كل عام و انتم بخير

ازيكم جميعا

كل سنة و انتم طيبين و بخير

و ان شالله اللى نفسه فى حاجة ربنا يحققهاله لو فيها خير

زي ما انتو كنتوا ملاحظين انا كنت قافلة المدونة

مش علشان حاجة بس كان نفسي اغير فيها شوية

و بعدين افتكرت اني لما بلعب و اغير فيها حاجات بتبوظ منى

قلت بلاها خلينا زي ما احنا،

و ده غير انى لاقيت صورة مفروسة فى مدونة تانية

زعلت مش عارفة ليه؟

مع ان الصورة اصلا انا جايباها من النت

يعنى اي حد ممكن ياخدها

بس حسيت فى التدوين ان الصورة كفيلة انها تعرفك مين صاحبها

و تغني عن انك تدور على الاسم

وده بالنسبة للناس اللى مش غيرت صورة البروفيل بتاعها و ثابته عليه

يعنى صورة فاتيما اول لما اشوفها اقول ديه فاتيما

و صورة البروفيل بتاع مفقوعة

و البروفيل بتاع كاميليا و رندا و قوس قزح و غيرهم

كلها صور من النت بس خلاص احنا المدونين عرفنا بعض بيها

و لسة مستنية يغير الصورة بس يظهر هو مبسوط انى مفروسة منه

المهم

انا طبعا مش ينفع اعيد عليكم و امشي من غير ما اقولكم على فرسة صغنونة كده

النهاردة شائت الظروف انى اتلاقى مع بعض الشخصيات

كان منهن السورية و الاردنية و المصرةي من اصل تركي

المهم ان الاحاديث اللى دار بيننا كان معظمها عن البلاد الاربعة

مصر و تركيا و سوريا و الاردن

مش حفرسكوا بتفاصيل الحديث

و لكن ما احزنني

ان هم اجمعوا على ان مصر دون عن البلاد الاخري

التى لا تحترم قوانين المرور و كل ما بها عشوائي

صحيح بيحبوها جدااا

و لكن السورية قالتلى احنا دلوقتى بنحب بشار جداااا

الشوارع بقت منظمة جداااا

يعنى مش ينفع تاكسي مرة واحدة ياخد يمينه علشان يركب ناس

على طول بيتاخد مخالفة بحوالى 2000 دولار

و ان الباسات ليها حارة مخصصة لايمكن ان تسير فى نفس المكان اللى بتسير فيه العربيات

ده غير ان التركية اكدت ايضا ان صحيح يوجد زحام و تكدس مروري فى بعض الشوارع

لكن يوجد نظام ده بالنسبة لتركيا

الاتوبيسات لايمكن لها ان تسير و بابها مفتوح مثلا

و اكدت ايضا ان التاكسيات ليها مكان مخصص تتوقف فيه مش فى اي حته ولا اي مكان

علشان تركب او تنزل ركاب

يعنى سوريا و تركيا بدأوا يبعدوا عن العشوائيات فى السلوك العام

و يلتزموا بالنظام

الاردنية ماقالتشي حاجة عن الاردن كانت ساكتة

يمكن حالها زي حالى

اتفرست جدا الصراحة

يعنى بلدنا و الهرجلة اللى احنا فيها ديه

نابعة على فكرة مننا احنا

احنا اللى مش منظمين

احنا اللى مهرجلين

و ديه حاجة برضه تؤآخذ عليها الحكومة

انها مش فاضية انها تجبر الناس على النظام

لأ هيه بس فاضية للم الفلوس من الناس

حاجة تفرس

حمدت ربنا اننا لم نتحدث عن النظافة

كان زماني دلوقتي منتحرة مش مفروسة بس

كل سنة و انتم طيبين و معايا مفروسين

ده بجد؟؟؟؟!!!! ولا انا بحلم؟؟؟؟؟!!!!!

ياحلييييييييييييييييلة

انجلترا حتسد الثغرات فى القانون بتاعها

علشان عيب و غلط

انهم يطلعوا مذكرة بإعتقال الست ليفة

على انها مجرمة حرب

و بكده يصبح الانجليز ا اعداء للسلام ، و مش ينفع خااالص

انهم يستمروا فى مباحثات السلام فى الشرق الاوسط

و هددت اسرائيل انجلترا

قالتلها حتندم يا جميل على الحكم ده

و والله حخاصمك و مش حلعب معاكي تاني

انتى لازمن ولابد تغيري القانون بتاعك اللى مليان ثغرات

قوم انجلترا خافت و اترعبت

و قالت لاااااااااااااااااااااااا

انا ازعل اسرائيل حبيبتى !!!!!!

