وأنه شريف سيجعلك على أقل التقديرات تقطعي علاقتك مع هذا الشخص
فما بالك برسولك الكريم سيد الخلق الذي لا يعترفون بنبوته ولا برسالته ويتهموةنه بالكذب والسرقة من كتبهم المحرفة !!!

وما بالك بالله سبحانه وتعالى الذي جعلوه إنسانا وجعلوا له ولدا وأما وكذبوا كلامه وقرآنه

ومع ذلك أمرنا أن نبرهم ونقسط إليهم طالما لا يحاربونا في الدين

فحدود العلاقة هي العدل والبر والاحسان إليهم ولكن الحب والنصرة والمؤازرة لأخي في الدين وفي الايمان بالله
وأن ننصره ظالما أو مظلوما ونصرته ظالما أن نكف يده عن الظلم ونظهر له خطأه ونعينه على فعل الصواب


أما قول الله أنهم أهل كتاب فهم بالفعل أهل كتاب وصفهم الله في قرآنه بأنهم ليسوا سواء وأن القسسين والرهبان عندما سمعوا القرآن فاضت أعينهم من الدمع لما عرفوه من الحق فأسلموا فلا بد أن نكمل الآية لنعرف من قصدهم الله

ووصف الله الآخرين بأن من أهل الكتاب كفروا بآيات الله
واقرأى معي تلك الآيات
من سورة أل عمران يميز فيها الله الصالحين منهم

لَيْسُوا سَوَاءً ۗ مِنْ أَهْلِ الْكِتَابِ أُمَّةٌ قَائِمَةٌ يَتْلُونَ آيَاتِ اللَّهِ آنَاءَ اللَّيْلِ وَهُمْ يَسْجُدُونَ (113)


يُؤْمِنُونَ بِاللَّهِ وَالْيَوْمِ الْآخِرِ وَيَأْمُرُونَ بِالْمَعْرُوفِ وَيَنْهَوْنَ عَنِ الْمُنْكَرِ وَيُسَارِعُونَ فِي الْخَيْرَاتِ وَأُولَٰئِكَ مِنَ الصَّالِحِينَ (114)


وقال عن من كفر منهم في سورة البينة

إِنَّ الَّذِينَ كَفَرُوا مِنْ أَهْلِ الْكِتَابِ وَالْمُشْرِكِينَ فِي نَارِ جَهَنَّمَ خَالِدِينَ فِيهَا ۚ أُولَٰئِكَ هُمْ شَرُّ الْبَرِيَّةِ


صدق الله العظيم


يتبع

مجداوية said...

الخلاصة أن الله حدد الأخ بأنه المؤمن بالله وبرسول الله

وليس كما ذكرتي لم يقل إذا كان مسلم أو قبطي أو يهودي

لأن القبطي واليهودي الآن كافر بما أؤمن أنا به ونحن كافرون بما يؤمنوا به فهي ليست سبة ولكن توصيف
وسنكون عليهم شهداء يوم القيامة وسيكون الرسول علينا شهيدا

ولكن حبنا لله ولرسوله يلزمنا بالولاء المطلق لهما والبراء من أى عدو لهما

فلا أحب من لا يؤمن بربي ورسولي ولا أوالي من يحاد الله ورسله

وضحت الصورة ؟؟

للأسف كثير منا يفهم خطأ العقيدة وكنت أردد مثل كلامك تماما قبل أن أدرس العقيدة وأقرأ تفسير آيات القرآن
ولم تختلف معاملتي الحسنة لمن يخالفني في العقيدة بل تحسنت أكثر لأني أشفق عليهم وأنفذ تعاليم ربي بالبر والقسط لكن بوعي دون إفراط ولا تفريط

وإذا كان الله سبحانه وتعالى قال عنهم :

يَا أَيُّهَا الَّذِينَ آمَنُوا كُونُوا قَوَّامِينَ لِلَّهِ شُهَدَاءَ بِالْقِسْطِ ۖ وَلَا يَجْرِمَنَّكُمْ شَنَآنُ قَوْمٍ عَلَىٰ أَلَّا تَعْدِلُوا ۚ اعْدِلُوا هُوَ أَقْرَبُ لِلتَّقْوَىٰ ۖ وَاتَّقُوا اللَّهَ ۚ إِنَّ اللَّهَ خَبِيرٌ بِمَا تَعْمَلُونَ (8)


ومعنى شنآن أى البغض
وأمرنا بالعدل فما بالك بأخوتنا في الدين


وآخر نقطة لتوضح موقف الله من الكفار من اليهود والنصارى هو منعهم من الاقتراب من بيت الله الحرام
هذه الآية الكريمة من سورة التوبة التي تسمى أيضا بسورة براءة


