احنا كده خلاص.....ولا فيه أمل

ازيكم جميعا

حد يقولى....
هو احنا كده خلاص؟؟؟
و لا لسة فيه أمل؟؟؟
انا مش عاوزة اتشائم..!!
.و لو ان الفرسة اللى انا فيها بتخليني على طول لابسة النظارة السودا الغطيس.
بس بجد هو فيه أمل؟؟؟
احنا كنا من سنتين زعلانين ان الاسعار بتزداد مرة فى اول السنة..
فى يومنا هذا...اليوم المشؤم...الاسعار بتزيد كل اسبوع
و ياريت زيادة بنسب..لا... زيادة عشوائية!!!
زي كل العشوائيات فى بلدنا....
ايه بقا؟؟؟؟؟
هو مش زيادة الاسعار ديه حتزود السرقات؟؟؟
القتل؟؟؟؟ الجرائم بصفة عامة؟؟؟؟
حتزود الفساد اكتر ماهو زيادة و بيطفح....
هو الغلاء ده
مش حينزل الناس..مش تحت مستوى الفقر
لااااااااااااااااااااا
ده فى القاع
انا حاسة ان الحكومة فلت منها زمام الأمور كلها،
مش عارفة تسيطر على حاجة فى البلد
كلمتها اصبحت غير مسموعة
الحكومة فقدت هيبتها
وباتت قرارتها عشوائية هيه كمان
يا تري واخدينا على فين؟؟؟؟؟

انا شخصيا مش عاوزة اروح فى حتة
و اهلى علموني ما اروحشي مع حد ما اعرفوش
انا ما يهمنيش مين اللى يحكم مصر
انا اللى يهمنى ان مين ما كان يتقى الله فينا
و يحاول الاصلاح
انا مايهمنيش مين مرشح فى مجلس الشعب
لانه مش حيفرق
لو كان بيعرف ربنا قبل الكرسي
بعد ما بيقعد على الكرسي بيعمل تحالف مع ابليس و ذريته
و يتسرع على الفلوس و النفوذ
انا عندى حالة من الإكتئاب...
عاوزة الدنيا تتصلح.....
حد يقولى انا اعمل ايه؟؟؟؟
انا فكرت ازرع فى بلكونتي فى صفايح الجبنة الكبيرة
طماطم ،وخيار،وملوخية
و اعمل تقفيصة اربي فيها فرختين، على كام ارنب
و ازرع ذرة
و ابقا اطحنه و اعمل منه العيش....

انا مش عاوزة احبطكم
ولا عاوزة اكئبكم
ولا عاوزة ابهت عليكم بفرستى
بس انا مش شايفة اى بصيص من اي أمل
وخايفة من العواقب
على جميع المستويات
اللهم احفظنا يارب
اللهم اضرب الظالمين بالظالمين و اخرجنا من بينهم سالمين يارب العالمين

26 زارونى......و اتفرسوا:

мαησηα said...

ولا انا يا مفروسة شايفة اى بارقة امل

بس كل الناس بتقول ان اخرة اللى احنا فيه ده اكيد هيبقى حلو مش وحش وهتحصل ثورة تانى بعدها حالنا هيتعدل

وبقول انا انه مستحيل ده يحصل بس ارجع واقول اش فهمنى انا ف السياسة :(

ربنا يستر يا مفروسة

نورتى بلوجر اوعى تسيبينا تانى

:) :* :*

صيدلانيه طالعه نازله said...

الامور واضح اوووى انها بتتجه من سيىء الى اسوا
لان البشوات الكبار حاليا مش مركزين خاااااااالص فى الحاجات التافهه دى و كل همهم التركه و الميراث و توزيع التورته
بس اللى هما مستهيفينه دلوقت عامل زى كوره التلج كل ما بتنزل و تلف بتكبر لغايه ما حتبقى قنبله كبيره حتفرقع فيهم و فى المجتمع كله
ربنا يستر بجد

t3ban said...

انا من موقعي هذا احب اطمنك اننا داخلين علي ايام حلوة

MR.PRESIDENT said...

مشاء الله انتي لسه عندك امل انك تزعي وتطحني وتربي فراخ


من النهارده مفيش حاكومه انا الحاكومة

Doba said...

معاكى يا معلمة مفروسة فى الفرسة دى
لازم ف النهاية المطاف نوصل لحد الكفاف زى زمان


ربنا يسترها

تحياتى
هبة

Ahmed Mubarak said...

الامل موجود بس نؤمن نقتنع بيه .. وان شاء الله خير

Mafrousa said...

мαησηα
-----------
ثورة؟؟؟؟
و الله انا خفت اكتر لما قلتى الكلمة ديه؟؟؟
يارب بكرة يكون احسن من النهاردة
و حالنا يتعدل
تحياتي
و شكرا على مرورك

Mafrousa said...

صيدلانيه طالعه نازله
---------------
و الله عندك حق يا علا
من سيء الى اسوأ
حاجة تفرس
طبعا الشعب المصري اغلبه بقا قنبلة موقوتة
ربك يستر
تحياتي و شكرا لزيارتك

Mafrousa said...

t3ban
----------
انت مش محتاج تتكلم اصلا
اسمك بيقول.....تعبان....:(((
تحياتي و شكرا لمرورك

Mafrousa said...