كلا انا اغير ام القانون و ابوه كمان

هيييييييييييييييييييييييه

اسرائيل بتلعب بالدول كلااااااااااااتها

ياحلييييييلة

انا مهيسة و مفروسة

يعنى انا زعلانة من روحي أوي علشان لاقيت

الشمعدان فى لعبة من الألعاب

و على رأي الزميل احمد سمير

الشمعدان زي ما بتحبه بيحبك كمان

انا بقا أكيد بحلم علشان مش اتفرس

يااااه انا نفسي نتعلم من اسرائيل ديه حاجة واحده فقط

و هو تعزيز مواطنيها فوق كل الدول و القوانين

و علشان خاطر مواطن حتى لو كان مسؤل

بتغير قوانين دول

ياربي

هو احنا رخاص اوي كده ليه؟؟؟؟؟؟

ليه حكومتنا مش بتعززنا

يعنى احنا بس نصدر شغالين ؟؟؟!!!

ايوه عندنا علماء

و ادباء

و مبتكرين و مبدعين

البلد اللى فيها كل دول

ما ينفعشي يصدروا شغالين

يصدروا حرفيين اه

شغالين لأ

خلوا الشغالين فى وسطينا....مننا و فينا

حاجة تفرررررررررررررس

شعور بالذنب فظيييييييييييع

أزيكم جميعا

انا زي اي حد طبيعي ...لما يضايق او يزعل ، او يتفرس و عاوز يخرج من الفرسة او الضيق

بيدور على فسحة ظريفة لطيفة، بصحبة جميلة للخروج من المود الوحش

انا بقا علشان اخرج نفسي من الفرسة الدائمة الأبديية،

اقرأمجلة ميكي، او العب سودوكوا، و مؤخرا بقيت العب العاب الفيس بوك

اللى كنت بنتسابق انا و اصحابي علشان نخفف عن انفسنا،

و اللى بتخلى ولادها يلعبوها علشان يتلهوا فى اي حاجة غير الخناق فى البيت

و فيه اللى ادمنوها

و الصراحة انا شايفاها العاب ظريفة مش مؤذية

المهم لفت نظري و جود شمعدان متداول فى الالعاب، ادخل فى قلبي الشك و الريبة

و قلت الشمعدان ده شكله بيفكرني بحاجة كده تفرس

اللهم احفظنا

المهم دعبست كعادتي دايما

و دعبست كتير لأن النت انتو عارفين فيه كتير كلام مغلوط و متفبرك

و اللى عاوز يكتب اي حاجة حيكتبها

المهم اتأكدت و تيقنت ان الشمعدان المذكور

هو للى ماتتسماش

اللى اتمنى ان ربنا يمحوها من على وجهه الارض

قولو آمين

الشمعدان المذكور اهو

آآآآآآآنآآآآآآآآآآن

ودية صورتة من داخل المعبد بتاعهم فى القاهرة

يالهوتييييييييييي

طبعا انتو دعبسوا بقا براحتكم

و لموا معلومات كما تشاؤن

و ابحثوا

انا قريت كتير و طبعا كلها اجتهادات من كتابها

الويكبيديا بعدت عنها لانهم قالولى انها بتحط كلام كتير مغلوط

و من اهم الحاجات اللى مغالطين فيها

ان حسن نصر الله ينتمي لسلالة الرسول من الاشراف

و دليل على هذا انه يلبس العمامة السوداء

فعلى هذا ان كل من يلبس العمامة السوداءينتسبون لنسل الرسول

( و اللى انا كنت عارفاه ان اللى بيلبس عمامة سوداء من الشيعة فقط)

كده بقا الدنيا ملخبطة و الناس للأسف بتصدق بسرعة،

و بتحاول تقنع غيرها، و بتآوح كمان

انا بقا لا بآوح ولا نيلة

انا بقولكم ياريت تدعبسوا، و تدورولى على المعلومات الصحيحة

اللي انا عارفة انها كلها حتكون مفيدة لينا كلنا

اللينك اللى انشرح له قلبي و صدقته هنا

المهم بقا دلوقتى انا علشان اتخلص من الاحساس ده

قررت الآتي:

اولا

حلغي كل الالعاب اللى حلاقى فيها الشمعدان المشؤم

لأنه دليل على هيمنة المنيلين علي عينهم

(اعذروا الفاظي النابعة من فرسة و غيظة ليس لها مثيل)

ثانيا:

حمنع ولاد اختى برضه انهم يلعبوها و حفهمهم بالراحة ،

لأنها بيني و بينكم العاب لذيذة و تشد

ربنا يستر بقا و ما تبقاش معركةحامية بيني و بينهم

ثالثا:

ده العقاب الافظع بجد عليا بس لازم املص وداني و اعاقبنى عقاب كويس

نويت افصل النت عنى لمدة شهر

عقابا لى عما بدر منى

و حيكون بعد 10 ايام

علشان اديلكم الفرصة انكم تدعبسوا

و ادى الفرصة للى لقي معلومة انه يحطها و اقراها و استفيد منها

تحياتي ليكم جميعا و كل عام و انتم بخير

اه

مواضيع فرساني على جنب كنت ناوية اكتب فيها بس خلاص بقا

اولا وجود اطفال تكنس الشوارع و هيه ظاهرة منتشرة جدااااا

(فين القانون اللى بيمنع عمل الاطفال؟؟؟)