يَا أَيُّهَا الَّذِينَ آمَنُوا إِنَّمَا الْمُشْرِكُونَ نَجَسٌ فَلَا يَقْرَبُوا الْمَسْجِدَ الْحَرَامَ بَعْدَ عَامِهِمْ هَٰذَا ۚ وَإِنْ خِفْتُمْ عَيْلَةً فَسَوْفَ يُغْنِيكُمُ اللَّهُ مِنْ فَضْلِهِ إِنْ شَاءَ ۚ إِنَّ اللَّهَ عَلِيمٌ حَكِيمٌ (28)


صدق الله العظيم


وأرجو ألا تحذفي أو تحجبي تعليقي لحساسيته كما حدث سابقا فأنا مسئولة عن كل كلمة فيه

عبده الرايق said...

لسه زى مانتى مفرووووووووووسه ؟؟؟؟
هههههههههه
فاتتك الفرصه الكبيره بتاعه بيبسى
دقيقتين محمول على كل ازازه
والمصيبه الكبيره ان كتير من الازايز تفتحها وتدخل الكود يبعتلك رساله تقولك الكود ده تم ادخاله من قبل وسيتم خصم 30 سحتوت بعد تالت محاوله
وانا اللى فاتح الازازه
هههههههه
يبقى اكيد فى حد فتحها قبل كده
عموما
كنا هنبيع ساقع ونكسب بالهبل
دتنا نيله فى حظنا الهباب

عبده الرايق said...

اما بقى بخصوص البوست
ده مش مفرس نهائى
يابنتى العزيزه
يا مفروسه الغاليه فى ناس كتير كده
وفى الاسره الواحده بالذات
تلاقى الاخ غنى جدا جدا جدا فيرى فيرى فيرى ريتش
واخوه فقير جدا جدا جدا فيرى فيرى بوور
وتلاقى الغنى عايش بعيد عن عالم الفقير ومش بيديله اى حاجه
على فكره
والله دى حكايه حصلت قدامى فعلا
العيب مش فى البلد
نو
نو
نو
العيب فى الانسان نفسه
العيب فى الانانيه

عبده الرايق said...

على فكره
لو عقلك وزك ورجعتى لجردل الساقع
انا فودافون
يعنى يحق عليا غطاء الازازه
وغطاء قليل يمنع بلاوى كتيره
الف تحيه ليكى ولزوار مدونتك

Haytham Alsayes said...

بصراحة حاجة تفرس بجد



تحياتي

سبهللة said...

مفروستى حبيبتى
وحشتييييييينى جدا ووحشتنى مدونتك وكلامك
ووحشنتى فرستك

بس المرة دى فرستك ما فرستنيش
لانى عارفة الموضوع دة من زمان
وكل من هم خارج فلسطين
دورهم الوحيد فى الحكاية دى
ان الناس الغلابة اللى جوه فلسطين
صعبانين عليهم اوى ومش عارفين يعملولهم ايه
حتى التبرع
اخر حد ممكن يتبرع لفسطين واهلها
هم الفلسطنين نفسهم اللى عايشين برة فلسطين
واحنا بس اللى قلبنا واكلنا عليهم

Wanda said...

بصى يامفروسة
واحدة قالتلى ان الفلسطنين من ياسهم انهم يرجعوا
بيعيشوا فى اى بلاد غربة بالقوى بتوغل و بيحاول ينسوا المنشاء و العودة

المصرين غير مبنغمسوش فى الغربة قوى كده الا لو كانت العودة بخسارة كبيرة

شهد الكلمات said...

حاجة مش غريبة ولا مريبة
دلوقتي الدم بقي ماية و لا في مشكلة
عادي واحد يموت مش مشكلة عشرة يموتوا مش مشكلة
المهم نفسي نفسي

هو ده بقي حالنا يا نوسة كل يبكي على ليله
ولا حول ولا قوة الا بالله
و حسبي الله و نعم الوكيل

تحياتي

كلام على بلاطة said...

له فى خلقه شئون
تحياتى
=====احمد ربنا واشكره على ما انت فيه وفى اى مرحلة

اما المنغصات وان وجدت فهى مهدئات زى الفرملة

حتى لا تتغر ولا تتبطر …وفكر جيدا فى هذه المسألة

واى صعوبات طالما قابلة للاحتمال ليشت معضلة

تعيش بيها وتسعد رغم ما فيها وهذه حكمتى المفضلة

وكم هى مملة الحياة المريحة والادوار الخاصة المفصلة

ونهايتها المرض النفسى او للخلل العقلى حتما موصلة

فالوصول للكمال بداية للزوال وهذه حكمتى المرسلة