MR.PRESIDENT
---------------
مشي يا عم الحاكومة
و النبي تشوفلك صرفة فى الموصلات
و العيش...و الخضار...و الفاكههة.....و......و.....
اكمل ولا انت عارف؟؟؟
طبعا انت عارف كل حاجة
ده انت الحااااااااااااااااااااااااااكومة
:)
تحياتي و شكرا لمرورك

Mafrousa said...

Doba
-----------
و الله يا هبة الكفاف ده احنا فيه بقالنا سنين
و لما وصلناله قلنا خلاص احنا جبنا آخرنا
طلع ان فيه حاجة لسة بعدها باين...
اصل مش معقول نفضل فى كفااااااف سنين طواااااااااااااال عجاااااااااااف
ديه بقت حاجة تفرس

Mafrousa said...

Ahmed Mubarak
--------------------
طول ما فيه ربنا
حيفضل الامل موجود يا احمد
بس ربنا مش بيرضى بالظلم
و احنا مظلووووووووووووومين جداااا
تحياتي و شكرا لمرورك

Shaimaa said...

انتى عندك مليوووون حق فى اللى بتقوليه... ومش مبالغة ولا عايزة تبهتى علينا اكتئاب وفرسة ..لأ.. دى الحقيقة المرة اللى ملهاش حل ...احنا بنرجع لورا كل يوم 100 سنة..

بنت الغربة said...

مفرووسه حبيبتى
والله انا كمان نفسى اعمل كده بعد الطماطم مابقت ب8 جنيه
والخيار ب6 جنيه
بجد حاجه تفرس ...حتى الكوسه غليت..
انا باقول اروح ازرع فى البلكونه
واهو اوفر تمن الخضار..
والله يامفروسه انا مش متفائله نهائى باللى بيحصل فى البلد..
ربنا يستر
تحياتى ياقمر

Sonnet said...

بعد التحية
أنا عندي فكرة عن التدوين
أنا قيمت أو انتقدت مدونتي،ممكن تشارك و تقيم مدونتك!
http://shayunbiqalbi.blogspot.com/2010/10/2.html
أنت مدعوة للمشاركة في حملة مدونات في الميزان
مع خالص تقديري للمشاركة

Sonnet said...

بعد التحية
أنا عندي فكرة عن التدوين
أنا قيمت أو انتقدت مدونتي،ممكن تشارك و تقيم مدونتك!
http://shayunbiqalbi.blogspot.com/2010/10/2.html
أنت مدعوة للمشاركة في حملة مدونات في الميزان
مع خالص تقديري للمشاركة

Tarkieb said...

أنت عارفة في مظاهرات 18 و19 يناير خرجت الناس تقول يا جيهان يا جيهان جوز الجزمة بسبعة جنيه؟ بكرة اولادك يخرجو ويقولو يا جمال يا جمال كيلو الطماطم بالف جنيه..مش حالك يا ستي اللي رضي ان سعر الجزم يوصل 100 جنية وساكت حيجيب طماطم حتى لو 10 جنية..طبعا مفيش امل ..واللي اخدته القرعة تاخده ام الشعور..

alaa esa said...

من غير ما افرسك مش عندك حق خالص ممكن على مستوكى العائلى حددى عدد من الاسر المحيطه بيكى و تعرفيهم كويس و راجعى تطور حياتهم الماديه بشكل محايد هتلاقى حقيقى مفاجاءه ان معظم حصل لهم تطور فى حياتهم ماديا بشكل او باخر يعنى زمان كنا بنعيش بكام فى حدود احتياجات محدوده و طموحات محدوده برضه بس النهارده الاحتياجات تعددت و الطموحات باه مالهاش حدود اعتقد على مستواكى الشخصى يا مفروسه هانم هتلاحظى كده كويس

ELMOSTAFZ said...

ربنا مايزيد فرستك ، بس لو هاتفضلي مفروسة كل ما حاجة تحصل هاتكون العواقب مش كويسة :)
تحياتي لفرستك...

شمس النهار said...

ساعات كتير بيصبني الاحباط زيك كده
وتسود الدنيا قصاد عيني
واقول هو ابن بنتي ده مستقبله هيكون ازاي لما الحاضر ده كده

بس مش بسيب نفسي كتير
علشان المستقبل بيد الله

والتغيير سمة الحياة
ودوام الحال من المحال

كل سنه وانتي طيبه
وبتغيبي ليه عن مدونتك كده

:))

شمس النهار said...

كل سنه وانتي طيبه وحبيبه
وعقبال 100 سنه ياجميلة
:)

Tarkieb said...

اللي صبر تلاتين سنة ممكن يصبر زيهم برضة...مفيش امل

Baskouta said...

كل سنة وحضرتك طيبة وبخير
عيد سعيد عليكي يارب
بسكوتك
:)

Hina wi Hinak said...

كل سنة وانت طيبة

ana ga3an said...

يعني اية امل؟؟

Plogs said...

This is such a nice addition thanks!!!
فعاليات الصوتي
شات صوتي
شات صوتي
شات صوتي
غلا الصوتيه
شات صوتي
شات صوتي
شات صوتي
شات صوتي
الشات الصوتي
غلا الصوتيه