موضوع الست اللى اسمها عيشة وزيرة الشغالين

مفروسة منها و قرفانة من اللى هية بتعملة و من افكارها اللى مرخصانا مش معززانا

ابداااااااا

حتخلينا الفلبين حاجة تفرررررررررررررس

موضوع قريتة فى اهرام امبارح بتاع سياج اللى اتحكم له من المحكمة الدولية ضد الحكومة المصرية

و كسب القضية، بان تدفع له الحكومة المصرية 400 مليون جنية

و اللى يفرس ان الحكم الاولى كانت المحكمة هنا فى مصر جكمتله ب 2 مليون

قال ايه مصر مش وافقت

طيب خدى على دماغكم بقا(ده طبعا احنا الشعب)

اهو لجأ لمحكمة دولية علشان يحمل جنسية ايطالية و اتحكم له ب مبلغ محترم

دفعه وزير المالية المحترم برضه

و رايح يلمه من الشعب دلوقتى لأن خزانته ناقصة

حاجة تفرس

دعبسوا بقا على الاخبار السابق ذكرها براحتكم و اتفرسوا براحتكم

لينا لقاء تاني السنة الجاية بس بعد 10 ايام

تحياتي ليكم جميعا نفر نفر و مدونة مدونة

مافيش فرسة خاااالص

فعلا البوست ده من غير فرسة

ما تستغربوش

صحيح انا عيانة

عندى برد

بس البرد العادى ،الغير مصحوب بسخونة

يعنى لا اقلق ان تكون انفلونزا الكتاكيت

المهم زمان كنت بلاحظ ان كل قصص الحب تنشأ فى الصيف

عندما يسافر اغلب الناس للمصايف و تكثر معاها سماع الاغاني الجميلة بتاعة فيروز

و تكثر معها التجمعات الشبابية

و السهر و حفلات السمر

أو تمضية اغلب الاوقات فى النوادى...و ده برضه بيكون مجال للتجمع ،و التعارف

و بداية لقصص الحب

و من قصص الحب هذة، ما نجد ما يستمر منها

و يكبر و ينتهى النهاية السعيدة

و منها ما ينتهى بإنتهاء الأجازة

يعنى موسمي

و منها ما يستمر لبضعة ايام او اشهر بعد الأجازة

وده الحب الصيفي

اما بقا الحب الشتوي

اللى بينشأ فى ايام الشتاء...و ليالية الباردة

غالبا ما بيكون حب انضج قليلا

ده من وجههة نظري

لأنه بيكون حب قائم على الشخصية نفسها

مافيش ما يجذب انتباه الطرف الآخر

يعنى الواحد غالبا

بيبقى لابس كل الهدوم من السقعة

مش زي الصيف

الواحد بيكون حران و بيلبس ما قل و خف

و غالبا فى الشتاء بيكون اللون الغامق هو اللذى يصبغ كل الهدوم الشتوي

مش زي الصيف بالوانة الزاهية اللى بتجذب

و برضه الواحد غالبا فى الشتا بيكون عنده برد و مزكم و بينفف و عنية بتدمع

يعنى لاروج حيثبت ولا مكياج حيفضل

مش زي الصيف اللى بيبقى الواحد واخد لون برونزي جميل يغنى عن كل الماكياجات

و بيبقى لابس نضارة الشمس ..للحماية من اشعة الشمس الحارقة

و بتكون الاطة برضه جذابة لكل من الطرفين

فى الشتا صوت الواحد بيكون خافت طبيعي

سواء أكان من الكحة اللى مبهدلة الواحد...او من السقعة

و الصوت الخافت برضه بيحرك مشاعر

مش زي الصيف اللى الواحد صوتة بيبقى ملعلع جايب لأخر الشارع

و قصص الحب اللى بتبدأ فى الشتاء و تستمر

بتكون قصص قوية جدااااااا و غالبا بتعيش

لأن برضه فيه من القصص ديه اللى بينتهى بإنتهاء الشتاء و بداية الصيف

و بداية الحر و الواحد بيكون زهقان من نفسة اساسا و مش طايق حد

فغالبا بيحصل مشاكل و تتفركش

نيجي بقا للمفيد

انا ليه بقول الكلام ده؟؟؟

حقولكم مش عارفة

يمكن علشان حالات الحب الجميلة اللى بتوج كثير من اصحاب المدونات

و بما انى عيانة و كامنة فى البيت و بزور ناس كتيرة

فلاحظت ان كتير منهم يمرون بقصص حب جميلة

فكرتني بايام الصيف

و ايام الشتاء الجميلة

اللى كانوا كلهم قبل الجواز

اصل بعيد عنكم بعد الجواز

الجو بيصبح خاريفي خماسيني

مصحوب برياح شمالية حنوبية شرقية غربية محملة بالأتربة و الزلط

و كثيرا ما يصاحبها الامطار و ساعات السيول الغزيرة من العيون

كفاية عليكو كده النهاردة لاحسن تتفرسوا

سلام حقوم آخد الدوا

عااااااااااوزة ابردنااااااااااااااااري

ازيكم جميعا........

عارفة...... ماحدش يرد رد يفرس

عارفة ان حالكم زي حالى

عارفة انكم مفروسين اكتر منى

عارفة انكم متغاظين

انا كنت ناوية اكتب فى نفس اليوم المشؤم بتاع الماتش

اللى هو يوم الاربع الحزين 18 نوفمبر

و لو ان شهرنوفمبر شهر جميل

فيه اتولدت مفروسة، و مامة مفروسة،و اخت مفروسة،.......بس ايييييييه

آآآآدي حال الدنيا يوم حلو و يوم مر

لأ..... مر ايه..... ده اسود و مهبب و مزفت بزفت درجة عالية من الوساخة

سوري فى اللفظ بس اعمل ايه؟؟!!!

بس قلت يا بت يا مفروسة بلاش الاندفاع بتاعك لأحسن تقولى كلمة كده ولا كده

استنى لما تسمعي خطاب يوم السبت

يمكن يا مقصوفة الرقبة يبرد نارك....زي مكالمةيوم الخميس .......اللى دلقت كوبايتين مية مثلجين

طفو الحريقة شوية

طبعا انتو فاهمين و عارفين خطاب مين...و مكالمة مين؟؟؟

ما انتو سيد العارفين الجو بدأ يبرد و مش وقت مارينا خااااااااااااااااالص

قوم جه يوم الخطاب..و كانت محسوبتكم مفروسة بتنضف تنضيفة العيد

و سابت الست تعك اللى تعكة علشان هيه مستنية كلام يبرد نارها

كلام يوطيلها الضغط

كلام يرفع راسها لفوووووووووووووووووق

كلام ما يخليهاش مفروسة....و لو حتى يوم واحد من عمرها

ماهو الصراحة لازم الكلام يتقال......حتى لو كان كلام بس ..ماهو اصل بالعقل يعنى

ما ينفعشي الابن يشتكي لأبوه.....و ابوه ما يعملشي حاجة

وقعدت و حياتكم امام التلفاز

هو يظهر و الله اعلم علشان مش اكون متجنية ولا مفترية

انا نمت فى نفس ذات الوقت اللى اتقال فيه الكلام اللى كنت عاوزةاسمعه

اصل مش معقول الخطبةكلها تصفيق و أعد يا ريس......

ده حتى قالهم أعد ديه تتقال لأم كلثوم....بس الغريبة انه أعد.....

مش معقول اكون سمعت بس اننا بينناو بين العرب مصالح مشتركة

و مايكونشي اتقال اننا حنقف وقفةرجالة......و نعمل حاجة للجزاير علشان قلةادبها و تجاوزاتها

و مش معقول اكون سمعت ان كرامةاي مواطن مصري من كرامة مصر

و مايكونشي اتقال انا حجبلكم حقكم يا مصريين ده انا ولادى كانو هناك

مش كده برضه ولا ايييييييييه؟؟؟

انا حشوف الخطاب ده حيتعاد فين و اسمعه من الاول

عاوزة ابرد ناااااااااااااارى

.............

النهاردة واحدة قريبة زوجي قالتلى انها تقريبا مفروسة اكتر منى

و متغااااااااااظة..كانت موجوده فى السودان مع قناة فضائية .......الحمد لله ان مجموعتها لم تتعرض لأيتها شيء.....

و اللى استغربتله انها ما كانش معاها حد زي اولاد الريس....غريبة مش كده؟؟؟؟

بتقولك و ده طبعا رأيها ...ووجههة نظرها...ان أغلب اللى راحو ممثلين....و كانو خايفين و موطيين روسهم لا يتعوروا ...و عمليات الشد و النفخ تبوظ......رأيها انها لو الطوبة اللى اترمت على مصري و أخدها و رماها على العيال الصويع الجزائريين

كانوا خافو و جريوا زي الفيران

و الله عندهاحق

وجههة نظر برضه

حالة من الصمت اللى يفرس

لمصلحة مين؟؟؟؟؟

لمصلحة مين اللى بيحصل ده؟؟؟

لمصلحة مين الاشاعات الفظيعة اللى بتتقال عن الجزائريين و اللى بيحصل لهم

و لا اللى بيحصل منهم؟؟؟؟

لمصلحة مين التصعيد الفظيع اللى بيحصل من كل من الطرفين؟؟؟؟

لمصلحة مين ان الجزائريين يوستفزوا بأقاويل غير صحيحة عن وجود قتلى منهم

لمصلحة مين ان لما يوستفزوا يروحوا يكسروا فى مكتب مصر الطيران هناك

و لا يعملوا شغب مع مصريين هناك فى بلدهم؟؟؟

لمصلحة مين

حد يفهمنى بس

انا مفروسة بزيادة

ديه حتة كورة لا راحة ولا جت

مونديال ايه ده اللى حيخلى اخ يقتل اخوه

ولا حيخلى العرب تولع فى بعضها

انا من رأي عدم تداول موضوع الاحداث ديه

سواء اكانت صحيحة او خطأ

و عدم المزايدة

اللى يشوف حاجة بعينه يتكلم

لكن انا النهاردة عندى يقين ان كل الصحافة بأنواعها

حتى الالكترونية

لا يمكن الوثوق فيما يقال فيها

فبالله عليكم

لا تتفاعلوا مع اي كلام ولا اي اشاعات

ولا تدوا ودانكم لاي حد يلعب فيها

مش عاوزين مصايب

خلونا احنا بكل الاحوال الاحسن

ما تفرسونيش

يارب ما تكسفنا

يارب ما تكسفنا
يارب

انا مفروسة بزيادة و مش ناقصة
يعنى اللى بيجري بقالة شهر ده يستفز الهادى

يوجا

ازيكم جميعا
اولا كل سنة و انتم طيبين بمناسبة عيد الحب المصري
و ثانيا كل سنة و انتم طيبين بمناسبة عيد الأضحى اللى قرب خلاص
ومش تاكلو لحمة كتير علشان مش تتعبوا
المهم انا بقالى فترة زي ما انتو عارفين انى مقلة جدااا سواء فى التعليقات او فى الزيارات او الكتابة
و ده لحالتى النفسية اللى من كتر الفرسة بقت ارض ارض
المهم بالصدفة الباحتة قابلت حد مش شوفته من يجي كام سنة كده
و مش حقول كام علشان الناصح فيكم ما يفرسنيش
المهم الكلام جاب بعضة و عرفت انه بيدرس يوجا
قلت يعنى التعليم اللى اهالينا علموهولنا و الصرف اللى صرفوه و تعب القلب و تيجي فى الآخر تبقى مدرس يوجا
المهم بدأ يشرحلى ايه هيه اليوجا ديه
قلتله ياعم يوجا ايه بس
دول ناس بتغمض عنيها و تنام و خلاص
اتاري بقا انها علم و علم مفيد كمان و بيعالج كثير من الامراض
و اصل اليوجا ديه الهند و بالأخص الهيمالايا
و الغرض الاساسي منها ان الانسان يتحكم فى عقلة
و لما فشلت محاولات التدريب على التحكم فى العقل
اتجهوا للتحكم فى الجسم و التحكم فى عضلات الجسم
و بعد طبعا تدريبات كتيرة الواحد بيقدر يتحكم فى جسمة و بالتالى التحكم فى العقل بيكون بالتبعية
و الغريب ان اليوجا قايمة اولا على تنظيم النفس
يعنى الواحد ياخد نفسة و يطلعه بطريقة معينة
يعنى ياخد النفس بالراحة و ياخده عميييييق و يبدأ فى انه يخرجه بالراااااااحة جداااااا
و ده طبعا مع تغميض العين مش علشان الواحد ينام لأ علشان الواحد مش يركز غير فى النفس اللى بيدخل
و يمر لغاية ما يملأ الرئتين
و يركز فى خروجه واحدة واحدة و يتخيل فى الدخول و الخروج مسار الهوا
تصدقوا انا لما عملت الموضوع ده حسيت بفرق و الله
بس طبعا لغوشت على الأخ الصديق و سبته و مشيت
و قررت بيني و بين نفسي انى اقرأ اكتر عن اليوجاا بس فى سري

طبعا بتسألوا ليه انا سبته و مشيت ؟
الصراحة؟؟؟
خوفت اتعالج من الفرسة و مش ابقى مفروسة تاني
و اوهمت نفسي ان فيه ناس حتوحشها مفروسة
فقلت لأ بلاها علاج
خليني مفروسة احسن

تحياتي ليكم جميعا و كل سنة و انتم كلكم طيبين و بخير و سعادة

هههههههههه عجبتنى المقالة ديه

لغناء وسط الدماء بقلم جلال عامر ٢٦/ ١٠/ ٢٠٠٩

«المؤمن القوى» أحب إلى الله سبحانه وتعالى من «المؤمن الضعيف»، لكن مع الأسف «المؤمن الغنى» أحب إلى الناس من «المؤمن المريض»، فالأول يحملّهم بالهدايا فى الإياب والثانى يحملون له الهدايا فى الذهاب والزبون دائماً على حق لكن الراكب ليس دائما على كرسى، وبين رحلتى الذهاب والإياب لم تقصر هيئة السكك الحديد فهى ترسل جدولاً أسبوعياً إلى التليفزيون بمواعيد وأماكن الحوادث ليذيعه مع نشرة الأحوال الجوية.. لكن هناك «تقصير» فى بنطلون بعض المذيعين.. وإعلامنا «رائد» ومعلق «نسر» ومن المنتظر بعد التطوير أن يترقى «مقدم» وينتقل إلى «مصلحة السجون»، والريادة الإعلامية هى أن تجتمع الفضائيات العربية والأجنبية فى التاسعة من مساء «السبت» عند قرية «العياط» لمتابعة حادث القطار، بينما القناة الأولى يغنى فيها «مدحت صالح» والقناة الثانية يستضيف فيها الأستاذ «محمود سعد» واحد ضايعة محفظته وطالع له «دمَّل».. تتساءل الـ BBC من موقع الحادث عن عدد المحشورين داخل العربات ويستمر «محمود سعد» فى سؤال الضيف (هيه المحفظة فيها كام؟!)، وتتساءل قناة «المحور» عن أسباب الحادث بينما محمود سعد يفاجأ الضيف (تفتكر مين اللى أخذ المحفظة؟!)، وتمر الدقائق ببطء ويرخى الليل سدوله وتعلو آهات الجرحى ويتناثر القتلى على جانبى الطريق، وتقترب كاميرا «الحياة» من العربات لنشاهد العمال يشقون الحديد فى محاولة لفتح الباب، بينما تقترب كاميرا الحكومة من رأس الضيف ويسأله محمود سعد (ما حاولتش تفتح الدمَّل ده قبل كده؟) فيرد الضيف (لا يا أفندم عمره ما انضرب فيه مفك ولسه بورق الفابريكة)، ويستمر «مدحت صالح» فى «الغناء» ويستمر التليفزيون فى «الغباء» ويستمر المصريون فى «الفناء» على أيدى حزب مصمم أن من يملك معرض سيارات يصلح وزيراً للنقل، ومن يملك محل خراطيم يصلح وزيراً للرى، ومن يربى فراخ يصلح وزيراً للتربية.. فما هو الفرق بين إرهاب يرقص على ضحايا «الأقصر» وحكومة تغنى على ضحايا «العياط»؟.. زمان ركب «النحاس باشا» ورفاقه قطاراً من محطة مصر متجهاً إلى مؤتمر جماهيرى فى طنطا فأمر رئيس الوزراء «إسماعيل صدقى» بفك الجرار عن القطار وظل النحاس ساعات طويلة ينتظر تحرك القطار دون جدوى، وعندما اكتشفوا اللعبة وعاتبوا صدقى باشا قال (أنا خايف عليكم من الحوادث) وهو اقتراح وجيه من الممكن أن نأخذ به و«نشيل» الجرار لمنع الحوادث و«نحتفظ» بالوزير.

المصري الل على حق يقول للغلط لأ

ليه الناس مش بتفهم؟؟؟؟

ليه الناس عندها لا مبالاة كده؟

هوه فيه ايه؟

يمكن حاجة بيرشوها على الاكل تخلى الناس كده؟

ولا يمكن بيحطوا خلاصة التناحة و الا مبالاة فى المية اللى بنشربها

و لا يمكن بيرشوا الهوا اللى احنا بنستنشقة

طبعا مستغربين انا ليه داخلة شمال كده و خصوصا اننا خارجين من ايام مفترجة

حقولكم علشان تتفرسوا و تقولولى احنا ايه اللى جرالنا

طبعا كلكم شايفين على قنوات التلفزيون الارضية و الفضائية

كم الاعلانات اللى بتوعي الناس بالنسة لأنفلونزا الخنازير

و كلكم طبعا شايفين انهم حتى المدارس أجلوها خوفا من ان الأاطفال مش حيكون عندهم الوعي الكافي للمحافظة على النظافة و ياخدوا حذرهم

بدون وجود اهاليهم اللى المفروض يكونو اكثر حرصا و خوفا من ان اولادهم بتصابوا ولا حتى همة يتصابوا و يعدوا اولادهم و عيليتهم

و التوعية زي ما انتو عارفين من البرد فى العموم لان ممكن يكون انفلونزا الخنازير بس احنا مش نعرف

يعنى اللى عنده برد فى المطلق يلزم بيته و ينعزل فى اوضة لحد ما يخف خوفا من انه يعدى اي حد

تكون مناعته ضعيفة يروح فيها

و على فكرة حتى البرد العادي لو اصاب حد مناعته خفيفة بيكون خطر عليه

برضه حتقولو هاتي من الآخر و قولى ايه اللى فرسك كده

اقولكم

بقا انا امبارح كنت فى الهايبر و بعيد عنكم الاقيلكم كم الناس اللى عندها برد و بتنف و مناخيرها بتسح و عيونها بتدمع بالكوم

كأني دخلت مستشفى

و النصيبة لا لابسين كمامة ولا حاجة

و تلاقى الست من دول ماشية فى افاك و توفاجأ انها بتنف فى ودنك او بتكح فى ودنك حاجة تقرف

ولا تلاقى الست ماشية و معاها عيلتها و تقف عند الفاكهة ولا الخيار و الطماطم

تنف و تحط الكلينكس فى الشنطة(نضيفة و الله) و بعدين تلاقيها مسكت الخيار كله تنقى منه واحدة

يالهوييييييييييييي ايه النيلة اللى احنا فيها ديه؟

الصراحة انا من فرستى كنت ببرطم بصوت عالى على الناس ديه

و توقعت ان حد فيهم حيزقلنى بطوبة

بس تصدقوا بلله ولا حسوا اصلا ان الكلام عليهم

ولا حسوا انهم بيعملوا حاجة غلط

ولا حتى حسوا انهم بيئذوا اللى حواليهم

طبعا انا اتفرست و اتنرفزت و مشيت

وقلت انا مش حمشي من غير الكمامة أأمنلى

برضه انا ليه بكتبلكم و بصوت كده؟

اهئ اهئ اصلى انا حاسة ان زوري بيوجعنى

اااااااااااااااااااااه

ياريتنى كنت اخدت تليفونات الناس اللى كانت فى الهايبر

علشان لو جالى برد عادى ولا حتى بتاع الخنازير

كنت رفعت عليهم قضية تعويض

ادعولى ما يكنشي اي حاجة و يكون بس بسبب المية المثلجة اللى عمالة اشربها

و امانة عليكم لو لاقيتم حد عنده برد جرسوه و زعقوله و خليه يقعد فى بيتهم الى ان يتم شفاءة

المصري اللى على حق يقول للغلط لأ

زعلانة مش مفروسة

ازيكم جميعا

وحشتوني كلكم...معلش الفترة اللى فاتت كنت بواجهه صعوبة فى دخول المدونة مش عارفه ليه

و بالرغم من انى كانت نفسي مفتوحة و بزور مدونات و بقرأ اللى بيتكتب بس كنت لما احاول اسيب تعليق

كان عم جوجل مش بيقبل الساين بتاعي ولا الباس وورد

و مش عارفه ليه الصراحة

زيه زي كذا حاجة كانت بتحصلى اليومين اللى فاتو و مش عارفه ليه

انا جايالكم النهارده زعلانة و مش مفروسة

زعلانه و اكاد اكون ببكي على حال الناس و اللى بيحصل منهم

مش ححكيلكم تفاصيل علشان مش اضايقكم انتو كمان

بس كل اللى اقدر اقوله ان الناس بتصطاد فى المية العكرة بتتصيد لاي مخلوق اي حاجة علشان

تظهر هيه فى الصورة و تبان انها شخصية سوية و هيه مش كده

زعلانه ان الناس مابقتش تفرق بين الكلام الجد و التهريج

بياخدو الجد على انه تهريج و يستهانو بيه

و بياخدو التهريج على انه جد و يعملو منه مشكلة

و تلاقى نفسك بعدما كنت داخل مبتسم و مبسوط و بتهرج

خرجت و انت معمولك مشكلة من ولا حاجة و بتبقى مزهول و مستغرب

هوه حصل ايه؟

بس هوه صحيح حصل ايه يا جماعة؟

هيه الناس بقت ليه كده؟

ليه ما بقيناش نستحمل حتى التهريج من بعض؟

ليه ما بقيناش نتوسم حسن النية فى اي حد

ليه بقينا نخلق مشاكل من الهوا؟

ليه بقى خلقنا ضيق

مش طايقين الناس اللى حوالينا

بيصعب علينا نشوف حد مبسوط لازم نقلبها نكد و نخلق معاه مشكلة علشان يضايق

ليه بنحور الكلام لو اتقال بتهريج نخليه ياخد شكل تاني يزعل الناس مننا

ليه؟

انابعانى من الموضوع ده بقالى كام يوم

مش حقولكم ان اسلوب تهريجي خارج مثلا الناس تزعل منه

ولا حقولكم تهريجي باللطش يالأيدي تخلى الناس تزعل منى

لأ خالص

بس اكتشفت ان الناس لما بتلاقيك بتهرج بتقول فى عقل بالها ديه واحده ما عندهاش مشاكل مرتاحة فى حياتها

لأ لازم ننكد عليها بقا

زمان كانوا بيتهمونى انى جد وكانو يتهموني بان اللى يقابلنى اول مرة يقول عليا غلسة و مش لذيذة

بس لما يقابلنى تاني و تالت و يعرف طبيعة شخصيتي يلاقيني مختلفة

و قعدت مع نفسي و قررت انى ما اتعبشي اللى قدامي فى انه يعرف طبيعتى من تاني او تالت مقابلة و احاول ان اكون بطبيعتى من اول لقاء

و غيرت من اسلوب حياتي و ريحت الناس و استريحت شوية مش كتير لان فيه ناس مش ينفع تكون على طبيعتك معاهم من اولها كده لازم تبقى جد شوية

بس علشان مش اتعب الناس قلت انا اتعب شوية و خلاص

ومرت الايام و السنين

و اتثبتلى مؤخرا انى ماكانش ينفع ان اتغير خالص

و ان اسلوبي الاولاني كان هوه الاصلح و الصح

و كان مجنبنى كثير من المشاكل اللى مستغربةلها مؤخرا

على الاقل كان موفر عليا انى ابرر باني بهرج

مش معقول ان الواحد يفضل محاسب مع كل الناس على كلامه لانك لو بطبيعتك و قلت كلمه بهزار حتلاقى اللى ياخدها بجد و يعملك مشكلة

فعلشان كده انا حربط لساني عن الكلام اصلا مع اي حد و مع كل حد

حكون غلسة و جد

اللى يعرفوني مش تزعلو منى لاني ما بعرفشي اكون بشخصيتين

يا كده يا كده معرفشي اكون الاتنين

و انتوا كمان خدو بالكم بلاش تكونوا على طبيعتكم تماما

لان اكيد حتلاقى خد ناصبلك فخ

خدوا بالكم و حرصوا علشان مش تزعلوا زيي

سلام

شاركوني فرستى

ازيكم جميعا ، كلكم على بعضكم واحد واحد و واحده واحده

انا وصلنى الايميل ده النهارده

على قد ما هو فيه كلام جميل على قد ما اتفرست من اللى بعته و طبعا مش اعرف مين الشخص الاولاني اللى بعته اصلا ولا اللى كتيه

الاول حوريكم الميل

@@@@@@@@@@@@@@@

أجمل أيميل ستقرؤه بحياتك

بسم الله الرحمن الرحيم

والحمد لله رب العالمين

والصلاة والسلام على اشرف المرسلين محمد صلى الله عليه وسلم وال بيته و أصحابه أجمعين

يا رب، لك الحمد كما ينبغي لجلال وجهك ولعظيم سلطانك

سبحان الله وبحمده، عدد خلقه، ورضى نفسه ، وزنة عرشه ، ومداد كلماته ..

اقسم بالله العظيم اني سأقرا هذا الايميل وسأرسله لمعارفي

أنت حلفت ولازم تقرأه

هو مش طويل...

المهم ...

قول معاي

سبحان الله

سبحان الله

سبحان الله

سبحان الله

سبحان الله

سبحان الله

سبحان الله

سبحان الله

سبحان الله

سبحان الله

خسرت حاجه ؟؟؟؟

والآن مره ثانيه قول

استغفر الله العظيم

استغفر الله العظيم

استغفر الله العظيم

استغفر الله العظيم

استغفر الله العظيم

استغفر الله العظيم

استغفر الله العظيم

استغفر الله العظيم

استغفر الله العظيم

استغفر الله العظيم

أبشر أخي الطيب...

فإن الله يفرح بتوبة عبده...........

اذا دعنا معا نتوب اليه قبل فوات الاوان .....

شكرا لك ..............ولقرائتك لهذه الرساله ,...

ولا تنسى انك حلفت ..

انك سترسلها لمعارفك...........

ولا تنسوني بالدعاء

لا اله الا الله محمد رسول الله

قلها باخلاص

ربما تنجح في الحصول على شفاعة الرسول لك

اذا كان نشرها سيرهقك فلا تنشرها

فلن تستحق اخذ ثوابها لان ثوابها عظيم

الله لا إلَه إلا هُو الحَيُّ القَيّومُ يعز من يشاء ويذل من يشاء وهو على

كل شيئ قدير

تخيل أنك عندما قرأتها حصلت على 580 حسنة وحصلت أنا كذلك على 580حسنة

أليس من السهل الحصول على هذا الأجر العظيم!

اعمل للرسالة Forwardبس وأنت تحصل على الثواب الكبير بأمر الله

@@@@@@@@@@@@

الايميل فى حد ذاته مش مضايقني بل بالعكس

يوشكر الراسل على انه بيذكرنا بالإستغفار

و ثوابه و فضل ذكر الله فى العموم

لكن اللى يفرس انه خلاك و انت بتقرا بحسن نية ان تقسم بالله انك حترسله

و كأنه فى عقل باله

بيضحك و يقولك هأو يا فالح وضحكت عليك و خليتك تقسم انك حتقراه و حتنشره

و الحاجة التانية اللى فرستنى بقا اكتر

انه بيقولك يعنى لو اتغظت منى و مش حتبعته

فلن تستحق أخذ ثوابها

هو انت مين ان شاء الله اللى قالك حاخد ثواب ولا لأ

انت مالك

ديه حاجه بين العبد و ربه

و بعدين ياللى باعت الرسالةانت اكيد من اللى بيقولوا قاطعوا و اضربوا و خلافه

انت عارف ان كل ضربة حرف على الكمبيوتر و ارساله بتعود بالملاين على الشركات الأجنبية؟

و بعدين تذكيرك لينا بالمدوامة على الاستغفار و ذكر الله شيء جميل

بس ليه لازم كل كلام جميل يتخلله بعض من السلوكيات الدنياوية

اللى تفرس

لأ

و بعد الجمله انك لن تستحق ثوابها

اعقبها ان الله يذل من يشاء و يعز من يشاء

يعنى عاوز يقول ان ربنا حيذلك و قادر عليك لو مش نشرتها بيخوفنا علشان نقوم بسرعة ناشرين الرسالة

انا بتفرس يا جماعة بجد من الاسلوب ده

لأ و بيقولك ادعولى

طيب يا سيدي حدعيلك

ربنا يهديك و يصلح حالك و ينور بصيرتك و يلهمك حسن التفكير قبل الكلام و الكتابة

على العموم انا مفروسة صحيح بس اذكى منك

كتبت رسالتك على البلوج و كبستك و فرستك

سلام

ملحوظة

الكلام ده على فكره دليل على ان الناس بتردد الكلام بدون تفكير زي البغبغنات

مادام الكلام فيه آيات من القرآن يبقى خلاص

ناسيين ان فيه بيننا ناس بتزج بكلام الله فى جمل لو فكرت فى الجمله شوية تلاقى تركيبها فيه حاجه غلط

ياعالم فكروا قبل ما تطلعوا الكلمه

احسبوها و شوفوها رايحه فين

زمان كانو بيقولو عدوا لغاية 10 قبل ما تتكلموا

و انا عرفت دلوقتي ليه

علشان ندى نفسنا الفرصه فى التفكير فى اللى بنقوله

سلام